ספר היובלים/רובין מנוקד/ד

ספר היובלים • א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ

פרק ד

א

וּבַשָּׁבֻעַ הַשְּׁלִישִׁי לַיּוֹבֵל הַשֵּׁנִי יָלְדָה אֶת־קַיִן וּבָרְבִיעִי יָלְדָה אֶת הֶבֶל וּבַחֲמִישִׁי יָלְדָה אֶת בִּתָּהּ אָוֶן:

ב

וּבַשָּׁבֻעַ הָרִאשׁוֹן לַיּוֹבֵל הַשְּׁלִישִׁי הָרַג קַיִן אֶת־הֶבֶל עַל־כִּי לָקַח ה' מִיָּדוֹ מִנְחָה לְרָצוֹן וּמִיַד קַיִן לֹא־לָקַח לְרָצוֹן מִנְחַת פְּרִי הָאֲדָמָה:

ג

וַיְּמִיתֵהוּ עַל־הַשָּׂדֶה וְדָמָיו צָעֲקוּ מִן־הָאֲדָמָה הַשָּׁמַיְמָה בְּנַאֲקָתוֹ כִּי נָפַל חָלָל:

ד

וְיִשְׁפֹּט ה' אֶת־קַיִן עַל־הֶבֶל אֲשֶׁר הָרָג, וַיְּשִׂימֵהוּ נָע וָנָד בָּאָרֶץ מִדְּמֵי אָחִיו וַיְּקַלְּלֵהוּ מִן־הָאֲדָמָה:

ה

לָכֵן כָּתוּב עַל־לֻחוֹת הַשָּׁמַיִם לֵאמֹר אָרוּר מַכֵּה רֵעֵהוּ בְּזָדוֹן וְכָל־הָרוֹאִים בּוֹ יֹאמְרוּ אָמֵן:

ו

וְהָאִישׁ אֲשֶׁר יִרְאֵהוּ וְהֶחְרִישׁ מְלַעֲנוֹת בּוֹ אָרוּר כָּמוֹהוּ:

ז

לָכֵן בֹּא נָבֹא לַעֲנוֹת לִפְנֵי ה' אֱלֹהֵינוּ עַל כָּל־הַחֲטָאִים אֲשֶׁר נַעֲשׂוּ בַּשָּׁמַיִם וּבָאָרֶץ בְּאוֹר וּבַחֹשֶׁךְ וּבְכָל מָקוֹם:

ח

וַיִּבְכּוּ הָאָדָם וְאִשְׁתּוֹ אֶת־הֶבֶל אַרְבָּעָה שָׁבֻעַיִם:

ט

וּבַשָּׁנָה הָרְבִיעִית לַשָׁבֻעַ הַחֲמִישִׁי הִתְנֶחָם, וַיֵּדַע עוֹד אֶת־אִשְׁתּוֹ וַתֵּלֶד לוֹ בֵן וַיִּקְרָא אֶת־שְׁמוֹ שֵׁת כִּי אָמַר שָׁת־לָנוּ אֱלֹהִים זֶרַע אַחֵר עַל־הָאָרֶץ תַּחַת הֶבֶל כִּי הֲרָגוֹ קָיִן:

י

וּבַשָּׁבֻעַ הַשִּׁשִּׁי הוֹלִיד אֶת בִּתּוֹ עֲצוּרָה:

יא

וַיִּקַּח קַיִן אֶת־אֲחוֹתוֹ אָוֶן לוֹ לְאִשָּׁה וַתֵּלֶד לוֹ אֶת־חֲנוֹךְ מִקֵּץ הַיּוֹבֵל הָרְבִיעִי:

יב

וּבַשָּׁנָה הָרִאשׁוֹנָה לַשָּׁבֻעַ הָרִאשׁוֹן לַיּוֹבֵל הַחֲמִישִׁי נִבְנוּ בָּתִּים עַל־הָאֲדָמָה, וַיְהִי קַיִן בֹּנֶה עִיר וַיִּקְרָא שְׁמָהּ כְּשֵׁם בְּנוֹ חֲנוֹךְ:

יג

וְהָאָדָם יָדַע אֶת־חַוָּה אִשְׁתּוֹ וַתֵּלֶד עוֹד תִּשְׁעָה בָנִים:

יָד

וּבַשָּׁבֻעַ הַחֲמִישִׁי לַיּוֹבֵל לָקַח שֵׁת אֶת־אֲחוֹתוֹ עֲצוּרָה לוֹ לְאִשָּׁה וַתֵּלֶד לוֹ בַשָּׁנָה הָרְבִיעִית אֶת־אֱנוֹשׁ הוּא הֵחֵל לִקְרֹא בְּשֵׁם ה' עַל־הָאָרֶץ:

טו

וּבַיּוֹבֵל הַשְּׁבִיעִי בַּשָּׁבֻעַ הַשְּׁלִישִׁי לָקַח אֱנוֹשׁ אֶת אֲחוֹתוֹ נַעֲמָה לוֹ לְאִשָּׁה וַתֵּלֶד־לוֹ בֵּן בַּשָּׁנָה הַשְּׁלִישִׁית לְשָׁבֻעַ הַחֲמִישִׁי וַיִּקְרָא אֶת־שְׁמוֹ קֵינָן:

טז

וּמִקֵּץ הַיּוֹבֵל הַשְּׁמִינִי לָקַח קֵינָן אֶת־אֲחוֹתוֹ מַהֲלַלְאִית לוֹ לְאִשָּׁה וַתֵּלֶד־לוֹ בֵּן בַּיּוֹבֵל הַתְּשִׁיעִי בַּשָּׁבוּעַ הָרִאשׁוֹן בַּשָּׁנָה הַשְּׁלִישִׁית לַשָּׁבוּעַ וַיִּקְרָא אֶת שְׁמוֹ מַהֲלַלְאֵל:

יז

וּבַשָּׁבוּעַ הַשֵּׁנִי לַיּוֹבֵל הָעֲשִׂירִי לָקַח מַהֲלַלְאֵל אֶת־דִּינָה בַּת בְּרַכְאֵל בַּת אֲחוֹת אָבִיו לוֹ לְאִשָּׁה וַתֵּלֶד־לוֹ בֵּן בַּשָּׁבוּעַ הַשְּׁלִישִׁי בַּשָּׁנָה הַשִּׁישִׁית וַיִּקְרָא אֶת־שְׁמוֹ יָרֶד:

יח

כִּי בְּיָמָיו יָרְדוּ מַלְאֲכֵי ה' הַנִּקְרָאִים שׁוֹמְרִים עַל־הָאָרֶץ לְלַמֵּד אֶת בְּנֵי־אָדָם מִשְׁפָּט וּמֵישָׁרִים לַעֲשׂוֹתָם בָּאָרֶץ:

יט

וּבַיּוֹבֵל הָעַשְׁתֵּי עָשָׂר לָקַח לוֹ יֶרֶד לְאִשָּׁה אֶת־בְּרָכָה בַּת רְצוּצְאֵל בַּת אֲחוֹת אָבִיו בַּשָּׁבוּעַ הָרְבִיעִי לַיּוֹבֵל הַזֶּה:

כ

וַתֵּלֶד־לוֹ בֵן בַּשָּׁבוּעַ הַחֲמִישִׁי בַּשָּׁנָה הָרְבִיעִית לַיּוֹבֵל, וַיִּקְרָא אֶת־שְׁמוֹ חֲנוֹךְ:

כא

הוּא הָיָה הָרִאשׁוֹן מִבְּנֵי־אָדָם הַיִּלוֹדִים עַל־הָאָרֶץ, אֲשֶׁר לִמֵּד אֶת־הַכְּתָב אֶת־הַדַּעַת וְאֶת הַחָכְמָה:

כב

וַיִּכְתֹּב אֶת אוֹתוֹת הַשָּׁמַיִם לְסֵדֶר חָדְשֵׁיהֶם בַּסֵפֶר לְמַעַן יֵדְעוּ בְּנֵי אָדָם אֶת־עֵת הַשָּׁנִים לְסִדְרֵי חֹדֶשׁ וְחֹדֶשׁ בְּמִסְפָּרָם:

כג

וַיִּכְתֹּב בָּרִאשׁוֹנָה עֵדוּת וַיִּתֵּן לִבְנֵי־אָדָם עֵדוּת עַל־מִשְׁפְּחוֹת הָאֲדָמָה וַיְּלַמְּדֵם לָדַעַת שְׁבֻעֵי הַיּוֹבְלִים וַיּוֹדִיעֵם אֶת־יְמֵי הַשָּׁנִים וַיַּעֲרוֹךְ אֶת־הַחֳדָשִׁים וְאֶת שַׁבְּתוֹת הַשָּׁנָה הוֹאִיל בָּאֵר לָהֶם כַּאֲשֶׁר הֶרְאֵינוּ לוֹ לָדַעַת:

כד

וְאֶת שֶׁכְּבָר הָיָה וְאֶת־אֲשֶׁר בֹּא יָבֹא בְאַחֲרִית הַיָּמִים רָאָה בַּחֲלוֹמוֹ אֶת אֲשֶׁר־יִקְרָא אֶת־בְּנֵי־הָאָדָם לְדוֹרוֹתֵיהֶם עַד יוֹם הַמִּשְׁפָּט:

כה

אֶת־הַכֹּל רָאָה וְהֵבִין וְכָתַב בְּסֵפֶר לָעֵדוּת, וַיָּשֶׂם אוֹתוֹ לָעֵדוּת עַל־הָאָרֶץ לְכָל־בְּנֵי הָאָדָם וּלְדוֹרוֹתֵיהֶם:

כו

וּבַיּוֹבֵל הַשְּׁנֵים־עָשָׂר בַּשָּׁבוּעַ הַשְּׁבִיעִי לָקַח לוֹ לְאִשָּׁה אֶת־עַדְנִי בַּת דָּנִיאֵל בַּת אֲחוֹת אָבִיו, וּבַשָּׁנָה הַשִּׁשִּׁית לַשָּׁבוּעַ הַזֶּה יָלְדָה לוֹ בֵן וַיִּקְרָא אֶת־שְׁמוֹ מְתוּשָׁלַח:

כז

וַיְהִי בְּקֶרֶב מַלְאֲכֵי אֱלֹהִים שֵׁשׁ שָׁנִים, וַיַּרְאוּהוּ אֶת־כָּל אֲשֶׁר עַל־הָאָרֶץ וּבַשָּׁמִים מֶמְשֶׁלֶת הַשֶּׁמֶשׁ וַיִּכְתֹּב הַכֹּל בְּסֵפֶר:

כח

וַיָּשֶׂם עֵדוּת לַעֲנוֹת בַּשּׁוֹמְרִים, אֲשֶׁר חָטְאוּ בִּבְנוֹת הָאָדָם:

כט

כִּי הֵמָה הֵחֵלּוּ לְהִתְעָרֵב וּלְהִטָּמֵא בִּבְנוֹת הָאָדָם, וַיָּקָם חֲנוֹךְ לְעֵד בְּכֻלָם:

ל

וַיִּלָּקַח מִתּוֹךְ בְּנֵי־הָאָדָם, וַנָּבִיא אוֹתוֹ אֶל־גַּן הָעֵדֶן לְכָבוֹד וּלְתִפְאָרֶת:

לא

וְהִנֵּהוּ כּוֹתֵב פֹּה בְּסֵּפֶר אֶת־פַּתְשֶׁגֶן הַדִּין וְאֶת הָעֹנֶשׁ לִצְמִיתוּת, וְכָל רָעַת יוֹצְאֵי חֲלָצֵי בְּנֵי־הָאָדָם:

לב

וּבַעֲבוּרוֹ הֵבִיא ה' אֶת־הַמַּבּוּל עַל־הָאָרֶץ, כִּי הוּשַׂם לְאוֹת לְעֵר וְעוֹנֶה בְּכָל־זֶרַע בְּנֵי־אִישׁ לְהַזְכִּיר אֶת־כָּל־מַעַלְלֵי הַדּוֹרוֹת עַד־יוֹם הַמִּשְׁפָּט:

לג

וַיַּקְרֵב קְטֹרֶת לַה' לְרָצוֹן עַל הַר־הַנֶּגֶב, כִּי בְּאַרְבַּע מְקוֹמוֹת בָּחַר ה' עַל הָאָרֶץ:

לד

הַלֹּא הֵמָה גַּן־הָעֵדֶן וְהַר־הַקֶּדֶם וְהָהָר הַזֶּה אֲשֶׁר אַתָּה עוֹמֵד עָלָיו הַיּוֹם הוּא הַר־סִינַי, וְהַר־צִיּוֹן אֲשֶׁר יְקֻדַּשׁ בַּבְּרִיאָה הַחֲדָשָׁה לִקְדוּשַּׁת הָאָרֶץ:

לה

בּוֹ תִּתְקַדֵּשׁ הָאָרֶץ מִכָּל־אַשְׁמָה וּמִכָּל־טֻמְאָתָה לְעוֹלָם וָעֶד:

לו

וּבַיּוֹבֵל הָאַרְבָּעָה עָשָׂר לָקַח מְתוּשֶׁלַח אֶת־עָדִּין בַּת עַזְרִיאֵל בַּת אֲחוֹת אָבִיו לוֹ לְאִשָּׁה בַּשָּׁבֻעַ הַשְּׁלִישִׁי בַּשָּׁנָה הָרִאשׁוֹנָה, וַיּוֹלֶד בֵּן וַיִּקְרָא אֶת־שְׁמוֹ לָמֶךְ:

לז

וּבַיּוֹבֵל הַחֲמִשָׁה עָשָׂר בַּשָּׁבוּעַ הַשְּׁלִישִׁי לָקַח לוֹ לֶמֶךְ אִשָּׁה וּשְׁמָהּ בִּיתָנָה בַּת בְּרַכְאֵל בַּת אֲחוֹת אָבִיו לוֹ לְאִשָּׁה, וּבַשָּׁבֻעַ הַזֶּה יָלְדָה לוֹ בֵן:

לח

וַיִּקְרָא אֶת־שְׁמוֹ נֹחַ לֵאמֹר, זֶה יְנַחֲמֵנִי מִכָּל־עִצְּבוֹנִי וּמִן־הָאֲדָמָה אֲשֶׁר אֵרְרָה ה':

לט

וּמִקֵּץ יוּבֵל הַתִּשְׁעָה עָשָׂר בַּשָּׁבוּעַ הַשְּׁבִיעִי בַּשָּׁנָה הַשִּׁשִּׁית בּוֹ מֵת הָאָדָם, וְכָל־בָּנָיו קָבְרוּהוּ בָּאָרֶץ אֲשֶׁר נִבְרָא שָׁם וְהוּא הָיָה הָרִאשׁוֹן אֲשֶׁר נִקְבַּר בָּאָרֶץ:

מ

וַיָּמָת שִׁבְעִים שָׁנָה לִפְנֵי מְלֹאת לוֹ אֶלֶף שָׁנִים כִּי אֶלֶף שָׁנִים כְּיוֹם אֶחָד לְפִי הָעֵדוּת אֲשֶׁר בַּשָּׁמַיִם:

מא

לָכֵן כָּתוּב עַל עֵץ הַדַּעַת לֵאמֹר, בְּיוֹם אֲכַלְכֶם מִמֶּנּוּ תָּמוּתוּ:

מב

עַל־כֵּן לֹא מָלְאוּ לוֹ שְׁנוֹת הַיּוֹם הַהוּא כִּי אִם מֵת בּוֹ:

מג

וּמִקֵּץ הַיּוֹבֵל הַזֶּה הוּמַת קַיִן אַחֲרָיו בַּשָּׁנָה הַהִיא, בֵּיתוֹ נָפַל עָלָיו וַיָּמָת בְּתוֹךְ בֵּיתוֹ וַיּוּמַת בְּקֶרֶב אֲבָנָיו:

מד

כִּי בְּאֶבֶן הֵמִית אֶת־הֶבֶל וּבְאֶבֶן הוּמַת גַּם הוּא עַל־פִּי מִשְׁפַּט־הַצֶּדֶק:

מה

לָכֵן חָרוּת עַל־לֻחוֹת הַשָּׁמַיִם לֵאמֹר, בַּדָּבָר אֲשֶׁר הֵמִית אִישׁ אֶת־רֵעֵהוּ בּוֹ יוּמָת כַּאֲשֶׁר נָתַן מוּם בַּעֲמִיתוֹ כֵּן יַעֲשׂוּ לוֹ:

מו

וּבְיוֹבֵל הַחֲמִשָׁה [וְ]עֶשְׂרִים לָקַח לוֹ נֹחַ אִשָּׁה וּשְׁמָהּ אֵמְצָרָה בַת רְקִיעַאל בַּת אֲחוֹתוֹ לוֹ לְאִשָּׁה בַּשָּׁנָה הָרִאשׁוֹנָה בַּשָּׁבֻעַ הַחֲמִישִׁי:

מז

וּבַשָּׁנָה הַשְּׁלִישִׁית בּוֹ יָלְדָה לוֹ אֶת־שֵׁם, וּבַשָּׁנָה הַחֲמִישִׁית יָלְדָה לוֹ אֶת־חָם, וּבַשָּׁנָה הָרִאשׁוֹנָה לַשָּׁבֻעַ הַשִּׁשִּׁי יָלְדָה לוֹ אֶת־יָפֶת: