תהלים קט

קיצור דרך: t26a9

תנ"ך > תהלים > א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ • נא • נב • נג • נד • נה • נו • נז • נח • נט • ס • סא • סב • סג • סד • סה • סו • סז • סח • סט • ע • עא • עב • עג • עד • עה • עו • עז • עח • עט • פ • פא • פב • פג • פד • פה • פו • פז • פח • פט • צ • צא • צב • צג • צד • צה • צו • צז • צח • צט • ק • קא • קב • קג • קד • קה • קו • קז • קח • קט • קי • קיא • קיב • קיג • קיד • קטו • קטז • קיז • קיח • קיט • קכ • קכא • קכב • קכג • קכד • קכה • קכו • קכז • קכח • קכט • קל • קלא • קלב • קלג • קלד • קלה • קלו • קלז • קלח • קלט • קמ • קמא • קמב • קמג • קמד • קמה • קמו • קמז • קמח • קמט • קנ

<< | ספר תהלים • פרק ק"ט | >>

הפרק במהדורה המוטעמת

　　
קט א לַ֭מְנַצֵּחַ לְדָוִ֣ד מִזְמ֑וֹר
אֱלֹהֵ֥י תְ֝הִלָּתִ֗י
אַֽל־תֶּחֱרַֽשׁ׃
ב כִּ֤י פִ֪י רָשָׁ֡ע
וּֽפִי־מִ֭רְמָה עָלַ֣י פָּתָ֑חוּ
דִּבְּר֥וּ אִ֝תִּ֗י לְשׁ֣וֹן שָֽׁקֶר׃
ג וְדִבְרֵ֣י שִׂנְאָ֣ה סְבָב֑וּנִי
וַיִּֽלָּחֲמ֥וּנִי חִנָּֽם׃
ד תַּֽחַת־אַהֲבָתִ֥י יִשְׂטְנ֗וּנִי
וַאֲנִ֥י תְפִלָּֽה׃
ה וַיָּ֘שִׂ֤ימוּ עָלַ֣י רָ֭עָה תַּ֣חַת טוֹבָ֑ה
וְ֝שִׂנְאָ֗ה תַּ֣חַת אַהֲבָתִֽי׃
ו הַפְקֵ֣ד עָלָ֣יו רָשָׁ֑ע
וְ֝שָׂטָ֗ן יַעֲמֹ֥ד עַל־יְמִינֽוֹ׃
ז בְּ֭הִשָּׁ֣פְטוֹ יֵצֵ֣א רָשָׁ֑ע
וּ֝תְפִלָּת֗וֹ תִּֽהְיֶ֥ה לַחֲטָאָֽה׃
ח יִֽהְיוּ־יָמָ֥יו מְעַטִּ֑ים
פְּ֝קֻדָּת֗וֹ יִקַּ֥ח אַחֵֽר׃
ט יִֽהְיוּ־בָנָ֥יו יְתוֹמִ֑ים
וְ֝אִשְׁתּ֗וֹ אַלְמָנָֽה׃
י וְנ֤וֹעַ יָנ֣וּעוּ בָנָ֣יו וְשִׁאֵ֑לוּ
וְ֝דָרְשׁ֗וּ מֵחׇרְבֽוֹתֵיהֶֽם׃
יא יְנַקֵּ֣שׁ נ֭וֹשֶׁה לְכׇל־אֲשֶׁר־ל֑וֹ
וְיָבֹ֖זּוּ זָרִ֣ים יְגִיעֽוֹ׃
יב אַל־יְהִי־ל֭וֹ מֹשֵׁ֣ךְ חָ֑סֶד
וְֽאַל־יְהִ֥י ח֝וֹנֵ֗ן לִֽיתוֹמָֽיו׃
יג יְהִי־אַחֲרִית֥וֹ לְהַכְרִ֑ית
בְּד֥וֹר אַ֝חֵ֗ר יִמַּ֥ח שְׁמָֽם׃
יד יִזָּכֵ֤ר ׀ עֲוֺ֣ן אֲ֭בֹתָיו אֶל־יְהֹוָ֑ה
וְחַטַּ֥את אִ֝מּ֗וֹ אַל־תִּמָּֽח׃
טו יִהְי֣וּ נֶגֶד־יְהֹוָ֣ה תָּמִ֑יד
וְיַכְרֵ֖ת מֵאֶ֣רֶץ זִכְרָֽם׃
טז יַ֗עַן אֲשֶׁ֤ר ׀ לֹ֥א זָכַר֮ עֲשׂ֢וֹת חָ֥֫סֶד
וַיִּרְדֹּ֡ף אִישׁ־עָנִ֣י וְ֭אֶבְיוֹן
וְנִכְאֵ֨ה לֵבָ֬ב לְמוֹתֵֽת׃
יז וַיֶּאֱהַ֣ב קְ֭לָלָה וַתְּבוֹאֵ֑הוּ
וְֽלֹא־חָפֵ֥ץ בִּ֝בְרָכָ֗ה וַתִּרְחַ֥ק מִמֶּֽנּוּ׃
יח וַיִּלְבַּ֥שׁ קְלָלָ֗ה כְּמַ֫דּ֥וֹ
וַתָּבֹ֣א כַמַּ֣יִם בְּקִרְבּ֑וֹ
וְ֝כַשֶּׁ֗מֶן בְּעַצְמוֹתָֽיו׃
יט תְּהִי־ל֭וֹ כְּבֶ֣גֶד יַעְטֶ֑ה
וּ֝לְמֵ֗זַח תָּמִ֥יד יַחְגְּרֶֽהָ׃
כ זֹ֤את פְּעֻלַּ֣ת שֹׂ֭טְנַי מֵאֵ֣ת יְהֹוָ֑ה
וְהַדֹּבְרִ֥ים רָ֗֝ע עַל־נַפְשִֽׁי׃
כא וְאַתָּ֤ה ׀ יֱ֘הֹוִ֤ה אֲדֹנָ֗י
עֲֽשֵׂה־אִ֭תִּי לְמַ֣עַן שְׁמֶ֑ךָ
כִּי־ט֥וֹב חַ֝סְדְּךָ֗ הַצִּילֵֽנִי׃
כב כִּי־עָנִ֣י וְאֶבְי֣וֹן אָנֹ֑כִי
וְ֝לִבִּ֗י חָלַ֥ל בְּקִרְבִּֽי׃
כג כְּצֵל־כִּנְטוֹת֥וֹ נֶהֱלָ֑כְתִּי
נִ֝נְעַ֗רְתִּי כָּאַרְבֶּֽה׃
כד בִּ֭רְכַּי כָּשְׁל֣וּ מִצּ֑וֹם
וּ֝בְשָׂרִ֗י כָּחַ֥שׁ מִשָּֽׁמֶן׃
כה וַאֲנִ֤י ׀ הָיִ֣יתִי חֶרְפָּ֣ה לָהֶ֑ם
יִ֝רְא֗וּנִי יְנִיע֥וּן רֹאשָֽׁם׃
כו עׇ֭זְרֵנִי יְהֹוָ֣ה אֱלֹהָ֑י
ה֖וֹשִׁיעֵ֣נִי כְחַסְדֶּֽךָ׃
כז וְֽ֭יֵדְעוּ כִּי־יָ֣דְךָ זֹּ֑את
אַתָּ֖ה יְהֹוָ֣ה עֲשִׂיתָֽהּ׃
כח יְקַֽלְﬞלוּ־הֵ֮מָּה֮ וְאַתָּ֢ה תְבָ֫רֵ֥ךְ
קָ֤מוּ ׀ וַיֵּבֹ֗שׁוּ וְֽעַבְדְּךָ֥ יִשְׂמָֽח׃
כט יִלְבְּשׁ֣וּ שׂוֹטְנַ֣י כְּלִמָּ֑ה
וְיַעֲט֖וּ כַמְעִ֣יל בׇּשְׁתָּֽם׃
ל א֘וֹדֶ֤ה יְהֹוָ֣ה מְאֹ֣ד בְּפִ֑י
וּבְת֖וֹךְ רַבִּ֣ים אֲהַלְﬞלֶֽנּוּ׃
לא כִּֽי־יַ֭עֲמֹד לִימִ֣ין אֶבְי֑וֹן
לְ֝הוֹשִׁ֗יעַ מִשֹּׁפְטֵ֥י נַפְשֽׁוֹ׃

מהדורות נוספות

לחץ למטה על [הראה] להצגת התוכן ↓

כתיב (אותיות בלבד)

א למנצח לדוד מזמור אלהי תהלתי אל תחרש ב כי פי רשע ופי מרמה עלי פתחו דברו אתי לשון שקר ג ודברי שנאה סבבוני וילחמוני חנם ד תחת אהבתי ישטנוני ואני תפלה ה וישימו עלי רעה תחת טובה ושנאה תחת אהבתי ו הפקד עליו רשע ושטן יעמד על ימינו ז בהשפטו יצא רשע ותפלתו תהיה לחטאה ח יהיו ימיו מעטים פקדתו יקח אחר ט יהיו בניו יתומים ואשתו אלמנה י ונוע ינועו בניו ושאלו ודרשו מחרבותיהם יא ינקש נושה לכל אשר לו ויבזו זרים יגיעו יב אל יהי לו משך חסד ואל יהי חונן ליתומיו יג יהי אחריתו להכרית בדור אחר ימח שמם יד יזכר עון אבתיו אל יהוה וחטאת אמו אל תמח טו יהיו נגד יהוה תמיד ויכרת מארץ זכרם טז יען אשר לא זכר עשות חסד וירדף איש עני ואביון ונכאה לבב למותת יז ויאהב קללה ותבואהו ולא חפץ בברכה ותרחק ממנו יח וילבש קללה כמדו ותבא כמים בקרבו וכשמן בעצמותיו יט תהי לו כבגד יעטה ולמזח תמיד יחגרה כ זאת פעלת שטני מאת יהוה והדברים רע על נפשי כא ואתה יהוה אדני ע‍שה אתי למען שמך כי טוב חסדך הצילני כב כי עני ואביון אנכי ולבי חלל בקרבי כג כצל כנטותו נהלכתי ננערתי כארבה כד ברכי כשלו מצום ובשרי כחש משמן כה ואני הייתי חרפה להם יראוני יניעון ראשם כו עזרני יהוה אלהי הושיעני כחסדך כז וידעו כי ידך זאת אתה יהוה עשיתה כח יקללו המה ואתה תברך קמו ויבשו ועבדך ישמח כט ילבשו שוטני כלמה ויעטו כמעיל בשתם ל אודה יהוה מאד בפי ובתוך רבים אהללנו לא כי יעמד לימין אביון להושיע משפטי נפשו

מנוקד

א לַמְנַצֵּחַ לְדָוִד מִזְמוֹר אֱלֹהֵי תְהִלָּתִי אַל תֶּחֱרַשׁ. ב כִּי פִי רָשָׁע וּפִי מִרְמָה עָלַי פָּתָחוּ דִּבְּרוּ אִתִּי לְשׁוֹן שָׁקֶר. ג וְדִבְרֵי שִׂנְאָה סְבָבוּנִי וַיִּלָּחֲמוּנִי חִנָּם. ד תַּחַת אַהֲבָתִי יִשְׂטְנוּנִי וַאֲנִי תְפִלָּה. ה וַיָּשִׂימוּ עָלַי רָעָה תַּחַת טוֹבָה וְשִׂנְאָה תַּחַת אַהֲבָתִי. ו הַפְקֵד עָלָיו רָשָׁע וְשָׂטָן יַעֲמֹד עַל יְמִינוֹ. ז בְּהִשָּׁפְטוֹ יֵצֵא רָשָׁע וּתְפִלָּתוֹ תִּהְיֶה לַחֲטָאָה. ח יִהְיוּ יָמָיו מְעַטִּים פְּקֻדָּתוֹ יִקַּח אַחֵר. ט יִהְיוּ בָנָיו יְתוֹמִים וְאִשְׁתּוֹ אַלְמָנָה. י וְנוֹעַ יָנוּעוּ בָנָיו וְשִׁאֵלוּ וְדָרְשׁוּ מֵחָרְבוֹתֵיהֶם. יא יְנַקֵּשׁ נוֹשֶׁה לְכָל אֲשֶׁר לוֹ וְיָבֹזּוּ זָרִים יְגִיעוֹ. יב אַל יְהִי לוֹ מֹשֵׁךְ חָסֶד וְאַל יְהִי חוֹנֵן לִיתוֹמָיו. יג יְהִי אַחֲרִיתוֹ לְהַכְרִית בְּדוֹר אַחֵר יִמַּח שְׁמָם. יד יִזָּכֵר עֲוֺן אֲבֹתָיו אֶל יְהוָה וְחַטַּאת אִמּוֹ אַל תִּמָּח. טו יִהְיוּ נֶגֶד יְהוָה תָּמִיד וְיַכְרֵת מֵאֶרֶץ זִכְרָם. טז יַעַן אֲשֶׁר לֹא זָכַר עֲשׂוֹת חָסֶד וַיִּרְדֹּף אִישׁ עָנִי וְאֶבְיוֹן וְנִכְאֵה לֵבָב לְמוֹתֵת. יז וַיֶּאֱהַב קְלָלָה וַתְּבוֹאֵהוּ וְלֹא חָפֵץ בִּבְרָכָה וַתִּרְחַק מִמֶּנּוּ. יח וַיִּלְבַּשׁ קְלָלָה כְּמַדּוֹ וַתָּבֹא כַמַּיִם בְּקִרְבּוֹ וְכַשֶּׁמֶן בְּעַצְמוֹתָיו. יט תְּהִי לוֹ כְּבֶגֶד יַעְטֶה וּלְמֵזַח תָּמִיד יַחְגְּרֶהָ. כ זֹאת פְּעֻלַּת שֹׂטְנַי מֵאֵת יְהוָה וְהַדֹּבְרִים רָע עַל נַפְשִׁי. כא וְאַתָּה יְהוִה אֲדֹנָי עֲ‍שֵׂה אִתִּי לְמַעַן שְׁמֶךָ כִּי טוֹב חַסְדְּךָ הַצִּילֵנִי. כב כִּי עָנִי וְאֶבְיוֹן אָנֹכִי וְלִבִּי חָלַל בְּקִרְבִּי. כג כְּצֵל כִּנְטוֹתוֹ נֶהֱלָכְתִּי נִנְעַרְתִּי כָּאַרְבֶּה. כד בִּרְכַּי כָּשְׁלוּ מִצּוֹם וּבְשָׂרִי כָּחַשׁ מִשָּׁמֶן. כה וַאֲנִי הָיִיתִי חֶרְפָּה לָהֶם יִרְאוּנִי יְנִיעוּן רֹאשָׁם. כו עָזְרֵנִי יְהוָה אֱלֹהָי הוֹשִׁיעֵנִי כְחַסְדֶּךָ. כז וְיֵדְעוּ כִּי יָדְךָ זֹּאת אַתָּה יְהוָה עֲשִׂיתָהּ. כח יְקַלְלוּ הֵמָּה וְאַתָּה תְבָרֵךְ קָמוּ וַיֵּבֹשׁוּ וְעַבְדְּךָ יִשְׂמָח. כט יִלְבְּשׁוּ שׂוֹטְנַי כְּלִמָּה וְיַעֲטוּ כַמְעִיל בָּשְׁתָּם. ל אוֹדֶה יְהוָה מְאֹד בְּפִי וּבְתוֹךְ רַבִּים אֲהַלְלֶנּוּ. לא כִּי יַעֲמֹד לִימִין אֶבְיוֹן לְהוֹשִׁיעַ מִשֹּׁפְטֵי נַפְשׁוֹ.

מנוקד ובשורות

(א) לַמְנַצֵּחַ לְדָוִד מִזְמוֹר אֱלֹהֵי תְהִלָּתִי אַל תֶּחֱרַשׁ.

(ב) כִּי פִי רָשָׁע וּפִי מִרְמָה עָלַי פָּתָחוּ דִּבְּרוּ אִתִּי לְשׁוֹן שָׁקֶר.

(ג) וְדִבְרֵי שִׂנְאָה סְבָבוּנִי וַיִּלָּחֲמוּנִי חִנָּם.

(ד) תַּחַת אַהֲבָתִי יִשְׂטְנוּנִי וַאֲנִי תְפִלָּה.

(ה) וַיָּשִׂימוּ עָלַי רָעָה תַּחַת טוֹבָה וְשִׂנְאָה תַּחַת אַהֲבָתִי.

(ו) הַפְקֵד עָלָיו רָשָׁע וְשָׂטָן יַעֲמֹד עַל יְמִינוֹ.

(ז) בְּהִשָּׁפְטוֹ יֵצֵא רָשָׁע וּתְפִלָּתוֹ תִּהְיֶה לַחֲטָאָה.

(ח) יִהְיוּ יָמָיו מְעַטִּים פְּקֻדָּתוֹ יִקַּח אַחֵר.

(ט) יִהְיוּ בָנָיו יְתוֹמִים וְאִשְׁתּוֹ אַלְמָנָה.

(י) וְנוֹעַ יָנוּעוּ בָנָיו וְשִׁאֵלוּ וְדָרְשׁוּ מֵחָרְבוֹתֵיהֶם.

(יא) יְנַקֵּשׁ נוֹשֶׁה לְכָל אֲשֶׁר לוֹ וְיָבֹזּוּ זָרִים יְגִיעוֹ.

(יב) אַל יְהִי לוֹ מֹשֵׁךְ חָסֶד וְאַל יְהִי חוֹנֵן לִיתוֹמָיו.

(יג) יְהִי אַחֲרִיתוֹ לְהַכְרִית בְּדוֹר אַחֵר יִמַּח שְׁמָם.

(יד) יִזָּכֵר עֲוֺן אֲבֹתָיו אֶל יְהוָה וְחַטַּאת אִמּוֹ אַל תִּמָּח.

(טו) יִהְיוּ נֶגֶד יְהוָה תָּמִיד וְיַכְרֵת מֵאֶרֶץ זִכְרָם.

(טז) יַעַן אֲשֶׁר לֹא זָכַר עֲשׂוֹת חָסֶד וַיִּרְדֹּף אִישׁ עָנִי וְאֶבְיוֹן וְנִכְאֵה לֵבָב לְמוֹתֵת.

(יז) וַיֶּאֱהַב קְלָלָה וַתְּבוֹאֵהוּ וְלֹא חָפֵץ בִּבְרָכָה וַתִּרְחַק מִמֶּנּוּ.

(יח) וַיִּלְבַּשׁ קְלָלָה כְּמַדּוֹ וַתָּבֹא כַמַּיִם בְּקִרְבּוֹ וְכַשֶּׁמֶן בְּעַצְמוֹתָיו.

(יט) תְּהִי לוֹ כְּבֶגֶד יַעְטֶה וּלְמֵזַח תָּמִיד יַחְגְּרֶהָ.

(כ) זֹאת פְּעֻלַּת שֹׂטְנַי מֵאֵת יְהוָה וְהַדֹּבְרִים רָע עַל נַפְשִׁי.

(כא) וְאַתָּה יְהוִה אֲדֹנָי עֲ‍שֵׂה אִתִּי לְמַעַן שְׁמֶךָ כִּי טוֹב חַסְדְּךָ הַצִּילֵנִי.

(כב) כִּי עָנִי וְאֶבְיוֹן אָנֹכִי וְלִבִּי חָלַל בְּקִרְבִּי.

(כג) כְּצֵל כִּנְטוֹתוֹ נֶהֱלָכְתִּי נִנְעַרְתִּי כָּאַרְבֶּה.

(כד) בִּרְכַּי כָּשְׁלוּ מִצּוֹם וּבְשָׂרִי כָּחַשׁ מִשָּׁמֶן.

(כה) וַאֲנִי הָיִיתִי חֶרְפָּה לָהֶם יִרְאוּנִי יְנִיעוּן רֹאשָׁם.

(כו) עָזְרֵנִי יְהוָה אֱלֹהָי הוֹשִׁיעֵנִי כְחַסְדֶּךָ.

(כז) וְיֵדְעוּ כִּי יָדְךָ זֹּאת אַתָּה יְהוָה עֲשִׂיתָהּ.

(כח) יְקַלְלוּ הֵמָּה וְאַתָּה תְבָרֵךְ קָמוּ וַיֵּבֹשׁוּ וְעַבְדְּךָ יִשְׂמָח.

(כט) יִלְבְּשׁוּ שׂוֹטְנַי כְּלִמָּה וְיַעֲטוּ כַמְעִיל בָּשְׁתָּם.

(ל) אוֹדֶה יְהוָה מְאֹד בְּפִי וּבְתוֹךְ רַבִּים אֲהַלְלֶנּוּ.

(לא) כִּי יַעֲמֹד לִימִין אֶבְיוֹן לְהוֹשִׁיעַ מִשֹּׁפְטֵי נַפְשׁוֹ.

עם ביאור

קישור לפרק זה במהדורה המבוארת

מבנה וסיכום הפרק

א לַמְנַצֵּחַ לְדָוִד מִזְמוֹר:

אֱלֹהֵי תְהִלָּתִי האל שאני מהללו, אַל תֶּחֱרַשׁ.

ב כִּי פִי רָשָׁע וּפִי מִרְמָה ופה של רמאי עָלַי פָּתָחוּ, דִּבְּרוּ אִתִּי לְשׁוֹן שָׁקֶר.

ג וְדִבְרֵי שִׂנְאָה סְבָבוּנִי הם (הרשעים) הקיפו אותי, וַיִּלָּחֲמוּנִי חִנָּם מבלי שעשיתי להם רע.

ד תַּחַת אַהֲבָתִי יִשְׂטְנוּנִי, וַאֲנִי תְפִלָּה התפללתי למענם.

ה וַיָּשִׂימוּ עָלַי רָעָה תַּחַת טוֹבָה, וְשִׂנְאָה תַּחַת אַהֲבָתִי.

ו הַפְקֵד עָלָיו מנה על אויבי מישהו רָשָׁע, וְשָׂטָן מישהו שרוצה את רעתו יַעֲמֹד עַל יְמִינוֹ יעמוד לצידו וירע לו.

ז בְּהִשָּׁפְטוֹ בבית דין של מעלה יֵצֵא ישפט דינו כ- רָשָׁע, וּתְפִלָּתוֹ תִּהְיֶה לַחֲטָאָה כמו חטא (כי היא תפילת שווא - לא מגיעה לו מחילה על חטאיו הרבים).

ח יִהְיוּ יָמָיו מְעַטִּים, פְּקֻדָּתוֹ את הדברים שהוא היה אחראי עליהם יִקַּח אַחֵר.

ט יִהְיוּ בָנָיו יְתוֹמִים, וְאִשְׁתּוֹ אַלְמָנָה.

י וְנוֹעַ יָנוּעוּ בָנָיו וְשִׁאֵלוּ ויבקשו עזרה, וְדָרְשׁוּ יבקשו מאחרים מֵחָרְבוֹתֵיהֶם בגלל חורבנם.

יא יְנַקֵּשׁ ילכוד, יתפוס ה- נוֹשֶׁה לְכָל אֲשֶׁר לוֹ את כל רכושו, וְיָבֹזּוּ זָרִים יְגִיעוֹ את עמלו, רכושו.

יב אַל יְהִי לוֹ מֹשֵׁךְ חָסֶד מי שימשוך את נאמנותו לאב גם לבניו, וְאַל יְהִי חוֹנֵן מי שירחם לִיתוֹמָיו.

יג יְהִי אַחֲרִיתוֹ לְהַכְרִית גורלה להשמדה, בְּדוֹר אַחֵר בדור שלאחר מות בניו יִמַּח שְׁמָם ימחה שמם של בניו, כי ימותו ללא בנים.

יד יִזָּכֵר עֲוֺן אֲבֹתָיו אֶל יְהוָה, וְחַטַּאת אִמּוֹ אַל תִּמָּח.

טו יִהְיוּ חטאיו של הרשע נֶגֶד יְהוָה תָּמִיד, וְיַכְרֵת מֵאֶרֶץ זִכְרָם.

טז יַעַן אֲשֶׁר לֹא זָכַר עֲשׂוֹת חָסֶד, וַיִּרְדֹּף אִישׁ עָנִי וְאֶבְיוֹן, וְנִכְאֵה לֵבָב שבור לב לְמוֹתֵת רצה להמית.

יז וַיֶּאֱהַב קְלָלָה וַתְּבוֹאֵהוּ, וְלֹא חָפֵץ בִּבְרָכָה וַתִּרְחַק מִמֶּנּוּ.

יח וַיִּלְבַּשׁ קְלָלָה כְּמַדּוֹ כאילו היתה המדים שלו וַתָּבֹא כַמַּיִם כמו מים שאדם שותה בְּקִרְבּוֹ, וְכַשֶּׁמֶן כמו שמן שאדם סך בו את גופו כדי לשחרר את עצמותיו בְּעַצְמוֹתָיו.

יט תְּהִי לוֹ כְּבֶגֶד יַעְטֶה, וּלְמֵזַח לאזור תָּמִיד יַחְגְּרֶהָ.

כ זֹאת פְּעֻלַּת שֹׂטְנַי הלוואי וזה יהיה הגמול לשונאי מֵאֵת יְהוָה, וְהַדֹּבְרִים ולדוברים רָע עַל נַפְשִׁי.

כא וְאַתָּה יְהוִה אֲדֹנָי, עֲ‍שֵׂה אִתִּי לְמַעַן שְׁמֶךָ, כִּי טוֹב חַסְדְּךָ, הַצִּילֵנִי.

כב כִּי עָנִי וְאֶבְיוֹן אָנֹכִי, וְלִבִּי חָלַל בְּקִרְבִּי.

כג כְּצֵל כִּנְטוֹתוֹ כאשר הוא נוטה כאשר השמש נמוכה נֶהֱלָכְתִּי, נִנְעַרְתִּי נטלטלתי ברוח כָּאַרְבֶּה.

כד בִּרְכַּי כָּשְׁלוּ מִצּוֹם, וּבְשָׂרִי כָּחַשׁ מִשָּׁמֶן ואין בו שמנונית.

כה וַאֲנִי הָיִיתִי חֶרְפָּה לָהֶם, יִרְאוּנִי - יְנִיעוּן רֹאשָׁם יזיזו את ראשם מצד לצד בלעג.

כו עָזְרֵנִי יְהוָה אֱלֹהָי, הוֹשִׁיעֵנִי כְחַסְדֶּךָ.

כז וְיֵדְעוּ כִּי יָדְךָ זֹּאת, אַתָּה יְהוָה עֲשִׂיתָהּ.

כח יְקַלְלוּ הֵמָּה וְאַתָּה תְבָרֵךְ, קָמוּ וַיֵּבֹשׁוּ קמו כנגדי ולבסוף התביישו וְעַבְדְּךָ יִשְׂמָח.

כט יִלְבְּשׁוּ שׂוֹטְנַי כְּלִמָּה, וְיַעֲטוּ כַמְעִיל בָּשְׁתָּם.

ל אוֹדֶה יְהוָה מְאֹד בְּפִי, וּבְתוֹךְ רַבִּים אֲהַלְלֶנּוּ.

לא כִּי יַעֲמֹד לִימִין אֶבְיוֹן, לְהוֹשִׁיעַ מִשֹּׁפְטֵי נַפְשׁוֹ את האביון מהשופטים אותו דיני נפשות.

המהדורה המוטעמת מציגה את נוסח המקרא על פי המסורה. יתר מהדורות המקרא בוויקיטקסט מציגות את נוסח כתב יד לנינגרד (מהדורת וסטמינסטר). לפרטים מלאים ראו את ויקיטקסט:מקרא.