תהלים קכה/טעמים



קכה א שִׁ֗יר הַֽמַּ֫עֲל֥וֹת
הַבֹּטְחִ֥ים בַּיהֹוָ֑ה
  כְּֽהַר־צִיּ֥וֹן לֹא־יִ֝מּ֗וֹט לְעוֹלָ֥ם יֵשֵֽׁב׃
ב יְֽרוּשָׁלַ֗͏ִם הָרִים֮ סָבִ֢יב לָ֥֫הּ
  וַ֭יהֹוָה סָבִ֣יב לְעַמּ֑וֹ
  מֵ֝עַתָּ֗ה וְעַד־עוֹלָֽם׃
ג כִּ֤י לֹ֪א יָנ֡וּחַ שֵׁ֤בֶט הָרֶ֗שַׁע
  עַל֮ גּוֹרַ֢ל הַֽצַּדִּ֫יקִ֥ים
    לְמַ֡עַן
    לֹא־יִשְׁלְח֖וּ הַצַּדִּיקִ֨ים בְּעַוְלָ֬תָה יְדֵיהֶֽם׃
ד הֵיטִ֣יבָה יְ֭הֹוָה לַטּוֹבִ֑ים
  וְ֝לִישָׁרִ֗ים בְּלִבּוֹתָֽם׃
ה וְהַמַּטִּ֤ים עֲֽקַלְקַלּוֹתָ֗ם
  יוֹלִיכֵ֣ם יְ֭הֹוָה אֶת־פֹּעֲלֵ֣י הָאָ֑וֶן
    שָׁ֝ל֗וֹם עַל־יִשְׂרָאֵֽל׃

הפרק בלי מספריםעריכה



שִׁ֗יר הַֽמַּ֫עֲל֥וֹת
הַבֹּטְחִ֥ים בַּיהֹוָ֑ה
  כְּֽהַר־צִיּ֥וֹן לֹא־יִ֝מּ֗וֹט לְעוֹלָ֥ם יֵשֵֽׁב׃
יְֽרוּשָׁלַ֗͏ִם הָרִים֮ סָבִ֢יב לָ֥֫הּ
  וַ֭יהֹוָה סָבִ֣יב לְעַמּ֑וֹ
  מֵ֝עַתָּ֗ה וְעַד־עוֹלָֽם׃
כִּ֤י לֹ֪א יָנ֡וּחַ שֵׁ֤בֶט הָרֶ֗שַׁע
  עַל֮ גּוֹרַ֢ל הַֽצַּדִּ֫יקִ֥ים
    לְמַ֡עַן
    לֹא־יִשְׁלְח֖וּ הַצַּדִּיקִ֨ים בְּעַוְלָ֬תָה יְדֵיהֶֽם׃
הֵיטִ֣יבָה יְ֭הֹוָה לַטּוֹבִ֑ים
  וְ֝לִישָׁרִ֗ים בְּלִבּוֹתָֽם׃
וְהַמַּטִּ֤ים עֲֽקַלְקַלּוֹתָ֗ם
  יוֹלִיכֵ֣ם יְ֭הֹוָה אֶת־פֹּעֲלֵ֣י הָאָ֑וֶן
    שָׁ֝ל֗וֹם עַל־יִשְׂרָאֵֽל׃