ספר היובלים/רובין מנוקד/א

ספר היובלים • א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ

אֵלֶּה דִּבְרֵי חֲלֻקַּת הַיָּמִים עַל פִּי הַתּוֹרָה וְהָעֵדוּת לְתוֹלְדוֹת הַשָּׁנִים לְשָׁבֻעֵיהֶן וּלְיוֹבְלֵיהֶן כָּל יְמֵי הַשָּׁמַיִם עַל הָאָרֶץ כַּאֲשֶׁר דִּבֶּר אֶל מֹשֶׁה בְּהַר סִינַי:

פרק א

א

וַיְּהִי בַּשָׁנָה הָרִאשׁוֹנָה לְצֵאת בְּנֵי יִשְׂרָאֵל מֵאֶרֶץ מִצְרַיִם, בַּחֹדֶשׁ הַשְּׁלִישִׁי בַּשִׁשָּׁה עָשָׂר בּוֹ וַיְדַבֵּר ה' אֶל מֹשֶׁה לֵּאמֹר:

ב

עֲלֵה אֵלַי פֹּה הָהָרָה וְאֶתְנָה לְךָ אֶת שְׁתֵּי לוּחוֹת הָאֶבֶן, וְהַתּוֹרָה וְהַמִּצְוָה אֲשֶׁר כָּתַבְתִּי לְהוֹרֹתָם:

ג

וַיַּעַל מֹשֶׁה אֶל הַר הָאֱלֹהִים וַיִּשְׁכֹּן כְּבוֹד ה' עַל הַר סִינַי וַיְּכַסֵּהוּ עָנָן שֵׁשֶׁת יָמִים, וַיִּקְרָא אֶל מֹשֶׁה בַּיּוֹם הַשְּׁבִיעִי מִתּוֹךְ הֶעָנָן:

ד

וַיַּרְא אֶת כְּבוֹד ה' כְּאֵשׁ אֹכֶלֶת עַל הַר סִינַי בַּעֲלוֹתוֹ לָקַחַת אֶת לֻחֹת הָאֶבֶן וְהַתּוֹרָה וְהַמִּצְוָה, עַל פִּי ה' אֲשֶׁר אָמַר אֵלָיו עֲלֵה אֶל רֹאשׁ הָהָר:

ה

וַיְהִי מֹשֶׁה בָּהָר אַרְבָּעִים יוֹם וְאַרְבָּעִים לָיְלָה, וַיּוֹרֵהוּ ה' אֶת אֲשֶׁר הָיָה וְאֶת אֲשֶׁר יִהְיֶה:

ו

וַיְּלַמְדֵהוּ אֶת חֲלֻקַּת הַיָּמִים, עַל פִּי הַתּוֹרָה וְהָעֵדוּת לֵאמֹר:

ז

הַסְכֵּת אֵת כָּל־הַדָּבָר אֲשֶׁר אָנֹכִי דּוֹבֵר אֵלֶיךָ וְכָתְבֵהוּ עַל סֵפֶר, לְמַעַן יֵדְעוּ דּוֹרוֹתֵיהֶם כִּי עָזַבְתִּי אוֹתָם עַל כָּל הָרָעָה אֲשֶׁר עָשׂוּ כִּי סָרוּ מִן הַבְּרִית אֲשֶׁר אָנֹכִי כּוֹרֵת הַיּוֹם בֵּינִי וּבֵינֶיךָ בְּהַר סִינַי לְדוֹרוֹתֵיהֶם:

ח

וְהָיָה כִּי תִּמְצֶאןָ אוֹתָם רָעוֹת רַבּוֹת וְצָרוֹת וְעָנָה הַדָּבָר הַזֶּה לִפְנֵיהֶם לְעֵד, וְיָדְעוּ כִּי צָדַקְתִּי מֵהֶם בְּכָל־מִשְׁפָּטָם וּבְכָל־מַעֲשֵׂיהֶם וְיָדְעוּ כִּי הָיִיתִי עִמָּהֶם:

ט

וְאַתָּה כְּתָב־לְךָ אֵת כָּל־הַדְּבָרִים אֲשֶׁר אָנֹכִי דּוֹבֵר הַיּוֹם בַּאָזְנֶךָ, כִּי יָדַעְתִּי אֶת מֶרְיָם וְאֶת עָרְפָּם הַקָּשֶׁה בְּטֶרֶם אֲבִיאֵם אֶל הָאָרֶץ אֲשֶׁר נִשְׁבַּעְתִּי לְאַבְרָהָם לְיִצְחָק וּלְיַעֲקֹב לֵאמֹר לְזַרְעֲכֶם אֶתֵּן אֶת הָאָרֶץ זָבַת חָלָב וּדְבַשׁ:

י

וְאָכְלוּ וְשָׂבְעוּ וּפָנוּ אֶל אֱלֹהִים אֲחֵרִים אֲשֶׁר לֹא הִצִּילוּ אוֹתָם מִכָּל־צָרָתָם:

יא

וְנִשְׁמְעָה הָעֵדוּת הַזֹּאת וְהָיְתָה לָהֶם לָעֵדָה, כִּי יִשְׁכְּחוּ אֶת כָּל־מִצְוֹתַי אֲשֶׁר אָנֹכִי מְצַוֶּה אוֹתָם:

יב

וְזָנוּ אַחֲרֵי שִׁקּוּצֵי הַגּוֹיִם וְגִלֻּלֵיהֶם וְעָבְדוּ לֶאֱלֹהֵיהֶם וְהָיוּ לָהֶם לְמִכְשָׁל־צָרָה וְצוּקָה לְפַח וּלְמוֹקֵשׁ:

יג

וְרַבִּים יֹאבֵדוּ וְיֵלְכוּ שֶׁבִי לִפְנֵי צַר וְיִפְּלוּ בְּיַד אוֹיְבֵיהֶם, עֵקֶב אֲשֶׁר שָׁכְחוּ חֻקּוֹתַי וּמִצְוֹתַי וּמוֹעֲדַי וּבְרִיתִי הֵפֵרוּ:

יד

וְאֶת שַׁבְּתוֹתַי וְקָדְשִׁי אֲשֶׁר הִקְדַּשְׁתִּי בְּתוֹכָם, וְאָהֳלִי וּמִקְדְּשִׁי אֲשֶׁר הִקְדַּשְׁתִּי בָּאָרֶץ לְשַׁכֵּן שְׁמִי שָׁם:

טו

וְעָשׂוּ לָהֶם מַצֵּבוֹת אֶבֶן וּפְסִילֵי עֵץ וְהִשְׁתַּחֲווּ לָהֶם לַחֲטֹא בְנַפְשׁוֹתָם, וְזָבְחוּ בְּנֵיהֶם לַשְׂעִירִים וּלְכָל־מַעֲשֵׂי תַּעֲתּוּעֵי לְבָבָם:

טז

וְשָׁלַחְתִּי לָהֶם עֵדִים לְהָעִיד בָּם וְהֵמָּה לֹא יִשְׁמְעוּ וְיָמִיתוּ אֶת עֵדָי:

יז

וְגַם בְּשׁוֹמְרֵי תּוֹרָה יִתְגָּרוּ וֶהֱמִיתוּם, וְעַל תּוֹרָתִי יִפְשְׁעוּ וְיַעֲשׂוּ הָרַע בְּעֵינָי:

יח

וְאָנֹכִי הַסֵּתֶר אַסְתִּיר אֶת פָּנַי מֵהֶם וּנְתַתִּים בְּיָד הַגּוֹיִם וְרָדוּ בָּהֶם וְהָיוּ לָהֶם לְמוֹקֵשׁ וַאֲכָלוּם, וְגֵרַשְׁתִּים מִן הָאָרֶץ וַהֲפִיצוֹתִים בַּגּוֹיִם:

יט

וְהֵמָּה יִשְׁכְּחוּ אֶת כָּל־תּוֹרָתִי וְאֶת כָּל־מִצְוֹתַי וְאֶת כָּל־מִשְׁפָּטַי וְלֹא יִשְׁמְרוּ חֹדֶשׁ וְשַׁבָּת מוֹעֵד וְיוֹבֵל וְיִזְנְחוּ כָּל־מִשְׁמֶרֶת:

כ

וְאַחֲרֵי כֵן יָשׁוּבוּ וּפָנוּ אֵלַי מִקֶּרֶב הַגּוֹיִם בְּכָל־לְבָבָם וּבְכָל־נַפְשָׁם וּבְכָל־מְאוֹדָם:

כא

וְקִבַּצְתִּי אֶת נִדְחֵיהֶם מִתּוֹךְ הַגּוֹיִם, וְהֵמָּה יָשׁוּבוּ וּבִקְּשׁוּ פָּנַי וְנִמְצֵאתִי לָהֶם:

כב

וְהָיָה כִּי יְשַׁחְרוּנִי בְּכָל־לְבָבָם וּבְכָל־נַפְשָׁם אַטֶּה לָהֶם שָׁלוֹם רַב בִּצְדָקָה, וּנְטַעְתִּים לְצֶמַּח מֵישָׁרִים בְּכָל־לִבִּי וּבְכָל־נַפְשִׁי:

כג

וְהָיוּ לִבְרָכָה וְלֹא לִקְלָלָה, וְהָיוּ לָרֹאשׁ וְלֹא לְזָנָב:

כד

וּבָנִיתִי מִקְדָּשִׁי בְּקִרְבָּם וְשָׁכַנְתִּי בְּתוֹכָם, וְהָיִיתִי לָהֶם לֵאלֹהִים וְהֵמָּה יִהְיוּ לִי לְעָם בֶּאֱמֶת וּבִצְדָקָה:

כה

וַאֲנִי לֹא אֶמְאָסֵם וְלֹא אֶגְעָלֵם, כִּי אֲנִי ה' אֱלֹהֵיהֶם:

כו

וַיִּפֹּל מֹשֶׁה עַל פָּנָיו וַיִּתְפַּלֵּל לֵאמֹר:

כז

ה' אֱלֹהַי אַל־נָא תַּעֲזוֹב עַמְךָ וְנַחֲלָתְךְ כִּי יֵלְכוּ בִּשְׁרִירוּת לִבָּם, וְאַל תִּתְּנֵם בְּיַד אוֹיְבֵיהֶם לִמְשָׁל־בָּם גּוֹיִם וְלֹא יִרְדוּ בָּהֶם פֶּן יִזְנְחוּךְ:

כח

וְעַתָּה יִגְדַּל־נָא חַסְדְךָ ה' עַל עַמֶךָ, וּבְרָא לָהֶם רוּחַ נָכוֹן:

כט

וְאַל יִמְשׁוֹל בָּהֶם רוּחַ בְּלִיַּעַל לִהְיוֹת לָהֶם לְשָׂטָן לְפָנֶיךָ לְהַטּוֹתָם מִכָּל דַּרְכֵּי הַצְּדָקָה לְמַעַן יאֹבְדוּ עַל פָּנֶיךָ:

ל

וְהֵם עַמְךָ וְנַחֲלָתֶךְָ, אֲשֶׁר פָּדִיתָ בְּכוֹחַ גָּדוֹל מִיַד הַמִּצְרִים:

לֹא

בְּרָא לָהֶם לֵב טָהוֹר וְרוּחַ קָדוֹשׁ, וְאַל יִכָּשְׁלוּ בַּעֲוֹנָם מֵעַתָּה וְעַד עוֹלָם:

לב

וַיֹּאמֶר ה' אֶל מֹשֶׁה יָדַעְתִּי אֶת מְרִי־שִׂיחָם וְאֶת מְזִמָּתָם וְאֶת קְשִׁי־עָרְפָּם, לֹא יִשְׁמְעוּ בְקוֹלֵי עַד אֲשֶׁר יֶאֱשְׁמוּ בְּחַטְאוֹתֵיהֶם וּבַחַטְאוֹת אֲבוֹתֵיהֶם:

לג

וְאַחֲרֵי־כֵן יָשׁוּבוּ אֵלַי בֶּאֱמֶת בְּכָל־לְבָבָם וּבְכָל־נַפְשָׁם וּמַלְתִּי אֶת עָרְלַת לְבָבָם וְאֶת עָרְלַת לְבַב זַרְעָם וּבָרָאתִי לָהֶם רוּחַ קָדוֹשׁ וּטְהַרְתִּים לְמַעַן לֹא יָסוּרוּ עוֹד מִמֶּנִּי מִיּוֹם הַהוּא וְעַד עוֹלָם:

לד

וְנַפְשָׁם תִּדְבַּק בִּי וּבְכָל־מִצְוֹתַי וְעָשׂוּ אֶת־מִצְוֹתַי, וְהָיִיתִי לָהֶם לְאָב וְהֵם יִהְיוּ לִי לְבֵן וְקָרְאוּ לָהֶם בְּנֵי אֱלֹהִים וּלְכֻלָּם זֶרַע הָרוּחַ:

לה

וְנוֹדַע כִּי בָנַי הֵם, וְאָנֹכִי אֲבִיהֶם בַּמִּשְׁפָּט כִּי כֵן אֲהַבְתִּים:

לו

וְאַתָּה כְּתָב־לְךָ אֵת כָּל הַדָּבָר הַזֶּה אֲשֶׁר אוֹדִיעֲךָ בָּהָר הַזֶּה, הָרִאשׁוֹן וְהָאַחֲרוֹן וְהַבָּאוֹת לְכָל־חֲלֻקַּת הָעֵת עַל פִּי הַתּוֹרָה וְהָעֵדוּת וְלִשְׁבֻעֵי הַיּוֹבְלִים עַד־עוֹלָם עַד־אֲשֶׁר אֵרֵד וְשָׁכַנְתִּי בְתוֹכָם מִן־הָעוֹלָם־וְעַד הָעוֹלָם:

לז

וַיֹּאמֶר אֶל־מַלְאַךְ פָּנָיו לֵאמֹר, כְּתוֹב בְּסֵפֶר לְמֹשֶׁה מִיּוֹם עֲשׂוֹת שָׁמַיִם וָאָרֶץ עַד־הַיּוֹם אֲשֶׁר יִבָּנֶה מִקְדָּשִׁי בְתוֹכָם לְעוֹלָם וָעֶד:

לח

וְנִגְלָה ה' לְעֵין כֹּל בָּשָׂר וְיָדְעוּ הַכֹּל כִּי אֲנִי אֱלֹהֵי יִשְׂרָאֵל וַאֲבִי כָּל בְּנֵי־יַעֲקֹב וּמֶלֶךְ עַל־הַר צִיּוֹן מִן־הָעוֹלָם וְעַד הָעוֹלָם וְצִיּוּן יְרוּשָׁלַיִם קֹדֶשׁ תִּהְיֶה:

לט

וַיִּקַּח מַלְאַךְ הַפָּנִים הַהוֹלֵךְ לִפְנֵי מַחֲנֵה בְּנֵי־יִשְׂרָאֵל אֶת לֻחוֹת חֲלֻקַּת הַשָּׁנִים מֵהָחֵל הַיְּצִירָה:

מ

לֻחוֹת הַשְּׁבוּעַיִם וְהַיּוֹבְלִים עַל־פִּי הַתּוֹרָה וְהָעֵדוּת שָׁנָה בְּשָׁנָה כְּמִסְפָּרָה וְהַיּוֹבְלִים לְפִי־הַשָּׁנִים מִיּוֹם הַבְּרִיאָה הַחֲדָשָׁה בַּעָשׂוֹת שָׁמַיִם וָאָרֶץ וְכָל־יְקוּמָם וּצְבָא הַשָּׁמַיִם וְכָל־בְּרִיאַת הָאָרֶץ:

מא

עַד־בְּרֹא מִקְדַּשׁ ה' בִּירוּשָׁלַיִם בִּמְכוֹן הַר צִיּוֹן וְכָל־מְאוֹרֵי אוֹר יִתְחַדְּשׁוּ לִקְדוּשָׁה לְשָׁלוֹם וְלִבְרָכָה לְכָל־בְּחִירֵי יִשְׂרָאֵל לִהְיוֹת כֵּן מִיּוֹם הַהוּא כָּל־יְמֵי הַשָּׁמַיִם עַל הָאָרֶץ: