תהלים קכא/טעמים
שער מקרא · שער תורה · שער נביאים · שער כתובים · מקראי מועד · ויבינו במקרא (אודיו) · מידע על גופנים · English
מבוא למקרא על פי המסורה (תקציר) · כתר · כתי"ל · הערות נוסח · תנ"ך פונטי · ייבין · GitHub · תיקונים ושינויים · דיווח על טעות
♦ תורה: בראשית · שמות · ויקרא · במדבר · דברים ♦ נביאים: יהושע · שופטים · שמואל · מלכים · ישעיהו · ירמיהו · יחזקאל · תרי עשר ♦ כתובים: תהלים · משלי · איוב · שיר השירים · רות · איכה · קֹהלת · אסתר · דניאל · עזרא · דברי הימים
קכא א שִׁ֗יר לַֽמַּ֫עֲל֥וֹת
אֶשָּׂ֣א עֵ֭ינַי אֶל־הֶהָרִ֑ים
מֵ֝אַ֗יִן יָבֹ֥א עֶזְרִֽי׃
ב עֶ֭זְרִי מֵעִ֣ם יְהֹוָ֑ה
עֹ֝שֵׂ֗ה שָׁמַ֥יִם וָאָֽרֶץ׃
ג אַל־יִתֵּ֣ן לַמּ֣וֹט רַגְלֶ֑ךָ
אַל־יָ֝נ֗וּם שֹׁמְרֶֽךָ׃
ד הִנֵּ֣ה לֹֽא־יָ֭נוּם וְלֹ֣א יִישָׁ֑ן
שׁ֝וֹמֵ֗ר יִשְׂרָאֵֽל׃
ה יְהֹוָ֥ה שֹׁמְרֶ֑ךָ
יְהֹוָ֥ה צִ֝לְּךָ֗ עַל־יַ֥ד יְמִינֶֽךָ׃
ו יוֹמָ֗ם הַשֶּׁ֥מֶשׁ לֹֽא־יַכֶּ֗כָּה
וְיָרֵ֥חַ בַּלָּֽיְלָה׃
ז יְֽהֹוָ֗ה יִשְׁמׇרְךָ֥ מִכׇּל־רָ֑ע
יִ֝שְׁמֹ֗ר אֶת־נַפְשֶֽׁךָ׃
ח יְֽהֹוָ֗ה יִשְׁמׇר־צֵאתְךָ֥ וּבוֹאֶ֑ךָ
מֵ֝עַתָּ֗ה וְעַד־עוֹלָֽם׃
הפרק בלי מספרים
עריכה
שִׁ֗יר לַֽמַּ֫עֲל֥וֹת
אֶשָּׂ֣א עֵ֭ינַי אֶל־הֶהָרִ֑ים
מֵ֝אַ֗יִן יָבֹ֥א עֶזְרִֽי׃
עֶ֭זְרִי מֵעִ֣ם יְהֹוָ֑ה
עֹ֝שֵׂ֗ה שָׁמַ֥יִם וָאָֽרֶץ׃
אַל־יִתֵּ֣ן לַמּ֣וֹט רַגְלֶ֑ךָ
אַל־יָ֝נ֗וּם שֹׁמְרֶֽךָ׃
הִנֵּ֣ה לֹֽא־יָ֭נוּם וְלֹ֣א יִישָׁ֑ן
שׁ֝וֹמֵ֗ר יִשְׂרָאֵֽל׃
יְהֹוָ֥ה שֹׁמְרֶ֑ךָ
יְהֹוָ֥ה צִ֝לְּךָ֗ עַל־יַ֥ד יְמִינֶֽךָ׃
יוֹמָ֗ם הַשֶּׁ֥מֶשׁ לֹֽא־יַכֶּ֗כָּה
וְיָרֵ֥חַ בַּלָּֽיְלָה׃
יְֽהֹוָ֗ה יִשְׁמׇרְךָ֥ מִכׇּל־רָ֑ע
יִ֝שְׁמֹ֗ר אֶת־נַפְשֶֽׁךָ׃
יְֽהֹוָ֗ה יִשְׁמׇר־צֵאתְךָ֥ וּבוֹאֶ֑ךָ
מֵ֝עַתָּ֗ה וְעַד־עוֹלָֽם׃