תהלים קג
קיצור דרך: t26a3
תנ"ך > תהלים > א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ • נא • נב • נג • נד • נה • נו • נז • נח • נט • ס • סא • סב • סג • סד • סה • סו • סז • סח • סט • ע • עא • עב • עג • עד • עה • עו • עז • עח • עט • פ • פא • פב • פג • פד • פה • פו • פז • פח • פט • צ • צא • צב • צג • צד • צה • צו • צז • צח • צט • ק • קא • קב • קג • קד • קה • קו • קז • קח • קט • קי • קיא • קיב • קיג • קיד • קטו • קטז • קיז • קיח • קיט • קכ • קכא • קכב • קכג • קכד • קכה • קכו • קכז • קכח • קכט • קל • קלא • קלב • קלג • קלד • קלה • קלו • קלז • קלח • קלט • קמ • קמא • קמב • קמג • קמד • קמה • קמו • קמז • קמח • קמט • קנ
הפרק במהדורה המוטעמת
קג א לְדָוִ֨ד ׀ בָּרְﬞכִ֣י נַ֭פְשִׁי אֶת־יְהֹוָ֑ה
וְכׇל־קְ֝רָבַ֗י אֶת־שֵׁ֥ם קׇדְשֽׁוֹ׃
ב בָּרְﬞכִ֣י נַ֭פְשִׁי אֶת־יְהֹוָ֑ה
וְאַל־תִּ֝שְׁכְּחִ֗י כׇּל־גְּמוּלָֽיו׃
ג הַסֹּלֵ֥חַ לְכׇל־עֲוֺנֵ֑כִי
הָ֝רֹפֵ֗א לְכׇל־תַּחֲלוּאָֽיְכִי׃
ד הַגּוֹאֵ֣ל מִשַּׁ֣חַת חַיָּ֑יְכִי
הַֽ֝מְעַטְּרֵ֗כִי חֶ֣סֶד וְרַחֲמִֽים׃
ה הַמַּשְׂבִּ֣יעַ בַּטּ֣וֹב עֶדְיֵ֑ךְ
תִּתְחַדֵּ֖שׁ כַּנֶּ֣שֶׁר נְעוּרָֽיְכִי׃
ו עֹשֵׂ֣ה צְדָק֣וֹת יְהֹוָ֑ה
וּ֝מִשְׁפָּטִ֗ים לְכׇל־עֲשׁוּקִֽים׃
ז יוֹדִ֣יעַ דְּרָכָ֣יו לְמֹשֶׁ֑ה
לִבְנֵ֥י יִ֝שְׂרָאֵ֗ל עֲלִילוֹתָֽיו׃
ח רַח֣וּם וְחַנּ֣וּן יְהֹוָ֑ה
אֶ֖רֶךְ אַפַּ֣יִם וְרַב־חָֽסֶד׃
ט לֹא־לָנֶ֥צַח יָרִ֑יב
וְלֹ֖א לְעוֹלָ֣ם יִטּֽוֹר׃
י לֹ֣א כַ֭חֲטָאֵינוּ עָ֣שָׂה לָ֑נוּ
וְלֹ֥א כַ֝עֲוֺנֹתֵ֗ינוּ גָּמַ֥ל עָלֵֽינוּ׃
יא כִּ֤י כִגְבֹ֣הַּ שָׁ֭מַיִם עַל־הָאָ֑רֶץ
גָּבַ֥ר חַ֝סְדּ֗וֹ עַל־יְרֵאָֽיו׃
יב כִּרְחֹ֣ק מִ֭זְרָח מִֽמַּעֲרָ֑ב
הִֽרְחִ֥יק מִ֝מֶּ֗נּוּ אֶת־פְּשָׁעֵֽינוּ׃
יג כְּרַחֵ֣ם אָ֭ב עַל־בָּנִ֑ים
רִחַ֥ם יְ֝הֹוָ֗ה עַל־יְרֵאָֽיו׃
יד כִּי־ה֭וּא יָדַ֣ע יִצְרֵ֑נוּ
זָ֝כ֗וּר כִּי־עָפָ֥ר אֲנָֽחְנוּ׃
טו אֱ֭נוֹשׁ כֶּחָצִ֣יר יָמָ֑יו
כְּצִ֥יץ הַ֝שָּׂדֶ֗ה כֵּ֣ן יָצִֽיץ׃
טז כִּ֤י ר֣וּחַ עָֽבְרָה־בּ֣וֹ וְאֵינֶ֑נּוּ
וְלֹֽא־יַכִּירֶ֖נּוּ ע֣וֹד מְקוֹמֽוֹ׃
יז וְחֶ֤סֶד יְהֹוָ֨ה ׀ מֵעוֹלָ֣ם וְעַד־ע֭וֹלָם
עַל־יְרֵאָ֑יו
וְ֝צִדְקָת֗וֹ לִבְנֵ֥י בָנִֽים׃
יח לְשֹׁמְרֵ֥י בְרִית֑וֹ
וּלְזֹכְרֵ֥י פִ֝קֻּדָ֗יו לַעֲשׂוֹתָֽם׃
יט יְֽהֹוָ֗ה בַּ֭שָּׁמַיִם הֵכִ֣ין כִּסְא֑וֹ
וּ֝מַלְכוּת֗וֹ בַּכֹּ֥ל מָשָֽׁלָה׃
כ בָּרְﬞכ֥וּ יְהֹוָ֗ה מַלְאָ֫כָ֥יו
גִּבֹּ֣רֵי כֹ֭חַ עֹשֵׂ֣י דְבָר֑וֹ
לִ֝שְׁמֹ֗עַ בְּק֣וֹל דְּבָרֽוֹ׃
כא בָּרְﬞכ֣וּ יְ֭הֹוָה כׇּל־צְבָאָ֑יו
מְ֝שָׁרְתָ֗יו עֹשֵׂ֥י רְצוֹנֽוֹ׃
כב בָּרְﬞכ֤וּ יְהֹוָ֨ה ׀ כׇּֽל־מַעֲשָׂ֗יו
בְּכׇל־מְקֹמ֥וֹת מֶמְשַׁלְתּ֑וֹ
בָּרְﬞכִ֥י נַ֝פְשִׁ֗י אֶת־יְהֹוָֽה׃
מהדורות נוספות
לחץ למטה על [הראה] להצגת התוכן ↓
א לדוד ברכי נפשי את יהוה וכל קרבי את שם קדשו
ב ברכי נפשי את יהוה ואל תשכחי כל גמוליו
ג הסלח לכל עונכי הרפא לכל תחלאיכי
ד הגואל משחת חייכי המעטרכי חסד ורחמים
ה המשביע בטוב עדיך תתחדש כנשר נעוריכי
ו עשה צדקות יהוה ומשפטים לכל עשוקים
ז יודיע דרכיו למשה לבני ישראל עלילותיו
ח רחום וחנון יהוה ארך אפים ורב חסד
ט לא לנצח יריב ולא לעולם יטור
י לא כחטאינו עשה לנו ולא כעונתינו גמל עלינו
יא כי כגבה שמים על הארץ גבר חסדו על יראיו
יב כרחק מזרח ממערב הרחיק ממנו את פשעינו
יג כרחם אב על בנים רחם יהוה על יראיו
יד כי הוא ידע יצרנו זכור כי עפר אנחנו
טו אנוש כחציר ימיו כציץ השדה כן יציץ
טז כי רוח עברה בו ואיננו ולא יכירנו עוד מקומו
יז וחסד יהוה מעולם ועד עולם על יראיו וצדקתו לבני בנים
יח לשמרי בריתו ולזכרי פקדיו לעשותם
יט יהוה בשמים הכין כסאו ומלכותו בכל משלה
כ ברכו יהוה מלאכיו גברי כח עשי דברו לשמע בקול דברו
כא ברכו יהוה כל צבאיו משרתיו עשי רצונו
כב ברכו יהוה כל מעשיו בכל מקמות ממשלתו ברכי נפשי את יהוה
א לְדָוִד בָּרֲכִי נַפְשִׁי אֶת יְהוָה וְכָל קְרָבַי אֶת שֵׁם קָדְשׁוֹ.
ב בָּרֲכִי נַפְשִׁי אֶת יְהוָה וְאַל תִּשְׁכְּחִי כָּל גְּמוּלָיו.
ג הַסֹּלֵחַ לְכָל עֲוֺנֵכִי הָרֹפֵא לְכָל תַּחֲלֻאָיְכִי.
ד הַגּוֹאֵל מִשַּׁחַת חַיָּיְכִי הַמְעַטְּרֵכִי חֶסֶד וְרַחֲמִים.
ה הַמַּשְׂבִּיַע בַּטּוֹב עֶדְיֵךְ תִּתְחַדֵּשׁ כַּנֶּשֶׁר נְעוּרָיְכִי.
ו עֹשֵׂה צְדָקוֹת יְהוָה וּמִשְׁפָּטִים לְכָל עֲשׁוּקִים.
ז יוֹדִיעַ דְּרָכָיו לְמֹשֶׁה לִבְנֵי יִשְׂרָאֵל עֲלִילוֹתָיו.
ח רַחוּם וְחַנּוּן יְהוָה אֶרֶךְ אַפַּיִם וְרַב חָסֶד.
ט לֹא לָנֶצַח יָרִיב וְלֹא לְעוֹלָם יִטּוֹר.
י לֹא כַחֲטָאֵינוּ עָשָׂה לָנוּ וְלֹא כַעֲוֺנֹתֵינוּ גָּמַל עָלֵינוּ.
יא כִּי כִגְבֹהַּ שָׁמַיִם עַל הָאָרֶץ גָּבַר חַסְדּוֹ עַל יְרֵאָיו.
יב כִּרְחֹק מִזְרָח מִמַּעֲרָב הִרְחִיק מִמֶּנּוּ אֶת פְּשָׁעֵינוּ.
יג כְּרַחֵם אָב עַל בָּנִים רִחַם יְהוָה עַל יְרֵאָיו.
יד כִּי הוּא יָדַע יִצְרֵנוּ זָכוּר כִּי עָפָר אֲנָחְנוּ.
טו אֱנוֹשׁ כֶּחָצִיר יָמָיו כְּצִיץ הַשָּׂדֶה כֵּן יָצִיץ.
טז כִּי רוּחַ עָבְרָה בּוֹ וְאֵינֶנּוּ וְלֹא יַכִּירֶנּוּ עוֹד מְקוֹמוֹ.
יז וְחֶסֶד יְהוָה מֵעוֹלָם וְעַד עוֹלָם עַל יְרֵאָיו וְצִדְקָתוֹ לִבְנֵי בָנִים.
יח לְשֹׁמְרֵי בְרִיתוֹ וּלְזֹכְרֵי פִקֻּדָיו לַעֲשׂוֹתָם.
יט יְהוָה בַּשָּׁמַיִם הֵכִין כִּסְאוֹ וּמַלְכוּתוֹ בַּכֹּל מָשָׁלָה.
כ בָּרֲכוּ יְהוָה מַלְאָכָיו גִּבֹּרֵי כֹחַ עֹשֵׂי דְבָרוֹ לִשְׁמֹעַ בְּקוֹל דְּבָרוֹ.
כא בָּרֲכוּ יְהוָה כָּל צְבָאָיו מְשָׁרְתָיו עֹשֵׂי רְצוֹנוֹ.
כב בָּרֲכוּ יְהוָה כָּל מַעֲשָׂיו בְּכָל מְקֹמוֹת מֶמְשַׁלְתּוֹ בָּרֲכִי נַפְשִׁי אֶת יְהוָה.
(א) לְדָוִד בָּרֲכִי נַפְשִׁי אֶת יְהוָה וְכָל קְרָבַי אֶת שֵׁם קָדְשׁוֹ.
(ב) בָּרֲכִי נַפְשִׁי אֶת יְהוָה וְאַל תִּשְׁכְּחִי כָּל גְּמוּלָיו.
(ג) הַסֹּלֵחַ לְכָל עֲוֺנֵכִי הָרֹפֵא לְכָל תַּחֲלֻאָיְכִי.
(ד) הַגּוֹאֵל מִשַּׁחַת חַיָּיְכִי הַמְעַטְּרֵכִי חֶסֶד וְרַחֲמִים.
(ה) הַמַּשְׂבִּיַע בַּטּוֹב עֶדְיֵךְ תִּתְחַדֵּשׁ כַּנֶּשֶׁר נְעוּרָיְכִי.
(ו) עֹשֵׂה צְדָקוֹת יְהוָה וּמִשְׁפָּטִים לְכָל עֲשׁוּקִים.
(ז) יוֹדִיעַ דְּרָכָיו לְמֹשֶׁה לִבְנֵי יִשְׂרָאֵל עֲלִילוֹתָיו.
(ח) רַחוּם וְחַנּוּן יְהוָה אֶרֶךְ אַפַּיִם וְרַב חָסֶד.
(ט) לֹא לָנֶצַח יָרִיב וְלֹא לְעוֹלָם יִטּוֹר.
(י) לֹא כַחֲטָאֵינוּ עָשָׂה לָנוּ וְלֹא כַעֲוֺנֹתֵינוּ גָּמַל עָלֵינוּ.
(יא) כִּי כִגְבֹהַּ שָׁמַיִם עַל הָאָרֶץ גָּבַר חַסְדּוֹ עַל יְרֵאָיו.
(יב) כִּרְחֹק מִזְרָח מִמַּעֲרָב הִרְחִיק מִמֶּנּוּ אֶת פְּשָׁעֵינוּ.
(יג) כְּרַחֵם אָב עַל בָּנִים רִחַם יְהוָה עַל יְרֵאָיו.
(יד) כִּי הוּא יָדַע יִצְרֵנוּ זָכוּר כִּי עָפָר אֲנָחְנוּ.
(טו) אֱנוֹשׁ כֶּחָצִיר יָמָיו כְּצִיץ הַשָּׂדֶה כֵּן יָצִיץ.
(טז) כִּי רוּחַ עָבְרָה בּוֹ וְאֵינֶנּוּ וְלֹא יַכִּירֶנּוּ עוֹד מְקוֹמוֹ.
(יז) וְחֶסֶד יְהוָה מֵעוֹלָם וְעַד עוֹלָם עַל יְרֵאָיו וְצִדְקָתוֹ לִבְנֵי בָנִים.
(יח) לְשֹׁמְרֵי בְרִיתוֹ וּלְזֹכְרֵי פִקֻּדָיו לַעֲשׂוֹתָם.
(יט) יְהוָה בַּשָּׁמַיִם הֵכִין כִּסְאוֹ וּמַלְכוּתוֹ בַּכֹּל מָשָׁלָה.
(כ) בָּרֲכוּ יְהוָה מַלְאָכָיו גִּבֹּרֵי כֹחַ עֹשֵׂי דְבָרוֹ לִשְׁמֹעַ בְּקוֹל דְּבָרוֹ.
(כא) בָּרֲכוּ יְהוָה כָּל צְבָאָיו מְשָׁרְתָיו עֹשֵׂי רְצוֹנוֹ.
(כב) בָּרֲכוּ יְהוָה כָּל מַעֲשָׂיו בְּכָל מְקֹמוֹת מֶמְשַׁלְתּוֹ בָּרֲכִי נַפְשִׁי אֶת יְהוָה.
א לְדָוִד:
- בָּרֲכִי נַפְשִׁי אֶת יְהוָה, וְכָל קְרָבַי איברי הפנימיים אֶת שֵׁם קָדְשׁוֹ.
- ב בָּרֲכִי נַפְשִׁי אֶת יְהוָה, וְאַל תִּשְׁכְּחִי כָּל גְּמוּלָיו את כל הטובות שגמל לנו.
- ג הַסֹּלֵחַ לְכָל עֲוֺנֵכִי, הָרֹפֵא לְכָל תַּחֲלֻאָיְכִי.
- ד הַגּוֹאֵל מִשַּׁחַת מבור שחת, מהמוות חַיָּיְכִי, הַמְעַטְּרֵכִי המקיף אותך חֶסֶד וְרַחֲמִים.
- ה הַמַּשְׂבִּיַע בַּטּוֹב עֶדְיֵךְ את גופך הנאה כמו תכשיט, תִּתְחַדֵּשׁ כַּנֶּשֶׁר כמו נשר שנוצותיו נושרות ומתחדשות נְעוּרָיְכִי.
- ו עֹשֵׂה צְדָקוֹת יְהוָה, וּמִשְׁפָּטִים לְכָל עֲשׁוּקִים.
- ז יוֹדִיעַ דְּרָכָיו לְמֹשֶׁה, לִבְנֵי יִשְׂרָאֵל עֲלִילוֹתָיו.
- ח רַחוּם וְחַנּוּן יְהוָה, אֶרֶךְ אַפַּיִם וְרַב חָסֶד.
- ט לֹא לָנֶצַח יָרִיב יכעס, וְלֹא לְעוֹלָם יִטּוֹר ישמור את כעסו.
- י לֹא כַחֲטָאֵינוּ עָשָׂה לָנוּ הקל בעונשינו, וְלֹא כַעֲוֺנֹתֵינוּ גָּמַל עָלֵינוּ.
- יא כִּי כִגְבֹהַּ שָׁמַיִם עַל הָאָרֶץ, גָּבַר חַסְדּוֹ כך חסדו של ה' פרוש עַל יְרֵאָיו.
- יב כִּרְחֹק מִזְרָח מִמַּעֲרָב, הִרְחִיק מִמֶּנּוּ אֶת פְּשָׁעֵינוּ.
- יג כְּרַחֵם אָב עַל בָּנִים, רִחַם יְהוָה עַל יְרֵאָיו.
- יד כִּי הוּא יָדַע יִצְרֵנוּ את יצר הרע שלנו, את תאוותינו, זָכוּר הוא זוכר כִּי עָפָר אֲנָחְנוּ.
- טו אֱנוֹשׁ - כֶּחָצִיר קצרים כמו עשב השדה יָמָיו, כְּצִיץ הַשָּׂדֶה - כֵּן יָצִיץ.
- טז כִּי רוּחַ עָבְרָה בּוֹ נשבה עליו וְאֵינֶנּוּ, וְלֹא יַכִּירֶנּוּ לא יהיה לו סימן היכר במקומו עוֹד מְקוֹמוֹ.
- יז וְחֶסֶד יְהוָה מֵעוֹלָם וְעַד עוֹלָם עַל יְרֵאָיו, וְצִדְקָתוֹ לִבְנֵי בָנִים.
- יח לְשֹׁמְרֵי בְרִיתוֹ, וּלְזֹכְרֵי פִקֻּדָיו מיצוותיו לַעֲשׂוֹתָם ומקיימים אותן.
- יט יְהוָה בַּשָּׁמַיִם הֵכִין ביסס, יסד כִּסְאוֹ, וּמַלְכוּתוֹ בַּכֹּל מָשָׁלָה.
- כ בָּרֲכוּ יְהוָה מַלְאָכָיו, גִּבֹּרֵי כֹחַ גיבורים בעלי כח עֹשֵׂי דְבָרוֹ שעליהם לעשות את דבר ה', לִשְׁמֹעַ ואכן הם שומעים בְּקוֹל דְּבָרוֹ.
- כא בָּרֲכוּ יְהוָה כָּל צְבָאָיו, מְשָׁרְתָיו עֹשֵׂי רְצוֹנוֹ.
- כב בָּרֲכוּ יְהוָה כָּל מַעֲשָׂיו בְּכָל מְקֹמוֹת מֶמְשַׁלְתּוֹ, בָּרֲכִי נַפְשִׁי אֶת יְהוָה.
פסוקי הפרק
טקסטים נוספים העוסקים בפרק
פירושים ומאמרים על הפרק:
