פתיחת התפריט הראשי

א א א אִ֛ישׁ הָיָ֥ה בְאֶֽרֶץ־ע֖וּץ אִיּ֣וֹב שְׁמ֑וֹ וְהָיָ֣ה ׀ הָאִ֣ישׁ הַה֗וּא תָּ֧ם וְיָשָׁ֛ר וִירֵ֥א אֱלֹהִ֖ים וְסָ֥ר מֵרָֽע׃ ב וַיִּוָּ֥לְדוּ ל֛וֹ שִׁבְעָ֥ה בָנִ֖ים וְשָׁל֥וֹשׁ בָּנֽוֹת׃ ג וַיְהִ֣י מִ֠קְנֵ֠הוּ שִֽׁבְעַ֨ת אַלְפֵי־צֹ֜אן וּשְׁלֹ֧שֶׁת אַלְפֵ֣י גְמַלִּ֗ים וַחֲמֵ֨שׁ מֵא֤וֹת צֶֽמֶד־בָּקָר֙ וַחֲמֵ֣שׁ מֵא֣וֹת אֲתוֹנ֔וֹת וַעֲבֻדָּ֖ה רַבָּ֣ה מְאֹ֑ד וַֽיְהִי֙ הָאִ֣ישׁ הַה֔וּא גָּד֖וֹל מִכׇּל־בְּנֵי־קֶֽדֶם׃ ד וְהָלְכ֤וּ בָנָיו֙ וְעָשׂ֣וּ מִשְׁתֶּ֔ה בֵּ֖ית אִ֣ישׁ יוֹמ֑וֹ וְשָׁלְח֗וּ וְקָֽרְאוּ֙ לִשְׁלֹ֣שֶׁת אַחְיֹתֵיהֶ֔ם לֶאֱכֹ֥ל וְלִשְׁתּ֖וֹת עִמָּהֶֽם׃ ה וַיְהִ֡י כִּ֣י הִקִּ֩יפוּ֩ יְמֵ֨י הַמִּשְׁתֶּ֜ה וַיִּשְׁלַ֧ח אִיּ֣וֹב וַֽיְקַדְּשֵׁ֗ם וְהִשְׁכִּ֣ים בַּבֹּ֘קֶר֮ וְהֶעֱלָ֣ה עֹלוֹת֮ מִסְפַּ֣ר כֻּלָּם֒ כִּ֚י אָמַ֣ר אִיּ֔וֹב אוּלַי֙ חָטְא֣וּ בָנַ֔י וּבֵרְכ֥וּ אֱלֹהִ֖ים בִּלְבָבָ֑ם כָּ֛כָה יַעֲשֶׂ֥ה אִיּ֖וֹב כׇּל־הַיָּמִֽים׃

ו וַיְהִ֣י הַיּ֔וֹם וַיָּבֹ֙אוּ֙ בְּנֵ֣י הָאֱלֹהִ֔ים לְהִתְיַצֵּ֖ב עַל־יְהֹוָ֑ה וַיָּב֥וֹא גַֽם־הַשָּׂטָ֖ן בְּתוֹכָֽם׃ ז וַיֹּ֧אמֶר יְהֹוָ֛ה אֶל־הַשָּׂטָ֖ן מֵאַ֣יִן תָּבֹ֑א וַיַּ֨עַן הַשָּׂטָ֤ן אֶת־יְהֹוָה֙ וַיֹּאמַ֔ר מִשּׁ֣וּט בָּאָ֔רֶץ וּמֵֽהִתְהַלֵּ֖ךְ בָּֽהּ׃ ח וַיֹּ֤אמֶר יְהֹוָה֙ אֶל־הַשָּׂטָ֔ן הֲשַׂ֥מְתָּ לִבְּךָ֖ עַל־עַבְדִּ֣י אִיּ֑וֹב כִּ֣י אֵ֤ין כָּמֹ֙הוּ֙ בָּאָ֔רֶץ אִ֣ישׁ תָּ֧ם וְיָשָׁ֛ר יְרֵ֥א אֱלֹהִ֖ים וְסָ֥ר מֵרָֽע׃ ט וַיַּ֧עַן הַשָּׂטָ֛ן אֶת־יְהֹוָ֖ה וַיֹּאמַ֑ר הַֽחִנָּ֔ם יָרֵ֥א אִיּ֖וֹב אֱלֹהִֽים׃ י הֲלֹֽא־אַ֠תָּ֠ה את שַׂ֣כְתָּ בַעֲד֧וֹ וּבְעַד־בֵּית֛וֹ וּבְעַ֥ד כׇּל־אֲשֶׁר־ל֖וֹ מִסָּבִ֑יב מַעֲשֵׂ֤ה יָדָיו֙ בֵּרַ֔כְתָּ וּמִקְנֵ֖הוּ פָּרַ֥ץ בָּאָֽרֶץ׃ יא וְאוּלָם֙ שְֽׁלַֽח־נָ֣א יָֽדְךָ֔ וְגַ֖ע בְּכׇל־אֲשֶׁר־ל֑וֹ אִם־לֹ֥א עַל־פָּנֶ֖יךָ יְבָרְכֶֽךָּ׃ יב וַיֹּ֨אמֶר יְהֹוָ֜ה אֶל־הַשָּׂטָ֗ן הִנֵּ֤ה כׇל־אֲשֶׁר־לוֹ֙ בְּיָדֶ֔ךָ רַ֣ק אֵלָ֔יו אַל־תִּשְׁלַ֖ח יָדֶ֑ךָ וַיֵּצֵא֙ הַשָּׂטָ֔ן מֵעִ֖ם פְּנֵ֥י יְהֹוָֽה׃ יג וַיְהִ֖י הַיּ֑וֹם וּבָנָ֨יו וּבְנֹתָ֤יו אֹֽכְלִים֙ וְשֹׁתִ֣ים יַ֔יִן בְּבֵ֖ית אֲחִיהֶ֥ם הַבְּכֽוֹר׃ יד וּמַלְאָ֛ךְ בָּ֥א אֶל־אִיּ֖וֹב וַיֹּאמַ֑ר הַבָּקָר֙ הָי֣וּ חֹֽרְשׁ֔וֹת וְהָאֲתֹנ֖וֹת רֹע֥וֹת עַל־יְדֵיהֶֽם׃ טו וַתִּפֹּ֤ל שְׁבָא֙ וַתִּקָּחֵ֔ם וְאֶת־הַנְּעָרִ֖ים הִכּ֣וּ לְפִי־חָ֑רֶב וָאִמָּ֨לְטָ֧ה רַק־אֲנִ֛י לְבַדִּ֖י לְהַגִּ֥יד לָֽךְ׃ טז ע֣וֹד ׀ זֶ֣ה מְדַבֵּ֗ר וְזֶה֮ בָּ֣א וַיֹּאמַר֒ אֵ֣שׁ אֱלֹהִ֗ים נָֽפְלָה֙ מִן־הַשָּׁמַ֔יִם וַתִּבְעַ֥ר בַּצֹּ֛אן וּבַנְּעָרִ֖ים וַתֹּֽאכְלֵ֑ם וָאִמָּ֨לְטָ֧ה רַק־אֲנִ֛י לְבַדִּ֖י לְהַגִּ֥יד לָֽךְ׃ יז ע֣וֹד ׀ זֶ֣ה מְדַבֵּ֗ר וְזֶה֮ בָּ֣א וַיֹּאמַר֒ כַּשְׂדִּ֞ים שָׂ֣מוּ ׀ שְׁלֹשָׁ֣ה רָאשִׁ֗ים וַֽיִּפְשְׁט֤וּ עַל־הַגְּמַלִּים֙ וַיִּקָּח֔וּם וְאֶת־הַנְּעָרִ֖ים הִכּ֣וּ לְפִי־חָ֑רֶב וָאִמָּ֨לְטָ֧ה רַק־אֲנִ֛י לְבַדִּ֖י לְהַגִּ֥יד לָֽךְ׃ יח עַ֚ד זֶ֣ה מְדַבֵּ֔ר וְזֶ֖ה בָּ֣א וַיֹּאמַ֑ר בָּנֶ֨יךָ וּבְנוֹתֶ֤יךָ אֹֽכְלִים֙ וְשֹׁתִ֣ים יַ֔יִן בְּבֵ֖ית אֲחִיהֶ֥ם הַבְּכֽוֹר׃ יט וְהִנֵּה֩ ר֨וּחַ גְּדוֹלָ֜ה בָּ֣אָה ׀ מֵעֵ֣בֶר הַמִּדְבָּ֗ר וַיִּגַּע֙ בְּאַרְבַּע֙ פִּנּ֣וֹת הַבַּ֔יִת וַיִּפֹּ֥ל עַל־הַנְּעָרִ֖ים וַיָּמ֑וּתוּ וָאִמָּ֨לְטָ֧ה רַק־אֲנִ֛י לְבַדִּ֖י לְהַגִּ֥יד לָֽךְ׃ כ וַיָּ֤קׇם אִיּוֹב֙ וַיִּקְרַ֣ע אֶת־מְעִל֔וֹ וַיָּ֖גׇז אֶת־רֹאשׁ֑וֹ וַיִּפֹּ֥ל אַ֖רְצָה וַיִּשְׁתָּֽחוּ׃ כא וַיֹּ֩אמֶר֩ עָרֹ֨ם יָצָ֜תִי מִבֶּ֣טֶן אִמִּ֗י וְעָרֹם֙ אָשׁ֣וּב שָׁ֔מָּה יְהֹוָ֣ה נָתַ֔ן וַֽיהֹוָ֖ה לָקָ֑ח יְהִ֛י שֵׁ֥ם יְהֹוָ֖ה מְבֹרָֽךְ׃ כב בְּכׇל־זֹ֖את לֹא־חָטָ֣א אִיּ֑וֹב וְלֹא־נָתַ֥ן תִּפְלָ֖ה לֵאלֹהִֽים׃

ב א וַיְהִ֣י הַיּ֔וֹם וַיָּבֹ֙אוּ֙ בְּנֵ֣י הָאֱלֹהִ֔ים לְהִתְיַצֵּ֖ב עַל־יְהֹוָ֑ה וַיָּב֤וֹא גַֽם־הַשָּׂטָן֙ בְּתֹכָ֔ם לְהִתְיַצֵּ֖ב עַל־יְהֹוָֽה׃ ב וַיֹּ֤אמֶר יְהֹוָה֙ אֶל־הַשָּׂטָ֔ן אֵ֥י מִזֶּ֖ה תָּבֹ֑א וַיַּ֨עַן הַשָּׂטָ֤ן אֶת־יְהֹוָה֙ וַיֹּאמַ֔ר מִשֻּׁ֣ט בָּאָ֔רֶץ וּמֵֽהִתְהַלֵּ֖ךְ בָּֽהּ׃ ג וַיֹּ֨אמֶר יְהֹוָ֜ה אֶל־הַשָּׂטָ֗ן הֲשַׂ֣מְתָּ לִבְּךָ֮ אֶל־עַבְדִּ֣י אִיּוֹב֒ כִּי֩ אֵ֨ין כָּמֹ֜הוּ בָּאָ֗רֶץ אִ֣ישׁ תָּ֧ם וְיָשָׁ֛ר יְרֵ֥א אֱלֹהִ֖ים וְסָ֣ר מֵרָ֑ע וְעֹדֶ֙נּוּ֙ מַחֲזִ֣יק בְּתֻמָּת֔וֹ וַתְּסִיתֵ֥נִי ב֖וֹ לְבַלְּע֥וֹ חִנָּֽם׃ ד וַיַּ֧עַן הַשָּׂטָ֛ן אֶת־יְהֹוָ֖ה וַיֹּאמַ֑ר ע֣וֹר בְּעַד־ע֗וֹר וְכֹל֙ אֲשֶׁ֣ר לָאִ֔ישׁ יִתֵּ֖ן בְּעַ֥ד נַפְשֽׁוֹ׃ ה אוּלָם֙ שְֽׁלַֽח־נָ֣א יָֽדְךָ֔ וְגַ֥ע אֶל־עַצְמ֖וֹ וְאֶל־בְּשָׂר֑וֹ אִם־לֹ֥א אֶל־פָּנֶ֖יךָ יְבָרְכֶֽךָּ׃ ו וַיֹּ֧אמֶר יְהֹוָ֛ה אֶל־הַשָּׂטָ֖ן הִנּ֣וֹ בְיָדֶ֑ךָ אַ֖ךְ אֶת־נַפְשׁ֥וֹ שְׁמֹֽר׃ ז וַיֵּצֵא֙ הַשָּׂטָ֔ן מֵאֵ֖ת פְּנֵ֣י יְהֹוָ֑ה וַיַּ֤ךְ אֶת־אִיּוֹב֙ בִּשְׁחִ֣ין רָ֔ע מִכַּ֥ף רַגְל֖וֹ עד וְעַ֥ד קׇדְקֳדֽוֹ׃ ח וַיִּֽקַּֽח־ל֣וֹ חֶ֔רֶשׂ לְהִתְגָּרֵ֖ד בּ֑וֹ וְה֖וּא יֹשֵׁ֥ב בְּתוֹךְ־הָאֵֽפֶר׃ ט וַתֹּ֤אמֶר לוֹ֙ אִשְׁתּ֔וֹ עֹדְךָ֖ מַחֲזִ֣יק בְּתֻמָּתֶ֑ךָ בָּרֵ֥ךְ אֱלֹהִ֖ים וָמֻֽת׃ י וַיֹּ֣אמֶר אֵלֶ֗יהָ כְּדַבֵּ֞ר אַחַ֤ת הַנְּבָלוֹת֙ תְּדַבֵּ֔רִי גַּ֣ם אֶת־הַטּ֗וֹב נְקַבֵּל֙ מֵאֵ֣ת הָאֱלֹהִ֔ים וְאֶת־הָרָ֖ע לֹ֣א נְקַבֵּ֑ל בְּכׇל־זֹ֛את לֹא־חָטָ֥א אִיּ֖וֹב בִּשְׂפָתָֽיו׃

יא וַֽיִּשְׁמְע֞וּ שְׁלֹ֣שֶׁת ׀ רֵעֵ֣י אִיּ֗וֹב אֵ֣ת כׇּל־הָרָעָ֣ה הַזֹּאת֮ הַבָּ֣אָה עָלָיו֒ וַיָּבֹ֙אוּ֙ אִ֣ישׁ מִמְּקֹמ֔וֹ אֱלִיפַ֤ז הַתֵּֽימָנִי֙ וּבִלְדַּ֣ד הַשּׁוּחִ֔י וְצוֹפַ֖ר הַנַּֽעֲמָתִ֑י וַיִּוָּעֲד֣וּ יַחְדָּ֔ו לָב֥וֹא לָנֽוּד־ל֖וֹ וּֽלְנַחֲמֽוֹ׃ יב וַיִּשְׂא֨וּ אֶת־עֵינֵיהֶ֤ם מֵֽרָחוֹק֙ וְלֹ֣א הִכִּירֻ֔הוּ וַיִּשְׂא֥וּ קוֹלָ֖ם וַיִּבְכּ֑וּ וַֽיִּקְרְעוּ֙ אִ֣ישׁ מְעִל֔וֹ וַיִּזְרְק֥וּ עָפָ֛ר עַל־רָאשֵׁיהֶ֖ם הַשָּׁמָֽיְמָה׃ יג וַיֵּֽשְׁב֤וּ אִתּוֹ֙ לָאָ֔רֶץ שִׁבְעַ֥ת יָמִ֖ים וְשִׁבְעַ֣ת לֵיל֑וֹת וְאֵין־דֹּבֵ֤ר אֵלָיו֙ דָּבָ֔ר כִּ֣י רָא֔וּ כִּי־גָדַ֥ל הַכְּאֵ֖ב מְאֹֽד׃ ג א אַֽחֲרֵי־כֵ֗ן פָּתַ֤ח אִיּוֹב֙ אֶת־פִּ֔יהוּ וַיְקַלֵּ֖ל אֶת־יוֹמֽוֹ׃

ב    וַיַּ֥עַן אִיּ֗וֹב וַיֹּאמַֽר׃
ג יֹ֣אבַד י֭וֹם אִוָּ֣לֶד בּ֑וֹ
  וְהַלַּ֥יְלָה אָ֝מַ֗ר הֹ֣רָה גָֽבֶר׃
ד הַיּ֥וֹם הַה֗וּא יְֽהִ֫י חֹ֥שֶׁךְ
  אַֽל־יִדְרְשֵׁ֣הוּ אֱל֣וֹהַּ מִמַּ֑עַל
    וְאַל־תּוֹפַ֖ע עָלָ֣יו נְהָרָֽה׃
ה יִגְאָלֻ֡הוּ חֹ֣שֶׁךְ וְ֭צַלְמָוֶת
  תִּשְׁכׇּן־עָלָ֣יו עֲנָנָ֑ה
    יְ֝בַעֲתֻ֗הוּ כִּֽמְרִ֥ירֵי יֽוֹם׃
ו הַלַּ֥יְלָה הַהוּא֮ יִקָּחֵ֢ה֫וּ אֹ֥פֶל
  אַל־יִ֭חַדְּ בִּימֵ֣י שָׁנָ֑ה
    בְּמִסְפַּ֥ר יְ֝רָחִ֗ים אַל־יָבֹֽא׃
ז הִנֵּ֤ה הַלַּ֣יְלָה הַ֭הוּא יְהִ֣י גַלְמ֑וּד
  אַל־תָּב֖וֹא רְנָנָ֣ה בֽוֹ׃
ח יִקְּבֻ֥הוּ אֹֽרְרֵי־י֑וֹם
  הָ֝עֲתִידִ֗ים עֹרֵ֥ר לִוְיָתָֽן׃
ט יֶחְשְׁכוּ֮ כּוֹכְבֵ֢י נִ֫שְׁפּ֥וֹ
  יְקַו־לְא֥וֹר וָאַ֑יִן
    וְאַל־יִ֝רְאֶ֗ה בְּעַפְעַפֵּי־שָֽׁחַר׃
י כִּ֤י לֹ֣א סָ֭גַר דַּלְתֵ֣י בִטְנִ֑י
  וַיַּסְתֵּ֥ר עָ֝מָ֗ל מֵעֵינָֽי׃
יא לָ֤מָּה לֹּ֣א מֵרֶ֣חֶם אָמ֑וּת
  מִבֶּ֖טֶן יָצָ֣אתִי וְאֶגְוָֽע׃
יב מַ֭דּוּעַ קִדְּמ֣וּנִי בִרְכָּ֑יִם
  וּמַה־שָּׁ֝דַ֗יִם כִּ֣י אִינָֽק׃
יג כִּֽי־עַ֭תָּה שָׁכַ֣בְתִּי וְאֶשְׁק֑וֹט
  יָ֝שַׁ֗נְתִּי אָ֤ז ׀ יָנ֬וּחַֽ לִֽי׃
יד עִם־מְ֭לָכִים וְיֹ֣עֲצֵי אָ֑רֶץ
  הַבֹּנִ֖ים חֳרָב֣וֹת לָֽמוֹ׃
טו א֣וֹ עִם־שָׂ֭רִים זָהָ֣ב לָהֶ֑ם
  הַֽמְמַלְאִ֖ים בָּתֵּיהֶ֣ם כָּֽסֶף׃
טז א֤וֹ כְנֵ֣פֶל טָ֭מוּן לֹ֣א אֶהְיֶ֑ה
  כְּ֝עֹלְלִ֗ים לֹא־רָ֥אוּ אֽוֹר׃
יז שָׁ֣ם רְ֭שָׁעִים חָ֣דְלוּ רֹ֑גֶז
  וְשָׁ֥ם יָ֝נ֗וּחוּ יְגִ֣יעֵי כֹֽחַ׃
יח יַ֭חַד אֲסִירִ֣ים שַׁאֲנָ֑נוּ
  לֹ֥א שָׁ֝מְע֗וּ ק֣וֹל נֹגֵֽשׂ׃
יט קָטֹ֣ן וְ֭גָדוֹל שָׁ֣ם ה֑וּא
  וְ֝עֶ֗בֶד חׇפְשִׁ֥י מֵאֲדֹנָֽיו׃
כ לָ֤מָּה יִתֵּ֣ן לְעָמֵ֣ל א֑וֹר
  וְ֝חַיִּ֗ים לְמָ֣רֵי נָֽפֶשׁ׃
כא הַֽמְחַכִּ֣ים לַמָּ֣וֶת וְאֵינֶ֑נּוּ
  וַֽ֝יַּחְפְּרֻ֗הוּ מִמַּטְמוֹנִֽים׃
כב הַשְּׂמֵחִ֥ים אֱלֵי־גִ֑יל
  יָ֝שִׂ֗ישׂוּ כִּ֣י יִמְצְאוּ־קָֽבֶר׃
כג לְ֭גֶבֶר אֲשֶׁר־דַּרְכּ֣וֹ נִסְתָּ֑רָה
  וַיָּ֖סֶךְ אֱל֣וֹהַּ בַּעֲדֽוֹ׃
כד כִּֽי־לִפְנֵ֣י לַ֭חְמִי אַנְחָתִ֣י תָבֹ֑א
  וַֽיִּתְּכ֥וּ כַ֝מַּ֗יִם שַׁאֲגֹתָֽי׃
כה כִּ֤י פַ֣חַד פָּ֭חַדְתִּי וַיֶּאֱתָיֵ֑נִי
  וַאֲשֶׁ֥ר יָ֝גֹ֗רְתִּי יָ֣בֹא לִֽי׃
כו לֹ֤א שָׁלַ֨וְתִּי ׀ וְלֹ֖א שָׁקַ֥טְתִּי וְֽלֹא־נָ֗חְתִּי
  וַיָּ֥בֹא רֹֽגֶז׃

ד א    וַ֭יַּעַן אֱלִיפַ֥ז הַֽתֵּימָנִ֗י וַיֹּאמַֽר׃
ב הֲנִסָּ֬ה דָבָ֣ר אֵלֶ֣יךָ תִּלְאֶ֑ה
  וַעְצֹ֥ר בְּ֝מִלִּ֗ין מִ֣י יוּכָֽל׃
ג הִ֭נֵּה יִסַּ֣רְתָּ רַבִּ֑ים
  וְיָדַ֖יִם רָפ֣וֹת תְּחַזֵּֽק׃
ד כּ֭וֹשֵׁל יְקִימ֣וּן מִלֶּ֑יךָ
  וּבִרְכַּ֖יִם כֹּרְע֣וֹת תְּאַמֵּֽץ׃
ה כִּ֤י עַתָּ֨ה ׀ תָּב֣וֹא אֵלֶ֣יךָ וַתֵּ֑לֶא
  תִּגַּ֥ע עָ֝דֶ֗יךָ וַתִּבָּהֵֽל׃
ו הֲלֹ֣א יִ֭רְאָתְךָ כִּסְלָתֶ֑ךָ
  תִּ֝קְוָתְךָ֗ וְתֹ֣ם דְּרָכֶֽיךָ׃
ז זְכׇר־נָ֗א מִ֤י ה֣וּא נָקִ֣י אָבָ֑ד
  וְ֝אֵיפֹ֗ה יְשָׁרִ֥ים נִכְחָֽדוּ׃
ח כַּאֲשֶׁ֣ר רָ֭אִיתִי חֹ֣רְשֵׁי אָ֑וֶן
  וְזֹרְעֵ֖י עָמָ֣ל יִקְצְרֻֽהוּ׃
ט מִנִּשְׁמַ֣ת אֱל֣וֹהַּ יֹאבֵ֑דוּ
  וּמֵר֖וּחַ אַפּ֣וֹ יִכְלֽוּ׃
י שַׁאֲגַ֣ת אַ֭רְיֵה וְק֣וֹל שָׁ֑חַל
  וְשִׁנֵּ֖י כְפִירִ֣ים נִתָּֽעוּ׃
יא לַ֭יִשׁ אֹבֵ֣ד מִבְּלִי־טָ֑רֶף
  וּבְנֵ֥י לָ֝בִ֗יא יִתְפָּרָֽדוּ׃
יב וְ֭אֵלַי דָּבָ֣ר יְגֻנָּ֑ב
  וַתִּקַּ֥ח אׇ֝זְנִ֗י שֵׁ֣מֶץ מֶֽנְהֽוּ׃
יג בִּ֭שְׂעִפִּים מֵחֶזְיֹנ֣וֹת לָ֑יְלָה
  בִּנְפֹ֥ל תַּ֝רְדֵּמָ֗ה עַל־אֲנָשִֽׁים׃
יד פַּ֣חַד קְ֭רָאַנִי וּרְעָדָ֑ה
  וְרֹ֖ב עַצְמוֹתַ֣י הִפְחִֽיד׃
טו וְ֭רוּחַ עַל־פָּנַ֣י יַחֲלֹ֑ף
  תְּ֝סַמֵּ֗ר שַׂעֲרַ֥ת בְּשָׂרִֽי׃
טז יַעֲמֹ֤ד ׀ וְֽלֹא־אַכִּ֬יר מַרְאֵ֗הוּ
  תְּ֭מוּנָה לְנֶ֣גֶד עֵינָ֑י
    דְּמָמָ֖ה וָק֣וֹל אֶשְׁמָֽע׃
יז הַ֭אֱנוֹשׁ מֵאֱל֣וֹהַּ יִצְדָּ֑ק
  אִ֥ם מֵ֝עֹשֵׂ֗הוּ יִטְהַר־גָּֽבֶר׃
יח הֵ֣ן בַּ֭עֲבָדָיו לֹ֣א יַאֲמִ֑ין
  וּ֝בְמַלְאָכָ֗יו יָשִׂ֥ים תׇּהֳלָֽה׃
יט אַ֤ף ׀ שֹׁכְנֵ֬י בָֽתֵּי־חֹ֗מֶר
  אֲשֶׁר־בֶּעָפָ֥ר יְסוֹדָ֑ם
    יְ֝דַכְּא֗וּם לִפְנֵי־עָֽשׁ׃
כ מִבֹּ֣קֶר לָעֶ֣רֶב יֻכַּ֑תּוּ
  מִבְּלִ֥י מֵ֝שִׂ֗ים לָנֶ֥צַח יֹאבֵֽדוּ׃
כא הֲלֹא־נִסַּ֣ע יִתְרָ֣ם בָּ֑ם
  יָ֝מ֗וּתוּ וְלֹ֣א בְחׇכְמָֽה׃
ה א קְֽרָא־נָ֭א הֲיֵ֣שׁ עוֹנֶ֑ךָּ
  וְאֶל־מִ֖י מִקְּדֹשִׁ֣ים תִּפְנֶֽה׃
ב כִּֽי־לֶ֭אֱוִיל יַהֲרׇג־כָּ֑עַשׂ
  וּ֝פֹתֶ֗ה תָּמִ֥ית קִנְאָֽה׃
ג אֲֽנִי־רָ֭אִיתִי אֱוִ֣יל מַשְׁרִ֑ישׁ
  וָאֶקּ֖וֹב נָוֵ֣הוּ פִתְאֹֽם׃
ד יִרְחֲק֣וּ בָנָ֣יו מִיֶּ֑שַׁע
  וְיִֽדַּכְּא֥וּ בַ֝שַּׁ֗עַר וְאֵ֣ין מַצִּֽיל׃
ה אֲשֶׁ֤ר קְצִיר֨וֹ ׀ רָ֘עֵ֤ב יֹאכֵ֗ל
  וְאֶֽל־מִצִּנִּ֥ים יִקָּחֵ֑הוּ
    וְשָׁאַ֖ף צַמִּ֣ים חֵילָֽם׃
ו כִּ֤י ׀ לֹא־יֵצֵ֣א מֵעָפָ֣ר אָ֑וֶן
  וּ֝מֵאֲדָמָ֗ה לֹא־יִצְמַ֥ח עָמָֽל׃
ז כִּֽי־אָ֭דָם לְעָמָ֣ל יוּלָּ֑ד
  וּבְנֵי־רֶ֗֝שֶׁף יַגְבִּ֥יהוּ עֽוּף׃
ח אוּלָ֗ם אֲ֭נִי אֶדְרֹ֣שׁ אֶל־אֵ֑ל
  וְאֶל־אֱ֝לֹהִ֗ים אָשִׂ֥ים דִּבְרָתִֽי׃
ט עֹשֶׂ֣ה גְ֭דֹלוֹת וְאֵ֣ין חֵ֑קֶר
  נִ֝פְלָא֗וֹת עַד־אֵ֥ין מִסְפָּֽר׃
י הַנֹּתֵ֣ן מָ֭טָר עַל־פְּנֵי־אָ֑רֶץ
  וְשֹׁ֥לֵֽחַ מַ֗֝יִם עַל־פְּנֵ֥י חוּצֽוֹת׃
יא לָשׂ֣וּם שְׁפָלִ֣ים לְמָר֑וֹם
  וְ֝קֹדְרִ֗ים שָׂ֣גְבוּ יֶֽשַׁע׃
יב מֵ֭פֵר מַחְשְׁב֣וֹת עֲרוּמִ֑ים
  וְֽלֹא־תַעֲשֶׂ֥נָה יְ֝דֵיהֶ֗ם תֻּֽשִׁיָּֽה׃
יג לֹכֵ֣ד חֲכָמִ֣ים בְּעׇרְמָ֑ם
  וַעֲצַ֖ת נִפְתָּלִ֣ים נִמְהָֽרָה׃
יד יוֹמָ֥ם יְפַגְּשׁוּ־חֹ֑שֶׁךְ
  וְ֝כַלַּ֗יְלָה יְֽמַשְׁשׁ֥וּ בַֽצׇּהֳרָֽיִם׃
טו וַיֹּ֣שַׁע מֵ֭חֶרֶב מִפִּיהֶ֑ם
  וּמִיַּ֖ד חָזָ֣ק אֶבְיֽוֹן׃
טז וַתְּהִ֣י לַדַּ֣ל תִּקְוָ֑ה
  וְ֝עֹלָ֗תָה קָ֣פְצָה פִּֽיהָ׃
יז הִנֵּ֤ה אַשְׁרֵ֣י אֱ֭נוֹשׁ יוֹכִחֶ֣נּוּ אֱל֑וֹהַּ
  וּמוּסַ֥ר שַׁ֝דַּ֗י אַל־תִּמְאָֽס׃
יח כִּ֤י ה֣וּא יַכְאִ֣יב וְיֶחְבָּ֑שׁ
  יִ֝מְחַ֗ץ וְיָדָ֥ו תִּרְפֶּֽינָה׃
יט בְּשֵׁ֣שׁ צָ֭רוֹת יַצִּילֶ֑ךָּ
  וּבְשֶׁ֓בַע ׀ לֹֽא־יִגַּ֖ע בְּךָ֣ רָֽע׃
כ בְּֽ֭רָעָב פָּדְךָ֣ מִמָּ֑וֶת
  וּ֝בְמִלְחָמָ֗ה מִ֣ידֵי חָֽרֶב׃
כא בְּשׁ֣וֹט לָ֭שׁוֹן תֵּחָבֵ֑א
  וְֽלֹא־תִירָ֥א מִ֝שֹּׁ֗ד כִּ֣י יָבֽוֹא׃
כב לְשֹׁ֣ד וּלְכָפָ֣ן תִּשְׂחָ֑ק
  וּֽמֵחַיַּ֥ת הָ֝אָ֗רֶץ אַל־תִּירָֽא׃
כג כִּ֤י עִם־אַבְנֵ֣י הַשָּׂדֶ֣ה בְרִיתֶ֑ךָ
  וְחַיַּ֥ת הַ֝שָּׂדֶ֗ה הׇשְׁלְמָה־לָּֽךְ׃
כד וְֽ֭יָדַעְתָּ כִּֽי־שָׁל֣וֹם אׇהֳלֶ֑ךָ
  וּֽפָקַדְתָּ֥ נָ֝וְךָ֗ וְלֹ֣א תֶחֱטָֽא׃
כה וְֽ֭יָדַעְתָּ כִּֽי־רַ֣ב זַרְעֶ֑ךָ
  וְ֝צֶאֱצָאֶ֗יךָ כְּעֵ֣שֶׂב הָאָֽרֶץ׃
כו תָּב֣וֹא בְכֶ֣לַח אֱלֵי־קָ֑בֶר
  כַּעֲל֖וֹת גָּדִ֣ישׁ בְּעִתּֽוֹ׃
ב כז הִנֵּה־זֹ֭את חֲקַרְנ֥וּהָ כֶּֽן־הִ֑יא
  שְׁ֝מָעֶ֗נָּה וְאַתָּ֥ה דַֽע־לָֽךְ׃

ו א    וַיַּ֥עַן אִיּ֗וֹב וַיֹּאמַֽר׃
ב ל֗וּ שָׁק֣וֹל יִשָּׁקֵ֣ל כַּעְשִׂ֑י
  והיתי וְ֝הַוָּתִ֗י בְּֽמֹאזְנַ֥יִם יִשְׂאוּ־יָֽחַד׃
ג כִּֽי־עַתָּ֗ה מֵח֣וֹל יַמִּ֣ים יִכְבָּ֑ד
  עַל־כֵּ֗֝ן דְּבָרַ֥י לָֽעוּ׃
ד כִּ֤י חִצֵּ֪י שַׁדַּ֡י עִמָּדִ֗י
  אֲשֶׁ֣ר חֲ֭מָתָם שֹׁתָ֣ה רוּחִ֑י
    בִּעוּתֵ֖י אֱל֣וֹהַּ יַעַרְכֽוּנִי׃
ה הֲיִֽנְהַק־פֶּ֥רֶא עֲלֵי־דֶ֑שֶׁא
  אִ֥ם יִגְעֶה־שּׁ֝֗וֹר עַל־בְּלִילֽוֹ׃
ו הֲיֵאָכֵ֣ל תָּ֭פֵל מִבְּלִי־מֶ֑לַח
  אִם־יֶשׁ־טַ֗֝עַם בְּרִ֣יר חַלָּמֽוּת׃
ז מֵאֲנָ֣ה לִנְגּ֣וֹעַ נַפְשִׁ֑י
  הֵ֗֝מָּה כִּדְוֵ֥י לַחְמִֽי׃
ח מִֽי־יִ֭תֵּן תָּב֣וֹא שֶׁאֱלָתִ֑י
  וְ֝תִקְוָתִ֗י יִתֵּ֥ן אֱלֽוֹהַּ׃
ט וְיֹאֵ֣ל אֱ֭לוֹהַּ וִידַכְּאֵ֑נִי
  יַתֵּ֥ר יָ֝ד֗וֹ וִיבַצְּעֵֽנִי׃
י וּ֥תְהִי־ע֨וֹד ׀ נֶ֘חָ֤מָתִ֗י
  וַאֲסַלְּדָ֣ה בְ֭חִילָה לֹ֣א יַחְמ֑וֹל
    כִּי־לֹ֥א כִ֝חַ֗דְתִּי אִמְרֵ֥י קָדֽוֹשׁ׃
יא מַה־כֹּחִ֥י כִֽי־אֲיַחֵ֑ל
  וּמַה־קִּ֝צִּ֗י כִּֽי־אַאֲרִ֥יךְ נַפְשִֽׁי׃
יב אִם־כֹּ֣חַ אֲבָנִ֣ים כֹּחִ֑י
  אִֽם־בְּשָׂרִ֥י נָחֽוּשׁ׃
יג הַאִ֬ם אֵ֣ין עֶזְרָתִ֣י בִ֑י
  וְ֝תֻשִׁיָּ֗ה נִדְּחָ֥ה מִמֶּֽנִּי׃
יד לַמָּ֣ס מֵרֵעֵ֣הוּ חָ֑סֶד
  וְיִרְאַ֖ת שַׁדַּ֣י יַעֲזֽוֹב׃
טו אַ֭חַי בָּגְד֣וּ כְמוֹ־נָ֑חַל
  כַּאֲפִ֖יק נְחָלִ֣ים יַעֲבֹֽרוּ׃
טז הַקֹּדְרִ֥ים מִנִּי־קָ֑רַח
  עָ֝לֵ֗ימוֹ יִתְעַלֶּם־שָֽׁלֶג׃
יז בְּעֵ֣ת יְזֹרְב֣וּ נִצְמָ֑תוּ
  בְּ֝חֻמּ֗וֹ נִדְעֲכ֥וּ מִמְּקוֹמָֽם׃
יח יִ֭לָּ֣פְתוּ אׇרְח֣וֹת דַּרְכָּ֑ם
  יַעֲל֖וּ בַתֹּ֣הוּ וְיֹאבֵֽדוּ׃
יט הִ֭בִּיטוּ אׇרְח֣וֹת תֵּמָ֑א
  הֲלִיכֹ֥ת שְׁ֝בָ֗א קִוּוּ־לָֽמוֹ׃
כ בֹּ֥שׁוּ כִּֽי־בָטָ֑ח
  בָּ֥אוּ עָ֝דֶ֗יהָ וַיֶּחְפָּֽרוּ׃
כא כִּֽי־עַ֭תָּה הֱיִ֣יתֶם לֹ֑א
  תִּֽרְא֥וּ חֲ֝תַ֗ת וַתִּירָֽאוּ׃
כב הֲֽכִי־אָ֭מַרְתִּי הָ֣בוּ לִ֑י
  וּ֝מִכֹּחֲכֶ֗ם שִׁחֲד֥וּ בַעֲדִֽי׃
כג וּמַלְּט֥וּנִי מִיַּד־צָ֑ר
  וּמִיַּ֖ד עָרִיצִ֣ים תִּפְדּֽוּנִי׃
כד ה֭וֹרוּנִי וַאֲנִ֣י אַחֲרִ֑ישׁ
  וּמַה־שָּׁ֝גִ֗יתִי הָבִ֥ינוּ לִֽי׃
כה מַה־נִּמְרְצ֥וּ אִמְרֵי־יֹ֑שֶׁר
  וּמַה־יּוֹכִ֖יחַ הוֹכֵ֣חַ מִכֶּֽם׃
כו הַלְהוֹכַ֣ח מִלִּ֣ים תַּחְשֹׁ֑בוּ
  וּ֝לְר֗וּחַ אִמְרֵ֥י נֹאָֽשׁ׃
כז אַף־עַל־יָת֥וֹם תַּפִּ֑ילוּ
  וְ֝תִכְר֗וּ עַֽל־רֵיעֲכֶֽם׃
כח וְ֭עַתָּה הוֹאִ֣ילוּ פְנוּ־בִ֑י
  וְעַל־פְּ֝נֵיכֶ֗ם אִם־אֲכַזֵּֽב׃
כט שֽׁוּבוּ־נָ֭א אַל־תְּהִ֣י עַוְלָ֑ה
  ושבי וְשֻׁ֥בוּ ע֗֝וֹד צִדְקִי־בָֽהּ׃
ל הֲיֵשׁ־בִּלְשׁוֹנִ֥י עַוְלָ֑ה
  אִם־חִ֝כִּ֗י לֹא־יָבִ֥ין הַוּֽוֹת׃
ז א הֲלֹֽא־צָבָ֣א לֶֽאֱנ֣וֹשׁ על עֲלֵי־אָ֑רֶץ
  וְכִימֵ֖י שָׂכִ֣יר יָמָֽיו׃
ב כְּעֶ֥בֶד יִשְׁאַף־צֵ֑ל
  וּ֝כְשָׂכִ֗יר יְקַוֶּ֥ה פׇעֳלֽוֹ׃
ג כֵּ֤ן הׇנְחַ֣לְתִּי לִ֭י יַרְחֵי־שָׁ֑וְא
  וְלֵיל֥וֹת עָ֝מָ֗ל מִנּוּ־לִֽי׃
ד אִם־שָׁכַ֗בְתִּי וְאָמַ֗רְתִּי
  מָתַ֣י אָ֭קוּם וּמִדַּד־עָ֑רֶב
    וְשָׂבַ֖עְתִּי נְדֻדִ֣ים עֲדֵי־נָֽשֶׁף׃
ה לָ֘בַ֤שׁ בְּשָׂרִ֣י רִ֭מָּה וגיש וְג֣וּשׁ עָפָ֑ר
  עוֹרִ֥י רָ֝גַ֗ע וַיִּמָּאֵֽס׃
ו יָמַ֣י קַ֭לּוּ מִנִּי־אָ֑רֶג
  וַ֝יִּכְל֗וּ בְּאֶ֣פֶס תִּקְוָֽה׃
ז זְ֭כֹר כִּי־ר֣וּחַ חַיָּ֑י
  לֹֽא־תָשׁ֥וּב עֵ֝ינִ֗י לִרְא֥וֹת טֽוֹב׃
ח לֹא־תְ֭שׁוּרֵנִי עֵ֣ין רֹ֑אִי
  עֵינֶ֖יךָ בִּ֣י וְאֵינֶֽנִּי׃
ט כָּלָ֣ה עָ֭נָן וַיֵּלַ֑ךְ
  כֵּ֥ן יוֹרֵ֥ד שְׁ֝א֗וֹל לֹ֣א יַעֲלֶֽה׃
י לֹא־יָשׁ֣וּב ע֣וֹד לְבֵית֑וֹ
  וְלֹא־יַכִּירֶ֖נּוּ ע֣וֹד מְקֹמֽוֹ׃
יא גַּם־אֲנִי֮ לֹ֤א אֶחֱשָׂ֫ךְ פִּ֥י
  אֲֽ֭דַבְּרָה בְּצַ֣ר רוּחִ֑י
    אָ֝שִׂ֗יחָה בְּמַ֣ר נַפְשִֽׁי׃
יב הֲֽיָם־אָ֭נִי אִם־תַּנִּ֑ין
  כִּֽי־תָשִׂ֖ים עָלַ֣י מִשְׁמָֽר׃
יג כִּֽי־אָ֭מַרְתִּי תְּנַחֲמֵ֣נִי עַרְשִׂ֑י
  יִשָּׂ֥א בְ֝שִׂיחִ֗י מִשְׁכָּבִֽי׃
יד וְחִתַּתַּ֥נִי בַחֲלֹמ֑וֹת
  וּֽמֵחֶזְיֹנ֥וֹת תְּבַעֲתַֽנִּי׃
טו וַתִּבְחַ֣ר מַחֲנָ֣ק נַפְשִׁ֑י
  מָ֗֝וֶת מֵעַצְמוֹתָֽי׃
טז מָ֭אַסְתִּי לֹא־לְעֹלָ֣ם אֶחְיֶ֑ה
  חֲדַ֥ל מִ֝מֶּ֗נִּי כִּי־הֶ֥בֶל יָמָֽי׃
יז מָֽה־אֱ֭נוֹשׁ כִּ֣י תְגַדְּלֶ֑נּוּ
  וְכִֽי־תָשִׁ֖ית אֵלָ֣יו לִבֶּֽךָ׃
יח וַתִּפְקְדֶ֥נּוּ לִבְקָרִ֑ים
  לִ֝רְגָעִ֗ים תִּבְחָנֶֽנּוּ׃
יט כַּ֭מָּה לֹא־תִשְׁעֶ֣ה מִמֶּ֑נִּי
  לֹֽא־תַ֝רְפֵּ֗נִי עַד־בִּלְעִ֥י רֻקִּֽי׃
כ חָטָ֡אתִי מָ֤ה אֶפְעַ֨ל ׀ לָךְ֮ נֹצֵ֢ר הָ֫אָדָ֥ם
  לָ֤מָה שַׂמְתַּ֣נִי לְמִפְגָּ֣ע לָ֑ךְ
    וָאֶהְיֶ֖ה עָלַ֣י לְמַשָּֽׂא׃
כא וּמֶ֤ה ׀ לֹֽא־תִשָּׂ֣א פִשְׁעִי֮
  וְתַעֲבִ֢יר אֶת־עֲוֺ֫נִ֥י
כִּֽי־עַ֭תָּה לֶעָפָ֣ר אֶשְׁכָּ֑ב
  וְשִׁ֖חַרְתַּ֣נִי וְאֵינֶֽנִּי׃

ח א    וַ֭יַּעַן בִּלְדַּ֥ד הַשּׁוּחִ֗י וַיֹּאמַֽר׃
ב עַד־אָ֥ן תְּמַלֶּל־אֵ֑לֶּה
  וְר֥וּחַ כַּ֝בִּ֗יר אִמְרֵי־פִֽיךָ׃
ג הַ֭אֵל יְעַוֵּ֣ת מִשְׁפָּ֑ט
  וְאִם־שַׁ֝דַּ֗י יְעַוֵּת־צֶֽדֶק׃
ד אִם־בָּנֶ֥יךָ חָֽטְאוּ־ל֑וֹ
  וַֽ֝יְשַׁלְּחֵ֗ם בְּיַד־פִּשְׁעָֽם׃
ה אִם־אַ֭תָּה תְּשַׁחֵ֣ר אֶל־אֵ֑ל
  וְאֶל־שַׁ֝דַּ֗י תִּתְחַנָּֽן׃
ו אִם־זַ֥ךְ וְיָשָׁ֗ר אָ֥֫תָּה
  כִּֽי־עַ֭תָּה יָעִ֣יר עָלֶ֑יךָ
    וְ֝שִׁלַּ֗ם נְוַ֣ת צִדְקֶֽךָ׃
ז וְהָיָ֣ה רֵאשִׁיתְךָ֣ מִצְעָ֑ר
  וְ֝אַחֲרִֽיתְךָ֗ יִשְׂגֶּ֥ה מְאֹֽד׃
ח כִּֽי־שְׁאַל־נָ֭א לְדֹ֣ר רִישׁ֑וֹן
  וְ֝כוֹנֵ֗ן לְחֵ֣קֶר אֲבוֹתָֽם׃
ט כִּֽי־תְמ֣וֹל אֲ֭נַחְנוּ וְלֹ֣א נֵדָ֑ע
  כִּ֤י צֵ֖ל יָמֵ֣ינוּ עֲלֵי־אָֽרֶץ׃
י הֲלֹא־הֵ֣ם י֭וֹרוּךָ יֹ֣אמְרוּ לָ֑ךְ
  וּ֝מִלִּבָּ֗ם יוֹצִ֥אוּ מִלִּֽים׃
יא הֲיִֽגְאֶה־גֹּ֭מֶא בְּלֹ֣א בִצָּ֑ה
  יִשְׂגֶּה־אָ֥חוּ בְלִי־מָֽיִם׃
יב עֹדֶ֣נּוּ בְ֭אִבּוֹ לֹ֣א יִקָּטֵ֑ף
  וְלִפְנֵ֖י כׇל־חָצִ֣יר יִיבָֽשׁ׃
יג כֵּ֗ן אׇ֭רְחוֹת כׇּל־שֹׁ֣כְחֵי אֵ֑ל
  וְתִקְוַ֖ת חָנֵ֣ף תֹּאבֵֽד׃
יד אֲשֶׁר־יָק֥וֹט כִּסְל֑וֹ
  וּבֵ֥ית עַ֝כָּבִ֗ישׁ מִבְטַחֽוֹ׃
טו יִשָּׁעֵ֣ן עַל־בֵּ֭יתוֹ וְלֹ֣א יַעֲמֹ֑ד
  יַחֲזִ֥יק בּ֗֝וֹ וְלֹ֣א יָקֽוּם׃
טז רָטֹ֣ב ה֭וּא לִפְנֵי־שָׁ֑מֶשׁ
  וְעַ֥ל גַּ֝נָּת֗וֹ יֹנַקְתּ֥וֹ תֵצֵֽא׃
יז עַל־גַּ֭ל שׇׁרָשָׁ֣יו יְסֻבָּ֑כוּ
  בֵּ֖ית אֲבָנִ֣ים יֶחֱזֶֽה׃
יח אִם־יְבַלְּעֶ֥נּוּ מִמְּקֹמ֑וֹ
  וְכִ֥חֶשׁ בּ֗֝וֹ לֹ֣א רְאִיתִֽיךָ׃
יט הֶן־ה֭וּא מְשׂ֣וֹשׂ דַּרְכּ֑וֹ
  וּ֝מֵעָפָ֗ר אַחֵ֥ר יִצְמָֽחוּ׃
כ הֶן־אֵ֭ל לֹ֣א יִמְאַס־תָּ֑ם
  וְלֹֽא־יַ֝חֲזִ֗יק בְּיַד־מְרֵעִֽים׃
כא עַד־יְמַלֵּ֣ה שְׂח֣וֹק פִּ֑יךָ
  וּשְׂפָתֶ֥יךָ תְרוּעָֽה׃
כב שֹׂנְאֶ֥יךָ יִלְבְּשׁוּ־בֹ֑שֶׁת
  וְאֹ֖הֶל רְשָׁעִ֣ים אֵינֶֽנּוּ׃

ט א    וַיַּ֥עַן אִיּ֗וֹב וַיֹּאמַֽר׃
ב אׇ֭מְנָם יָדַ֣עְתִּי כִי־כֵ֑ן
  וּמַה־יִּצְדַּ֖ק אֱנ֣וֹשׁ עִם־אֵֽל׃
ג אִם־יַ֭חְפֹּץ לָרִ֣יב עִמּ֑וֹ
  לֹֽא־יַ֝עֲנֶ֗נּוּ אַחַ֥ת מִנִּי־אָֽלֶף׃
ד חֲכַ֣ם לֵ֭בָב וְאַמִּ֣יץ כֹּ֑חַ
  מִֽי־הִקְשָׁ֥ה אֵ֝לָ֗יו וַיִּשְׁלָֽם׃
ה הַמַּעְתִּ֣יק הָ֭רִים וְלֹ֣א יָדָ֑עוּ
  אֲשֶׁ֖ר הֲפָכָ֣ם בְּאַפּֽוֹ׃
ו הַמַּרְגִּ֣יז אֶ֭רֶץ מִמְּקוֹמָ֑הּ
  וְ֝עַמּוּדֶ֗יהָ יִתְפַּלָּצֽוּן׃
ז הָאֹמֵ֣ר לַ֭חֶרֶס וְלֹ֣א יִזְרָ֑ח
  וּבְעַ֖ד כּוֹכָבִ֣ים יַחְתֹּֽם׃
ח נֹטֶ֣ה שָׁמַ֣יִם לְבַדּ֑וֹ
  וְ֝דוֹרֵ֗ךְ עַל־בׇּ֥מֳתֵי יָֽם׃
ט עֹֽשֶׂה־עָ֭שׁ כְּסִ֥יל וְכִימָ֗ה
  וְחַדְרֵ֥י תֵמָֽן׃
י עֹשֶׂ֣ה גְ֭דֹלוֹת עַד־אֵ֣ין חֵ֑קֶר
  וְנִפְלָא֗וֹת עַד־אֵ֥ין מִסְפָּֽר׃
יא הֵ֤ן יַעֲבֹ֣ר עָ֭לַי וְלֹ֣א אֶרְאֶ֑ה
  וְ֝יַחֲלֹ֗ף וְֽלֹא־אָבִ֥ין לֽוֹ׃
יב הֵ֣ן יַ֭חְתֹּף מִ֣י יְשִׁיבֶ֑נּוּ
  מִי־יֹאמַ֥ר אֵ֝לָ֗יו מַֽה־תַּעֲשֶֽׂה׃
יג אֱ֭לוֹהַּ לֹא־יָשִׁ֣יב אַפּ֑וֹ
  תַּחְתָּ֥ו שָׁ֝חֲח֗וּ עֹ֣זְרֵי רָֽהַב׃
יד אַ֭ף כִּֽי־אָנֹכִ֣י אֶעֱנֶ֑נּוּ
  אֶבְחֲרָ֖ה דְבָרַ֣י עִמּֽוֹ׃
טו אֲשֶׁ֣ר אִם־צָ֭דַקְתִּי לֹ֣א אֶעֱנֶ֑ה
  לִ֝מְשֹׁפְטִ֗י אֶתְחַנָּֽן׃
טז אִם־קָרָ֥אתִי וַֽיַּעֲנֵ֑נִי
  לֹֽא־אַ֝אֲמִ֗ין כִּֽי־יַאֲזִ֥ין קוֹלִֽי׃
יז אֲשֶׁר־בִּשְׂעָרָ֥ה יְשׁוּפֵ֑נִי
  וְהִרְבָּ֖ה פְצָעַ֣י חִנָּֽם׃
יח לֹֽא־יִ֭תְּנֵנִי הָשֵׁ֣ב רוּחִ֑י
  כִּ֥י יַ֝שְׂבִּעַ֗נִי מַמְּרֹרִֽים׃
יט אִם־לְכֹ֣חַ אַמִּ֣יץ הִנֵּ֑ה
  וְאִם־לְ֝מִשְׁפָּ֗ט מִ֣י יוֹעִידֵֽנִי׃
כ אִם־אֶ֭צְדָּק פִּ֣י יַרְשִׁיעֵ֑נִי
  תׇּֽם־אָ֗֝נִי וַֽיַּעְקְשֵֽׁנִי׃
כא תׇּֽם־אָ֭נִי לֹֽא־אֵדַ֥ע נַפְשִׁ֗י
  אֶמְאַ֥ס חַיָּֽי׃
כב אַחַ֗ת הִ֥֫יא
  עַל־כֵּ֥ן אָמַ֑רְתִּי
    תָּ֥ם וְ֝רָשָׁ֗ע ה֣וּא מְכַלֶּֽה׃
כג אִם־שׁ֭וֹט יָמִ֣ית פִּתְאֹ֑ם
  לְמַסַּ֖ת נְקִיִּ֣ם יִלְעָֽג׃
כד אֶ֤רֶץ ׀ נִתְּנָ֬ה בְֽיַד־רָשָׁ֗ע
  פְּנֵֽי־שֹׁפְטֶ֥יהָ יְכַסֶּ֑ה
    אִם־לֹ֖א אֵפ֣וֹא מִי־הֽוּא׃
כה וְיָמַ֣י קַ֭לּוּ מִנִּי־רָ֑ץ
  בָּ֝רְח֗וּ לֹא־רָא֥וּ טוֹבָֽה׃
כו חָ֭לְפוּ עִם־אֳנִיּ֣וֹת אֵבֶ֑ה
  כְּ֝נֶ֗שֶׁר יָט֥וּשׂ עֲלֵי־אֹֽכֶל׃
כז אִם־אׇ֭מְרִי אֶשְׁכְּחָ֣ה שִׂיחִ֑י
  אֶעֶזְבָ֖ה פָנַ֣י וְאַבְלִֽיגָה׃
כח יָגֹ֥רְתִּי כׇל־עַצְּבֹתָ֑י
  יָ֝דַ֗עְתִּי כִּי־לֹ֥א תְנַקֵּֽנִי׃
כט אָנֹכִ֥י אֶרְשָׁ֑ע
  לָמָּה־זֶּ֗֝ה הֶ֣בֶל אִיגָֽע׃
ל אִם־הִתְרָחַ֥צְתִּי במו בְמֵי־שָׁ֑לֶג
  וַ֝הֲזִכּ֗וֹתִי בְּבֹ֣ר כַּפָּֽי׃
לא אָ֭ז בַּשַּׁ֣חַת תִּטְבְּלֵ֑נִי
  וְ֝תִעֲב֗וּנִי שַׂלְמוֹתָֽי׃
לב כִּֽי־לֹא־אִ֣ישׁ כָּמ֣וֹנִי אֶעֱנֶ֑נּוּ
  נָב֥וֹא יַ֝חְדָּ֗ו בַּמִּשְׁפָּֽט׃
לג לֹ֣א יֵשׁ־בֵּינֵ֣ינוּ מוֹכִ֑יחַ
  יָשֵׁ֖ת יָד֣וֹ עַל־שְׁנֵֽינוּ׃
לד יָסֵ֣ר מֵעָלַ֣י שִׁבְט֑וֹ
  וְ֝אֵמָת֗וֹ אַֽל־תְּבַעֲתַֽנִּי׃
לה אֲֽ֭דַבְּרָה וְלֹ֣א אִירָאֶ֑נּוּ
  כִּ֥י לֹא־כֵ֥ן אָ֝נֹכִ֗י עִמָּדִֽי׃
י א נָֽקְטָ֥ה נַפְשִׁ֗י בְּחַ֫יָּ֥י
  אֶעֶזְבָ֣ה עָלַ֣י שִׂיחִ֑י
    אֲ֝דַבְּרָ֗ה בְּמַ֣ר נַפְשִֽׁי׃
ב אֹמַ֣ר אֶל־אֱ֭לוֹהַּ אַל־תַּרְשִׁיעֵ֑נִי
  ה֝וֹדִיעֵ֗נִי עַ֣ל מַה־תְּרִיבֵֽנִי׃
ג הֲט֤וֹב לְךָ֨ ׀ כִּֽי־תַעֲשֹׁ֗ק
  כִּֽי־תִ֭מְאַס יְגִ֣יעַ כַּפֶּ֑יךָ
    וְעַל־עֲצַ֖ת רְשָׁעִ֣ים הוֹפָֽעְתָּ׃
ד הַעֵינֵ֣י בָשָׂ֣ר לָ֑ךְ
  אִם־כִּרְא֖וֹת אֱנ֣וֹשׁ תִּרְאֶֽה׃
ה הֲכִימֵ֣י אֱנ֣וֹשׁ יָמֶ֑יךָ
  אִם־שְׁ֝נוֹתֶ֗יךָ כִּ֣ימֵי גָֽבֶר׃
ו כִּֽי־תְבַקֵּ֥שׁ לַעֲוֺנִ֑י
  וּֽלְחַטָּאתִ֥י תִדְרֽוֹשׁ׃
ז עַֽל־דַּ֭עְתְּךָ כִּי־לֹ֣א אֶרְשָׁ֑ע
  וְאֵ֖ין מִיָּדְךָ֣ מַצִּֽיל׃
ח יָדֶ֣יךָ עִ֭צְּבוּנִי וַֽיַּעֲשׂ֑וּנִי
  יַ֥חַד סָ֝בִ֗יב וַֽתְּבַלְּעֵֽנִי׃
ט זְכׇר־נָ֭א כִּֽי־כַחֹ֣מֶר עֲשִׂיתָ֑נִי
  וְֽאֶל־עָפָ֥ר תְּשִׁיבֵֽנִי׃
י הֲלֹ֣א כֶ֭חָלָב תַּתִּיכֵ֑נִי
  וְ֝כַגְּבִנָּ֗ה תַּקְפִּיאֵֽנִי׃
יא ע֣וֹר וּ֭בָשָׂר תַּלְבִּישֵׁ֑נִי
  וּֽבַעֲצָמ֥וֹת וְ֝גִידִ֗ים תְּשֹׂכְכֵֽנִי׃
יב חַיִּ֣ים וָ֭חֶסֶד עָשִׂ֣יתָ עִמָּדִ֑י
  וּ֝פְקֻדָּתְךָ֗ שָֽׁמְרָ֥ה רוּחִֽי׃
יג וְ֭אֵלֶּה צָפַ֣נְתָּ בִלְבָבֶ֑ךָ
  יָ֝דַ֗עְתִּי כִּי־זֹ֥את עִמָּֽךְ׃
יד אִם־חָטָ֥אתִי וּשְׁמַרְתָּ֑נִי
  וּ֝מֵעֲוֺנִ֗י לֹ֣א תְנַקֵּֽנִי׃
טו אִם־רָשַׁ֡עְתִּי אַלְלַ֬י לִ֗י
  וְ֭צָדַקְתִּי לֹא־אֶשָּׂ֣א רֹאשִׁ֑י
    שְׂבַ֥ע קָ֝ל֗וֹן וּרְאֵ֥ה עׇנְיִֽי׃
טז וְ֭יִגְאֶה כַּשַּׁ֣חַל תְּצוּדֵ֑נִי
  וְ֝תָשֹׁ֗ב תִּתְפַּלָּא־בִֽי׃
יז תְּחַדֵּ֬שׁ עֵדֶ֨יךָ ׀ נֶגְדִּ֗י
  וְתֶ֣רֶב כַּ֭עַשְׂךָ עִמָּדִ֑י
    חֲלִיפ֖וֹת וְצָבָ֣א עִמִּֽי׃
יח וְלָ֣מָּה מֵ֭רֶחֶם הֹצֵאתָ֑נִי
  אֶ֝גְוַ֗ע וְעַ֣יִן לֹֽא־תִרְאֵֽנִי׃
יט כַּאֲשֶׁ֣ר לֹא־הָיִ֣יתִי אֶהְיֶ֑ה
  מִ֝בֶּ֗טֶן לַקֶּ֥בֶר אוּבָֽל׃
כ הֲלֹֽא־מְעַ֣ט יָמַ֣י יחדל וַחֲדָ֑ל
  ישית וְשִׁ֥ית מִ֝מֶּ֗נִּי וְאַבְלִ֥יגָה מְּעָֽט׃
כא בְּטֶ֣רֶם אֵ֭לֵךְ וְלֹ֣א אָשׁ֑וּב
  אֶל־אֶ֖רֶץ חֹ֣שֶׁךְ וְצַלְמָֽוֶת׃
כב אֶ֤רֶץ עֵפָ֨תָה ׀ כְּמ֥וֹ אֹ֗פֶל
  צַ֭לְמָוֶת וְלֹ֥א סְדָרִ֗ים
    וַתֹּ֥פַע כְּמוֹ־אֹֽפֶל׃

יא א    וַ֭יַּעַן צֹפַ֥ר הַֽנַּעֲמָתִ֗י וַיֹּאמַֽר׃
ב הֲרֹ֣ב דְּ֭בָרִים לֹ֣א יֵעָנֶ֑ה
  וְאִם־אִ֖ישׁ שְׂפָתַ֣יִם יִצְדָּֽק׃
ג בַּ֭דֶּיךָ מְתִ֣ים יַחֲרִ֑ישׁוּ
  וַ֝תִּלְעַ֗ג וְאֵ֣ין מַכְלִֽם׃
ד וַ֭תֹּאמֶר זַ֣ךְ לִקְחִ֑י
  וּ֝בַ֗ר הָיִ֥יתִי בְעֵינֶֽיךָ׃
ה וְֽאוּלָ֗ם מִֽי־יִתֵּ֣ן אֱל֣וֹהַּ דַּבֵּ֑ר
  וְיִפְתַּ֖ח שְׂפָתָ֣יו עִמָּֽךְ׃
ו וְיַגֶּד־לְךָ֨ ׀ תַּ֥עֲלֻמ֣וֹת חׇכְמָה֮
  כִּֽי־כִפְלַ֢יִם לְֽת֫וּשִׁיָּ֥ה
    וְדַ֡ע
    כִּֽי־יַשֶּׁ֥ה לְךָ֥ אֱ֝ל֗וֹהַּ מֵעֲוֺנֶֽךָ׃
ז הַחֵ֣קֶר אֱל֣וֹהַּ תִּמְצָ֑א
  אִ֤ם עַד־תַּכְלִ֖ית שַׁדַּ֣י תִּמְצָֽא׃
ח גׇּבְהֵ֣י שָׁ֭מַיִם מַה־תִּפְעָ֑ל
  עֲמֻקָּ֥ה מִ֝שְּׁא֗וֹל מַה־תֵּדָֽע׃
ט אֲרֻכָּ֣ה מֵאֶ֣רֶץ מִדָּ֑הּ
  וּ֝רְחָבָ֗ה מִנִּי־יָֽם׃
י אִם־יַחֲלֹ֥ף וְיַסְגִּ֑יר
  וְ֝יַקְהִ֗יל וּמִ֣י יְשִׁיבֶֽנּוּ׃
יא כִּי־ה֭וּא יָדַ֣ע מְתֵי־שָׁ֑וְא
  וַיַּרְא־אָ֗֝וֶן וְלֹ֣א יִתְבּוֹנָֽן׃
יב וְאִ֣ישׁ נָ֭בוּב יִלָּבֵ֑ב
  וְעַ֥יִר פֶּ֗֝רֶא אָדָ֥ם יִוָּלֵֽד׃
יג אִם־אַ֭תָּה הֲכִינ֣וֹתָ לִבֶּ֑ךָ
  וּפָרַשְׂתָּ֖ אֵלָ֣יו כַּפֶּֽיךָ׃
יד אִם־אָ֣וֶן בְּ֭יָדְךָ הַרְחִיקֵ֑הוּ
  וְאַל־תַּשְׁכֵּ֖ן בְּאֹהָלֶ֣יךָ עַוְלָֽה׃
טו כִּי־אָ֤ז ׀ תִּשָּׂ֣א פָנֶ֣יךָ מִמּ֑וּם
  וְהָיִ֥יתָ מֻ֝צָ֗ק וְלֹ֣א תִירָֽא׃
טז כִּֽי־אַ֭תָּה עָמָ֣ל תִּשְׁכָּ֑ח
  כְּמַ֖יִם עָבְר֣וּ תִזְכֹּֽר׃
יז וּֽ֭מִצׇּהֳרַיִם יָק֣וּם חָ֑לֶד
  תָּ֝עֻ֗פָה כַּבֹּ֥קֶר תִּהְיֶֽה׃
יח וּֽ֭בָטַחְתָּ כִּֽי־יֵ֣שׁ תִּקְוָ֑ה
  וְ֝חָפַרְתָּ֗ לָבֶ֥טַח תִּשְׁכָּֽב׃
ג יט וְֽ֭רָבַצְתָּ וְאֵ֣ין מַחֲרִ֑יד
  וְחִלּ֖וּ פָנֶ֣יךָ רַבִּֽים׃
כ וְעֵינֵ֥י רְשָׁעִ֗ים תִּ֫כְלֶ֥ינָה
  וּ֭מָנוֹס אָבַ֣ד מִנְהֶ֑ם
    וְ֝תִקְוָתָ֗ם מַֽפַּֽח־נָֽפֶשׁ׃

יב א    וַיַּ֥עַן אִיּ֗וֹב וַיֹּאמַֽר׃
ב אׇ֭מְנָם כִּ֣י אַתֶּם־עָ֑ם
  וְ֝עִמָּכֶ֗ם תָּמ֥וּת חׇכְמָֽה׃
ג גַּם־לִ֤י לֵבָ֨ב ׀ כְּֽמוֹכֶ֗ם
  לֹא־נֹפֵ֣ל אָנֹכִ֣י מִכֶּ֑ם
    וְאֶת־מִי־אֵ֥ין כְּמוֹ־אֵֽלֶּה׃
ד שְׂחֹ֤ק לְרֵעֵ֨הוּ ׀ אֶהְיֶ֗ה
  קֹרֵ֣א לֶ֭אֱלוֹהַּ וַֽיַּעֲנֵ֑הוּ
    שְׂ֝ח֗וֹק צַדִּ֥יק תָּמִֽים׃
ה לַפִּ֣יד בּ֭וּז לְעַשְׁתּ֣וּת שַׁאֲנָ֑ן
  נָ֝כ֗וֹן לְמ֣וֹעֲדֵי רָֽגֶל׃
ו יִשְׁלָ֤יוּ אֹהָלִ֨ים ׀ לְשֹׁ֥דְדִ֗ים
  וּֽ֭בַטֻּחוֹת לְמַרְגִּ֣יזֵי אֵ֑ל
    לַאֲשֶׁ֤ר הֵבִ֖יא אֱל֣וֹהַּ בְּיָדֽוֹ׃
ז וְֽאוּלָ֗ם שְׁאַל־נָ֣א בְהֵמ֣וֹת וְתֹרֶ֑ךָּ
  וְע֥וֹף הַ֝שָּׁמַ֗יִם וְיַגֶּד־לָֽךְ׃
ח א֤וֹ שִׂ֣יחַ לָאָ֣רֶץ וְתֹרֶ֑ךָּ
  וִיסַפְּר֥וּ לְ֝ךָ֗ דְּגֵ֣י הַיָּֽם׃
ט מִ֭י לֹא־יָדַ֣ע בְּכׇל־אֵ֑לֶּה
  כִּ֥י יַד־יְ֝הֹוָ֗ה עָ֣שְׂתָה זֹּֽאת׃
י אֲשֶׁ֣ר בְּ֭יָדוֹ נֶ֣פֶשׁ כׇּל־חָ֑י
  וְ֝ר֗וּחַ כׇּל־בְּשַׂר־אִֽישׁ׃
יא הֲלֹא־אֹ֭זֶן מִלִּ֣ין תִּבְחָ֑ן
  וְ֝חֵ֗ךְ אֹ֣כֶל יִטְעַם־לֽוֹ׃
יב בִּישִׁישִׁ֥ים חׇכְמָ֑ה
  וְאֹ֖רֶךְ יָמִ֣ים תְּבוּנָֽה׃
יג עִ֭מּוֹ חׇכְמָ֣ה וּגְבוּרָ֑ה
  ל֗֝וֹ עֵצָ֥ה וּתְבוּנָֽה׃
יד הֵ֣ן יַ֭הֲרוֹס וְלֹ֣א יִבָּנֶ֑ה
  יִסְגֹּ֥ר עַל־אִ֗֝ישׁ וְלֹ֣א יִפָּתֵֽחַ׃
טו הֵ֤ן יַעְצֹ֣ר בַּמַּ֣יִם וְיִבָ֑שׁוּ
  וִ֝ישַׁלְּחֵ֗ם וְיַ֖הַפְכוּ אָֽרֶץ׃
טז עִ֭מּוֹ עֹ֣ז וְתוּשִׁיָּ֑ה
  ל֗֝וֹ שֹׁגֵ֥ג וּמַשְׁגֶּֽה׃
יז מוֹלִ֣יךְ יוֹעֲצִ֣ים שׁוֹלָ֑ל
  וְֽשֹׁפְטִ֥ים יְהוֹלֵֽל׃
יח מוּסַ֣ר מְלָכִ֣ים פִּתֵּ֑חַ
  וַיֶּאְסֹ֥ר אֵ֝ז֗וֹר בְּמׇתְנֵיהֶֽם׃
יט מוֹלִ֣יךְ כֹּהֲנִ֣ים שׁוֹלָ֑ל
  וְאֵ֖תָנִ֣ים יְסַלֵּֽף׃
כ מֵסִ֣יר שָׂ֭פָה לְנֶאֱמָנִ֑ים
  וְטַ֖עַם זְקֵנִ֣ים יִקָּֽח׃
כא שׁוֹפֵ֣ךְ בּ֭וּז עַל־נְדִיבִ֑ים
  וּמְזִ֖יחַ אֲפִיקִ֣ים רִפָּֽה׃
כב מְגַלֶּ֣ה עֲ֭מֻקוֹת מִנִּי־חֹ֑שֶׁךְ
  וַיֹּצֵ֖א לָא֣וֹר צַלְמָֽוֶת׃
כג מַשְׂגִּ֣יא לַ֭גּוֹיִם וַֽיְאַבְּדֵ֑ם
  שֹׁטֵ֥חַ לַ֝גּוֹיִ֗ם וַיַּנְחֵֽם׃
כד מֵסִ֗יר לֵ֭ב רָאשֵׁ֣י עַם־הָאָ֑רֶץ
  וַ֝יַּתְעֵ֗ם בְּתֹ֣הוּ לֹא־דָֽרֶךְ׃
כה יְמַֽשְׁשׁוּ־חֹ֥שֶׁךְ וְלֹא־א֑וֹר
  וַ֝יַּתְעֵ֗ם כַּשִּׁכּֽוֹר׃
יג א הֶן־כֹּ֭ל רָאֲתָ֣ה עֵינִ֑י
  שָֽׁמְעָ֥ה אׇ֝זְנִ֗י וַתָּ֥בֶן לָֽהּ׃
ב כְּֽ֭דַעְתְּכֶם יָדַ֣עְתִּי גַם־אָ֑נִי
  לֹֽא־נֹפֵ֖ל אָנֹכִ֣י מִכֶּֽם׃
ג אוּלָ֗ם אֲ֭נִי אֶל־שַׁדַּ֣י אֲדַבֵּ֑ר
  וְהוֹכֵ֖חַ אֶל־אֵ֣ל אֶחְפָּֽץ׃
ד וְֽאוּלָ֗ם אַתֶּ֥ם טֹפְלֵי־שָׁ֑קֶר
  רֹפְאֵ֖י אֱלִ֣ל כֻּלְּכֶֽם׃
ה מִי־יִ֭תֵּן הַחֲרֵ֣שׁ תַּחֲרִישׁ֑וּן
  וּתְהִ֖י לָכֶ֣ם לְחׇכְמָֽה׃
ו שִׁמְעוּ־נָ֥א תוֹכַחְתִּ֑י
  וְרִב֖וֹת שְׂפָתַ֣י הַקְשִֽׁיבוּ׃
ז הַ֭לְאֵל תְּדַבְּר֣וּ עַוְלָ֑ה
  וְ֝ל֗וֹ תְּֽדַבְּר֥וּ רְמִיָּֽה׃
ח הֲפָנָ֥יו תִּשָּׂא֑וּן
  אִם־לָאֵ֥ל תְּרִיבֽוּן׃
ט הֲ֭טוֹב כִּֽי־יַחְקֹ֣ר אֶתְכֶ֑ם
  אִם־כְּהָתֵ֥ל בֶּ֝אֱנ֗וֹשׁ תְּהָתֵ֥לּוּ בֽוֹ׃
י הוֹכֵ֣חַ יוֹכִ֣יחַ אֶתְכֶ֑ם
  אִם־בַּ֝סֵּ֗תֶר פָּנִ֥ים תִּשָּׂאֽוּן׃
יא הֲלֹ֣א שְׂ֭אֵתוֹ תְּבַעֵ֣ת אֶתְכֶ֑ם
  וּ֝פַחְדּ֗וֹ יִפֹּ֥ל עֲלֵיכֶֽם׃
יב זִֽ֭כְרֹנֵיכֶם מִשְׁלֵי־אֵ֑פֶר
  לְגַבֵּי־חֹ֗֝מֶר גַּבֵּיכֶֽם׃
יג הַחֲרִ֣ישׁוּ מִ֭מֶּנִּי וַאֲדַבְּרָה־אָ֑נִי
  וְיַעֲבֹ֖ר עָלַ֣י מָֽה׃
יד עַל־מָ֤ה ׀ אֶשָּׂ֣א בְשָׂרִ֣י בְשִׁנָּ֑י
  וְ֝נַפְשִׁ֗י אָשִׂ֥ים בְּכַפִּֽי׃
טו הֵ֣ן יִ֭קְטְלֵנִי לא ל֣וֹ אֲיַחֵ֑ל
  אַךְ־דְּ֝רָכַ֗י אֶל־פָּנָ֥יו אוֹכִֽיחַ׃
טז גַּם־הוּא־לִ֥י לִישׁוּעָ֑ה
  כִּי־לֹ֥א לְ֝פָנָ֗יו חָנֵ֥ף יָבֽוֹא׃
יז שִׁמְע֣וּ שָׁ֭מוֹעַ מִלָּתִ֑י
  וְ֝אַחֲוָתִ֗י בְּאׇזְנֵיכֶֽם׃
יח הִנֵּה־נָ֭א עָרַ֣כְתִּי מִשְׁפָּ֑ט
  יָ֝דַ֗עְתִּי כִּי־אֲנִ֥י אֶצְדָּֽק׃
יט מִי־ה֭וּא יָרִ֣יב עִמָּדִ֑י
  כִּֽי־עַתָּ֖ה אַחֲרִ֣ישׁ וְאֶגְוָֽע׃
כ אַךְ־שְׁ֭תַּיִם אַל־תַּ֣עַשׂ עִמָּדִ֑י
  אָ֥ז מִ֝פָּנֶ֗יךָ לֹ֣א אֶסָּתֵֽר׃
כא כַּ֭פְּךָ מֵעָלַ֣י הַרְחַ֑ק
  וְ֝אֵ֥מָתְךָ֗ אַֽל־תְּבַעֲתַֽנִּי׃
כב וּ֭קְרָא וְאָנֹכִ֣י אֶעֱנֶ֑ה
  אֽוֹ־אֲ֝דַבֵּ֗ר וַהֲשִׁיבֵֽנִי׃
כג כַּמָּ֣ה לִ֭י עֲוֺנ֣וֹת וְחַטָּא֑וֹת
  פִּֽשְׁעִ֥י וְ֝חַטָּאתִ֗י הֹדִיעֵֽנִי׃
כד לָֽמָּה־פָנֶ֥יךָ תַסְתִּ֑יר
  וְתַחְשְׁבֵ֖נִי לְאוֹיֵ֣ב לָֽךְ׃
כה הֶעָלֶ֣ה נִדָּ֣ף תַּעֲר֑וֹץ
  וְאֶת־קַ֖שׁ יָבֵ֣שׁ תִּרְדֹּֽף׃
כו כִּֽי־תִכְתֹּ֣ב עָלַ֣י מְרֹר֑וֹת
  וְ֝תוֹרִישֵׁ֗נִי עֲוֺנ֥וֹת נְעוּרָֽי׃
כז וְתָ֘שֵׂ֤ם בַּסַּ֨ד ׀ רַגְלַ֗י
  וְתִשְׁמ֥וֹר כׇּל־אׇרְחוֹתָ֑י
    עַל־שׇׁרְשֵׁ֥י רַ֝גְלַ֗י תִּתְחַקֶּֽה׃
כח וְ֭הוּא כְּרָקָ֣ב יִבְלֶ֑ה
  כְּ֝בֶ֗גֶד אֲכָ֣לוֹ עָֽשׁ׃
יד א אָ֭דָם יְל֣וּד אִשָּׁ֑ה
  קְצַ֥ר יָ֝מִ֗ים וּֽשְׂבַֽע־רֹֽגֶז׃
ב כְּצִ֣יץ יָ֭צָא וַיִּמָּ֑ל
  וַיִּבְרַ֥ח כַּ֝צֵּ֗ל וְלֹ֣א יַעֲמֽוֹד׃
ג אַף־עַל־זֶ֭ה פָּקַ֣חְתָּ עֵינֶ֑ךָ
  וְאֹ֘תִ֤י תָבִ֖יא בְמִשְׁפָּ֣ט עִמָּֽךְ׃
ד מִֽי־יִתֵּ֣ן טָ֭הוֹר מִטָּמֵ֗א
  לֹ֣א אֶחָֽד׃
ה אִ֥ם חֲרוּצִ֨ים ׀ יָמָ֗יו
  מִֽסְפַּר־חֳדָשָׁ֥יו אִתָּ֑ךְ
    חֻקָּ֥ו עָ֝שִׂ֗יתָ וְלֹ֣א יַעֲבֹֽר׃
ו שְׁעֵ֣ה מֵעָלָ֣יו וְיֶחְדָּ֑ל
  עַד־יִ֝רְצֶ֗ה כְּשָׂכִ֥יר יוֹמֽוֹ׃
ז כִּ֤י יֵ֥שׁ לָעֵ֗ץ תִּ֫קְוָ֥ה
  אִֽם־יִ֭כָּרֵת וְע֣וֹד יַחֲלִ֑יף
    וְ֝יֹנַקְתּ֗וֹ לֹ֣א תֶחְדָּֽל׃
ח אִם־יַזְקִ֣ין בָּאָ֣רֶץ שׇׁרְשׁ֑וֹ
  וּ֝בֶעָפָ֗ר יָמ֥וּת גִּזְעֽוֹ׃
ט מֵרֵ֣יחַ מַ֣יִם יַפְרִ֑חַ
  וְעָשָׂ֖ה קָצִ֣יר כְּמוֹ־נָֽטַע׃
י וְגֶ֣בֶר יָ֭מוּת וַֽיֶּחֱלָ֑שׁ
  וַיִּגְוַ֖ע אָדָ֣ם וְאַיּֽוֹ׃
יא אָזְלוּ־מַ֭יִם מִנִּי־יָ֑ם
  וְ֝נָהָ֗ר יֶחֱרַ֥ב וְיָבֵֽשׁ׃
יב וְאִ֥ישׁ שָׁכַ֗ב וְֽלֹא־יָ֫ק֥וּם
  עַד־בִּלְתִּ֣י שָׁ֭מַיִם לֹ֣א יָקִ֑יצוּ
    וְלֹֽא־יֵ֝עֹ֗רוּ מִשְּׁנָתָֽם׃
יג מִ֤י יִתֵּ֨ן ׀ בִּשְׁא֬וֹל תַּצְפִּנֵ֗נִי
  תַּ֭סְתִּירֵנִי עַד־שׁ֣וּב אַפֶּ֑ךָ
    תָּ֤שִֽׁית לִ֖י חֹ֣ק וְתִזְכְּרֵֽנִי׃
יד אִם־יָמ֥וּת גֶּ֗בֶר הֲיִֽ֫חְיֶ֥ה
  כׇּל־יְמֵ֣י צְבָאִ֣י אֲיַחֵ֑ל
    עַד־בּ֗֝וֹא חֲלִיפָתִֽי׃
טו תִּ֭קְרָא וְאָנֹכִ֣י אֶעֱנֶ֑ךָּ
  לְֽמַעֲשֵׂ֖ה יָדֶ֣יךָ תִכְסֹֽף׃
טז כִּֽי־עַ֭תָּה צְעָדַ֣י תִּסְפּ֑וֹר
  לֹֽא־תִ֝שְׁמֹ֗ר עַל־חַטָּאתִֽי׃
יז חָתֻ֣ם בִּצְר֣וֹר פִּשְׁעִ֑י
  וַ֝תִּטְפֹּ֗ל עַל־עֲוֺנִֽי׃
יח וְ֭אוּלָם הַר־נוֹפֵ֣ל יִבּ֑וֹל
  וְ֝צ֗וּר יֶעְתַּ֥ק מִמְּקֹמֽוֹ׃
יט אֲבָנִ֤ים ׀ שָׁ֥חֲקוּ מַ֗יִם
  תִּשְׁטֹֽף־סְפִיחֶ֥יהָ עֲפַר־אָ֑רֶץ
    וְתִקְוַ֖ת אֱנ֣וֹשׁ הֶֽאֱבַֽדְתָּ׃
כ תִּתְקְפֵ֣הוּ לָ֭נֶצַח וַֽיַּהֲלֹ֑ךְ
  מְשַׁנֶּ֥ה פָ֝נָ֗יו וַֽתְּשַׁלְּחֵֽהוּ׃
כא יִכְבְּד֣וּ בָ֭נָיו וְלֹ֣א יֵדָ֑ע
  וְ֝יִצְעֲר֗וּ וְֽלֹא־יָבִ֥ין לָֽמוֹ׃
כב אַךְ־בְּ֭שָׂרוֹ עָלָ֣יו יִכְאָ֑ב
  וְ֝נַפְשׁ֗וֹ עָלָ֥יו תֶּאֱבָֽל׃

טו א    וַ֭יַּעַן אֱלִיפַ֥ז הַֽתֵּימָנִ֗י וַיֹּאמַֽר׃
ב הֶחָכָ֗ם יַעֲנֶ֥ה דַעַת־ר֑וּחַ
  וִימַלֵּ֖א קָדִ֣ים בִּטְנֽוֹ׃
ג הוֹכֵ֣חַ בְּ֭דָבָר לֹ֣א יִסְכּ֑וֹן
  וּ֝מִלִּ֗ים לֹא־יוֹעִ֥יל בָּֽם׃
ד אַף־אַ֭תָּה תָּפֵ֣ר יִרְאָ֑ה
  וְתִגְרַ֥ע שִׂ֝יחָ֗ה לִפְנֵי־אֵֽל׃
ה כִּ֤י יְאַלֵּ֣ף עֲוֺנְךָ֣ פִ֑יךָ
  וְ֝תִבְחַ֗ר לְשׁ֣וֹן עֲרוּמִֽים׃
ו יַרְשִׁיעֲךָ֣ פִ֣יךָ וְלֹא־אָ֑נִי
  וּ֝שְׂפָתֶ֗יךָ יַעֲנוּ־בָֽךְ׃
ז הֲרִאישׁ֣וֹן אָ֭דָם תִּוָּלֵ֑ד
  וְלִפְנֵ֖י גְבָע֣וֹת חוֹלָֽלְתָּ׃
ח הַבְס֣וֹד אֱל֣וֹהַּ תִּשְׁמָ֑ע
  וְתִגְרַ֖ע אֵלֶ֣יךָ חׇכְמָֽה׃
ט מַה־יָּ֭דַעְתָּ וְלֹ֣א נֵדָ֑ע
  תָּ֝בִ֗ין וְֽלֹא־עִמָּ֥נוּ הֽוּא׃
י גַּם־שָׂ֣ב גַּם־יָשִׁ֣ישׁ בָּ֑נוּ
  כַּבִּ֖יר מֵאָבִ֣יךָ יָמִֽים׃
יא הַמְעַ֣ט מִ֭מְּךָ תַּנְחוּמ֣וֹת אֵ֑ל
  וְ֝דָבָ֗ר לָאַ֥ט עִמָּֽךְ׃
יב מַה־יִּקָּחֲךָ֥ לִבֶּ֑ךָ
  וּֽמַה־יִּרְזְמ֥וּן עֵינֶֽיךָ׃
יג כִּֽי־תָשִׁ֣יב אֶל־אֵ֣ל רוּחֶ֑ךָ
  וְהֹצֵ֖אתָ מִפִּ֣יךָ מִלִּֽין׃
יד מָה־אֱנ֥וֹשׁ כִּֽי־יִזְכֶּ֑ה
  וְכִי־יִ֝צְדַּ֗ק יְל֣וּד אִשָּֽׁה׃
טו הֵ֣ן בִּ֭קְדֹשָׁו לֹ֣א יַאֲמִ֑ין
  וְ֝שָׁמַ֗יִם לֹא־זַכּ֥וּ בְעֵינָֽיו׃
טז אַ֭ף כִּי־נִתְעָ֥ב וְֽנֶאֱלָ֑ח
  אִישׁ־שֹׁתֶ֖ה כַמַּ֣יִם עַוְלָֽה׃
יז אֲחַוְךָ֥ שְֽׁמַֽע־לִ֑י
  וְזֶֽה־חָ֝זִ֗יתִי וַאֲסַפֵּֽרָה׃
יח אֲשֶׁר־חֲכָמִ֥ים יַגִּ֑ידוּ
  וְלֹ֥א כִ֝חֲד֗וּ מֵאֲבוֹתָֽם׃
יט לָהֶ֣ם לְ֭בַדָּם נִתְּנָ֣ה הָאָ֑רֶץ
  וְלֹא־עָ֖בַר זָ֣ר בְּתוֹכָֽם׃
כ כׇּל־יְמֵ֣י רָ֭שָׁע ה֣וּא מִתְחוֹלֵ֑ל
  וּמִסְפַּ֥ר שָׁ֝נִ֗ים נִצְפְּנ֥וּ לֶעָרִֽיץ׃
כא קוֹל־פְּחָדִ֥ים בְּאׇזְנָ֑יו
  בַּ֝שָּׁל֗וֹם שׁוֹדֵ֥ד יְבוֹאֶֽנּוּ׃
כב לֹא־יַאֲמִ֣ין שׁ֭וּב מִנִּי־חֹ֑שֶׁךְ
  וצפו וְצָפ֖וּי ה֣וּא אֱלֵי־חָֽרֶב׃
כג נֹ֘דֵ֤ד ה֣וּא לַלֶּ֣חֶם אַיֵּ֑ה
  יָדַ֓ע ׀ כִּי־נָכ֖וֹן בְּיָד֣וֹ יֽוֹם־חֹֽשֶׁךְ׃
כד יְֽ֭בַעֲתֻהוּ צַ֣ר וּמְצוּקָ֑ה
  תִּ֝תְקְפֵ֗הוּ כְּמֶ֤לֶךְ ׀ עָתִ֬יד לַכִּידֽוֹר׃
כה כִּֽי־נָטָ֣ה אֶל־אֵ֣ל יָד֑וֹ
  וְאֶל־שַׁ֝דַּ֗י יִתְגַּבָּֽר׃
כו יָר֣וּץ אֵלָ֣יו בְּצַוָּ֑אר
  בַּ֝עֲבִ֗י גַּבֵּ֥י מָגִנָּֽיו׃
כז כִּֽי־כִסָּ֣ה פָנָ֣יו בְּחֶלְבּ֑וֹ
  וַיַּ֖עַשׂ פִּימָ֣ה עֲלֵי־כָֽסֶל׃
כח וַיִּשְׁכּ֤וֹן ׀ עָ֘רִ֤ים נִכְחָד֗וֹת
  בָּ֭תִּים לֹא־יֵ֣שְׁבוּ לָ֑מוֹ
    אֲשֶׁ֖ר הִתְעַתְּד֣וּ לְגַלִּֽים׃
כט לֹֽא־יֶ֭עְשַׁר וְלֹא־יָק֣וּם חֵיל֑וֹ
  וְלֹא־יִטֶּ֖ה לָאָ֣רֶץ מִנְלָֽם׃
ל לֹֽא־יָס֨וּר ׀ מִנִּי־חֹ֗שֶׁךְ
  יֹ֭נַקְתּוֹ תְּיַבֵּ֣שׁ שַׁלְהָ֑בֶת
    וְ֝יָס֗וּר בְּר֣וּחַ פִּֽיו׃
לא אַל־יַאֲמֵ֣ן בַּשָּׁ֣ו נִתְעָ֑ה
  כִּי־שָׁ֗֝וְא תִּהְיֶ֥ה תְמוּרָתֽוֹ׃
לב בְּֽלֹא־י֭וֹמוֹ תִּמָּלֵ֑א
  וְ֝כִפָּת֗וֹ לֹ֣א רַעֲנָֽנָה׃
לג יַחְמֹ֣ס כַּגֶּ֣פֶן בִּסְר֑וֹ
  וְיַשְׁלֵ֥ךְ כַּ֝זַּ֗יִת נִצָּתֽוֹ׃
לד כִּֽי־עֲדַ֣ת חָנֵ֣ף גַּלְמ֑וּד
  וְ֝אֵ֗שׁ אָכְלָ֥ה אׇהֳלֵי־שֹֽׁחַד׃
לה הָרֹ֣ה עָ֭מָל וְיָ֣לֹֽד אָ֑וֶן
  וּ֝בִטְנָ֗ם תָּכִ֥ין מִרְמָֽה׃

טז א    וַיַּ֥עַן אִיּ֗וֹב וַיֹּאמַֽר׃
ב שָׁמַ֣עְתִּי כְאֵ֣לֶּה רַבּ֑וֹת
  מְנַחֲמֵ֖י עָמָ֣ל כֻּלְּכֶֽם׃
ג הֲקֵ֥ץ לְדִבְרֵי־ר֑וּחַ
  א֥וֹ מַה־יַּ֝מְרִֽיצְךָ֗ כִּ֣י תַֽעֲנֶֽה׃
ד גַּ֤ם ׀ אָנֹכִי֮ כָּכֶ֢ם אֲדַ֫בֵּ֥רָה
  ל֤וּ יֵ֪שׁ נַפְשְׁכֶ֡ם תַּ֤חַת נַפְשִׁ֗י
אַחְבִּ֣ירָה עֲלֵיכֶ֣ם בְּמִלִּ֑ים
  וְאָנִ֥יעָה עֲ֝לֵיכֶ֗ם בְּמ֣וֹ רֹאשִֽׁי׃
ה אֲאַמִּצְכֶ֥ם בְּמוֹ־פִ֑י
  וְנִ֖יד שְׂפָתַ֣י יַחְשֹֽׂךְ׃
ו אִֽם־אֲ֭דַבְּרָה לֹא־יֵחָשֵׂ֣ךְ כְּאֵבִ֑י
  וְ֝אַחְדְּלָ֗ה מַה־מִּנִּ֥י יַהֲלֹֽךְ׃
ז אַךְ־עַתָּ֥ה הֶלְאָ֑נִי
  הֲ֝שִׁמּ֗וֹתָ כׇּל־עֲדָתִֽי׃
ח וַֽ֭תִּקְמְטֵנִי לְעֵ֣ד הָיָ֑ה
  וַיָּ֥קׇם בִּ֥י כַ֝חֲשִׁ֗י בְּפָנַ֥י יַעֲנֶֽה׃
ט אַפּ֤וֹ טָרַ֨ף ׀ וַֽיִּשְׂטְמֵ֗נִי
  חָרַ֣ק עָלַ֣י בְּשִׁנָּ֑יו
    צָרִ֓י ׀ יִלְטֹ֖שׁ עֵינָ֣יו לִֽי׃
י פָּעֲר֬וּ עָלַ֨י ׀ בְּפִיהֶ֗ם
  בְּ֭חֶרְפָּה הִכּ֣וּ לְחָיָ֑י
    יַ֗֝חַד עָלַ֥י יִתְמַלָּאֽוּן׃
יא יַסְגִּירֵ֣נִי אֵ֭ל אֶ֣ל עֲוִ֑יל
  וְעַל־יְדֵ֖י רְשָׁעִ֣ים יִרְטֵֽנִי׃
יב שָׁ֘לֵ֤ו הָיִ֨יתִי ׀ וַֽיְפַרְפְּרֵ֗נִי
  וְאָחַ֣ז בְּ֭עׇרְפִּי וַֽיְפַצְפְּצֵ֑נִי
    וַיְקִימֵ֥נִי ל֗֝וֹ לְמַטָּרָֽה׃
יג יָ֘סֹ֤בּוּ עָלַ֨י ׀ רַבָּ֗יו
  יְפַלַּ֣ח כִּ֭לְיוֹתַי וְלֹ֣א יַחְמֹ֑ל
    יִשְׁפֹּ֥ךְ לָ֝אָ֗רֶץ מְרֵרָתִֽי׃
יד יִפְרְצֵ֣נִי פֶ֭רֶץ עַל־פְּנֵי־פָ֑רֶץ
  יָרֻ֖ץ עָלַ֣י כְּגִבּֽוֹר׃
טו שַׂ֣ק תָּ֭פַרְתִּי עֲלֵ֣י גִלְדִּ֑י
  וְעֹלַ֖לְתִּי בֶעָפָ֣ר קַרְנִֽי׃
טז פָּנַ֣י חמרמרה חֳ֭מַרְמְרוּ מִנִּי־בֶ֑כִי
  וְעַ֖ל עַפְעַפַּ֣י צַלְמָֽוֶת׃
יז עַ֭ל לֹא־חָמָ֣ס בְּכַפָּ֑י
  וּֽתְפִלָּתִ֥י זַכָּֽה׃
יח אֶ֭רֶץ אַל־תְּכַסִּ֣י דָמִ֑י
  וְֽאַל־יְהִ֥י מָ֝ק֗וֹם לְזַעֲקָתִֽי׃
יט גַּם־עַ֭תָּה הִנֵּה־בַשָּׁמַ֣יִם עֵדִ֑י
  וְ֝שָׂהֲדִ֗י בַּמְּרֹמִֽים׃
כ מְלִיצַ֥י רֵעָ֑י
  אֶל־אֱ֝ל֗וֹהַּ דָּלְפָ֥ה עֵינִֽי׃
כא וְיוֹכַ֣ח לְגֶ֣בֶר עִם־אֱל֑וֹהַּ
  וּֽבֶן־אָדָ֥ם לְרֵעֵֽהוּ׃
כב כִּֽי־שְׁנ֣וֹת מִסְפָּ֣ר יֶאֱתָ֑יוּ
  וְאֹ֖רַח לֹא־אָשׁ֣וּב אֶהֱלֹֽךְ׃
יז א רוּחִ֣י חֻ֭בָּלָה יָמַ֥י נִזְעָ֗כוּ
  קְבָרִ֥ים לִֽי׃
ב אִם־לֹ֣א הֲ֭תֻלִים עִמָּדִ֑י
  וּ֝בְהַמְּרוֹתָ֗ם תָּלַ֥ן עֵינִֽי׃
ג שִֽׂימָה־נָּ֭א עׇרְבֵ֣נִי עִמָּ֑ךְ
  מִ֥י ה֗֝וּא לְיָדִ֥י יִתָּקֵֽעַ׃
ד כִּֽי־לִ֭בָּם צָפַ֣נְתָּ מִּשָּׂ֑כֶל
  עַל־כֵּ֗֝ן לֹ֣א תְרֹמֵֽם׃
ה לְ֭חֵלֶק יַגִּ֣יד רֵעִ֑ים
  וְעֵינֵ֖י בָנָ֣יו תִּכְלֶֽנָה׃
ו וְֽ֭הִצִּיגַנִי לִמְשֹׁ֣ל עַמִּ֑ים
  וְתֹ֖פֶת לְפָנִ֣ים אֶהְיֶֽה׃
ז וַתֵּ֣כַהּ מִכַּ֣עַשׂ עֵינִ֑י
  וִיצֻרַ֖י כַּצֵּ֣ל כֻּלָּֽם׃
ח יָשֹׁ֣מּוּ יְשָׁרִ֣ים עַל־זֹ֑את
  וְ֝נָקִ֗י עַל־חָנֵ֥ף יִתְעֹרָֽר׃
ד ט וְיֹאחֵ֣ז צַדִּ֣יק דַּרְכּ֑וֹ
  וּֽטְהׇר־יָ֝דַ֗יִם יֹסִ֥יף אֹֽמֶץ׃
י וְֽאוּלָ֗ם כֻּלָּ֣ם תָּ֭שֻׁבוּ וּבֹ֣אוּ נָ֑א
  וְלֹֽא־אֶמְצָ֖א בָכֶ֣ם חָכָֽם׃
יא יָמַ֣י עָ֭בְרוּ זִמֹּתַ֣י נִתְּק֑וּ
  מ֖וֹרָשֵׁ֣י לְבָבִֽי׃
יב לַ֭יְלָה לְי֣וֹם יָשִׂ֑ימוּ
  א֗֝וֹר קָר֥וֹב מִפְּנֵי־חֹֽשֶׁךְ׃
יג אִם־אֲ֭קַוֶּה שְׁא֣וֹל בֵּיתִ֑י
  בַּ֝חֹ֗שֶׁךְ רִפַּ֥דְתִּי יְצוּעָֽי׃
יד לַשַּׁ֣חַת קָ֭רָאתִי אָ֣בִי אָ֑תָּה
  אִמִּ֥י וַ֝אֲחֹתִ֗י לָרִמָּֽה׃
טו וְ֭אַיֵּה אֵפ֣וֹ תִקְוָתִ֑י
  וְ֝תִקְוָתִ֗י מִ֣י יְשׁוּרֶֽנָּה׃
טז בַּדֵּ֣י שְׁאֹ֣ל תֵּרַ֑דְנָה
  אִם־יַ֖חַד עַל־עָפָ֣ר נָֽחַת׃

יח א    וַ֭יַּעַן בִּלְדַּ֥ד הַשֻּׁחִ֗י וַיֹּאמַֽר׃
ב עַד־אָ֤נָה ׀ תְּשִׂימ֣וּן קִנְצֵ֣י לְמִלִּ֑ין
  תָּ֝בִ֗ינוּ וְאַחַ֥ר נְדַבֵּֽר׃
ג מַ֭דּוּעַ נֶחְשַׁ֣בְנוּ כַבְּהֵמָ֑ה
  נִ֝טְמִ֗ינוּ בְּעֵינֵיכֶֽם׃
ד טֹרֵ֥ף נַפְשׁ֗וֹ בְּאַ֫פּ֥וֹ
  הַֽ֭לְמַעַנְךָ תֵּעָ֣זַב אָ֑רֶץ
    וְיֶעְתַּק־צ֗֝וּר מִמְּקֹמֽוֹ׃
ה גַּ֤ם א֣וֹר רְשָׁעִ֣ים יִדְעָ֑ךְ
  וְלֹא־יִ֝גַּ֗הּ שְׁבִ֣יב אִשּֽׁוֹ׃
ו א֭וֹר חָשַׁ֣ךְ בְּאׇהֳל֑וֹ
  וְ֝נֵר֗וֹ עָלָ֥יו יִדְעָֽךְ׃
ז יֵ֭צְרוּ צַעֲדֵ֣י אוֹנ֑וֹ
  וְֽתַשְׁלִיכֵ֥הוּ עֲצָתֽוֹ׃
ח כִּֽי־שֻׁלַּ֣ח בְּרֶ֣שֶׁת בְּרַגְלָ֑יו
  וְעַל־שְׂ֝בָכָ֗ה יִתְהַלָּֽךְ׃
ט יֹאחֵ֣ז בְּעָקֵ֣ב פָּ֑ח
  יַחֲזֵ֖ק עָלָ֣יו צַמִּֽים׃
י טָמ֣וּן בָּאָ֣רֶץ חַבְל֑וֹ
  וּ֝מַלְכֻּדְתּ֗וֹ עֲלֵ֣י נָתִֽיב׃
יא סָ֭בִיב בִּעֲתֻ֣הוּ בַלָּה֑וֹת
  וֶהֱפִיצֻ֥הוּ לְרַגְלָֽיו׃
יב יְהִֽי־רָעֵ֥ב אֹנ֑וֹ
  וְ֝אֵ֗יד נָכ֥וֹן לְצַלְעֽוֹ׃
יג יֹ֭אכַל בַּדֵּ֣י עוֹר֑וֹ
  יֹאכַ֥ל בַּ֝דָּ֗יו בְּכ֣וֹר מָֽוֶת׃
יד יִנָּתֵ֣ק מֵ֭אׇהֳלוֹ מִבְטַח֑וֹ
  וְ֝תַצְעִדֵ֗הוּ לְמֶ֣לֶךְ בַּלָּהֽוֹת׃
טו תִּשְׁכּ֣וֹן בְּ֭אׇהֳלוֹ מִבְּלִיל֑וֹ
  יְזֹרֶ֖ה עַל־נָוֵ֣הוּ גׇפְרִֽית׃
טז מִ֭תַּחַת שׇׁרָשָׁ֣יו יִבָ֑שׁוּ
  וּ֝מִמַּ֗עַל יִמַּ֥ל קְצִירֽוֹ׃
יז זִֽכְרוֹ־אָ֭בַד מִנִּי־אָ֑רֶץ
  וְלֹא־שֵׁ֥ם ל֗֝וֹ עַל־פְּנֵי־חֽוּץ׃
יח יֶ֭הְדְּפֻהוּ מֵא֣וֹר אֶל־חֹ֑שֶׁךְ
  וּֽמִתֵּבֵ֥ל יְנִדֻּֽהוּ׃
יט לֹ֘א נִ֤ין ל֣וֹ וְלֹא־נֶ֣כֶד בְּעַמּ֑וֹ
  וְאֵ֥ין שָׂ֝רִ֗יד בִּמְגוּרָֽיו׃
כ עַל־י֭וֹמוֹ נָשַׁ֣מּוּ אַחֲרֹנִ֑ים
  וְ֝קַדְמֹנִ֗ים אָ֣חֲזוּ שָֽׂעַר׃
כא אַךְ־אֵ֭לֶּה מִשְׁכְּנ֣וֹת עַוָּ֑ל
  וְ֝זֶ֗ה מְק֣וֹם לֹֽא־יָדַֽע־אֵֽל׃

יט א    וַיַּ֥עַן אִיּ֗וֹב וַיֹּאמַֽר׃
ב עַד־אָ֭נָה תּוֹגְי֣וּן נַפְשִׁ֑י
  וּֽתְדַכּאוּנַ֥נִי בְמִלִּֽים׃
ג זֶ֤ה עֶ֣שֶׂר פְּ֭עָמִים תַּכְלִימ֑וּנִי
  לֹֽא־תֵ֝בֹ֗שׁוּ תַּהְכְּרוּ־לִֽי׃
ד וְאַף־אׇמְנָ֥ם שָׁגִ֑יתִי
  אִ֝תִּ֗י תָּלִ֥ין מְשׁוּגָתִֽי׃
ה אִם־אׇ֭מְנָם עָלַ֣י תַּגְדִּ֑ילוּ
  וְתוֹכִ֥יחוּ עָ֝לַ֗י חֶרְפָּתִֽי׃
ו דְּֽעוּ־אֵ֭פוֹ כִּֽי־אֱל֣וֹהַּ עִוְּתָ֑נִי
  וּ֝מְצוּד֗וֹ עָלַ֥י הִקִּֽיף׃
ז הֵ֤ן אֶצְעַ֣ק חָ֭מָס וְלֹ֣א אֵעָנֶ֑ה
  אֲ֝שַׁוַּ֗ע וְאֵ֣ין מִשְׁפָּֽט׃
ח אׇרְחִ֣י גָ֭דַר וְלֹ֣א אֶעֱב֑וֹר
  וְעַ֥ל נְ֝תִיבוֹתַ֗י חֹ֣שֶׁךְ יָשִֽׂים׃
ט כְּ֭בוֹדִי מֵעָלַ֣י הִפְשִׁ֑יט
  וַ֝יָּ֗סַר עֲטֶ֣רֶת רֹאשִֽׁי׃
י יִתְּצֵ֣נִי סָ֭בִיב וָאֵלַ֑ךְ
  וַיַּסַּ֥ע כָּ֝עֵ֗ץ תִּקְוָתִֽי׃
יא וַיַּ֣חַר עָלַ֣י אַפּ֑וֹ
  וַיַּחְשְׁבֵ֖נִי ל֣וֹ כְצָרָֽיו׃
יב יַ֤חַד ׀ יָ֘בֹ֤אוּ גְדוּדָ֗יו וַיָּסֹ֣לּוּ עָלַ֣י דַּרְכָּ֑ם
  וַיַּחֲנ֖וּ סָבִ֣יב לְאׇהֳלִֽי׃
יג אַ֭חַי מֵעָלַ֣י הִרְחִ֑יק
  וְ֝יֹדְעַ֗י אַךְ־זָ֥רוּ מִמֶּֽנִּי׃
יד חָדְל֥וּ קְרוֹבָ֑י
  וּֽמְיֻדָּעַ֥י שְׁכֵחֽוּנִי׃
טו גָּ֘רֵ֤י בֵיתִ֣י וְ֭אַמְהֹתַי לְזָ֣ר תַּחְשְׁבֻ֑נִי
  נׇ֝כְרִ֗י הָיִ֥יתִי בְעֵינֵיהֶֽם׃
טז לְעַבְדִּ֣י קָ֭רָאתִי וְלֹ֣א יַעֲנֶ֑ה
  בְּ֝מוֹ־פִ֗י אֶתְחַנֶּן־לֽוֹ׃
יז ר֭וּחִי זָ֣רָה לְאִשְׁתִּ֑י
  וְ֝חַנֹּתִ֗י לִבְנֵ֥י בִטְנִֽי׃
יח גַּם־עֲ֭וִילִים מָ֣אֲסוּ בִ֑י
  אָ֝ק֗וּמָה וַיְדַבְּרוּ־בִֽי׃
יט תִּ֭עֲבוּנִי כׇּל־מְתֵ֣י סוֹדִ֑י
  וְזֶה־אָ֝הַ֗בְתִּי נֶהְפְּכוּ־בִֽי׃
כ בְּעוֹרִ֣י וּ֭בִבְשָׂרִי דָּבְקָ֣ה עַצְמִ֑י
  וָ֝אֶתְמַלְּטָ֗ה בְּע֣וֹר שִׁנָּֽי׃
כא חׇנֻּ֬נִי חׇנֻּ֣נִי אַתֶּ֣ם רֵעָ֑י
  כִּ֥י יַד־אֱ֝ל֗וֹהַּ נָ֣גְעָה בִּֽי׃
כב לָ֭מָּה תִּרְדְּפֻ֣נִי כְמוֹ־אֵ֑ל
  וּ֝מִבְּשָׂרִ֗י לֹ֣א תִשְׂבָּֽעוּ׃
כג מִי־יִתֵּ֣ן אֵ֭פוֹ וְיִכָּתְב֣וּן מִלָּ֑י
  מִי־יִתֵּ֖ן בַּסֵּ֣פֶר וְיֻחָֽקוּ׃
כד בְּעֵט־בַּרְזֶ֥ל וְעֹפָ֑רֶת
  לָ֝עַ֗ד בַּצּ֥וּר יֵחָצְבֽוּן׃
כה וַאֲנִ֣י יָ֭דַעְתִּי גֹּ֣אֲלִי חָ֑י
  וְ֝אַחֲר֗וֹן עַל־עָפָ֥ר יָקֽוּם׃
כו וְאַחַ֣ר ע֭וֹרִי נִקְּפוּ־זֹ֑את
  וּ֝מִבְּשָׂרִ֗י אֶחֱזֶ֥ה אֱלֽוֹהַּ׃
כז אֲשֶׁ֤ר אֲנִ֨י ׀ אֶחֱזֶה־לִּ֗י
  וְעֵינַ֣י רָא֣וּ וְלֹא־זָ֑ר
    כָּל֖וּ כִלְיֹתַ֣י בְּחֵקִֽי׃
כח כִּ֣י תֹ֭אמְרוּ מַה־נִּרְדׇּף־ל֑וֹ
  וְשֹׁ֥רֶשׁ דָּ֝בָ֗ר נִמְצָא־בִֽי׃
כט גּ֤וּרוּ לָכֶ֨ם ׀ מִפְּנֵי־חֶ֗רֶב
  כִּֽי־חֵ֭מָה עֲוֺנ֣וֹת חָ֑רֶב
    לְמַ֖עַן תֵּדְע֣וּן שדין שַׁדּֽוּן׃

כ א    וַ֭יַּעַן צֹפַ֥ר הַֽנַּעֲמָתִ֗י וַיֹּאמַֽר׃
ב לָ֭כֵן שְׂעִפַּ֣י יְשִׁיב֑וּנִי
  וּ֝בַעֲב֗וּר ח֣וּשִׁי בִֽי׃
ג מוּסַ֣ר כְּלִמָּתִ֣י אֶשְׁמָ֑ע
  וְ֝ר֗וּחַ מִֽבִּינָתִ֥י יַעֲנֵֽנִי׃
ד הֲזֹ֣את יָ֭דַעְתָּ מִנִּי־עַ֑ד
  מִנִּ֤י שִׂ֖ים אָדָ֣ם עֲלֵי־אָֽרֶץ׃
ה כִּ֤י רִנְנַ֣ת רְ֭שָׁעִים מִקָּר֑וֹב
  וְשִׂמְחַ֖ת חָנֵ֣ף עֲדֵי־רָֽגַע׃
ו אִם־יַעֲלֶ֣ה לַשָּׁמַ֣יִם שִׂיא֑וֹ
  וְ֝רֹאשׁ֗וֹ לָעָ֥ב יַגִּֽיעַ׃
ז כְּֽ֭גֶלְלוֹ לָנֶ֣צַח יֹאבֵ֑ד
  רֹ֝אָ֗יו יֹאמְר֥וּ אַיּֽוֹ׃
ח כַּחֲל֣וֹם יָ֭עוּף וְלֹ֣א יִמְצָאֻ֑הוּ
  וְ֝יֻדַּ֗ד כְּחֶזְי֥וֹן לָֽיְלָה׃
ט עַ֣יִן שְׁ֭זָפַתּוּ וְלֹ֣א תוֹסִ֑יף
  וְלֹֽא־ע֗֝וֹד תְּשׁוּרֶ֥נּוּ מְקוֹמֽוֹ׃
י בָּ֭נָיו יְרַצּ֣וּ דַלִּ֑ים
  וְ֝יָדָ֗יו תָּשֵׁ֥בְנָה אוֹנֽוֹ׃
יא עַ֭צְמוֹתָיו מָלְא֣וּ עֲלוּמָ֑ו
  וְ֝עִמּ֗וֹ עַל־עָפָ֥ר תִּשְׁכָּֽב׃
יב אִם־תַּמְתִּ֣יק בְּפִ֣יו רָעָ֑ה
  יַ֝כְחִידֶ֗נָּה תַּ֣חַת לְשֹׁנֽוֹ׃
יג יַחְמֹ֣ל עָ֭לֶיהָ וְלֹ֣א יַעַזְבֶ֑נָּה
  וְ֝יִמְנָעֶ֗נָּה בְּת֣וֹךְ חִכּֽוֹ׃
יד לַ֭חְמוֹ בְּמֵעָ֣יו נֶהְפָּ֑ךְ
  מְרוֹרַ֖ת פְּתָנִ֣ים בְּקִרְבּֽוֹ׃
טו חַ֣יִל בָּ֭לַע וַיְקִאֶ֑נּוּ
  מִ֝בִּטְנ֗וֹ יֹרִשֶׁ֥נּוּ אֵֽל׃
טז רֹאשׁ־פְּתָנִ֥ים יִינָ֑ק
  תַּ֝הַרְגֵ֗הוּ לְשׁ֣וֹן אֶפְעֶֽה׃
יז אַל־יֵ֥רֶא בִפְלַגּ֑וֹת
  נַהֲרֵ֥י נַ֝חֲלֵ֗י דְּבַ֣שׁ וְחֶמְאָֽה׃
יח מֵשִׁ֣יב יָ֭גָע וְלֹ֣א יִבְלָ֑ע
  כְּחֵ֥יל תְּ֝מוּרָת֗וֹ וְלֹ֣א יַעֲלֹֽס׃
יט כִּֽי־רִ֭צַּץ עָזַ֣ב דַּלִּ֑ים
  בַּ֥יִת גָּ֝זַ֗ל וְלֹ֣א יִבְנֵֽהוּ׃
כ כִּ֤י ׀ לֹא־יָדַ֣ע שָׁלֵ֣ו בְּבִטְנ֑וֹ
  בַּ֝חֲמוּד֗וֹ לֹ֣א יְמַלֵּֽט׃
כא אֵין־שָׂרִ֥יד לְאׇכְל֑וֹ
  עַל־כֵּ֗֝ן לֹא־יָחִ֥יל טוּבֽוֹ׃
כב בִּמְלֹ֣אות שִׂ֭פְקוֹ יֵ֣צֶר ל֑וֹ
  כׇּל־יַ֖ד עָמֵ֣ל תְּבֹאֶֽנּוּ׃
כג יְהִ֤י ׀ לְמַלֵּ֬א בִטְנ֗וֹ
  יְֽשַׁלַּח־בּ֭וֹ חֲר֣וֹן אַפּ֑וֹ
    וְיַמְטֵ֥ר עָ֝לֵ֗ימוֹ בִּלְחוּמֽוֹ׃
כד יִ֭בְרַח מִנֵּ֣שֶׁק בַּרְזֶ֑ל
  תַּ֝חְלְפֵ֗הוּ קֶ֣שֶׁת נְחוּשָֽׁה׃
כה שָׁלַף֮ וַיֵּצֵ֢א מִגֵּ֫וָ֥ה
  וּ֭בָרָק מִֽמְּרֹרָת֥וֹ יַהֲלֹ֗ךְ
  עָלָ֥יו אֵמִֽים׃
כו כׇּל־חֹשֶׁךְ֮ טָמ֢וּן לִצְפּ֫וּנָ֥יו
  תְּ֭אׇכְלֵהוּ אֵ֣שׁ לֹא־נֻפָּ֑ח
    יֵ֖רַע שָׂרִ֣יד בְּאׇהֳלֽוֹ׃
כז יְגַלּ֣וּ שָׁמַ֣יִם עֲוֺנ֑וֹ
  וְ֝אֶ֗רֶץ מִתְקוֹמָ֘מָ֥ה לֽוֹ׃
כח יִ֭גֶל יְב֣וּל בֵּית֑וֹ
  נִ֝גָּר֗וֹת בְּי֣וֹם אַפּֽוֹ׃
כט זֶ֤ה ׀ חֵלֶק־אָדָ֣ם רָ֭שָׁע מֵאֱלֹהִ֑ים
  וְנַחֲלַ֖ת אִמְר֣וֹ מֵאֵֽל׃

כא א    וַיַּ֥עַן אִיּ֗וֹב וַיֹּאמַֽר׃
ב שִׁמְע֣וּ שָׁ֭מוֹעַ מִלָּתִ֑י
  וּתְהִי־זֹ֗֝את תַּנְח֥וּמֹֽתֵיכֶֽם׃
ג שָׂ֭אוּנִי וְאָנֹכִ֣י אֲדַבֵּ֑ר
  וְאַחַ֖ר דַּבְּרִ֣י תַלְעִֽיג׃
ד הֶ֭אָנֹכִי לְאָדָ֣ם שִׂיחִ֑י
  וְאִם־מַ֝דּ֗וּעַ לֹֽא־תִקְצַ֥ר רוּחִֽי׃
ה פְּנוּ־אֵלַ֥י וְהָשַׁ֑מּוּ
  וְשִׂ֖ימוּ יָ֣ד עַל־פֶּֽה׃
ו וְאִם־זָכַ֥רְתִּי וְנִבְהָ֑לְתִּי
  וְאָחַ֥ז בְּ֝שָׂרִ֗י פַּלָּצֽוּת׃
ז מַ֭דּוּעַ רְשָׁעִ֣ים יִֽחְי֑וּ
  עָ֝תְק֗וּ גַּם־גָּ֥בְרוּ חָֽיִל׃
ח זַרְעָ֤ם נָכ֣וֹן לִפְנֵיהֶ֣ם עִמָּ֑ם
  וְ֝צֶאֱצָאֵיהֶ֗ם לְעֵינֵיהֶֽם׃
ט בָּתֵּיהֶ֣ם שָׁל֣וֹם מִפָּ֑חַד
  וְלֹ֤א שֵׁ֖בֶט אֱל֣וֹהַּ עֲלֵיהֶֽם׃
י שׁוֹר֣וֹ עִ֭בַּר וְלֹ֣א יַגְעִ֑ל
  תְּפַלֵּ֥ט פָּ֝רָת֗וֹ וְלֹ֣א תְשַׁכֵּֽל׃
יא יְשַׁלְּח֣וּ כַ֭צֹּאן עֲוִילֵיהֶ֑ם
  וְ֝יַלְדֵיהֶ֗ם יְרַקֵּדֽוּן׃
יב יִ֭שְׂאוּ כְּתֹ֣ף וְכִנּ֑וֹר
  וְ֝יִשְׂמְח֗וּ לְק֣וֹל עוּגָֽב׃
יג יבלו יְכַלּ֣וּ בַטּ֣וֹב יְמֵיהֶ֑ם
  וּ֝בְרֶ֗גַע שְׁא֣וֹל יֵחָֽתּוּ׃
יד וַיֹּאמְר֣וּ לָ֭אֵל ס֣וּר מִמֶּ֑נּוּ
  וְדַ֥עַת דְּ֝רָכֶ֗יךָ לֹ֣א חָפָֽצְנוּ׃
טו מַה־שַּׁדַּ֥י כִּֽי־נַעַבְדֶ֑נּוּ
  וּמַה־נּ֝וֹעִ֗יל כִּ֣י נִפְגַּע־בּֽוֹ׃
טז הֵ֤ן לֹ֣א בְיָדָ֣ם טוּבָ֑ם
  עֲצַ֥ת רְ֝שָׁעִ֗ים רָ֣חֲקָה מֶֽנִּי׃
יז כַּמָּ֤ה ׀ נֵר־רְשָׁ֘עִ֤ים יִדְעָ֗ךְ
  וְיָבֹ֣א עָלֵ֣ימוֹ אֵידָ֑ם
    חֲ֝בָלִ֗ים יְחַלֵּ֥ק בְּאַפּֽוֹ׃
יח יִֽהְי֗וּ כְּתֶ֥בֶן לִפְנֵי־ר֑וּחַ
  וּ֝כְמֹ֗ץ גְּנָבַ֥תּוּ סוּפָֽה׃
יט אֱל֗וֹהַּ יִצְפֹּן־לְבָנָ֥יו אוֹנ֑וֹ
  יְשַׁלֵּ֖ם אֵלָ֣יו וְיֵדָֽע׃
כ יִרְא֣וּ עֵינָ֣ו כִּיד֑וֹ
  וּמֵחֲמַ֖ת שַׁדַּ֣י יִשְׁתֶּֽה׃
כא כִּ֤י מַה־חֶפְצ֣וֹ בְּבֵית֣וֹ אַחֲרָ֑יו
  וּמִסְפַּ֖ר חֳדָשָׁ֣יו חֻצָּֽצוּ׃
כב הַלְאֵ֥ל יְלַמֶּד־דָּ֑עַת
  וְ֝ה֗וּא רָמִ֥ים יִשְׁפּֽוֹט׃
כג זֶ֗ה יָ֭מוּת בְּעֶ֣צֶם תֻּמּ֑וֹ
  כֻּ֝לּ֗וֹ שַׁלְאֲנַ֥ן וְשָׁלֵֽיו׃
כד עֲ֭טִינָיו מָלְא֣וּ חָלָ֑ב
  וּמֹ֖חַ עַצְמוֹתָ֣יו יְשֻׁקֶּֽה׃
כה וְזֶ֗ה יָ֭מוּת בְּנֶ֣פֶשׁ מָרָ֑ה
  וְלֹֽא־אָ֝כַ֗ל בַּטּוֹבָֽה׃
כו יַ֭חַד עַל־עָפָ֣ר יִשְׁכָּ֑בוּ
  וְ֝רִמָּ֗ה תְּכַסֶּ֥ה עֲלֵיהֶֽם׃
כז הֵ֣ן יָ֭דַעְתִּי מַחְשְׁבֽוֹתֵיכֶ֑ם
  וּ֝מְזִמּ֗וֹת עָלַ֥י תַּחְמֹֽסוּ׃
כח כִּ֤י תֹאמְר֗וּ אַיֵּ֥ה בֵית־נָדִ֑יב
  וְ֝אַיֵּ֗ה אֹ֤הֶל ׀ מִשְׁכְּנ֬וֹת רְשָׁעִֽים׃
כט הֲלֹ֣א שְׁ֭אֶלְתֶּם ע֣וֹבְרֵי דָ֑רֶךְ
  וְ֝אֹתֹתָ֗ם לֹ֣א תְנַכֵּֽרוּ׃
ל כִּ֤י לְי֣וֹם אֵ֭יד יֵחָ֣שֶׂךְ רָ֑ע
  לְי֖וֹם עֲבָר֣וֹת יוּבָֽלוּ׃
לא מִֽי־יַגִּ֣יד עַל־פָּנָ֣יו דַּרְכּ֑וֹ
  וְהוּא־עָ֝שָׂ֗ה מִ֣י יְשַׁלֶּם־לֽוֹ׃
לב וְ֭הוּא לִקְבָר֣וֹת יוּבָ֑ל
  וְֽעַל־גָּדִ֥ישׁ יִשְׁקֽוֹד׃
לג מָֽתְקוּ־ל֗וֹ רִגְבֵ֫י נָ֥חַל
  וְ֭אַחֲרָיו כׇּל־אָדָ֣ם יִמְשׁ֑וֹךְ
    וּ֝לְפָנָ֗יו אֵ֣ין מִסְפָּֽר׃
לד וְ֭אֵיךְ תְּנַחֲמ֣וּנִי הָ֑בֶל
  וּ֝תְשׁ֥וּבֹתֵיכֶ֗ם נִשְׁאַר־מָֽעַל׃

כב א    וַ֭יַּעַן אֱלִיפַ֥ז הַֽתֵּמָנִ֗י וַיֹּאמַֽר׃
ב הַלְאֵ֥ל יִסְכׇּן־גָּ֑בֶר
  כִּֽי־יִסְכֹּ֖ן עָלֵ֣ימוֹ מַשְׂכִּֽיל׃
ג הַחֵ֣פֶץ לְ֭שַׁדַּי כִּ֣י תִצְדָּ֑ק
  וְאִם־בֶּ֗֝צַע כִּֽי־תַתֵּ֥ם דְּרָכֶֽיךָ׃
ד הֲֽ֭מִיִּרְאָ֣תְךָ יֹכִיחֶ֑ךָ
  יָב֥וֹא עִ֝מְּךָ֗ בַּמִּשְׁפָּֽט׃
ה הֲלֹ֣א רָעָֽתְךָ֣ רַבָּ֑ה
  וְאֵֽין־קֵ֗֝ץ לַעֲוֺנֹתֶֽיךָ׃
ו כִּֽי־תַחְבֹּ֣ל אַחֶ֣יךָ חִנָּ֑ם
  וּבִגְדֵ֖י עֲרוּמִּ֣ים תַּפְשִֽׁיט׃
ז לֹא־מַ֭יִם עָיֵ֣ף תַּשְׁקֶ֑ה
  וּ֝מֵרָעֵ֗ב תִּֽמְנַֽע־לָֽחֶם׃
ח וְאִ֣ישׁ זְ֭רוֹעַ ל֣וֹ הָאָ֑רֶץ
  וּנְשׂ֥וּא פָ֝נִ֗ים יֵ֣שֶׁב בָּֽהּ׃
ט אַ֭לְמָנוֹת שִׁלַּ֣חְתָּ רֵיקָ֑ם
  וּזְרֹע֖וֹת יְתֹמִ֣ים יְדֻכָּֽא׃
י עַל־כֵּ֭ן סְבִיבוֹתֶ֣יךָ פַחִ֑ים
  וִ֝יבַהֶלְךָ֗ פַּ֣חַד פִּתְאֹֽם׃
יא אוֹ־חֹ֥שֶׁךְ לֹֽא־תִרְאֶ֑ה
  וְֽשִׁפְעַת־מַ֥יִם תְּכַסֶּֽךָּ׃
יב הֲֽלֹא־אֱ֭לוֹהַּ גֹּ֣בַהּ שָׁמָ֑יִם
  וּרְאֵ֤ה רֹ֖אשׁ כּוֹכָבִ֣ים כִּי־רָֽמּוּ׃
יג וְֽ֭אָמַרְתָּ מַה־יָּ֣דַֽע אֵ֑ל
  הַבְעַ֖ד עֲרָפֶ֣ל יִשְׁפּֽוֹט׃
יד עָבִ֣ים סֵֽתֶר־ל֭וֹ וְלֹ֣א יִרְאֶ֑ה
  וְח֥וּג שָׁ֝מַ֗יִם יִתְהַלָּֽךְ׃
טו הַאֹ֣רַח עוֹלָ֣ם תִּשְׁמ֑וֹר
  אֲשֶׁ֖ר דָּרְכ֣וּ מְתֵי־אָֽוֶן׃
טז אֲשֶֽׁר־קֻמְּט֥וּ וְלֹא־עֵ֑ת
  נָ֝הָ֗ר יוּצַ֥ק יְסוֹדָֽם׃
יז הָאֹמְרִ֣ים לָ֭אֵל ס֣וּר מִמֶּ֑נּוּ
  וּמַה־יִּפְעַ֖ל שַׁדַּ֣י לָֽמוֹ׃
יח וְה֤וּא מִלֵּ֣א בָתֵּיהֶ֣ם ט֑וֹב
  וַעֲצַ֥ת רְ֝שָׁעִ֗ים רָ֣חֲקָה מֶֽנִּי׃
יט יִרְא֣וּ צַדִּיקִ֣ים וְיִשְׂמָ֑חוּ
  וְ֝נָקִ֗י יִלְעַג־לָֽמוֹ׃
כ אִם־לֹ֣א נִכְחַ֣ד קִימָ֑נוּ
  וְ֝יִתְרָ֗ם אָ֣כְלָה אֵֽשׁ׃
כא הַסְכֶּן־נָ֣א עִמּ֣וֹ וּשְׁלָ֑ם
  בָּ֝הֶ֗ם תְּֽבוֹאַתְךָ֥ טוֹבָֽה׃
כב קַח־נָ֣א מִפִּ֣יו תּוֹרָ֑ה
  וְשִׂ֥ים אֲ֝מָרָ֗יו בִּלְבָבֶֽךָ׃
כג אִם־תָּשׁ֣וּב עַד־שַׁ֭דַּי תִּבָּנֶ֑ה
  תַּרְחִ֥יק עַ֝וְלָ֗ה מֵאׇהֳלֶֽךָ׃
כד וְשִׁית־עַל־עָפָ֥ר בָּ֑צֶר
  וּכְצ֖וּר נְחָלִ֣ים אוֹפִֽיר׃
כה וְהָיָ֣ה שַׁדַּ֣י בְּצָרֶ֑יךָ
  וְכֶ֖סֶף תּוֹעָפ֣וֹת לָֽךְ׃
כו כִּי־אָ֭ז עַל־שַׁדַּ֣י תִּתְעַנָּ֑ג
  וְתִשָּׂ֖א אֶל־אֱל֣וֹהַּ פָּנֶֽיךָ׃
כז תַּעְתִּ֣יר אֵ֭לָיו וְיִשְׁמָעֶ֑ךָּ
  וּנְדָרֶ֥יךָ תְשַׁלֵּֽם׃
כח וְֽתִגְזַר־אֹ֭מֶר וְיָ֣קׇם לָ֑ךְ
  וְעַל־דְּ֝רָכֶ֗יךָ נָ֣גַהּ אֽוֹר׃
כט כִּֽי־הִ֭שְׁפִּילוּ וַתֹּ֣אמֶר גֵּוָ֑ה
  וְשַׁ֖ח עֵינַ֣יִם יוֹשִֽׁעַ׃
ה ל יְמַלֵּ֥ט אִֽי־נָקִ֑י
  וְ֝נִמְלַ֗ט בְּבֹ֣ר כַּפֶּֽיךָ׃

כג א    וַיַּ֥עַן אִיּ֗וֹב וַיֹּאמַֽר׃
ב גַּם־הַ֭יּוֹם מְרִ֣י שִׂחִ֑י
  יָ֝דִ֗י כָּבְדָ֥ה עַל־אַנְחָתִֽי׃
ג מִֽי־יִתֵּ֣ן יָ֭דַעְתִּי וְאֶמְצָאֵ֑הוּ
  אָ֝ב֗וֹא עַד־תְּכוּנָתֽוֹ׃
ד אֶעֶרְכָ֣ה לְפָנָ֣יו מִשְׁפָּ֑ט
  וּ֝פִ֗י אֲמַלֵּ֥א תוֹכָחֽוֹת׃
ה אֵ֭דְעָה מִלִּ֣ים יַעֲנֵ֑נִי
  וְ֝אָבִ֗ינָה מַה־יֹּ֥אמַר לִֽי׃
ו הַבְּרׇב־כֹּ֭חַ יָרִ֣יב עִמָּדִ֑י
  לֹ֥א אַךְ־ה֗֝וּא יָשִׂ֥ם בִּֽי׃
ז שָׁ֗ם יָ֭שָׁר נוֹכָ֣ח עִמּ֑וֹ
  וַאֲפַלְּטָ֥ה לָ֝נֶ֗צַח מִשֹּׁפְטִֽי׃
ח הֵ֤ן קֶ֣דֶם אֶהֱלֹ֣ךְ וְאֵינֶ֑נּוּ
  וְ֝אָח֗וֹר וְֽלֹא־אָבִ֥ין לֽוֹ׃
ט שְׂמֹ֣אול בַּעֲשֹׂת֣וֹ וְלֹא־אָ֑חַז
  יַעְטֹ֥ף יָ֝מִ֗ין וְלֹ֣א אֶרְאֶֽה׃
י כִּֽי־יָ֭דַע דֶּ֣רֶךְ עִמָּדִ֑י
  בְּ֝חָנַ֗נִי כַּזָּהָ֥ב אֵצֵֽא׃
יא בַּ֭אֲשֻׁרוֹ אָחֲזָ֣ה רַגְלִ֑י
  דַּרְכּ֖וֹ שָׁמַ֣רְתִּי וְלֹא־אָֽט׃
יב מִצְוַ֣ת שְׂ֭פָתָיו וְלֹ֣א אָמִ֑ישׁ
  מֵ֝חֻקִּ֗י צָפַ֥נְתִּי אִמְרֵי־פִֽיו׃
יג וְה֣וּא בְ֭אֶחָד וּמִ֣י יְשִׁיבֶ֑נּוּ
  וְנַפְשׁ֖וֹ אִוְּתָ֣ה וַיָּֽעַשׂ׃
יד כִּ֭י יַשְׁלִ֣ים חֻקִּ֑י
  וְכָהֵ֖נָּה רַבּ֣וֹת עִמּֽוֹ׃
טו עַל־כֵּ֭ן מִפָּנָ֣יו אֶבָּהֵ֑ל
  אֶ֝תְבּוֹנֵ֗ן וְאֶפְחַ֥ד מִמֶּֽנּוּ׃
טז וְ֭אֵל הֵרַ֣ךְ לִבִּ֑י
  וְ֝שַׁדַּ֗י הִבְהִילָֽנִי׃
יז כִּֽי־לֹ֣א נִ֭צְמַתִּי מִפְּנֵי־חֹ֑שֶׁךְ
  וּ֝מִפָּנַ֗י כִּסָּה־אֹֽפֶל׃
כד א מַדּ֗וּעַ מִ֭שַּׁדַּי לֹא־נִצְפְּנ֣וּ עִתִּ֑ים
  וְ֝יֹדְעָ֗ו לֹא־חָ֥זוּ יָמָֽיו׃
ב גְּבֻל֥וֹת יַשִּׂ֑יגוּ
  עֵ֥דֶר גָּ֝זְל֗וּ וַיִּרְעֽוּ׃
ג חֲמ֣וֹר יְתוֹמִ֣ים יִנְהָ֑גוּ
  יַ֝חְבְּל֗וּ שׁ֣וֹר אַלְמָנָֽה׃
ד יַטּ֣וּ אֶבְיֹנִ֣ים מִדָּ֑רֶךְ
  יַ֥חַד חֻ֝בְּא֗וּ עֲנִיֵּי־אָֽרֶץ׃
ה הֵ֤ן פְּרָאִ֨ים ׀ בַּ֥מִּדְבָּ֗ר
  יָצְא֣וּ בְּ֭פׇעֳלָם מְשַׁחֲרֵ֣י לַטָּ֑רֶף
    עֲרָבָ֥ה ל֥וֹ לֶ֗֝חֶם לַנְּעָרִֽים׃
ו בַּ֭שָּׂדֶה בְּלִיל֣וֹ יקצירו יִקְצ֑וֹרוּ
  וְכֶ֖רֶם רָשָׁ֣ע יְלַקֵּֽשׁוּ׃
ז עָר֣וֹם יָ֭לִינוּ מִבְּלִ֣י לְב֑וּשׁ
  וְאֵ֥ין כְּ֝ס֗וּת בַּקָּרָֽה׃
ח מִזֶּ֣רֶם הָרִ֣ים יִרְטָ֑בוּ
  וּֽמִבְּלִ֥י מַ֝חְסֶ֗ה חִבְּקוּ־צֽוּר׃
ט יִ֭גְזְלוּ מִשֹּׁ֣ד יָת֑וֹם
  וְֽעַל־עָנִ֥י יַחְבֹּֽלוּ׃
י עָר֣וֹם הִ֭לְּכוּ בְּלִ֣י לְב֑וּשׁ
  וּ֝רְעֵבִ֗ים נָ֣שְׂאוּ עֹֽמֶר׃
יא בֵּין־שׁוּרֹתָ֥ם יַצְהִ֑ירוּ
  יְקָבִ֥ים דָּ֝רְכ֗וּ וַיִּצְמָֽאוּ׃
יב מֵ֘עִ֤יר מְתִ֨ים ׀ יִנְאָ֗קוּ
  וְנֶֽפֶשׁ־חֲלָלִ֥ים תְּשַׁוֵּ֑עַ
    וֶ֝אֱל֗וֹהַּ לֹֽא־יָשִׂ֥ים תִּפְלָֽה׃
יג הֵ֤מָּה ׀ הָיוּ֮ בְּֽמֹרְדֵ֫י א֥וֹר
  לֹא־הִכִּ֥ירוּ דְרָכָ֑יו
    וְלֹ֥א יָ֝שְׁב֗וּ בִּנְתִיבֹתָֽיו׃
יד לָא֡וֹר יָ֘ק֤וּם רוֹצֵ֗חַ
  יִֽקְטׇל־עָנִ֥י וְאֶבְי֑וֹן
    וּ֝בַלַּ֗יְלָה יְהִ֣י כַגַּנָּֽב׃
טו וְעֵ֤ין נֹאֵ֨ף ׀ שָׁ֤מְרָֽה נֶ֣שֶׁף לֵ֭אמֹר
  לֹא־תְשׁוּרֵ֣נִי עָ֑יִן
    וְסֵ֖תֶר פָּנִ֣ים יָשִֽׂים׃
טז חָתַ֥ר בַּחֹ֗שֶׁךְ בָּ֫תִּ֥ים
  יוֹמָ֥ם חִתְּמוּ־לָ֗מוֹ
    לֹא־יָ֥דְעוּ אֽוֹר׃
יז כִּ֤י יַחְדָּ֨ו ׀ בֹּ֣קֶר לָ֣מוֹ צַלְמָ֑וֶת
  כִּֽי־יַ֝כִּ֗יר בַּלְה֥וֹת צַלְמָֽוֶת׃
יח קַל־ה֤וּא ׀ עַל־פְּנֵי־מַ֗יִם
  תְּקֻלַּ֣ל חֶלְקָתָ֣ם בָּאָ֑רֶץ
    לֹא־יִ֝פְנֶ֗ה דֶּ֣רֶךְ כְּרָמִֽים׃
יט צִיָּ֤ה גַם־חֹ֗ם
  יִגְזְל֥וּ מֵֽימֵי־שֶׁ֗לֶג
    שְׁא֣וֹל חָטָֽאוּ׃
כ יִשְׁכָּ֘חֵ֤הוּ רֶ֨חֶם ׀ מְתָ֘ק֤וֹ רִמָּ֗ה
  ע֥וֹד לֹֽא־יִזָּכֵ֑ר
    וַתִּשָּׁבֵ֖ר כָּעֵ֣ץ עַוְלָֽה׃
כא רֹעֶ֣ה עֲ֭קָרָה לֹ֣א תֵלֵ֑ד
  וְ֝אַלְמָנָ֗ה לֹ֣א יְיֵטִֽיב׃
כב וּמָשַׁ֣ךְ אַבִּירִ֣ים בְּכֹח֑וֹ
  יָ֝ק֗וּם וְֽלֹא־יַאֲמִ֥ין בַּֽחַיִּֽין׃
כג יִתֶּן־ל֣וֹ לָ֭בֶטַח וְיִשָּׁעֵ֑ן
  וְ֝עֵינֵ֗יהוּ עַל־דַּרְכֵיהֶֽם׃
כד ר֤וֹמּוּ מְּעַ֨ט ׀ וְֽאֵינֶ֗נּוּ
  וְֽהֻמְּכ֗וּ כַּכֹּ֥ל יִקָּפְצ֑וּן
    וּכְרֹ֖אשׁ שִׁבֹּ֣לֶת יִמָּֽלוּ׃
כה וְאִם־לֹ֣א אֵ֭פוֹ מִ֣י יַכְזִיבֵ֑נִי
  וְיָשֵׂ֥ם לְ֝אַ֗ל מִלָּתִֽי׃

כה א    וַ֭יַּעַן בִּלְדַּ֥ד הַשֻּׁחִ֗י וַיֹּאמַֽר׃
ב הַמְשֵׁ֣ל וָפַ֣חַד עִמּ֑וֹ
  עֹשֶׂ֥ה שָׁ֝ל֗וֹם בִּמְרוֹמָֽיו׃
ג הֲיֵ֣שׁ מִ֭סְפָּר לִגְדוּדָ֑יו
  וְעַל־מִ֗֝י לֹא־יָק֥וּם אוֹרֵֽהוּ׃
ד וּמַה־יִּצְדַּ֣ק אֱנ֣וֹשׁ עִם־אֵ֑ל
  וּמַה־יִּ֝זְכֶּ֗ה יְל֣וּד אִשָּֽׁה׃
ה הֵ֣ן עַד־יָ֭רֵחַ וְלֹ֣א יַאֲהִ֑יל
  וְ֝כוֹכָבִ֗ים לֹא־זַכּ֥וּ בְעֵינָֽיו׃
ו אַ֭ף כִּֽי־אֱנ֣וֹשׁ רִמָּ֑ה
  וּבֶן־אָ֝דָ֗ם תּוֹלֵעָֽה׃

כו א    וַיַּ֥עַן אִיּ֗וֹב וַיֹּאמַֽר׃
ב מֶה־עָזַ֥רְתָּ לְלֹא־כֹ֑חַ
  ה֝וֹשַׁ֗עְתָּ זְר֣וֹעַ לֹא־עֹֽז׃
ג מַה־יָּ֭עַצְתָּ לְלֹ֣א חׇכְמָ֑ה
  וְ֝תֻשִׁיָּ֗ה לָרֹ֥ב הוֹדָֽעְתָּ׃
ד אֶת־מִ֭י הִגַּ֣דְתָּ מִלִּ֑ין
  וְנִשְׁמַת־מִ֗֝י יָצְאָ֥ה מִמֶּֽךָּ׃
ה הָרְפָאִ֥ים יְחוֹלָ֑לוּ
  מִתַּ֥חַת מַ֗֝יִם וְשֹׁכְנֵיהֶֽם׃
ו עָר֣וֹם שְׁא֣וֹל נֶגְדּ֑וֹ
  וְאֵ֥ין כְּ֝ס֗וּת לָאֲבַדּֽוֹן׃
ז נֹטֶ֣ה צָפ֣וֹן עַל־תֹּ֑הוּ
  תֹּ֥לֶה אֶ֗֝רֶץ עַל־בְּלִי־מָֽה׃
ח צֹרֵֽר־מַ֥יִם בְּעָבָ֑יו
  וְלֹֽא־נִבְקַ֖ע עָנָ֣ן תַּחְתָּֽם׃
ט מְאַחֵ֥ז פְּנֵֽי־כִסֵּ֑ה
  פַּרְשֵׁ֖ז עָלָ֣יו עֲנָנֽוֹ׃
י חֹֽק־חָ֭ג עַל־פְּנֵי־מָ֑יִם
  עַד־תַּכְלִ֖ית א֣וֹר עִם־חֹֽשֶׁךְ׃
יא עַמּוּדֵ֣י שָׁמַ֣יִם יְרוֹפָ֑פוּ
  וְ֝יִתְמְה֗וּ מִגַּעֲרָתֽוֹ׃
יב בְּ֭כֹחוֹ רָגַ֣ע הַיָּ֑ם
  ובתובנתו וּ֝בִתְבוּנָת֗וֹ מָ֣חַץ רָֽהַב׃
יג בְּ֭רוּחוֹ שָׁמַ֣יִם שִׁפְרָ֑ה
  חֹלְלָ֥ה יָ֝ד֗וֹ נָחָ֥שׁ בָּרִֽחַ׃
יד הֶן־אֵ֤לֶּה ׀ קְצ֬וֹת דְּרָכָ֗ו
  וּמַה־שֵּׁ֣מֶץ דָּ֭בָר נִשְׁמַע־בּ֑וֹ
    וְרַ֥עַם גְּ֝בוּרֹתָ֗ו מִ֣י יִתְבּוֹנָֽן׃

כז א    וַיֹּ֣סֶף אִ֭יּוֹב שְׂאֵ֥ת מְשָׁל֗וֹ וַיֹּאמַֽר׃
ב חַי־אֵ֭ל הֵסִ֣יר מִשְׁפָּטִ֑י
  וְ֝שַׁדַּ֗י הֵמַ֥ר נַפְשִֽׁי׃
ג כִּי־כׇל־ע֣וֹד נִשְׁמָתִ֣י בִ֑י
  וְר֖וּחַ אֱל֣וֹהַּ בְּאַפִּֽי׃
ד אִם־תְּדַבֵּ֣רְנָה שְׂפָתַ֣י עַוְלָ֑ה
  וּ֝לְשׁוֹנִ֗י אִם־יֶהְגֶּ֥ה רְמִיָּֽה׃
ה חָלִ֣ילָה לִּי֮ אִם־אַצְדִּ֢יק אֶ֫תְכֶ֥ם
  עַד־אֶגְוָ֑ע
  לֹֽא־אָסִ֖יר תֻּמָּתִ֣י מִמֶּֽנִּי׃
ו בְּצִדְקָתִ֣י הֶ֭חֱזַקְתִּי וְלֹ֣א אַרְפֶּ֑הָ
  לֹא־יֶחֱרַ֥ף לְ֝בָבִ֗י מִיָּמָֽי׃
ז יְהִ֣י כְ֭רָשָׁע אֹ֣יְבִ֑י
  וּמִתְקוֹמְמִ֥י כְעַוָּֽל׃
ח כִּ֤י מַה־תִּקְוַ֣ת חָ֭נֵף כִּ֣י יִבְצָ֑ע
  כִּ֤י יֵ֖שֶׁל אֱל֣וֹהַּ נַפְשֽׁוֹ׃
ט הֲֽ֭צַעֲקָתוֹ יִשְׁמַ֥ע ׀ אֵ֑ל
  כִּֽי־תָב֖וֹא עָלָ֣יו צָרָֽה׃
י אִם־עַל־שַׁדַּ֥י יִתְעַנָּ֑ג
  יִקְרָ֖א אֱל֣וֹהַּ בְּכׇל־עֵֽת׃
יא אוֹרֶ֣ה אֶתְכֶ֣ם בְּיַד־אֵ֑ל
  אֲשֶׁ֥ר עִם־שַׁ֝דַּ֗י לֹ֣א אֲכַחֵֽד׃
יב הֵן־אַתֶּ֣ם כֻּלְּכֶ֣ם חֲזִיתֶ֑ם
  וְלָמָּה־זֶּ֗֝ה הֶ֣בֶל תֶּהְבָּֽלוּ׃
יג זֶ֤ה ׀ חֵלֶק־אָדָ֖ם רָשָׁ֥ע ׀ עִם־אֵ֑ל
  וְֽנַחֲלַ֥ת עָ֝רִיצִ֗ים מִשַּׁדַּ֥י יִקָּֽחוּ׃
יד אִם־יִרְבּ֣וּ בָנָ֣יו לְמוֹ־חָ֑רֶב
  וְ֝צֶאֱצָאָ֗יו לֹ֣א יִשְׂבְּעוּ־לָֽחֶם׃
טו שְׂ֭רִידָו בַּמָּ֣וֶת יִקָּבֵ֑רוּ
  וְ֝אַלְמְנֹתָ֗יו לֹ֣א תִבְכֶּֽינָה׃
טז אִם־יִצְבֹּ֣ר כֶּעָפָ֣ר כָּ֑סֶף
  וְ֝כַחֹ֗מֶר יָכִ֥ין מַלְבּֽוּשׁ׃
יז יָ֭כִין וְצַדִּ֣יק יִלְבָּ֑שׁ
  וְ֝כֶ֗סֶף נָקִ֥י יַחֲלֹֽק׃
יח בָּנָ֣ה כָעָ֣שׁ בֵּית֑וֹ
  וּ֝כְסֻכָּ֗ה עָשָׂ֥ה נֹצֵֽר׃
יט עָשִׁ֣יר יִ֭שְׁכַּב וְלֹ֣א יֵאָסֵ֑ף
  עֵינָ֖יו פָּקַ֣ח וְאֵינֶֽנּוּ׃
כ תַּשִּׂיגֵ֣הוּ כַ֭מַּיִם בַּלָּה֑וֹת
  לַ֗֝יְלָה גְּנָבַ֥תּוּ סוּפָֽה׃
כא יִשָּׂאֵ֣הוּ קָדִ֣ים וְיֵלַ֑ךְ
  וִ֝ישָׂעֲרֵ֗הוּ מִמְּקֹמֽוֹ׃
כב וְיַשְׁלֵ֣ךְ עָ֭לָיו וְלֹ֣א יַחְמֹ֑ל
  מִ֝יָּד֗וֹ בָּר֥וֹחַ יִבְרָֽח׃
כג יִשְׂפֹּ֣ק עָלֵ֣ימוֹ כַפֵּ֑ימוֹ
  וְיִשְׁרֹ֥ק עָ֝לָ֗יו מִמְּקֹמֽוֹ׃
כח א כִּ֤י יֵ֣שׁ לַכֶּ֣סֶף מוֹצָ֑א
  וּ֝מָק֗וֹם לַזָּהָ֥ב יָזֹֽקּוּ׃
ב בַּ֭רְזֶל מֵֽעָפָ֣ר יֻקָּ֑ח
  וְ֝אֶ֗בֶן יָצ֥וּק נְחוּשָֽׁה׃
ג קֵ֤ץ ׀ שָׂ֤ם לַחֹ֗שֶׁךְ
  וּֽלְכׇל־תַּ֭כְלִית ה֣וּא חוֹקֵ֑ר
    אֶ֖בֶן אֹ֣פֶל וְצַלְמָֽוֶת׃
ד פָּ֤רַץ נַ֨חַל ׀ מֵֽעִם־גָּ֗ר
  הַֽנִּשְׁכָּחִ֥ים מִנִּי־רָ֑גֶל
    דַּ֖לּוּ מֵאֱנ֣וֹשׁ נָֽעוּ׃
ה אֶ֗רֶץ מִמֶּ֥נָּה יֵֽצֵא־לָ֑חֶם
    וְ֝תַחְתֶּ֗יהָ נֶהְפַּ֥ךְ כְּמוֹ־אֵֽשׁ׃
ו מְקוֹם־סַפִּ֥יר אֲבָנֶ֑יהָ
  וְעַפְרֹ֖ת זָהָ֣ב לֽוֹ׃
ז נָ֭תִיב לֹא־יְדָ֣עוֹ עָ֑יִט
  וְלֹ֥א שְׁ֝זָפַ֗תּוּ עֵ֣ין אַיָּֽה׃
ח לֹֽא־הִדְרִיכ֥וּהוּ בְנֵֽי־שָׁ֑חַץ
  לֹֽא־עָדָ֖ה עָלָ֣יו שָֽׁחַל׃
ט בַּ֭חַלָּמִישׁ שָׁלַ֣ח יָד֑וֹ
  הָפַ֖ךְ מִשֹּׁ֣רֶשׁ הָרִֽים׃
י בַּ֭צּוּרוֹת יְאֹרִ֣ים בִּקֵּ֑עַ
  וְכׇל־יְ֝קָ֗ר רָאֲתָ֥ה עֵינֽוֹ׃
יא מִ֭בְּכִי נְהָר֣וֹת חִבֵּ֑שׁ
  וְ֝תַעֲלֻמָ֗הּ יֹ֣צִא אֽוֹר׃

יב וְֽ֭הַחׇכְמָה מֵאַ֣יִן תִּמָּצֵ֑א
  וְאֵ֥י זֶ֗֝ה מְק֣וֹם בִּינָֽה׃
יג לֹא־יָדַ֣ע אֱנ֣וֹשׁ עֶרְכָּ֑הּ
  וְלֹ֥א תִ֝מָּצֵ֗א בְּאֶ֣רֶץ הַחַיִּֽים׃
יד תְּה֣וֹם אָ֭מַר לֹ֣א בִי־הִ֑יא
  וְיָ֥ם אָ֝מַ֗ר אֵ֣ין עִמָּדִֽי׃
טו לֹֽא־יֻתַּ֣ן סְג֣וֹר תַּחְתֶּ֑יהָ
  וְלֹ֥א יִ֝שָּׁקֵ֗ל כֶּ֣סֶף מְחִירָֽהּ׃
טז לֹֽא־תְ֭סֻלֶּה בְּכֶ֣תֶם אוֹפִ֑יר
  בְּשֹׁ֖הַם יָקָ֣ר וְסַפִּֽיר׃
יז לֹא־יַעַרְכֶ֣נָּה זָ֭הָב וּזְכוֹכִ֑ית
  וּתְמ֖וּרָתָ֣הּ כְּלִי־פָֽז׃
יח רָאמ֣וֹת וְ֭גָבִישׁ לֹ֣א יִזָּכֵ֑ר
  וּמֶ֥שֶׁךְ חׇ֝כְמָ֗ה מִפְּנִינִֽים׃
יט לֹֽא־יַ֭עַרְכֶנָּה פִּטְדַת־כּ֑וּשׁ
  בְּכֶ֥תֶם טָ֝ה֗וֹר לֹ֣א תְסֻלֶּֽה׃
כ וְֽ֭הַחׇכְמָה מֵאַ֣יִן תָּב֑וֹא
  וְאֵ֥י זֶ֗֝ה מְק֣וֹם בִּינָֽה׃
כא וְֽ֭נֶעֶלְמָה מֵעֵינֵ֣י כׇל־חָ֑י
  וּמֵע֖וֹף הַשָּׁמַ֣יִם נִסְתָּֽרָה׃
כב אֲבַדּ֣וֹן וָ֭מָוֶת אָ֣מְר֑וּ
  בְּ֝אׇזְנֵ֗ינוּ שָׁמַ֥עְנוּ שִׁמְעָֽהּ׃
כג אֱ֭לֹהִים הֵבִ֣ין דַּרְכָּ֑הּ
  וְ֝ה֗וּא יָדַ֥ע אֶת־מְקוֹמָֽהּ׃
כד כִּי־ה֭וּא לִקְצוֹת־הָאָ֣רֶץ יַבִּ֑יט
  תַּ֖חַת כׇּל־הַשָּׁמַ֣יִם יִרְאֶֽה׃
כה לַעֲשׂ֣וֹת לָר֣וּחַ מִשְׁקָ֑ל
  וּ֝מַ֗יִם תִּכֵּ֥ן בְּמִדָּֽה׃
כו בַּעֲשֹׂת֣וֹ לַמָּטָ֣ר חֹ֑ק
  וְ֝דֶ֗רֶךְ לַחֲזִ֥יז קֹלֽוֹת׃
כז אָ֣ז רָ֭אָהּ וַֽיְסַפְּרָ֑הּ
  הֱ֝כִינָ֗הּ וְגַם־חֲקָרָֽהּ׃
כח וַיֹּ֤אמֶר ׀ לָאָדָ֗ם
  הֵ֤ן יִרְאַ֣ת אֲ֭דֹנָי הִ֣יא חׇכְמָ֑ה
    וְס֖וּר מֵרָ֣ע בִּינָֽה׃

כט א    וַיֹּ֣סֶף אִ֭יּוֹב שְׂאֵ֥ת מְשָׁל֗וֹ וַיֹּאמַֽר׃
ב מִֽי־יִתְּנֵ֥נִי כְיַרְחֵי־קֶ֑דֶם
  כִּ֝ימֵ֗י אֱל֣וֹהַּ יִשְׁמְרֵֽנִי׃
ג בְּהִלּ֣וֹ נֵ֭רוֹ עֲלֵ֣י רֹאשִׁ֑י
  לְ֝אוֹר֗וֹ אֵ֣לֶךְ חֹֽשֶׁךְ׃
ד כַּאֲשֶׁ֣ר הָ֭יִיתִי בִּימֵ֣י חׇרְפִּ֑י
  בְּס֥וֹד אֱ֝ל֗וֹהַּ עֲלֵ֣י אׇהֳלִֽי׃
ה בְּע֣וֹד שַׁ֭דַּי עִמָּדִ֑י
  סְבִ֖יבוֹתַ֣י נְעָרָֽי׃
ו בִּרְחֹ֣ץ הֲלִיכַ֣י בְּחֵמָ֑ה
  וְצ֥וּר יָצ֥וּק עִ֝מָּדִ֗י פַּלְגֵי־שָֽׁמֶן׃
ז בְּצֵ֣אתִי שַׁ֣עַר עֲלֵי־קָ֑רֶת
  בָּ֝רְח֗וֹב אָכִ֥ין מוֹשָׁבִֽי׃
ח רָא֣וּנִי נְעָרִ֣ים וְנֶחְבָּ֑אוּ
  וִ֝ישִׁישִׁ֗ים קָ֣מוּ עָמָֽדוּ׃
ט שָׂ֭רִים עָצְר֣וּ בְמִלִּ֑ים
  וְ֝כַ֗ף יָשִׂ֥ימוּ לְפִיהֶֽם׃
י קוֹל־נְגִידִ֥ים נֶחְבָּ֑אוּ
  וּ֝לְשׁוֹנָ֗ם לְחִכָּ֥ם דָּבֵֽקָה׃
יא כִּ֤י אֹ֣זֶן שָׁ֭מְעָה וַֽתְּאַשְּׁרֵ֑נִי
  וְעַ֥יִן רָ֝אֲתָ֗ה וַתְּעִידֵֽנִי׃
יב כִּֽי־אֲ֭מַלֵּט עָנִ֣י מְשַׁוֵּ֑עַ
  וְ֝יָת֗וֹם וְֽלֹא־עֹזֵ֥ר לֽוֹ׃
יג בִּרְכַּ֣ת אֹ֭בֵד עָלַ֣י תָּבֹ֑א
  וְלֵ֖ב אַלְמָנָ֣ה אַרְנִֽן׃
ו יד צֶ֣דֶק לָ֭בַשְׁתִּי וַיִּלְבָּשֵׁ֑נִי
  כִּמְעִ֥יל וְ֝צָנִ֗יף מִשְׁפָּטִֽי׃
טו עֵינַ֣יִם הָ֭יִיתִי לַעִוֵּ֑ר
  וְרַגְלַ֖יִם לַפִּסֵּ֣חַ אָֽנִי׃
טז אָ֣ב אָ֭נֹכִ֥י לָאֶבְיוֹנִ֑ים
  וְרִ֖ב לֹא־יָדַ֣עְתִּי אֶחְקְרֵֽהוּ׃
יז וָ֭אֲשַׁבְּרָה מְתַלְּע֣וֹת עַוָּ֑ל
  וּ֝מִשִּׁנָּ֗יו אַשְׁלִ֥יךְ טָֽרֶף׃
יח וָ֭אֹמַר עִם־קִנִּ֣י אֶגְוָ֑ע
  וְ֝כַח֗וֹל אַרְבֶּ֥ה יָמִֽים׃
יט שׇׁרְשִׁ֣י פָת֣וּחַ אֱלֵי־מָ֑יִם
  וְ֝טַ֗ל יָלִ֥ין בִּקְצִירִֽי׃
כ כְּ֭בוֹדִי חָדָ֣שׁ עִמָּדִ֑י
  וְ֝קַשְׁתִּ֗י בְּיָדִ֥י תַחֲלִֽיף׃
כא לִֽי־שָׁמְע֥וּ וְיִחֵ֑לּוּ
  וְ֝יִדְּמ֗וּ לְמ֣וֹ עֲצָתִֽי׃
כב אַחֲרֵ֣י דְ֭בָרִי לֹ֣א יִשְׁנ֑וּ
  וְ֝עָלֵ֗ימוֹ תִּטֹּ֥ף מִלָּתִֽי׃
כג וְיִחֲל֣וּ כַמָּטָ֣ר לִ֑י
  וּ֝פִיהֶ֗ם פָּעֲר֥וּ לְמַלְקֽוֹשׁ׃
כד אֶשְׂחַ֣ק אֲ֭לֵהֶם לֹ֣א יַאֲמִ֑ינוּ
  וְא֥וֹר פָּ֝נַ֗י לֹ֣א יַפִּילֽוּן׃
כה אֶ֥בְחַ֣ר דַּרְכָּם֮ וְאֵשֵׁ֢ב רֹ֥֫אשׁ
  וְ֭אֶשְׁכּוֹן כְּמֶ֣לֶךְ בַּגְּד֑וּד
    כַּאֲשֶׁ֖ר אֲבֵלִ֣ים יְנַחֵֽם׃
ל א וְעַתָּ֤ה ׀ שָׂ֥חֲק֣וּ עָלַי֮
  צְעִירִ֥ים מִמֶּ֗נִּי לְיָ֫מִ֥ים
אֲשֶׁר־מָאַ֥סְתִּי אֲבוֹתָ֑ם
  לָ֝שִׁ֗ית עִם־כַּלְבֵ֥י צֹאנִֽי׃
ב גַּם־כֹּ֣חַ יְ֭דֵיהֶם לָ֣מָּה לִּ֑י
  עָ֝לֵ֗ימוֹ אָ֣בַד כָּֽלַח׃
ג בְּחֶ֥סֶר וּבְכָפָ֗ן גַּ֫לְמ֥וּד
  הַעֹרְקִ֥ים צִיָּ֑ה
  אֶ֗֝מֶשׁ שׁוֹאָ֥ה וּמְשֹׁאָֽה׃
ד הַקֹּטְפִ֣ים מַלּ֣וּחַ עֲלֵי־שִׂ֑יחַ
  וְשֹׁ֖רֶשׁ רְתָמִ֣ים לַחְמָֽם׃
ה מִן־גֵּ֥ו יְגֹרָ֑שׁוּ
  יָרִ֥יעוּ עָ֝לֵ֗ימוֹ כַּגַּנָּֽב׃
ו בַּעֲר֣וּץ נְחָלִ֣ים לִשְׁכֹּ֑ן
  חֹרֵ֖י עָפָ֣ר וְכֵפִֽים׃
ז בֵּין־שִׂיחִ֥ים יִנְהָ֑קוּ
  תַּ֖חַת חָר֣וּל יְסֻפָּֽחוּ׃
ח בְּֽנֵי־נָ֭בָל גַּם־בְּנֵ֣י בְלִי־שֵׁ֑ם
  נִ֝כְּא֗וּ מִן־הָאָֽרֶץ׃
ט וְ֭עַתָּה נְגִינָתָ֣ם הָיִ֑יתִי
  וָאֱהִ֖י לָהֶ֣ם לְמִלָּֽה׃
י תִּ֭עֲבוּנִי רָ֣חֲקוּ מֶ֑נִּי
  וּ֝מִפָּנַ֗י לֹא־חָ֥שְׂכוּ רֹֽק׃
יא כִּֽי־יִתְרִ֣י יתרו פִ֭תַּח וַיְעַנֵּ֑נִי
  וְ֝רֶ֗סֶן מִפָּנַ֥י שִׁלֵּֽחוּ׃
יב עַל־יָמִין֮ פִּרְחַ֢ח יָ֫ק֥וּמוּ
  רַגְלַ֥י שִׁלֵּ֑חוּ
  וַיָּסֹ֥לּוּ עָ֝לַ֗י אׇרְח֥וֹת אֵידָֽם׃
יג נָֽתְס֗וּ נְֽתִיבָ֫תִ֥י
  לְהַוָּתִ֥י יֹעִ֑ילוּ
    לֹ֖א עֹזֵ֣ר לָֽמוֹ׃
יד כְּפֶ֣רֶץ רָחָ֣ב יֶאֱתָ֑יוּ
  תַּ֥חַת שֹׁ֝אָ֗ה הִתְגַּלְגָּֽלוּ׃
טו הׇהְפַּ֥ךְ עָלַ֗י בַּלָּ֫ה֥וֹת
  תִּרְדֹּ֣ף כָּ֭רוּחַ נְדִבָתִ֑י
    וּ֝כְעָ֗ב עָבְרָ֥ה יְשֻׁעָתִֽי׃
טז וְעַתָּ֗ה עָ֭לַי תִּשְׁתַּפֵּ֣ךְ נַפְשִׁ֑י
  יֹ֖אחֲז֣וּנִי יְמֵי־עֹֽנִי׃
יז לַ֗יְלָה עֲ֭צָמַי נִקַּ֣ר מֵעָלָ֑י
  וְ֝עֹרְקַ֗י לֹ֣א יִשְׁכָּבֽוּן׃
יח בְּרׇב־כֹּ֭חַ יִתְחַפֵּ֣שׂ לְבוּשִׁ֑י
  כְּפִ֖י כֻתׇּנְתִּ֣י יַאַזְרֵֽנִי׃
יט הֹרָ֥נִי לַחֹ֑מֶר
  וָ֝אֶתְמַשֵּׁ֗ל כֶּעָפָ֥ר וָאֵֽפֶר׃
כ אֲשַׁוַּ֣ע אֵ֭לֶיךָ וְלֹ֣א תַֽעֲנֵ֑נִי
  עָ֝מַ֗דְתִּי וַתִּתְבֹּ֥נֶן בִּֽי׃
כא תֵּהָפֵ֣ךְ לְאַכְזָ֣ר לִ֑י
  בְּעֹ֖צֶם יָדְךָ֣ תִשְׂטְמֵֽנִי׃
כב תִּשָּׂאֵ֣נִי אֶל־ר֭וּחַ תַּרְכִּיבֵ֑נִי
  וּ֝תְמֹגְגֵ֗נִי תשוה תּוּשִׁיָּֽה׃
כג כִּֽי־יָ֭דַעְתִּי מָ֣וֶת תְּשִׁיבֵ֑נִי
  וּבֵ֖ית מוֹעֵ֣ד לְכׇל־חָֽי׃
כד אַ֣ךְ לֹֽא־בְ֭עִי יִשְׁלַח־יָ֑ד
  אִם־בְּ֝פִיד֗וֹ לָהֶ֥ן שֽׁוּעַ׃
כה אִם־לֹ֣א בָ֭כִיתִי לִקְשֵׁה־י֑וֹם
  עָֽגְמָ֥ה נַ֝פְשִׁ֗י לָאֶבְיֽוֹן׃
כו כִּ֤י ט֣וֹב קִ֭וִּיתִי וַיָּ֣בֹא רָ֑ע
  וַאֲיַחֲלָ֥ה לְ֝א֗וֹר וַיָּ֥בֹא אֹֽפֶל׃
כז מֵעַ֖י רֻתְּח֥וּ וְלֹא־דָ֗מּוּ
  קִדְּמֻ֥נִי יְמֵי־עֹֽנִי׃
כח קֹדֵ֣ר הִ֭לַּכְתִּי בְּלֹ֣א חַמָּ֑ה
  קַ֖מְתִּי בַקָּהָ֣ל אֲשַׁוֵּֽעַ׃
כט אָ֭ח הָיִ֣יתִי לְתַנִּ֑ים
  וְ֝רֵ֗עַ לִבְנ֥וֹת יַעֲנָֽה׃
ל ע֭וֹרִי שָׁחַ֣ר מֵעָלָ֑י
  וְעַצְמִי־חָ֗֝רָה מִנִּי־חֹֽרֶב׃
לא וַיְהִ֣י לְ֭אֵבֶל כִּנֹּרִ֑י
  וְ֝עֻגָבִ֗י לְק֣וֹל בֹּכִֽים׃
לא א בְּ֭רִית כָּרַ֣תִּי לְעֵינָ֑י
  וּמָ֥ה אֶ֝תְבּוֹנֵ֗ן עַל־בְּתוּלָֽה׃
ב וּמֶ֤ה ׀ חֵ֣לֶק אֱל֣וֹהַּ מִמָּ֑עַל
  וְֽנַחֲלַ֥ת שַׁ֝דַּ֗י מִמְּרֹמִֽים׃
ג הֲלֹא־אֵ֥יד לְעַוָּ֑ל
  וְ֝נֵ֗כֶר לְפֹ֣עֲלֵי אָֽוֶן׃
ד הֲלֹא־ה֭וּא יִרְאֶ֣ה דְרָכָ֑י
  וְֽכׇל־צְעָדַ֥י יִסְפּֽוֹר׃
ה אִם־הָלַ֥כְתִּי עִם־שָׁ֑וְא
  וַתַּ֖חַשׁ עַל־מִרְמָ֣ה רַגְלִֽי׃
ו יִשְׁקְלֵ֥נִי בְמֹֽאזְנֵי־צֶ֑דֶק
  וְיֵדַ֥ע אֱ֝ל֗וֹהַּ תֻּמָּתִֽי׃
ז אִ֥ם תִּטֶּ֣ה אַשֻּׁרִי֮ מִנִּ֢י הַ֫דָּ֥רֶךְ
  וְאַחַ֣ר עֵ֭ינַי הָלַ֣ךְ לִבִּ֑י
    וּ֝בְכַפַּ֗י דָּ֣בַק מֽאוּם׃
ח אֶ֭זְרְעָה וְאַחֵ֣ר יֹאכֵ֑ל
  וְֽצֶאֱצָאַ֥י יְשֹׁרָֽשׁוּ׃
ט אִם־נִפְתָּ֣ה לִ֭בִּי עַל־אִשָּׁ֑ה
  וְעַל־פֶּ֖תַח רֵעִ֣י אָרָֽבְתִּי׃
י תִּטְחַ֣ן לְאַחֵ֣ר אִשְׁתִּ֑י
  וְ֝עָלֶ֗יהָ יִכְרְע֥וּן אֲחֵרִֽין׃
יא כִּי־הִ֥יא הוא זִמָּ֑ה
  והיא וְ֝ה֗וּא עָוֺ֥ן פְּלִילִֽים׃
יב כִּ֤י אֵ֣שׁ הִ֭יא עַד־אֲבַדּ֣וֹן תֹּאכֵ֑ל
  וּֽבְכׇל־תְּב֖וּאָתִ֣י תְשָׁרֵֽשׁ׃
יג אִם־אֶמְאַ֗ס מִשְׁפַּ֣ט עַ֭בְדִּי וַאֲמָתִ֑י
  בְּ֝רִבָ֗ם עִמָּדִֽי׃
יד וּמָ֣ה אֶ֭עֱשֶׂה כִּֽי־יָק֣וּם אֵ֑ל
  וְכִי־יִ֝פְקֹ֗ד מָ֣ה אֲשִׁיבֶֽנּוּ׃
טו הֲֽלֹא־בַ֭בֶּטֶן עֹשֵׂ֣נִי עָשָׂ֑הוּ
  וַ֝יְכֻנֶ֗נּוּ בָּרֶ֥חֶם אֶחָֽד׃
טז אִם־אֶ֭מְנַע מֵחֵ֣פֶץ דַּלִּ֑ים
  וְעֵינֵ֖י אַלְמָנָ֣ה אֲכַלֶּֽה׃
יז וְאֹכַ֣ל פִּתִּ֣י לְבַדִּ֑י
  וְלֹֽא־אָכַ֖ל יָת֣וֹם מִמֶּֽנָּה׃
יח כִּ֣י מִ֭נְּעוּרַי גְּדֵלַ֣נִי כְאָ֑ב
  וּמִבֶּ֖טֶן אִמִּ֣י אַנְחֶֽנָּה׃
יט אִם־אֶרְאֶ֣ה א֭וֹבֵד מִבְּלִ֣י לְב֑וּשׁ
  וְאֵ֥ין כְּ֝ס֗וּת לָאֶבְיֽוֹן׃
כ אִם־לֹ֣א בֵרְכ֣וּנִי חֲלָצָ֑ו
  וּמִגֵּ֥ז כְּ֝בָשַׂ֗י יִתְחַמָּֽם׃
כא אִם־הֲנִיפ֣וֹתִי עַל־יָת֣וֹם יָדִ֑י
  כִּֽי־אֶרְאֶ֥ה בַ֝שַּׁ֗עַר עֶזְרָתִֽי׃
כב כְּ֭תֵפִי מִשִּׁכְמָ֣ה תִפּ֑וֹל
  וְ֝אֶזְרֹעִ֗י מִקָּנָ֥ה תִשָּׁבֵֽר׃
כג כִּ֤י פַ֣חַד אֵ֭לַי אֵ֣יד אֵ֑ל
  וּ֝מִשְּׂאֵת֗וֹ לֹ֣א אוּכָֽל׃
כד אִם־שַׂ֣מְתִּי זָהָ֣ב כִּסְלִ֑י
  וְ֝לַכֶּ֗תֶם אָמַ֥רְתִּי מִבְטַחִֽי׃
כה אִם־אֶ֭שְׂמַח כִּֽי־רַ֣ב חֵילִ֑י
  וְכִֽי־כַ֝בִּ֗יר מָצְאָ֥ה יָדִֽי׃
כו אִם־אֶרְאֶ֣ה א֭וֹר כִּ֣י יָהֵ֑ל
  וְ֝יָרֵ֗חַ יָקָ֥ר הֹלֵֽךְ׃
כז וַיִּ֣פְתְּ בַּסֵּ֣תֶר לִבִּ֑י
  וַתִּשַּׁ֖ק יָדִ֣י לְפִֽי׃
כח גַּם־ה֭וּא עָוֺ֣ן פְּלִילִ֑י
  כִּֽי־כִחַ֖שְׁתִּי לָאֵ֣ל מִמָּֽעַל׃
כט אִם־אֶ֭שְׂמַח בְּפִ֣יד מְשַׂנְאִ֑י
  וְ֝הִתְעֹרַ֗רְתִּי כִּֽי־מְצָ֥אוֹ רָֽע׃
ל וְלֹא־נָתַ֣תִּי לַחֲטֹ֣א חִכִּ֑י
  לִשְׁאֹ֖ל בְּאָלָ֣ה נַפְשֽׁוֹ׃
לא אִם־לֹ֣א אָ֭מְרוּ מְתֵ֣י אׇהֳלִ֑י
  מִי־יִתֵּ֥ן מִ֝בְּשָׂר֗וֹ לֹ֣א נִשְׂבָּֽע׃
לב בַּ֭חוּץ לֹא־יָלִ֣ין גֵּ֑ר
  דְּ֝לָתַ֗י לָאֹ֥רַח אֶפְתָּֽח׃
לג אִם־כִּסִּ֣יתִי כְאָדָ֣ם פְּשָׁעָ֑י
  לִטְמ֖וֹן בְּחֻבִּ֣י עֲוֺנִֽי׃
לד כִּ֤י אֶעֱר֨וֹץ ׀ הָ֘מ֤וֹן רַבָּ֗ה
  וּבוּז־מִשְׁפָּח֥וֹת יְחִתֵּ֑נִי
    וָ֝אֶדֹּ֗ם לֹא־אֵ֥צֵא פָֽתַח׃
לה מִ֤י יִתֶּן־לִ֨י ׀ שֹׁ֘מֵ֤עַֽ לִ֗י
  הֶן־תָּ֭וִי שַׁדַּ֣י יַעֲנֵ֑נִי
    וְסֵ֥פֶר כָּ֝תַ֗ב אִ֣ישׁ רִיבִֽי׃
לו אִם־לֹ֣א עַל־שִׁ֭כְמִי אֶשָּׂאֶ֑נּוּ
  אֶעֶנְדֶ֖נּוּ עֲטָר֣וֹת לִֽי׃
לז מִסְפַּ֣ר צְ֭עָדַי אַגִּידֶ֑נּוּ
  כְּמוֹ־נָ֝גִ֗יד אֲקָֽרְבֶֽנּוּ׃
לח אִם־עָ֭לַי אַדְמָתִ֣י תִזְעָ֑ק
  וְ֝יַ֗חַד תְּלָמֶ֥יהָ יִבְכָּיֽוּן׃
לט אִם־כֹּ֭חָהּ אָכַ֣לְתִּי בְלִי־כָ֑סֶף
  וְנֶ֖פֶשׁ בְּעָלֶ֣יהָ הִפָּֽחְתִּי׃
מ תַּ֤חַת חִטָּ֨ה ׀ יֵ֥צֵא ח֗וֹחַ
  וְתַֽחַת־שְׂעֹרָ֥ה בׇאְשָׁ֑ה
תַּ֗֝מּוּ דִּבְרֵ֥י אִיּֽוֹב׃

לב א וַֽיִּשְׁבְּת֡וּ שְׁלֹ֤שֶׁת הָאֲנָשִׁ֣ים הָ֭אֵלֶּה
  מֵעֲנ֣וֹת אֶת־אִיּ֑וֹב
    כִּ֤י ה֖וּא צַדִּ֣יק בְּעֵינָֽיו׃

ב וַיִּ֤חַר אַ֨ף ׀
  אֱלִיה֣וּא בֶן־בַּרַכְאֵ֣ל הַבּוּזִי֮
    מִמִּשְׁפַּ֢חַ֫ת רָ֥ם
בְּ֭אִיּוֹב חָרָ֣ה אַפּ֑וֹ
  עַֽל־צַדְּק֥וֹ נַ֝פְשׁ֗וֹ מֵאֱלֹהִֽים׃
ג וּבִשְׁלֹ֣שֶׁת רֵעָיו֮ חָרָ֢ה אַ֫פּ֥וֹ
  עַ֤ל אֲשֶׁ֣ר לֹא־מָצְא֣וּ מַעֲנֶ֑ה
    וַ֝יַּרְשִׁ֗יעוּ אֶת־אִיּֽוֹב׃
ד וֶאֱלִיה֗וּ חִכָּ֣ה אֶת־אִ֭יּוֹב בִּדְבָרִ֑ים
  כִּ֤י זְֽקֵנִים־הֵ֖מָּה מִמֶּ֣נּוּ לְיָמִֽים׃
ה וַיַּ֤רְא אֱלִיה֗וּא כִּ֘י אֵ֤ין מַֽעֲנֶ֗ה
  בְּ֭פִי שְׁלֹ֥שֶׁת הָֽאֲנָשִׁ֗ים
  וַיִּ֥חַר אַפּֽוֹ׃

ו וַיַּ֤עַן ׀ אֱלִיה֖וּא בֶן־בַּרַכְאֵ֥ל הַבּוּזִ֗י
  וַיֹּ֫אמַ֥ר
צָ֘עִ֤יר אֲנִ֣י לְ֭יָמִים וְאַתֶּ֣ם יְשִׁישִׁ֑ים
  עַל־כֵּ֖ן זָחַ֥לְתִּי וָאִירָ֓א ׀
    מֵחַוֺּ֖ת דֵּעִ֣י אֶתְכֶֽם׃
ז אָ֭מַרְתִּי יָמִ֣ים יְדַבֵּ֑רוּ
  וְרֹ֥ב שָׁ֝נִ֗ים יֹדִ֥יעוּ חׇכְמָֽה׃
ח אָ֭כֵן רוּחַ־הִ֣יא בֶאֱנ֑וֹשׁ
  וְנִשְׁמַ֖ת שַׁדַּ֣י תְּבִינֵֽם׃
ט לֹא־רַבִּ֥ים יֶחְכָּ֑מוּ
  וּ֝זְקֵנִ֗ים יָבִ֥ינוּ מִשְׁפָּֽט׃
י לָכֵ֣ן אָ֭מַרְתִּי שִׁמְעָה־לִּ֑י
  אֲחַוֶּ֖ה דֵעִ֣י אַף־אָֽנִי׃
יא הֵ֤ן הוֹחַ֨לְתִּי ׀ לְֽדִבְרֵיכֶ֗ם
  אָ֭זִין עַד־תְּב֥וּנֹֽתֵיכֶ֑ם
    עַֽד־תַּחְקְר֥וּן מִלִּֽין׃
יב וְעָ֥דֵיכֶ֗ם אֶתְבּ֫וֹנָ֥ן
  וְהִנֵּ֤ה אֵ֣ין לְאִיּ֣וֹב מוֹכִ֑יחַ
    עוֹנֶ֖ה אֲמָרָ֣יו מִכֶּֽם׃
יג פֶּן־תֹּ֣֭אמְרוּ מָצָ֣אנוּ חׇכְמָ֑ה
  אֵ֖ל יִדְּפֶ֣נּוּ לֹא־אִֽישׁ׃
יד וְלֹא־עָרַ֣ךְ אֵלַ֣י מִלִּ֑ין
  וּ֝בְאִמְרֵיכֶ֗ם לֹ֣א אֲשִׁיבֶֽנּוּ׃
טו חַ֭תּוּ לֹא־עָ֣נוּ ע֑וֹד
  הֶעְתִּ֖יקוּ מֵהֶ֣ם מִלִּֽים׃
טז וְ֭הוֹחַלְתִּי כִּי־לֹ֣א יְדַבֵּ֑רוּ
  כִּ֥י עָ֝מְד֗וּ לֹא־עָ֥נוּ עֽוֹד׃
יז אַעֲנֶ֣ה אַף־אֲנִ֣י חֶלְקִ֑י
  אֲחַוֶּ֖ה דֵעִ֣י אַף־אָֽנִי׃
יח כִּ֭י מָלֵ֣תִי מִלִּ֑ים
  הֱ֝צִיקַ֗תְנִי ר֣וּחַ בִּטְנִֽי׃
יט הִנֵּֽה־בִטְנִ֗י
  כְּיַ֥יִן לֹֽא־יִפָּתֵ֑חַ
    כְּאֹב֥וֹת חֲ֝דָשִׁ֗ים יִבָּקֵֽעַ׃
כ אֲדַבְּרָ֥ה וְיִֽרְוַֽח־לִ֑י
  אֶפְתַּ֖ח שְׂפָתַ֣י וְאֶעֱנֶֽה׃
כא אַל־נָ֭א אֶשָּׂ֣א פְנֵי־אִ֑ישׁ
  וְאֶל־אָ֝דָ֗ם לֹ֣א אֲכַנֶּֽה׃
כב כִּ֤י לֹ֣א יָדַ֣עְתִּי אֲכַנֶּ֑ה
  כִּ֝מְעַ֗ט יִשָּׂאֵ֥נִי עֹשֵֽׂנִי׃
לג א וְֽאוּלָ֗ם שְׁמַֽע־נָ֣א אִיּ֣וֹב מִלָּ֑י
  וְֽכׇל־דְּבָרַ֥י הַאֲזִֽינָה׃
ב הִנֵּה־נָ֭א פָּתַ֣חְתִּי פִ֑י
  דִּבְּרָ֖ה לְשׁוֹנִ֣י בְחִכִּֽי׃
ג יֹשֶׁר־לִבִּ֥י אֲמָרָ֑י
  וְדַ֥עַת שְׂ֝פָתַ֗י בָּר֥וּר מִלֵּֽלוּ׃
ד רֽוּחַ־אֵ֥ל עָשָׂ֑תְנִי
  וְנִשְׁמַ֖ת שַׁדַּ֣י תְּחַיֵּֽנִי׃
ה אִם־תּוּכַ֥ל הֲשִׁיבֵ֑נִי
  עֶרְכָ֥ה לְ֝פָנַ֗י הִתְיַצָּֽבָה׃
ו הֵן־אֲנִ֣י כְפִ֣יךָ לָאֵ֑ל
  מֵ֝חֹ֗מֶר קֹרַ֥צְתִּי גַם־אָֽנִי׃
ז הִנֵּ֣ה אֵ֭מָתִי לֹ֣א תְבַעֲתֶ֑ךָּ
  וְ֝אַכְפִּ֗י עָלֶ֥יךָ לֹֽא־יִכְבָּֽד׃
ח אַ֭ךְ אָמַ֣רְתָּ בְאׇזְנָ֑י
  וְק֖וֹל מִלִּ֣ין אֶשְׁמָֽע׃
ט זַ֥ךְ אֲנִ֗י בְּֽלִ֫י פָ֥שַׁע
  חַ֥ף אָנֹכִ֑י
  וְלֹ֖א עָוֺ֣ן לִֽי׃
י הֵ֣ן תְּ֭נוּאוֹת עָלַ֣י יִמְצָ֑א
  יַחְשְׁבֵ֖נִי לְאוֹיֵ֣ב לֽוֹ׃
יא יָשֵׂ֣ם בַּסַּ֣ד רַגְלָ֑י
  יִ֝שְׁמֹ֗ר כׇּל־אׇרְחֹתָֽי׃
יב הֶן־זֹ֣את לֹא־צָדַ֣קְתָּ אֶעֱנֶ֑ךָּ
  כִּי־יִרְבֶּ֥ה אֱ֝ל֗וֹהַּ מֵאֱנֽוֹשׁ׃
יג מַ֭דּוּעַ אֵלָ֣יו רִיב֑וֹתָ
  כִּ֥י כׇל־דְּ֝בָרָ֗יו לֹ֣א יַעֲנֶֽה׃
יד כִּֽי־בְאַחַ֥ת יְדַבֶּר־אֵ֑ל
  וּ֝בִשְׁתַּ֗יִם לֹ֣א יְשׁוּרֶֽנָּה׃
טו בַּחֲל֤וֹם ׀ חֶזְי֬וֹן לַ֗יְלָה
  בִּנְפֹ֣ל תַּ֭רְדֵּמָה עַל־אֲנָשִׁ֑ים
    בִּ֝תְנוּמ֗וֹת עֲלֵ֣י מִשְׁכָּֽב׃
טז אָ֣ז יִ֭גְלֶה אֹ֣זֶן אֲנָשִׁ֑ים
  וּבְמֹ֖סָרָ֣ם יַחְתֹּֽם׃
יז לְ֭הָסִיר אָדָ֣ם מַעֲשֶׂ֑ה
  וְגֵוָ֖ה מִגֶּ֣בֶר יְכַסֶּֽה׃
יח יַחְשֹׂ֣ךְ נַ֭פְשׁוֹ מִנִּי־שָׁ֑חַת
  וְ֝חַיָּת֗וֹ מֵעֲבֹ֥ר בַּשָּֽׁלַח׃
יט וְהוּכַ֣ח בְּ֭מַכְאוֹב עַל־מִשְׁכָּב֑וֹ
  וריב וְר֖וֹב עֲצָמָ֣יו אֵתָֽן׃
כ וְזִהֲמַ֣תּוּ חַיָּת֣וֹ לָ֑חֶם
  וְ֝נַפְשׁ֗וֹ מַאֲכַ֥ל תַּאֲוָֽה׃
כא יִ֣כֶל בְּשָׂר֣וֹ מֵרֹ֑אִי
  ושפי וְשֻׁפּ֥וּ עַ֝צְמֹתָ֗יו לֹ֣א רֻאּֽוּ׃
כב וַתִּקְרַ֣ב לַשַּׁ֣חַת נַפְשׁ֑וֹ
  וְ֝חַיָּת֗וֹ לַֽמְמִתִֽים׃
כג אִם־יֵ֤שׁ עָלָ֨יו ׀ מַלְאָ֗ךְ מֵלִ֗יץ
  אֶחָ֥ד מִנִּי־אָ֑לֶף
    לְהַגִּ֖יד לְאָדָ֣ם יָשְׁרֽוֹ׃
כד וַיְחֻנֶּ֗נּוּ וַיֹּ֗אמֶר
  פְּ֭דָעֵהוּ מֵרֶ֥דֶת שָׁ֗חַת
  מָצָ֥אתִי כֹֽפֶר׃
כה רֻֽטְפַ֣שׁ בְּשָׂר֣וֹ מִנֹּ֑עַר
  יָ֝שׁ֗וּב לִימֵ֥י עֲלוּמָֽיו׃
כו יֶעְתַּ֤ר אֶל־אֱל֨וֹהַּ ׀ וַיִּרְצֵ֗הוּ
  וַיַּ֣רְא פָּ֭נָיו בִּתְרוּעָ֑ה
    וַיָּ֥שֶׁב לֶ֝אֱנ֗וֹשׁ צִדְקָתֽוֹ׃
כז יָשֹׁ֤ר ׀ עַל־אֲנָשִׁ֗ים וַיֹּ֗אמֶר
  חָ֭טָאתִי וְיָשָׁ֥ר הֶעֱוֵ֗יתִי
  וְלֹא־שָׁ֥וָה לִֽי׃
כח פָּדָ֣ה נפשי נַ֭פְשׁוֹ מֵעֲבֹ֣ר בַּשָּׁ֑חַת
  וחיתי וְ֝חַיָּת֗וֹ בָּא֥וֹר תִּרְאֶֽה׃
כט הֶן־כׇּל־אֵ֭לֶּה יִפְעַל־אֵ֑ל
  פַּעֲמַ֖יִם שָׁל֣וֹשׁ עִם־גָּֽבֶר׃
ל לְהָשִׁ֣יב נַ֭פְשׁוֹ מִנִּי־שָׁ֑חַת
  לֵ֝א֗וֹר בְּא֣וֹר הַחַיִּֽים׃
לא הַקְשֵׁ֖ב אִיּ֥וֹב שְֽׁמַֽע־לִ֑י
  הַ֝חֲרֵ֗שׁ וְאָנֹכִ֥י אֲדַבֵּֽר׃
לב אִם־יֵשׁ־מִלִּ֥ין הֲשִׁיבֵ֑נִי
  דַּ֝בֵּ֗ר כִּֽי־חָפַ֥צְתִּי צַדְּקֶֽךָּ׃
ז לג אִם־אַ֭יִן אַתָּ֥ה שְֽׁמַֽע־לִ֑י
  הַ֝חֲרֵ֗שׁ וַאֲאַלֶּפְךָ֥ חׇכְמָֽה׃

לד א    וַיַּ֥עַן אֱלִיה֗וּא וַיֹּאמַֽר׃
ב שִׁמְע֣וּ חֲכָמִ֣ים מִלָּ֑י
  וְ֝יֹֽדְעִ֗ים הַֽאֲזִ֥ינוּ לִֽי׃
ג כִּי־אֹ֭זֶן מִלִּ֣ין תִּבְחָ֑ן
  וְ֝חֵ֗ךְ יִטְעַ֥ם לֶאֱכֹֽל׃
ד מִשְׁפָּ֥ט נִבְחֲרָה־לָּ֑נוּ
  נֵדְעָ֖ה בֵינֵ֣ינוּ מַה־טּֽוֹב׃
ה כִּֽי־אָמַ֣ר אִיּ֣וֹב צָדַ֑קְתִּי
  וְ֝אֵ֗ל הֵסִ֥יר מִשְׁפָּטִֽי׃
ו עַל־מִשְׁפָּטִ֥י אֲכַזֵּ֑ב
  אָנ֖וּשׁ חִצִּ֣י בְלִי־פָֽשַׁע׃
ז מִי־גֶ֥בֶר כְּאִיּ֑וֹב
  יִֽשְׁתֶּה־לַּ֥עַג כַּמָּֽיִם׃
ח וְאָרַ֣ח לְ֭חֶבְרָה עִם־פֹּ֣עֲלֵי אָ֑וֶן
  וְ֝לָלֶ֗כֶת עִם־אַנְשֵׁי־רֶֽשַׁע׃
ט כִּֽי־אָ֭מַר לֹ֣א יִסְכׇּן־גָּ֑בֶר
  בִּ֝רְצֹת֗וֹ עִם־אֱלֹהִֽים׃
י לָכֵ֤ן ׀ אַ֥נְשֵׁ֥י לֵבָ֗ב שִׁמְע֫וּ לִ֥י
  חָלִ֖לָה לָאֵ֥ל מֵרֶ֗שַׁע
  וְשַׁדַּ֥י מֵעָֽוֶל׃
יא כִּ֤י פֹ֣עַל אָ֭דָם יְשַׁלֶּם־ל֑וֹ
  וּֽכְאֹ֥רַח אִ֗֝ישׁ יַמְצִאֶֽנּוּ׃
יב אַף־אׇמְנָ֗ם אֵ֥ל לֹֽא־יַרְשִׁ֑יעַ
  וְ֝שַׁדַּ֗י לֹא־יְעַוֵּ֥ת מִשְׁפָּֽט׃
יג מִֽי־פָקַ֣ד עָלָ֣יו אָ֑רְצָה
  וּמִ֥י שָׂ֝֗ם תֵּבֵ֥ל כֻּלָּֽהּ׃
יד אִם־יָשִׂ֣ים אֵלָ֣יו לִבּ֑וֹ
  רוּח֥וֹ וְ֝נִשְׁמָת֗וֹ אֵלָ֥יו יֶאֱסֹֽף׃
טו יִגְוַ֣ע כׇּל־בָּשָׂ֣ר יָ֑חַד
  וְ֝אָדָ֗ם עַל־עָפָ֥ר יָשֽׁוּב׃
טז וְאִם־בִּ֥ינָה שִׁמְעָה־זֹּ֑את
  הַ֝אֲזִ֗ינָה לְק֣וֹל מִלָּֽי׃
יז הַאַ֬ף שׂוֹנֵ֣א מִשְׁפָּ֣ט יַחֲב֑וֹשׁ
  וְאִם־צַדִּ֖יק כַּבִּ֣יר תַּרְשִֽׁיעַ׃
יח הַאֲמֹ֣ר לְמֶ֣לֶךְ בְּלִיָּ֑עַל
  רָ֝שָׁ֗ע אֶל־נְדִיבִֽים׃
יט אֲשֶׁ֤ר לֹֽא־נָשָׂ֨א ׀ פְּנֵ֥י שָׂרִ֗ים
  וְלֹ֣א נִכַּר־שׁ֭וֹעַ לִפְנֵי־דָ֑ל
    כִּֽי־מַעֲשֵׂ֖ה יָדָ֣יו כֻּלָּֽם׃
כ רֶ֤גַע ׀ יָמֻתוּ֮ וַחֲצ֢וֹת לָ֥֫יְלָה
  יְגֹעֲשׁ֣וּ עָ֣ם וְיַעֲבֹ֑רוּ
    וְיָסִ֥ירוּ אַ֝בִּ֗יר לֹ֣א בְיָֽד׃
כא כִּֽי־עֵ֭ינָיו עַל־דַּרְכֵי־אִ֑ישׁ
  וְֽכׇל־צְעָדָ֥יו יִרְאֶֽה׃
כב אֵֽין־חֹ֭שֶׁךְ וְאֵ֣ין צַלְמָ֑וֶת
  לְהִסָּ֥תֶר שָׁ֝֗ם פֹּ֣עֲלֵי אָֽוֶן׃
כג כִּ֤י לֹ֣א עַל־אִ֭ישׁ יָשִׂ֣ים ע֑וֹד
  לַהֲלֹ֥ךְ אֶל־אֵ֗֝ל בַּמִּשְׁפָּֽט׃
כד יָרֹ֣עַ כַּבִּירִ֣ים לֹא־חֵ֑קֶר
  וַיַּעֲמֵ֖ד אֲחֵרִ֣ים תַּחְתָּֽם׃
כה לָכֵ֗ן יַ֭כִּיר מַעְבָּדֵיהֶ֑ם
  וְהָ֥פַךְ לַ֗֝יְלָה וְיִדַּכָּֽאוּ׃
כו תַּֽחַת־רְשָׁעִ֥ים סְפָקָ֗ם
  בִּמְק֥וֹם רֹאִֽים׃
כז אֲשֶׁ֣ר עַל־כֵּ֭ן סָ֣רוּ מֵאַחֲרָ֑יו
  וְכׇל־דְּ֝רָכָ֗יו לֹ֣א הִשְׂכִּֽילוּ׃
כח לְהָבִ֣יא עָ֭לָיו צַעֲקַת־דָּ֑ל
  וְצַעֲקַ֖ת עֲנִיִּ֣ים יִשְׁמָֽע׃
כט וְה֤וּא יַשְׁקִ֨ט ׀ וּמִ֥י יַרְשִׁ֗עַ
  וְיַסְתֵּ֣ר פָּ֭נִים וּמִ֣י יְשׁוּרֶ֑נּוּ
    וְעַל־גּ֖וֹי וְעַל־אָדָ֣ם יָֽחַד׃
ל מִ֭מְּלֹךְ אָדָ֥ם חָנֵ֗ף
  מִמֹּ֥קְשֵׁי עָֽם׃
לא כִּֽי־אֶל־אֵ֭ל הֶאָמַ֥ר נָשָׂ֗אתִי
  לֹ֣א אֶחְבֹּֽל׃
לב בִּלְעֲדֵ֣י אֶ֭חֱזֶה אַתָּ֣ה הֹרֵ֑נִי
  אִֽם־עָ֥וֶל פָּ֝עַ֗לְתִּי לֹ֣א אֹסִֽיף׃
לג הֲֽמֵעִמְּךָ֬ יְשַׁלְּמֶ֨נָּה ׀ כִּֽי־מָאַ֗סְתָּ
  כִּֽי־אַתָּ֣ה תִבְחַ֣ר וְלֹא־אָ֑נִי
    וּֽמַה־יָּדַ֥עְתָּ דַבֵּֽר׃
לד אַנְשֵׁ֣י לֵ֭בָב יֹ֣אמְרוּ לִ֑י
  וְגֶ֥בֶר חָ֝כָ֗ם שֹׁמֵ֥עַֽ לִֽי׃
לה אִ֭יּוֹב לֹא־בְדַ֣עַת יְדַבֵּ֑ר
  וּ֝דְבָרָ֗יו לֹ֣א בְהַשְׂכֵּֽיל׃
לו אָבִ֗י יִבָּחֵ֣ן אִיּ֣וֹב עַד־נֶ֑צַח
  עַל־תְּ֝שֻׁבֹ֗ת בְּאַנְשֵׁי־אָֽוֶן׃
לז כִּ֥י יֹ֘סִ֤יף עַֽל־חַטָּאת֣וֹ פֶ֭שַׁע
  בֵּינֵ֣ינוּ יִשְׂפּ֑וֹק
  וְיֶ֖רֶב אֲמָרָ֣יו לָאֵֽל׃

לה א    וַיַּ֥עַן אֱלִיה֗וּ וַיֹּאמַֽר׃
ב הֲ֭זֹאת חָשַׁ֣בְתָּ לְמִשְׁפָּ֑ט
  אָ֝מַ֗רְתָּ צִדְקִ֥י מֵאֵֽל׃
ג כִּֽי־תֹ֭אמַר מַה־יִּסְכׇּן־לָ֑ךְ
  מָה־אֹ֝עִ֗יל מֵחַטָּאתִֽי׃
ד אֲ֭נִי אֲשִֽׁיבְךָ֣ מִלִּ֑ין
  וְֽאֶת־רֵעֶ֥יךָ עִמָּֽךְ׃
ה הַבֵּ֣ט שָׁמַ֣יִם וּרְאֵ֑ה
  וְשׁ֥וּר שְׁ֝חָקִ֗ים גָּבְה֥וּ מִמֶּֽךָּ׃
ו אִם־חָ֭טָאתָ מַה־תִּפְעׇל־בּ֑וֹ
  וְרַבּ֥וּ פְ֝שָׁעֶ֗יךָ מַה־תַּֽעֲשֶׂה־לּֽוֹ׃
ז אִם־צָ֭דַקְתָּ מַה־תִּתֶּן־ל֑וֹ
  א֥וֹ מַה־מִּיָּדְךָ֥ יִקָּֽח׃
ח לְאִישׁ־כָּמ֥וֹךָ רִשְׁעֶ֑ךָ
  וּלְבֶן־אָ֝דָ֗ם צִדְקָתֶֽךָ׃
ט מֵ֭רֹב עֲשׁוּקִ֣ים יַזְעִ֑יקוּ
  יְשַׁוְּע֖וּ מִזְּר֣וֹעַ רַבִּֽים׃
י וְֽלֹא־אָמַ֗ר אַ֭יֵּה אֱל֣וֹהַּ עֹשָׂ֑י
  נֹתֵ֖ן זְמִר֣וֹת בַּלָּֽיְלָה׃
יא מַ֭לְּפֵנוּ מִבַּהֲמ֣וֹת אָ֑רֶץ
  וּמֵע֖וֹף הַשָּׁמַ֣יִם יְחַכְּמֵֽנוּ׃
יב שָׁ֣ם יִ֭צְעֲקוּ וְלֹ֣א יַעֲנֶ֑ה
  מִ֝פְּנֵ֗י גְּא֣וֹן רָעִֽים׃
יג אַךְ־שָׁ֭וְא לֹא־יִשְׁמַ֥ע ׀ אֵ֑ל
  וְ֝שַׁדַּ֗י לֹ֣א יְשׁוּרֶֽנָּה׃
יד אַ֣ף כִּֽי־תֹ֭אמַר לֹ֣א תְשׁוּרֶ֑נּוּ
  דִּ֥ין לְ֝פָנָ֗יו וּתְח֥וֹלֵֽל לֽוֹ׃
טו וְעַתָּ֗ה כִּי־אַ֭יִן פָּקַ֣ד אַפּ֑וֹ
  וְלֹֽא־יָדַ֖ע בַּפַּ֣שׁ מְאֹֽד׃
טז וְ֭אִיּוֹב הֶ֣בֶל יִפְצֶה־פִּ֑יהוּ
  בִּבְלִי־דַ֗֝עַת מִלִּ֥ין יַכְבִּֽר׃

לו א    וַיֹּ֥סֶף אֱלִיה֗וּא וַיֹּאמַֽר׃
ב כַּתַּר־לִ֣י זְ֭עֵיר וַאֲחַוֶּ֑ךָּ
  כִּ֤י ע֖וֹד לֶאֱל֣וֹהַּ מִלִּֽים׃
ג אֶשָּׂ֣א דֵ֭עִי לְמֵרָח֑וֹק
  וּ֝לְפֹעֲלִ֗י אֶֽתֵּֽן־צֶֽדֶק׃
ד כִּֽי־אׇ֭מְנָם לֹא־שֶׁ֣קֶר מִלָּ֑י
  תְּמִ֖ים דֵּע֣וֹת עִמָּֽךְ׃
ה הֶן־אֵ֣ל כַּ֭בִּיר וְלֹ֣א יִמְאָ֑ס
  כַּ֝בִּ֗יר כֹּ֣חַֽ לֵֽב׃
ו לֹא־יְחַיֶּ֥ה רָשָׁ֑ע
  וּמִשְׁפַּ֖ט עֲנִיִּ֣ים יִתֵּֽן׃
ז לֹֽא־יִגְרַ֥ע מִצַּדִּ֗יק עֵ֫ינָ֥יו
  וְאֶת־מְלָכִ֥ים לַכִּסֵּ֑א
    וַיֹּשִׁיבֵ֥ם לָ֝נֶ֗צַח וַיִּגְבָּֽהוּ׃
ח וְאִם־אֲסוּרִ֥ים בַּזִּקִּ֑ים
  יִ֝לָּכְד֗וּן בְּחַבְלֵי־עֹֽנִי׃
ט וַיַּגֵּ֣ד לָהֶ֣ם פׇּעֳלָ֑ם
  וּ֝פִשְׁעֵיהֶ֗ם כִּ֣י יִתְגַּבָּֽרוּ׃
י וַיִּ֣גֶל אׇ֭זְנָם לַמּוּסָ֑ר
  וַ֝יֹּ֗אמֶר כִּֽי־יְשׁוּב֥וּן מֵאָֽוֶן׃
יא אִֽם־יִשְׁמְע֗וּ וְֽיַ֫עֲבֹ֥דוּ
  יְכַלּ֣וּ יְמֵיהֶ֣ם בַּטּ֑וֹב
  וּ֝שְׁנֵיהֶ֗ם בַּנְּעִימִֽים׃
יב וְאִם־לֹ֣א יִ֭שְׁמְעוּ בְּשֶׁ֣לַח יַעֲבֹ֑רוּ
  וְ֝יִגְוְע֗וּ בִּבְלִי־דָֽעַת׃
יג וְֽחַנְפֵי־לֵ֭ב יָשִׂ֣ימוּ אָ֑ף
  לֹ֥א יְ֝שַׁוְּע֗וּ כִּ֣י אֲסָרָֽם׃
יד תָּמֹ֣ת בַּנֹּ֣עַר נַפְשָׁ֑ם
  וְ֝חַיָּתָ֗ם בַּקְּדֵשִֽׁים׃
טו יְחַלֵּ֣ץ עָנִ֣י בְעׇנְי֑וֹ
  וְיִ֖גֶל בַּלַּ֣חַץ אׇזְנָֽם׃
טז וְאַ֤ף הֲסִֽיתְךָ֨ ׀ מִפִּי־צָ֗ר
  רַ֭חַב לֹא־מוּצָ֣ק תַּחְתֶּ֑יהָ
    וְנַ֥חַת שֻׁ֝לְחָנְךָ֗ מָ֣לֵא דָֽשֶׁן׃
יז וְדִין־רָשָׁ֥ע מָלֵ֑אתָ
  דִּ֖ין וּמִשְׁפָּ֣ט יִתְמֹֽכוּ׃
יח כִּֽי־חֵ֭מָה פֶּן־יְסִֽיתְךָ֣ בְסָ֑פֶק
  וְרׇב־כֹּ֗֝פֶר אַל־יַטֶּֽךָּ׃
יט הֲיַעֲרֹ֣ךְ שׁ֭וּעֲךָ לֹ֣א בְצָ֑ר
  וְ֝כֹ֗ל מַאֲמַצֵּי־כֹֽחַ׃
כ אַל־תִּשְׁאַ֥ף הַלָּ֑יְלָה
  לַעֲל֖וֹת עַמִּ֣ים תַּחְתָּֽם׃
כא הִ֭שָּׁמֶר אַל־תֵּ֣פֶן אֶל־אָ֑וֶן
  כִּֽי־עַל־זֶ֗֝ה בָּחַ֥רְתָּ מֵעֹֽנִי׃
כב הֶן־אֵ֭ל יַשְׂגִּ֣יב בְּכֹח֑וֹ
  מִ֖י כָמֹ֣הוּ מוֹרֶֽה׃
כג מִֽי־פָקַ֣ד עָלָ֣יו דַּרְכּ֑וֹ
  וּמִי־אָ֝מַ֗ר פָּעַ֥לְתָּ עַוְלָֽה׃
כד זְ֭כֹר כִּֽי־תַשְׂגִּ֣יא פׇעֳל֑וֹ
  אֲשֶׁ֖ר שֹׁרְר֣וּ אֲנָשִֽׁים׃
כה כׇּל־אָדָ֥ם חָזוּ־ב֑וֹ
  אֱ֝נ֗וֹשׁ יַבִּ֥יט מֵרָחֽוֹק׃
כו הֶן־אֵ֣ל שַׂ֭גִּיא וְלֹ֣א נֵדָ֑ע
  מִסְפַּ֖ר שָׁנָ֣יו וְלֹא־חֵֽקֶר׃
כז כִּ֭י יְגָרַ֣ע נִטְפֵי־מָ֑יִם
  יָזֹ֖קּוּ מָטָ֣ר לְאֵדֽוֹ׃
כח אֲשֶֽׁר־יִזְּל֥וּ שְׁחָקִ֑ים
  יִ֝רְעֲפ֗וּ עֲלֵ֤י ׀ אָדָ֬ם רָֽב׃
כט אַ֣ף אִם־יָ֭בִין מִפְרְשֵׂי־עָ֑ב
  תְּ֝שֻׁא֗וֹת סֻכָּתֽוֹ׃
ל הֵן־פָּרַ֣שׂ עָלָ֣יו אוֹר֑וֹ
  וְשׇׁרְשֵׁ֖י הַיָּ֣ם כִּסָּֽה׃
לא כִּי־בָ֭ם יָדִ֣ין עַמִּ֑ים
  יִֽתֶּן־אֹ֥כֶל לְמַכְבִּֽיר׃
לב עַל־כַּפַּ֥יִם כִּסָּה־א֑וֹר
  וַיְצַ֖ו עָלֶ֣יהָ בְמַפְגִּֽיעַ׃
לג יַגִּ֣יד עָלָ֣יו רֵע֑וֹ
  מִ֝קְנֶ֗ה אַ֣ף עַל־עוֹלֶֽה׃
לז א אַף־לְ֭זֹאת יֶחֱרַ֣ד לִבִּ֑י
  וְ֝יִתַּ֗ר מִמְּקוֹמֽוֹ׃
ב שִׁמְע֤וּ שָׁמ֣וֹעַ בְּרֹ֣גֶז קֹל֑וֹ
  וְ֝הֶ֗גֶה מִפִּ֥יו יֵצֵֽא׃
ג תַּֽחַת־כׇּל־הַשָּׁמַ֥יִם יִשְׁרֵ֑הוּ
  וְ֝אוֹר֗וֹ עַל־כַּנְפ֥וֹת הָאָֽרֶץ׃
ד אַחֲרָ֤יו ׀ יִשְׁאַג־ק֗וֹל
  יַ֭רְעֵם בְּק֣וֹל גְּאוֹנ֑וֹ
    וְלֹ֥א יְ֝עַקְּבֵ֗ם כִּֽי־יִשָּׁמַ֥ע קוֹלֽוֹ׃
ה יַרְעֵ֤ם אֵ֣ל בְּ֭קוֹלוֹ נִפְלָא֑וֹת
  עֹשֶׂ֥ה גְ֝דֹל֗וֹת וְלֹ֣א נֵדָֽע׃
ו כִּ֤י לַשֶּׁ֨לֶג ׀ יֹאמַ֗ר הֱוֵ֫א אָ֥רֶץ
  וְגֶ֥שֶׁם מָטָ֑ר
  וְ֝גֶ֗שֶׁם מִטְר֥וֹת עֻזּֽוֹ׃
ז בְּיַד־כׇּל־אָדָ֥ם יַחְתּ֑וֹם
  לָ֝דַ֗עַת כׇּל־אַנְשֵׁ֥י מַעֲשֵֽׂהוּ׃
ח וַתָּב֣וֹא חַיָּ֣ה בְמוֹ־אָ֑רֶב
  וּבִמְע֖וֹנֹתֶ֣יהָ תִשְׁכֹּֽן׃
ט מִן־הַ֭חֶדֶר תָּב֣וֹא סוּפָ֑ה
  וּֽמִמְּזָרִ֥ים קָרָֽה׃
י מִנִּשְׁמַת־אֵ֥ל יִתֶּן־קָ֑רַח
  וְרֹ֖חַב מַ֣יִם בְּמוּצָֽק׃
יא אַף־בְּ֭רִי יַטְרִ֣יחַ עָ֑ב
  יָ֝פִ֗יץ עֲנַ֣ן אוֹרֽוֹ׃
יב וְה֤וּא מְסִבּ֨וֹת ׀
  מִתְהַפֵּ֣ךְ בְּתַחְבּוּלֹתָ֣ו לְפׇעֳלָ֑ם
    כֹּ֖ל אֲשֶׁ֥ר יְצַוֵּ֓ם ׀
    עַל־פְּנֵ֖י תֵבֵ֣ל אָֽרְצָה׃
יג אִם־לְשֵׁ֥בֶט אִם־לְאַרְצ֑וֹ
  אִם־לְ֝חֶ֗סֶד יַמְצִאֵֽהוּ׃
יד הַאֲזִ֣ינָה זֹּ֣את אִיּ֑וֹב
  עֲ֝מֹ֗ד וְהִתְבּוֹנֵ֤ן ׀ נִפְלְא֬וֹת אֵֽל׃
טו הֲ֭תֵדַע בְּשׂוּם־אֱל֣וֹהַּ עֲלֵיהֶ֑ם
  וְ֝הֹפִ֗יעַ א֣וֹר עֲנָנֽוֹ׃
טז הֲ֭תֵדַע עַל־מִפְלְשֵׂי־עָ֑ב
  מִ֝פְלְא֗וֹת תְּמִ֣ים דֵּעִֽים׃
יז אֲשֶׁר־בְּגָדֶ֥יךָ חַמִּ֑ים
  בְּהַשְׁקִ֥ט אֶ֗֝רֶץ מִדָּרֽוֹם׃
יח תַּרְקִ֣יעַ עִ֭מּוֹ לִשְׁחָקִ֑ים
  חֲ֝זָקִ֗ים כִּרְאִ֥י מוּצָֽק׃
יט ה֭וֹדִיעֵנוּ מַה־נֹּ֣אמַר ל֑וֹ
  לֹֽא־נַ֝עֲרֹ֗ךְ מִפְּנֵי־חֹֽשֶׁךְ׃
כ הַֽיְסֻפַּר־ל֭וֹ כִּ֣י אֲדַבֵּ֑ר
  אִֽם־אָ֥מַר אִ֗֝ישׁ כִּ֣י יְבֻלָּֽע׃
כא וְעַתָּ֤ה ׀ לֹ֘א רָ֤אוּ א֗וֹר
  בָּהִ֣יר ה֭וּא בַּשְּׁחָקִ֑ים
    וְר֥וּחַ עָ֝בְרָ֗ה וַֽתְּטַהֲרֵֽם׃
כב מִ֭צָּפוֹן זָהָ֣ב יֶאֱתֶ֑ה
  עַל־אֱ֝ל֗וֹהַּ נ֣וֹרָא הֽוֹד׃
כג שַׁדַּ֣י לֹא־מְ֭צָאנֻהוּ שַׂגִּיא־כֹ֑חַ
  וּמִשְׁפָּ֥ט וְרֹב־צְ֝דָקָ֗ה לֹ֣א יְעַנֶּֽה׃
כד לָ֭כֵן יְרֵא֣וּהוּ אֲנָשִׁ֑ים
  לֹֽא־יִ֝רְאֶ֗ה כׇּל־חַכְמֵי־לֵֽב׃

לח א וַיַּֽעַן־יְהֹוָ֣ה אֶת־אִ֭יּוֹב מנהסערה מִ֥ן ׀ הַסְּעָרָ֗ה
  וַיֹּאמַֽר׃
ב מִ֤י זֶ֨ה ׀ מַחְשִׁ֖יךְ עֵצָ֥ה בְמִלִּ֗ין
  בְּֽלִי־דָֽעַת׃
ג אֱזׇר־נָ֣א כְגֶ֣בֶר חֲלָצֶ֑יךָ
  וְ֝אֶשְׁאָלְךָ֗ וְהוֹדִיעֵֽנִי׃
ד אֵיפֹ֣ה הָ֭יִיתָ בְּיׇסְדִי־אָ֑רֶץ
  הַ֝גֵּ֗ד אִם־יָדַ֥עְתָּ בִינָֽה׃
ה מִי־שָׂ֣ם מְ֭מַדֶּיהָ כִּ֣י תֵדָ֑ע
  א֤וֹ מִֽי־נָטָ֖ה עָלֶ֣יהָ קָּֽו׃
ו עַל־מָ֭ה אֲדָנֶ֣יהָ הׇטְבָּ֑עוּ
  א֥וֹ מִי־יָ֝רָ֗ה אֶ֣בֶן פִּנָּתָֽהּ׃
ז בְּרׇן־יַ֭חַד כּ֣וֹכְבֵי בֹ֑קֶר
  וַ֝יָּרִ֗יעוּ כׇּל־בְּנֵ֥י אֱלֹהִֽים׃
ח וַיָּ֣סֶךְ בִּדְלָתַ֣יִם יָ֑ם
  בְּ֝גִיח֗וֹ מֵרֶ֥חֶם יֵצֵֽא׃
ט בְּשׂוּמִ֣י עָנָ֣ן לְבֻשׁ֑וֹ
  וַ֝עֲרָפֶ֗ל חֲתֻלָּתֽוֹ׃
י וָאֶשְׁבֹּ֣ר עָלָ֣יו חֻקִּ֑י
  וָ֝אָשִׂ֗ים בְּרִ֣יחַ וּדְלָתָֽיִם׃
יא וָאֹמַ֗ר עַד־פֹּ֣ה תָ֭בוֹא וְלֹ֣א תֹסִ֑יף
  וּפֹא־יָ֝שִׁ֗ית בִּגְא֥וֹן גַּלֶּֽיךָ׃
יב הֲֽ֭מִיָּמֶיךָ צִוִּ֣יתָ בֹּ֑קֶר
  ידעתה שחר יִדַּ֖עְתָּ הַשַּׁ֣חַר מְקֹמֽוֹ׃
יג לֶ֭אֱחֹז בְּכַנְפ֣וֹת הָאָ֑רֶץ
  וְיִנָּעֲר֖וּ רְשָׁעִ֣ים מִמֶּֽנָּה׃
יד תִּ֭תְהַפֵּךְ כְּחֹ֣מֶר חוֹתָ֑ם
  וְ֝יִֽתְיַצְּב֗וּ כְּמ֣וֹ לְבֽוּשׁ׃
טו וְיִמָּנַ֣ע מֵרְשָׁעִ֣ים אוֹרָ֑ם
  וּזְר֥וֹעַ רָ֝מָ֗ה תִּשָּׁבֵֽר׃
טז הֲ֭בָאתָ עַד־נִבְכֵי־יָ֑ם
  וּבְחֵ֥קֶר תְּ֝ה֗וֹם הִתְהַלָּֽכְתָּ׃
יז הֲנִגְל֣וּ לְ֭ךָ שַׁעֲרֵי־מָ֑וֶת
  וְשַׁעֲרֵ֖י צַלְמָ֣וֶת תִּרְאֶֽה׃
יח הִ֭תְבֹּנַנְתָּ עַד־רַחֲבֵי־אָ֑רֶץ
  הַ֝גֵּ֗ד אִם־יָדַ֥עְתָּ כֻלָּֽהּ׃
יט אֵי־זֶ֣ה הַ֭דֶּרֶךְ יִשְׁכׇּן־א֑וֹר
  וְ֝חֹ֗שֶׁךְ אֵי־זֶ֥ה מְקֹמֽוֹ׃
כ כִּ֣י תִ֭קָּחֶנּוּ אֶל־גְּבוּל֑וֹ
  וְכִי־תָ֝בִ֗ין נְתִיב֥וֹת בֵּיתֽוֹ׃
כא יָ֭דַעְתָּ כִּי־אָ֣ז תִּוָּלֵ֑ד
  וּמִסְפַּ֖ר יָמֶ֣יךָ רַבִּֽים׃
כב הֲ֭בָאתָ אֶל־אֹצְר֣וֹת שָׁ֑לֶג
  וְאוֹצְר֖וֹת בָּרָ֣ד תִּרְאֶֽה׃
כג אֲשֶׁר־חָשַׂ֥כְתִּי לְעֶת־צָ֑ר
  לְי֥וֹם קְ֝רָ֗ב וּמִלְחָמָֽה׃
כד אֵי־זֶ֣ה הַ֭דֶּרֶךְ יֵחָ֣לֶק א֑וֹר
  יָפֵ֖ץ קָדִ֣ים עֲלֵי־אָֽרֶץ׃
כה מִֽי־פִלַּ֣ג לַשֶּׁ֣טֶף תְּעָלָ֑ה
  וְ֝דֶ֗רֶךְ לַחֲזִ֥יז קֹלֽוֹת׃
כו לְ֭הַמְטִיר עַל־אֶ֣רֶץ לֹא־אִ֑ישׁ
  מִ֝דְבָּ֗ר לֹא־אָדָ֥ם בּֽוֹ׃
כז לְהַשְׂבִּ֣יעַ שֹׁ֭אָה וּמְשֹׁאָ֑ה
  וּ֝לְהַצְמִ֗יחַ מֹ֣צָא דֶֽשֶׁא׃
כח הֲיֵשׁ־לַמָּטָ֥ר אָ֑ב
  א֥וֹ מִי־ה֝וֹלִ֗יד אֶגְלֵי־טָֽל׃
כט מִבֶּ֣טֶן מִ֭י יָצָ֣א הַקָּ֑רַח
  וּכְפֹ֥ר שָׁ֝מַ֗יִם מִ֣י יְלָדֽוֹ׃
ל כָּ֭אֶבֶן מַ֣יִם יִתְחַבָּ֑אוּ
  וּפְנֵ֥י תְ֝ה֗וֹם יִתְלַכָּֽדוּ׃
לא הַֽ֭תְקַשֵּׁר מַעֲדַנּ֣וֹת כִּימָ֑ה
  אֽוֹ־מֹשְׁכ֖וֹת כְּסִ֣יל תְּפַתֵּֽחַ׃
לב הֲתֹצִ֣יא מַזָּר֣וֹת בְּעִתּ֑וֹ
  וְ֝עַ֗יִשׁ עַל־בָּנֶ֥יהָ תַנְחֵֽם׃
לג הֲ֭יָדַעְתָּ חֻקּ֣וֹת שָׁמָ֑יִם
  אִם־תָּשִׂ֖ים מִשְׁטָר֣וֹ בָאָֽרֶץ׃
לד הֲתָרִ֣ים לָעָ֣ב קוֹלֶ֑ךָ
  וְֽשִׁפְעַת־מַ֥יִם תְּכַסֶּֽךָּ׃
ח לה הַֽתְשַׁלַּ֣ח בְּרָקִ֣ים וְיֵלֵ֑כוּ
  וְיֹֽאמְר֖וּ לְךָ֣ הִנֵּֽנוּ׃
לו מִי־שָׁ֭ת בַּטֻּח֣וֹת חׇכְמָ֑ה
  א֤וֹ מִֽי־נָתַ֖ן לַשֶּׂ֣כְוִי בִינָֽה׃
לז מִֽי־יְסַפֵּ֣ר שְׁחָקִ֣ים בְּחׇכְמָ֑ה
  וְנִבְלֵ֥י שָׁ֝מַ֗יִם מִ֣י יַשְׁכִּֽיב׃
לח בְּצֶ֣קֶת עָ֭פָר לַמּוּצָ֑ק
  וּרְגָבִ֥ים יְדֻבָּֽקוּ׃
לט הֲתָצ֣וּד לְלָבִ֣יא טָ֑רֶף
  וְחַיַּ֖ת כְּפִירִ֣ים תְּמַלֵּֽא׃
מ כִּֽי־יָשֹׁ֥חוּ בַמְּעוֹנ֑וֹת
  יֵֽשְׁב֖וּ בַסֻּכָּ֣ה לְמוֹ־אָֽרֶב׃
מא מִ֤י יָכִ֥ין לָעֹרֵ֗ב צֵ֫יד֥וֹ
  כִּֽי־יְ֭לָדָו אֶל־אֵ֣ל יְשַׁוֵּ֑עוּ
    יִ֝תְע֗וּ לִבְלִי־אֹֽכֶל׃
לט א הֲיָדַ֗עְתָּ עֵ֭ת לֶ֣דֶת יַעֲלֵי־סָ֑לַע
  חֹלֵ֖ל אַיָּל֣וֹת תִּשְׁמֹֽר׃
ב תִּסְפֹּ֣ר יְרָחִ֣ים תְּמַלֶּ֑אנָה
  וְ֝יָדַ֗עְתָּ עֵ֣ת לִדְתָּֽנָה׃
ג תִּ֭כְרַעְנָה יַלְדֵיהֶ֣ן תְּפַלַּ֑חְנָה
  חֶבְלֵיהֶ֥ם תְּשַׁלַּֽחְנָה׃
ד יַחְלְמ֣וּ בְ֭נֵיהֶם יִרְבּ֣וּ בַבָּ֑ר
  יָ֝צְא֗וּ וְלֹא־שָׁ֥בוּ לָֽמוֹ׃
ה מִי־שִׁלַּ֣ח פֶּ֣רֶא חׇפְשִׁ֑י
  וּמֹסְר֥וֹת עָ֝ר֗וֹד מִ֣י פִתֵּֽחַ׃
ו אֲשֶׁר־שַׂ֣מְתִּי עֲרָבָ֣ה בֵית֑וֹ
  וּֽמִשְׁכְּנוֹתָ֥יו מְלֵחָֽה׃
ז יִ֭שְׂחַק לַהֲמ֣וֹן קִרְיָ֑ה
  תְּשֻׁא֥וֹת נֹ֝גֵ֗שׂ לֹ֣א יִשְׁמָֽע׃
ח יְת֣וּר הָרִ֣ים מִרְעֵ֑הוּ
  וְאַחַ֖ר כׇּל־יָר֣וֹק יִדְרֽוֹשׁ׃
ט הֲיֹ֣אבֶה רֵּ֣ים עׇבְדֶ֑ךָ
  אִם־יָ֝לִ֗ין עַל־אֲבוּסֶֽךָ׃
י הֲֽתִקְשׇׁר־רֵ֭ים בְּתֶ֣לֶם עֲבֹת֑וֹ
  אִם־יְשַׂדֵּ֖ד עֲמָקִ֣ים אַחֲרֶֽיךָ׃
יא הֲֽתִבְטַח־בּ֭וֹ כִּֽי־רַ֣ב כֹּח֑וֹ
  וְתַעֲזֹ֖ב אֵלָ֣יו יְגִיעֶֽךָ׃
יב הֲתַאֲמִ֣ין בּ֭וֹ כִּֽי־יָשִׁ֣יב ישוב זַרְעֶ֑ךָ
  וְֽגׇרְנְךָ֥ יֶאֱסֹֽף׃
יג כְּנַף־רְנָנִ֥ים נֶעֱלָ֑סָה
  אִם־אֶ֝בְרָ֗ה חֲסִידָ֥ה וְנֹצָֽה׃
יד כִּי־תַעֲזֹ֣ב לָאָ֣רֶץ בֵּצֶ֑יהָ
  וְֽעַל־עָפָ֥ר תְּחַמֵּֽם׃
טו וַ֭תִּשְׁכַּח כִּי־רֶ֣גֶל תְּזוּרֶ֑הָ
  וְחַיַּ֖ת הַשָּׂדֶ֣ה תְדוּשֶֽׁהָ׃
טז הִקְשִׁ֣יחַ בָּנֶ֣יהָ לְּלֹא־לָ֑הּ
  לְרִ֖יק יְגִיעָ֣הּ בְּלִי־פָֽחַד׃
יז כִּי־הִשָּׁ֣הּ אֱל֣וֹהַּ חׇכְמָ֑ה
  וְלֹא־חָ֥לַק לָ֗֝הּ בַּבִּינָֽה׃
יח כָּ֭עֵת בַּמָּר֣וֹם תַּמְרִ֑יא
  תִּֽשְׂחַ֥ק לַ֝סּ֗וּס וּלְרֹכְבֽוֹ׃

יט הֲתִתֵּ֣ן לַסּ֣וּס גְּבוּרָ֑ה
  הֲתַלְבִּ֖ישׁ צַוָּאר֣וֹ רַעְמָֽה׃
כ הֲֽ֭תַרְעִישֶׁנּוּ כָּֽאַרְבֶּ֑ה
  ה֖וֹד נַחְר֣וֹ אֵימָֽה׃
כא יַחְפְּר֣וּ בָ֭עֵמֶק וְיָשִׂ֣ישׂ בְּכֹ֑חַ
  יֵ֝צֵ֗א לִקְרַאת־נָֽשֶׁק׃
כב יִשְׂחַ֣ק לְ֭פַחַד וְלֹ֣א יֵחָ֑ת
  וְלֹא־יָ֝שׁ֗וּב מִפְּנֵי־חָֽרֶב׃
כג עָ֭לָיו תִּרְנֶ֣ה אַשְׁפָּ֑ה
  לַ֖הַב חֲנִ֣ית וְכִידֽוֹן׃
כד בְּרַ֣עַשׁ וְ֭רֹגֶז יְגַמֶּא־אָ֑רֶץ
  וְלֹא־יַ֝אֲמִ֗ין כִּי־ק֥וֹל שׁוֹפָֽר׃
כה בְּדֵ֤י שֹׁפָ֨ר ׀ יֹ֘אמַ֤ר הֶאָ֗ח
  וּֽ֭מֵרָחוֹק יָרִ֣יחַ מִלְחָמָ֑ה
    רַ֥עַם שָׂ֝רִ֗ים וּתְרוּעָֽה׃
כו הֲֽ֭מִבִּינָ֣תְךָ יַאֲבֶר־נֵ֑ץ
  יִפְרֹ֖שׂ כְּנָפָ֣ו לְתֵימָֽן׃
כז אִם־עַל־פִּ֭יךָ יַגְבִּ֣יהַּ נָ֑שֶׁר
  וְ֝כִ֗י יָרִ֥ים קִנּֽוֹ׃
כח סֶ֣לַע יִ֭שְׁכֹּן וְיִתְלֹנָ֑ן
  עַ֥ל שֶׁן־סֶ֗֝לַע וּמְצוּדָֽה׃
כט מִשָּׁ֥ם חָֽפַר־אֹ֑כֶל
  לְ֝מֵרָח֗וֹק עֵינָ֥יו יַבִּֽיטוּ׃
ל וְאֶפְרֹחָ֥ו יְעַלְעוּ־דָ֑ם
  וּבַאֲשֶׁ֥ר חֲ֝לָלִ֗ים שָׁ֣ם הֽוּא׃

מ א    וַיַּ֖עַן יְהֹוָ֥ה אֶת־אִיּ֗וֹב וַיֹּאמַֽר׃
ב הֲ֭רֹב עִם־שַׁדַּ֣י יִסּ֑וֹר
  מוֹכִ֖יחַ אֱל֣וֹהַּ יַעֲנֶֽנָּה׃



ג    וַיַּ֖עַן אִיּ֥וֹב אֶת־יְהֹוָ֗ה וַיֹּאמַֽר׃
ד הֵ֣ן קַ֭לֹּתִי מָ֣ה אֲשִׁיבֶ֑ךָּ
  יָ֝דִ֗י שַׂ֣מְתִּי לְמוֹ־פִֽי׃
ה אַחַ֣ת דִּ֭בַּרְתִּי וְלֹ֣א אֶעֱנֶ֑ה
  וּ֝שְׁתַּ֗יִם וְלֹ֣א אוֹסִֽיף׃

ו וַיַּעַן־יְהֹוָ֣ה אֶת־אִ֭יּוֹב מנסערה מִ֥ן ׀ סְעָרָ֗ה
  וַיֹּאמַֽר׃
ז אֱזׇר־נָ֣א כְגֶ֣בֶר חֲלָצֶ֑יךָ
  אֶ֝שְׁאָלְךָ֗ וְהוֹדִיעֵֽנִי׃
ח הַ֭אַף תָּפֵ֣ר מִשְׁפָּטִ֑י
  תַּ֝רְשִׁיעֵ֗נִי לְמַ֣עַן תִּצְדָּֽק׃
ט וְאִם־זְר֖וֹעַ כָּאֵ֥ל ׀ לָ֑ךְ
  וּ֝בְק֗וֹל כָּמֹ֥הוּ תַרְעֵֽם׃
י עֲדֵ֥ה נָ֣א גָא֣וֹן וָגֹ֑בַהּ
  וְה֖וֹד וְהָדָ֣ר תִּלְבָּֽשׁ׃
יא הָ֭פֵץ עֶבְר֣וֹת אַפֶּ֑ךָ
  וּרְאֵ֥ה כׇל־גֵּ֝אֶ֗ה וְהַשְׁפִּילֵֽהוּ׃
יב רְאֵ֣ה כׇל־גֵּ֭אֶה הַכְנִיעֵ֑הוּ
  וַהֲדֹ֖ךְ רְשָׁעִ֣ים תַּחְתָּֽם׃
יג טׇמְנֵ֣ם בֶּעָפָ֣ר יָ֑חַד
  פְּ֝נֵיהֶ֗ם חֲבֹ֣שׁ בַּטָּמֽוּן׃
יד וְגַם־אֲנִ֥י אוֹדֶ֑ךָּ
  כִּֽי־תוֹשִׁ֖עַ לְךָ֣ יְמִינֶֽךָ׃
טו הִנֵּה־נָ֣א בְ֭הֵמוֹת אֲשֶׁר־עָשִׂ֣יתִי עִמָּ֑ךְ
  חָ֝צִ֗יר כַּבָּקָ֥ר יֹאכֵֽל׃
טז הִנֵּה־נָ֣א כֹח֣וֹ בְמׇתְנָ֑יו
  וְ֝אוֹנ֗וֹ בִּשְׁרִירֵ֥י בִטְנֽוֹ׃
יז יַחְפֹּ֣ץ זְנָב֣וֹ כְמוֹ־אָ֑רֶז
  גִּידֵ֖י פַחֲדָ֣ו יְשֹׂרָֽגוּ׃
יח עֲ֭צָמָיו אֲפִיקֵ֣י נְחֻשָׁ֑ה
  גְּ֝רָמָ֗יו כִּמְטִ֥יל בַּרְזֶֽל׃
יט ה֭וּא רֵאשִׁ֣ית דַּרְכֵי־אֵ֑ל
  הָ֝עֹשׂ֗וֹ יַגֵּ֥שׁ חַרְבּֽוֹ׃
כ כִּי־ב֭וּל הָרִ֣ים יִשְׂאוּ־ל֑וֹ
  וְֽכׇל־חַיַּ֥ת הַ֝שָּׂדֶ֗ה יְשַׂחֲקוּ־שָֽׁם׃
כא תַּֽחַת־צֶאֱלִ֥ים יִשְׁכָּ֑ב
  בְּסֵ֖תֶר קָנֶ֣ה וּבִצָּֽה׃
כב יְסֻכֻּ֣הוּ צֶאֱלִ֣ים צִֽלְל֑וֹ
  יְ֝סֻבּ֗וּהוּ עַרְבֵי־נָֽחַל׃
כג הֵ֤ן יַעֲשֹׁ֣ק נָ֭הָר לֹ֣א יַחְפּ֑וֹז
  יִבְטַ֓ח ׀ כִּֽי־יָגִ֖יחַ יַרְדֵּ֣ן אֶל־פִּֽיהוּ׃
כד בְּעֵינָ֥יו יִקָּחֶ֑נּוּ
  בְּ֝מוֹקְשִׁ֗ים יִנְקׇב־אָֽף׃
כה תִּמְשֹׁ֣ךְ לִוְיָתָ֣ן בְּחַכָּ֑ה
  וּ֝בְחֶ֗בֶל תַּשְׁקִ֥יעַ לְשֹׁנֽוֹ׃
כו הֲתָשִׂ֣ים אַגְמֹ֣ן בְּאַפּ֑וֹ
  וּ֝בְח֗וֹחַ תִּקֹּ֥ב לֶחֱיֽוֹ׃
כז הֲיַרְבֶּ֣ה אֵ֭לֶיךָ תַּחֲנוּנִ֑ים
  אִם־יְדַבֵּ֖ר אֵלֶ֣יךָ רַכּֽוֹת׃
כח הֲיִכְרֹ֣ת בְּרִ֣ית עִמָּ֑ךְ
  תִּ֝קָּחֶ֗נּוּ לְעֶ֣בֶד עוֹלָֽם׃
כט הַֽתְשַׂחֶק־בּ֭וֹ כַּצִּפּ֑וֹר
  וְ֝תִקְשְׁרֶ֗נּוּ לְנַעֲרוֹתֶֽיךָ׃
ל יִכְר֣וּ עָ֭לָיו חַבָּרִ֑ים
  יֶ֝חֱצ֗וּהוּ בֵּ֣ין כְּֽנַעֲנִֽים׃
לא הַֽתְמַלֵּ֣א בְשֻׂכּ֣וֹת עוֹר֑וֹ
  וּבְצִלְצַ֖ל דָּגִ֣ים רֹאשֽׁוֹ׃
לב שִׂים־עָלָ֥יו כַּפֶּ֑ךָ
  זְכֹ֥ר מִ֝לְחָמָ֗ה אַל־תּוֹסַֽף׃
מא א הֵן־תֹּחַלְתּ֥וֹ נִכְזָ֑בָה
  הֲגַ֖ם אֶל־מַרְאָ֣יו יֻטָֽל׃
ב לֹֽא־אַ֭כְזָר כִּ֣י יְעוּרֶ֑נּוּ
  וּמִ֥י ה֗֝וּא לְפָנַ֥י יִתְיַצָּֽב׃
ג מִ֣י הִ֭קְדִּימַנִי וַאֲשַׁלֵּ֑ם
  תַּ֖חַת כׇּל־הַשָּׁמַ֣יִם לִי־הֽוּא׃
ד לא לוֹ־אַחֲרִ֥ישׁ בַּדָּ֑יו
  וּדְבַר־גְּ֝בוּר֗וֹת וְחִ֣ין עֶרְכּֽוֹ׃
ה מִֽי־גִ֭לָּה פְּנֵ֣י לְבוּשׁ֑וֹ
  בְּכֶ֥פֶל רִ֝סְנ֗וֹ מִ֣י יָבֽוֹא׃
ו דַּלְתֵ֣י פָ֭נָיו מִ֣י פִתֵּ֑חַ
  סְבִיב֖וֹת שִׁנָּ֣יו אֵימָֽה׃
ז גַּ֭אֲוָה אֲפִיקֵ֣י מָגִנִּ֑ים
  סָ֝ג֗וּר חוֹתָ֥ם צָֽר׃
ח אֶחָ֣ד בְּאֶחָ֣ד יִגַּ֑שׁוּ
  וְ֝ר֗וּחַ לֹא־יָבֹ֥א בֵינֵיהֶֽם׃
ט אִישׁ־בְּאָחִ֥יהוּ יְדֻבָּ֑קוּ
  יִ֝תְלַכְּד֗וּ וְלֹ֣א יִתְפָּרָֽדוּ׃
י עֲ֭טִישֹׁתָיו תָּ֣הֶל א֑וֹר
  וְ֝עֵינָ֗יו כְּעַפְעַפֵּי־שָֽׁחַר׃
יא מִ֭פִּיו לַפִּידִ֣ים יַהֲלֹ֑כוּ
  כִּיד֥וֹדֵי אֵ֗֝שׁ יִתְמַלָּֽטוּ׃
יב מִ֭נְּחִירָיו יֵצֵ֣א עָשָׁ֑ן
  כְּד֖וּד נָפ֣וּחַ וְאַגְמֹֽן׃
יג נַ֭פְשׁוֹ גֶּחָלִ֣ים תְּלַהֵ֑ט
  וְ֝לַ֗הַב מִפִּ֥יו יֵצֵֽא׃
יד בְּֽ֭צַוָּארוֹ יָלִ֣ין עֹ֑ז
  וּ֝לְפָנָ֗יו תָּד֥וּץ דְּאָבָֽה׃
טו מַפְּלֵ֣י בְשָׂר֣וֹ דָבֵ֑קוּ
  יָצ֥וּק עָ֝לָ֗יו בַּל־יִמּֽוֹט׃
טז לִ֭בּוֹ יָצ֣וּק כְּמוֹ־אָ֑בֶן
  וְ֝יָצ֗וּק כְּפֶ֣לַח תַּחְתִּֽית׃
יז מִ֭שֵּׂתוֹ יָג֣וּרוּ אֵלִ֑ים
  מִ֝שְּׁבָרִ֗ים יִתְחַטָּֽאוּ׃
יח מַשִּׂיגֵ֣הוּ חֶ֭רֶב בְּלִ֣י תָק֑וּם
  חֲנִ֖ית מַסָּ֣ע וְשִׁרְיָֽה׃
יט יַחְשֹׁ֣ב לְתֶ֣בֶן בַּרְזֶ֑ל
  לְעֵ֖ץ רִקָּב֣וֹן נְחוּשָֽׁה׃
כ לֹא־יַבְרִיחֶ֥נּוּ בֶן־קָ֑שֶׁת
  לְ֝קַ֗שׁ נֶהְפְּכוּ־ל֥וֹ אַבְנֵי־קָֽלַע׃
כא כְּ֭קַשׁ נֶחְשְׁב֣וּ תוֹתָ֑ח
  וְ֝יִשְׂחַ֗ק לְרַ֣עַשׁ כִּידֽוֹן׃
כב תַּ֭חְתָּיו חַדּ֣וּדֵי חָ֑רֶשׂ
  יִרְפַּ֖ד חָר֣וּץ עֲלֵי־טִֽיט׃
כג יַרְתִּ֣יחַ כַּסִּ֣יר מְצוּלָ֑ה
  יָ֗֝ם יָשִׂ֥ים כַּמֶּרְקָחָֽה׃
כד אַ֭חֲרָיו יָאִ֣יר נָתִ֑יב
  יַחְשֹׁ֖ב תְּה֣וֹם לְשֵׂיבָֽה׃
כה אֵֽין־עַל־עָפָ֥ר מׇשְׁל֑וֹ
  הֶ֝עָשׂ֗וּ לִבְלִי־חָֽת׃
כו אֵֽת־כׇּל־גָּבֹ֥הַּ יִרְאֶ֑ה
  ה֗֝וּא מֶ֣לֶךְ עַל־כׇּל־בְּנֵי־שָֽׁחַץ׃

מב א    וַיַּ֖עַן אִיּ֥וֹב אֶת־יְהֹוָ֗ה וַיֹּאמַֽר׃
ב ידעת יָ֭דַעְתִּי כִּי־כֹ֣ל תּוּכָ֑ל
  וְלֹֽא־יִבָּצֵ֖ר מִמְּךָ֣ מְזִמָּֽה׃
ג מִ֤י זֶ֨ה ׀ מַעְלִ֥ים עֵצָ֗ה בְּֽלִ֫י דָ֥עַת
  לָכֵ֣ן הִ֭גַּדְתִּי וְלֹ֣א אָבִ֑ין
    נִפְלָא֥וֹת מִ֝מֶּ֗נִּי וְלֹ֣א אֵדָֽע׃
ד שְֽׁמַֽע־נָ֭א וְאָנֹכִ֣י אֲדַבֵּ֑ר
  אֶ֝שְׁאָלְךָ֗ וְהוֹדִיעֵֽנִי׃
ה לְשֵֽׁמַע־אֹ֥זֶן שְׁמַעְתִּ֑יךָ
  וְ֝עַתָּ֗ה עֵינִ֥י רָאָֽתְךָ׃
ו עַל־כֵּ֭ן אֶמְאַ֣ס וְנִחַ֑מְתִּי
  עַל־עָפָ֥ר וָאֵֽפֶר׃

ז וַיְהִ֗י אַחַ֨ר דִּבֶּ֧ר יְהֹוָ֛ה אֶת־הַדְּבָרִ֥ים הָאֵ֖לֶּה אֶל־אִיּ֑וֹב וַיֹּ֨אמֶר יְהֹוָ֜ה אֶל־אֱלִיפַ֣ז הַתֵּימָנִ֗י חָרָ֨ה אַפִּ֤י בְךָ֙ וּבִשְׁנֵ֣י רֵעֶ֔יךָ כִּ֠י לֹ֣א דִבַּרְתֶּ֥ם אֵלַ֛י נְכוֹנָ֖ה כְּעַבְדִּ֥י אִיּֽוֹב׃
    ח וְעַתָּ֡ה קְחוּ־לָכֶ֣ם שִׁבְעָֽה־פָרִים֩ וְשִׁבְעָ֨ה אֵילִ֜ים וּלְכ֣וּ ׀ אֶל־עַבְדִּ֣י אִיּ֗וֹב וְהַעֲלִיתֶ֤ם עוֹלָה֙ בַּעַדְכֶ֔ם וְאִיּ֣וֹב עַבְדִּ֔י יִתְפַּלֵּ֖ל עֲלֵיכֶ֑ם כִּ֧י אִם־פָּנָ֣יו אֶשָּׂ֗א לְבִלְתִּ֞י עֲשׂ֤וֹת עִמָּכֶם֙ נְבָלָ֔ה כִּ֠י לֹ֣א דִבַּרְתֶּ֥ם אֵלַ֛י נְכוֹנָ֖ה כְּעַבְדִּ֥י אִיּֽוֹב׃ ט וַיֵּלְכוּ֩ אֱלִיפַ֨ז הַתֵּימָנִ֜י וּבִלְדַּ֣ד הַשּׁוּחִ֗י צֹפַר֙ הַנַּ֣עֲמָתִ֔י וַיַּעֲשׂ֔וּ כַּאֲשֶׁ֛ר דִּבֶּ֥ר אֲלֵיהֶ֖ם יְהֹוָ֑ה וַיִּשָּׂ֥א יְהֹוָ֖ה אֶת־פְּנֵ֥י אִיּֽוֹב׃ י וַיהֹוָ֗ה שָׁ֚ב אֶת־שְׁב֣וּת שבית אִיּ֔וֹב בְּהִֽתְפַּֽלְל֖וֹ בְּעַ֣ד רֵעֵ֑הוּ וַ֧יֹּסֶף יְהֹוָ֛ה אֶת־כׇּל־אֲשֶׁ֥ר לְאִיּ֖וֹב לְמִשְׁנֶֽה׃ יא וַיָּבֹ֣אוּ אֵ֠לָ֠יו כׇּל־אֶחָ֨יו וְכׇל־אַחְיֹתָ֜יו וְכׇל־יֹדְעָ֣יו לְפָנִ֗ים וַיֹּאכְל֨וּ עִמּ֣וֹ לֶחֶם֮ בְּבֵיתוֹ֒ וַיָּנֻ֤דוּ לוֹ֙ וַיְנַחֲמ֣וּ אֹת֔וֹ עַ֚ל כׇּל־הָ֣רָעָ֔ה אֲשֶׁר־הֵבִ֥יא יְהֹוָ֖ה עָלָ֑יו וַיִּתְּנוּ־ל֗וֹ אִ֚ישׁ קְשִׂיטָ֣ה אֶחָ֔ת וְאִ֕ישׁ נֶ֥זֶם זָהָ֖ב אֶחָֽד׃ יב וַיהֹוָ֗ה בֵּרַ֛ךְ אֶת־אַחֲרִ֥ית אִיּ֖וֹב מֵרֵֽאשִׁת֑וֹ וַֽיְהִי־ל֡וֹ אַרְבָּעָה֩ עָשָׂ֨ר אֶ֜לֶף צֹ֗אן וְשֵׁ֤שֶׁת אֲלָפִים֙ גְּמַלִּ֔ים וְאֶלֶף־צֶ֥מֶד בָּקָ֖ר וְאֶ֥לֶף אֲתוֹנֽוֹת׃ יג וַֽיְהִי־ל֛וֹ שִׁבְעָ֥נָה בָנִ֖ים וְשָׁל֥וֹשׁ בָּנֽוֹת׃ יד וַיִּקְרָ֤א שֵׁם־הָאַחַת֙ יְמִימָ֔ה וְשֵׁ֥ם הַשֵּׁנִ֖ית קְצִיעָ֑ה וְשֵׁ֥ם הַשְּׁלִישִׁ֖ית קֶ֥רֶן הַפּֽוּךְ׃ טו וְלֹ֨א נִמְצָ֜א נָשִׁ֥ים יָפ֛וֹת כִּבְנ֥וֹת אִיּ֖וֹב בְּכׇל־הָאָ֑רֶץ וַיִּתֵּ֨ן לָהֶ֧ם אֲבִיהֶ֛ם נַחֲלָ֖ה בְּת֥וֹךְ אֲחֵיהֶֽם׃ טז וַיְחִ֤י אִיּוֹב֙ אַחֲרֵי־זֹ֔את מֵאָ֥ה וְאַרְבָּעִ֖ים שָׁנָ֑ה וירא וַיִּרְאֶ֗ה אֶת־בָּנָיו֙ וְאֶת־בְּנֵ֣י בָנָ֔יו אַרְבָּעָ֖ה דֹּרֽוֹת׃ יז וַיָּ֣מׇת אִיּ֔וֹב זָקֵ֖ן וּשְׂבַ֥ע יָמִֽים׃