תהלים נז/טעמים
שער מקרא · שער תורה · שער נביאים · שער כתובים · מקראי מועד · ויבינו במקרא (אודיו) · מידע על גופנים · English
תקציר המבוא למהדורה · המבוא המלא למהדורה · הערות הנוסח · הבסיס הטכני לפרויקט בגליון נתונים · GitHub · מדריך טכני · דיווח על טעות
♦ תורה: בראשית · שמות · ויקרא · במדבר · דברים ♦ נביאים: יהושע · שופטים · שמואל · מלכים · ישעיהו · ירמיהו · יחזקאל · תרי עשר ♦ כתובים: תהלים · משלי · איוב · שיר השירים · רות · איכה · קֹהלת · אסתר · דניאל · עזרא · דברי הימים
נז א לַמְנַצֵּ֣חַ אַל־תַּ֭שְׁחֵת לְדָוִ֣ד מִכְתָּ֑ם
בְּבׇרְח֥וֹ מִפְּנֵי־שָׁ֝א֗וּל בַּמְּעָרָֽה׃
ב חׇנֵּ֤נִי אֱלֹהִ֨ים ׀ חׇנֵּ֗נִי
כִּ֥י בְךָ֮ חָסָ֢יָה נַ֫פְשִׁ֥י
וּבְצֵֽל־כְּנָפֶ֥יךָ אֶחְסֶ֑ה
עַ֗֝ד יַעֲבֹ֥ר הַוּֽוֹת׃
ג אֶ֭קְרָא לֵאלֹהִ֣ים עֶלְי֑וֹן
לָ֝אֵ֗ל גֹּמֵ֥ר עָלָֽי׃
ד יִשְׁלַ֤ח מִשָּׁמַ֨יִם ׀ וְֽיוֹשִׁיעֵ֗נִי
חֵרֵ֣ף שֹׁאֲפִ֣י סֶ֑לָה
יִשְׁלַ֥ח אֱ֝לֹהִ֗ים חַסְדּ֥וֹ וַאֲמִתּֽוֹ׃
ה נַפְשִׁ֤י ׀ בְּת֥וֹךְ לְבָאִם֮ אֶשְׁכְּבָ֢ה לֹ֫הֲטִ֥ים
בְּֽנֵי־אָדָ֗ם שִׁ֭נֵּיהֶם חֲנִ֣ית וְחִצִּ֑ים
וּ֝לְשׁוֹנָ֗ם חֶ֣רֶב חַדָּֽה׃
ו ר֣וּמָה עַל־הַשָּׁמַ֣יִם אֱלֹהִ֑ים
עַ֖ל כׇּל־הָאָ֣רֶץ כְּבוֹדֶֽךָ׃
ז רֶ֤שֶׁת ׀ הֵכִ֣ינוּ לִפְעָמַי֮ כָּפַ֢ף נַ֫פְשִׁ֥י
כָּר֣וּ לְפָנַ֣י שִׁיחָ֑ה
נָפְל֖וּ בְתוֹכָ֣הּ סֶֽלָה׃
ח נָ֘כ֤וֹן לִבִּ֣י אֱ֭לֹהִים נָכ֣וֹן לִבִּ֑י
אָ֝שִׁ֗ירָה וַאֲזַמֵּֽרָה׃
ט ע֤וּרָה כְבוֹדִ֗י
ע֭וּרָֽה הַנֵּ֥בֶל וְכִנּ֗וֹר
אָעִ֥ירָה שָּֽׁחַר׃
י אוֹדְךָ֖ בָעַמִּ֥ים ׀ אֲדֹנָ֑י
אֲ֝זַמֶּרְךָ֗ בַּלְאֻמִּֽים׃
יא כִּֽי־גָדֹ֣ל עַד־שָׁמַ֣יִם חַסְדֶּ֑ךָ
וְֽעַד־שְׁחָקִ֥ים אֲמִתֶּֽךָ׃
ח יב ר֣וּמָה עַל־שָׁמַ֣יִם אֱלֹהִ֑ים
עַ֖ל כׇּל־הָאָ֣רֶץ כְּבוֹדֶֽךָ׃
הפרק בלי מספרים עריכה
לַמְנַצֵּ֣חַ אַל־תַּ֭שְׁחֵת לְדָוִ֣ד מִכְתָּ֑ם
בְּבׇרְח֥וֹ מִפְּנֵי־שָׁ֝א֗וּל בַּמְּעָרָֽה׃
חׇנֵּ֤נִי אֱלֹהִ֨ים ׀ חׇנֵּ֗נִי
כִּ֥י בְךָ֮ חָסָ֢יָה נַ֫פְשִׁ֥י
וּבְצֵֽל־כְּנָפֶ֥יךָ אֶחְסֶ֑ה
עַ֗֝ד יַעֲבֹ֥ר הַוּֽוֹת׃
אֶ֭קְרָא לֵאלֹהִ֣ים עֶלְי֑וֹן
לָ֝אֵ֗ל גֹּמֵ֥ר עָלָֽי׃
יִשְׁלַ֤ח מִשָּׁמַ֨יִם ׀ וְֽיוֹשִׁיעֵ֗נִי
חֵרֵ֣ף שֹׁאֲפִ֣י סֶ֑לָה
יִשְׁלַ֥ח אֱ֝לֹהִ֗ים חַסְדּ֥וֹ וַאֲמִתּֽוֹ׃
נַפְשִׁ֤י ׀ בְּת֥וֹךְ לְבָאִם֮ אֶשְׁכְּבָ֢ה לֹ֫הֲטִ֥ים
בְּֽנֵי־אָדָ֗ם שִׁ֭נֵּיהֶם חֲנִ֣ית וְחִצִּ֑ים
וּ֝לְשׁוֹנָ֗ם חֶ֣רֶב חַדָּֽה׃
ר֣וּמָה עַל־הַשָּׁמַ֣יִם אֱלֹהִ֑ים
עַ֖ל כׇּל־הָאָ֣רֶץ כְּבוֹדֶֽךָ׃
רֶ֤שֶׁת ׀ הֵכִ֣ינוּ לִפְעָמַי֮ כָּפַ֢ף נַ֫פְשִׁ֥י
כָּר֣וּ לְפָנַ֣י שִׁיחָ֑ה
נָפְל֖וּ בְתוֹכָ֣הּ סֶֽלָה׃
נָ֘כ֤וֹן לִבִּ֣י אֱ֭לֹהִים נָכ֣וֹן לִבִּ֑י
אָ֝שִׁ֗ירָה וַאֲזַמֵּֽרָה׃
ע֤וּרָה כְבוֹדִ֗י
ע֭וּרָֽה הַנֵּ֥בֶל וְכִנּ֗וֹר
אָעִ֥ירָה שָּֽׁחַר׃
אוֹדְךָ֖ בָעַמִּ֥ים ׀ אֲדֹנָ֑י
אֲ֝זַמֶּרְךָ֗ בַּלְאֻמִּֽים׃
כִּֽי־גָדֹ֣ל עַד־שָׁמַ֣יִם חַסְדֶּ֑ךָ
וְֽעַד־שְׁחָקִ֥ים אֲמִתֶּֽךָ׃
ר֣וּמָה עַל־שָׁמַ֣יִם אֱלֹהִ֑ים
עַ֖ל כׇּל־הָאָ֣רֶץ כְּבוֹדֶֽךָ׃