ספר היובלים/רובין מנוקד/יג

ספר היובלים • א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ

פרק יג

א

וַיֵּצֵא אַבְרָם מֵחָרָ֑ן, וַיִּקַּח אֶת־שָׂרַי אִשְׁתּוֹ וְאֶת־לוֹט בֶּן הָרָן אָחִיו אִתּוֹ אַרְצָה כְּנָֽעַן:

ב

וְיָבֹא [אַרְצָה כְּנַעַן] וַיַּעֲבֹר עַד מְקוֹם שְׁכֶם עַד אֵלוֹן רָֽם:

ג

וַיֹּאמֶר ה' אֵלָיו לְךָ וּלְזַרְעֲךָ אֶתֵּן אֶת־־הָאָרֶץ הַזֹּ֑את, וַיִּבֶן שָׁם מִזְבַּח וַיַּעַל עָלָיו אִשֶּׁה לַה' הַנִּרְאֶה אֵלָֽיו:

ד

וַיַּעְתֵּק מִשָּׁם הָהָרָה בֵּית־אֵל מִיָּם וְהָעַי [מִקֶּדֶ֑ם], וַיֵּט אָהֲלֹֽה:

ה

וַיַּרְא כִּי טוֹבָה הָאָרֶץ וְרַחֲבַת־יָדַיִם מְאֹ֑ד, וְכִי כָּל בָּֽהּ:

ו

גֶּפֶן וּתְאֵנָה וְרִמּוֹן וְאֵלָה וְעֵצִים רַעֲנַנִּים וַאֲלוֹנִים וְזֵיתִים וַאֲרָזִים וּבְרוֹשִׁים וַעֲצֵי־־הַלְּבָנוֹן וְכֹל עֲצֵי הַשָּׂדֶ֑ה, וְכִי כֻלָּהּ מַשְׁקֶה בְּהָרֶֽיהָ:

ז

וַיְּבָרֶךְ אֶת־ה' אֲשֶׁר הֵבִיאוֹ מֵאוּר כַּשְׂדִים אֶל־הָהָר הַזֶּה:

ח

וַיְהִי בַּשָּׁנָה הָרִאשׁוֹנָה בַּשָּׁבֻעַ הַשְּׁבִיעִי בְּאֶחָד לַחֹדֶשׁ הָרִאשׁוֹן וַיִּבֶן מִזְבַּח עַל הָהָר הַזֶּ֑ה, וַיִּקְרָא בְשֵׁם ה' אַתָּה אֵלִי אֱלֹהֵי עוֹלָֽם:

ט

וַיַּעַל עַל־הַמִּזְבֵּחַ אִשֶּׁה לַה֑', לְמַעַן יִהְיֶה עִמּוֹ וְלֹא יַעַזְבֵהוּ כָּל־יְמֵי־חַיָּֽיו:

י

וַיָּקָם מִשָּׁם וַיִּסַּע [הַנֶּגְבָּ֔ה] וַיָּבֹא עַד־חֶבְרֹן, וְחֶבְרֹן נִבְנְתָה אָז וַיֵּשֶׁב שָׁם שְׁנָתַיִם יָמִֽים: [...]

יא

[וַיִּסַּע] אַבְרָם מִצְרָיְמָה בַּשָּׁנָה הַשְּׁלִישִׁית לַשָּׁבוּעַ וַיָּגָר בְּמִצְרַיִם חָמֵשׁ שָׁנִ֑ים, לִפְנֵי הִלָּקַח אִשְׁתּוֹ מִמֶּנּֽוּ:

יב

וְצוֹעַן מִצְרַיִם נִבְנְתָה אָ֑ז, שֶׁבַע שָׁנִים אַחֲרֵי חֶבְרֹֽן:

יג

וַיְהִי כַּאֲשֶׁר לָקַח פַּרְעֹה אֶת־שָׂרַי אֵשֶׁת אַבְרָ֑ם, וַיְּנַגַּע ה' אֶת־פַּרְעֹה וְאֶת־כָּל־בֵּיתוֹ בִּנְגָעִים גְּדוֹלִים עַל־דְּבַר שָׂרַי אֵשֶׁת אַבְרָֽם:

יד

וְאַבְרָם כָּבֵד מְאֹ֑ד, בַּצֹּאן וּבַבַּקָּר וּבַחֲמוֹרִים וּבַסּוּסִים וּבִגְמַלִּים וּבַעֲבָדִים וּבִשְׁפָחוֹת וּבַכֶּסֶף וּבְזָהָב עַד־מְאֹֽד:

טו

וְגַם־לוֹט בֶּן־אָחִיו הָיָה כָּבֵֽד:

טז

וַיְהִי כַּאֲשֶׁר הֵשִׁיב פַּרְעֹה אֶת־שָׂרַי אִשְׁתּוֹ וַיַּעְתֵּק מֵאֶרֶץ מִצְרַיִם וַיָּבֹא אֶל־־מָקוֹם אֲשֶׁר מִקֶּדֶם לְבַית־אֵ֑ל, וַיְּבָרֶךְ אֶת־ה' אֱלֹהָיו אֲשֶׁר הֱשִׁיבֵהוּ בְּשָׁלֽוֹם:

יז

וַיְהִי בַיּוֹבֵל [הָאֶחָד וְאַרְבָּעִים] בַּשָּׁנָה הַשְּׁלִישִׁית לַשָּׁבֻעַ הָרִאשׁוֹן וַיָּשָׁב אֶל־הַמָּקוֹם הַה֑וּא, וַיַּעַל שָׁם אִשֶּׁה וַיִּקְרָא בְּשֵׁם ה' וַיֹּאמֶר ה' אֶל עֶלְיוֹן אֱלֹהַי אַתָּה לְעוֹלָֽם:

יח

וּבַשָּׁנָה הָרְבִיעִית לַשָּׁב֑וּעַ, נִפְרַד לוֹט מֵעְמּֽוֹ:

יט

וְלוֹט יָשַׁב בִּסְד֑וֹם, וְאַנְשֵׁי סְדוֹם רָעִים מְאֹֽד:

כ

וַיִּתְעַצֵּב אֶל־־לִבּוֹ כִּי־נִפְרַד בֶּן־־אָחִיו מֵעִמּ֑וֹ, כִּי־לֹא־הָיוּ לוֹ בָנִֽים:

כא

וַיְהִי בַשָּׁנָה הַהִיא לַשָּׁבֻעַ הַזֶּה כַּאֲשֶׁר נִשְׁבָּה ל֑וֹט, וַיֹּאמֶר ה' אֶל אַבְרָם אַחֲרֵי הִפָּרֶד־לוֹט מֵעִמּוֹ לֵאמֹֽר:

כב

שָׂא נָא עֵינֶיךָ וּרְאֵה מִן־הַמָּקוֹם אֲשֶׁר־אַתָּה שָׁם [צָפוֹנָה] וָנֶגְבָּה וָקֵדְמָ֑ה, כִּי אֶת־כָּל הָאָרֶץ אֲשֶׁר אַתָּה רֹאֶה לְךָ אֶתְּנֶנָּהּ וּלְזַרְעֲךָ אֶתְנֶנָּהּ עַד־עוֹלָֽם:

כג

וְשַׂמְתִּי אֶת־זַרְעֲךָ כְּחוֹל הַיָּ֑ם, [אֲשֶׁר אִם יוּכַל אִישׁ לִמְנוֹת אֶת־־חוֹל הַיָּם] גַּם זַרְעֲךָ יִמָּנֶֽה:

כד

קוּם הִתְהַלֵּךְ בָּהּ לְאָרְכָּהּ וּלְרָחְבָּהּ וְרְאֵה כֻלָּ֑הּ, כִּי לְזַרְעֲךָ אֶתְנֶנָּֽהּ:

כה

וַיִּסַּע אַבְרָם חֶבְרוֹנָה וַיֵּשֶׁב שָֽׁם:

כו

וּבַשָּׁנָה הַהִיא בָּא כְּדָרְלָעֹמֶר מֶלֶךְ עֵילָם וְאַמְרָפֶל מֶלֶךְ־שִׁנְעָ֑ר, וְאַרְיוֹךְ מֶלֶךְ אֱלָסָר וְתִדְעָל מֶלֶךְ הַגּוֹיִֽם:

כז

וַיַּכּוּ אֶת־־מֶלֶךְ עֲמֹרָה וַיָּנָס מֶלֶךְ סְדֹ֑ם, וְרַבִּים נָפְלוּ פְּצוּעִים בְּשִׂדִּים בְּאֶרֶץ הַמֶּלַח בִּסְדֹם בָּאַדְמָה וּבִצְבוֹיִֽם:

כח

וַיִּשְׁבּוּ אֶת־־לוֹט בֶּן־־אֲחִי אַבְרָם וְאֵת כָּל־רְכֻשׁ֑וֹ, וַיִּסְּעוּ עַד־דָּֽן:

כט

וַיָּבֹא הַפָּלִיט וַיַּגֵּד לְאַבְרָם כִּי נִשְׁבָּה בֶּן־אָחִיו[....]:

ל

וַיָבֵא עַבְדוֹ זְקַן בֵּיתוֹ אֶת־מַעֲשֵׂר הַבִּכּוּרִים לַה֑', לְכַפֵּר בְּעַד אַבְרָם וּבְעַד זַרְעֽוֹ:

לא

וַיְּשִׂימֶהָ אֱלֹהִים לְחָק־עוֹלָ֑ם, לָתֵת אוֹתוֹ אֶל־־הַכֹּהֲנִים הַמְּשָׁרְתִים אֶת־־פָּנָיו לָרֶשֶׁת אוֹתוֹ עַד־־עוֹלָֽם:

לב

וְהַחֹק הַזֶּה לֹא לְיָמִים הוּא כִּי־אִם לְדוֹרוֹת עוֹלָם שָׂם אוֹת֑וֹ, לָתֵת לַה' מַעֲשֵׂר זֶרַע וְיַיִן וְשֶׁמֶן וּבָקָר וָצֹֽאן:

לג

וַיִּתֵּן אוֹתוֹ אֶל־־כֹּהֲנָיו לֶאֱכוֹל וְלִשְׁתּוֹת מִמֶּנּוּ בְּשִׂמְחָה לְפָנָֽיו:

לד

וַיָּבֹא אֵלָיו מֶלֶךְ־סְדֹם וַיִּשְׁתַּחוּ לְפָנָיו וַיֹּאמַ֑ר, אֲדוֹנִי אַבְרָם תֶּן לִי הַנֶּפֶשׁ אֲשֶׁר הִצַּלְתָּ וְהַשָּׁלָל יְהִי־לָךְ:

לה

וַיֹּאמֶר אַבְרָם אֵלָ֑יו, הֲרִימֹתִי יָדַי אֶל־אֵל עֶלְיֽוֹן:

לו

אִם מִחוּט וְעַד שְׂרוֹךְ־נַעַל וְאִם־אֶקַּח מִכָּל־אֲשֶׁר־לָ֑ךְ, וְלֹא תֹאמַר אֲנִי הֶעֱשַׁרְתִּי אֶת־אַבְרָֽם:

לז

בִּלְעָדַי רַק אֲשֶׁר אָכְלוּ הַנְּעָרִים וְהָאֲנָשִׁים אֲשֶׁר הָלְכוּ אִתִּ֑י, עוּנָן אֶשְׁכֹּל וּמַמְרֵא הֵם יִקְּחוּ חֶלְקָֽם: