ספר היובלים/רובין מנוקד/ה

ספר היובלים • א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ

פרק ה

א

וַיְּהִי כִּי־הֵחַלּוּ בְּנֵי־הָאָדָם לָרֹב עַל־פְּנֵי כָּל־הָאֲדָמָה, וּבָנוֹת יֻלְּדוּ לָהֶם:

ב

וַיִּרְאוּ מַלְאֲכֵי הָאֱלֹהִים בְשָׁנָה אֶחַת לַיּוֹבֵל הַזֶּה כִּי טוֹבוֹת הֵנָּה לְמַרְאֶה וַיִּקְחוּ אוֹתָן לָהֶם לְנָשִׁים מִכֹּל אֲשֶׁר בָּחָרוּ וַתֵּלַדְנָה לָהֶם בָּנִים אֲשֶׁר הָיוּ לַנְפִילִים:

ג

וְהֶחָמָס מָלֵא אֶת־הָאָרֶץ וְכָל־בָּשָׂר הִשְׁחִית אֶת־דַּרְכּוֹ מֵאָדָם עַד־בְּהֵמָה עַד־חַיַּת הָאָרֶץ עַד־עוֹף הַשָּׁמַיִם וְעַד־כֹּל רוֹמֵשׂ עַל־הָאֲדָמָה:

ד

כֻּלָּם הִשְׁחִיתוּ אֶת־דַּרְכָּם וְאֶת־סִדְרָם וַיָּחֵלּוּ לִטְרוֹף אִישׁ אֶת־אָחִיו:

ה

וְהֶחָמָס מָלֵא אֶת־הָאָרֶץ, וְכָל־יֵצֶר מַחְשְׁבוֹת לֵב בְּנֵי־אָדָם הָיָה רַק רַע כָּל־הַיּוֹם:

ו

וַיַּרְא אֱלֹהִים אֶת־הָאָרֶץ וְהִנֵּה נִשְׁחָתָה וְכָל־בָּשָׂר הִשְׁחִית אֶת־סִדְרוֹ וַיַּעֲשׂוּ כֻּלָּם אֶת־הָרַע בְּעֵינָיו כֹּל אֲשֶׁר בָּאָרֶץ:

ז

וַיֹּאמֶר לִמְחוֹת אֶת־הָאָדָם וְכָל־בָּשָׂר אֲשֶׁר בָּרָא עַל־פְּנֵי הָאֲדָמָה:

ח

וְנוֹחַ לְבַדּוֹ מָצָא חֵן בְּעֵינָיו:

ט

וְעַל מַלְאָכָיו אֲשֶׁר שָׁלַח עַל־הָאָרֶץ חָרָה אַפּוֹ מְאוֹד, וַיֹּאמֶר לְהַשְׁמִידָם:

י

וַיֹּאמֶר אֵלֵינוּ נַאַסְרָה אוֹתָם בְּמַעֲמַּקֵי הָאֲדָמָה, וְהִנֵּה הִנָּם אֲסוּרִים בְּתוֹכָם וּמְפֹרָדִים:

יא

וְעַל־בְּנֵיהֶם יָצְאָה דָת מֵאֵת פָּנָיו, לִמְחוֹץ אוֹתָם בְּחֶרֶב וּלְכַלּוֹתָם מִתַּחַת הַשָּׁמַיִם:

יב

וַיֹּאמֶר לֹא־יָדוֹן רוּחִי בָאָדָם לְעֹלָם כִּי בָּשָׂר הוּא, וְהָיוּ יָמָיו מֵאָה וְעֶשְׂרִים שָׁנָה:

יג

וַיִּשְׁלַח אֶת־חַרְבּוֹ בֵּינֵיהֶם לְמַעַן יַכּוּ אִישׁ אֶת־אָחִיו, וַיָּחֵלּוּ לְהַכּוֹת אִישׁ אֶת־אָחִיו עַד־אֲשֶׁר נָפְלוּ כֻּלָּם לְפִי־חֶרֶב וְנִשְׁמְדוּ מֵעַל־הָאָרֶץ וְעֵינֵי אֲבוֹתֵיהֶם רוֹאוֹת:

יד

וְאַחֲרֵי־כֵן נֶאֶסְרוּ בְּמַעֲמַקֵי הָאֲדָמָה עַד־יוֹם הַמִּשְׁפָּט הַגָּדוֹל, כִּי אָז עָנוֹשׁ יֵעָנְשׁוּ כָּל־אֲשֶׁר הִשְׁחִיתוּ אֶת־דַּרְכֵיהֶם וְאֶת־עֲלִילוֹתֵיהֶם לִפְנֵי ה':

טו

וַיַּשְׁמֵּד אֵת כָּל־מִשְׁכְּנוֹתֵיהֶם, וְלֹא־נוֹתַר מֵהֶם עַד־אֶחָד אֲשֶׁר לֹא שָׁפַט אוֹתוֹ כְּכָל־רָעָתָם:

טז

וַיַּעַשׂ לְכָל־בְּרוּאָיו קֶרֶב חָדָשׁ וְנָכוֹן, אֲשֶׁר לֹא יֶחְטְאוּ לְעוֹלָמִים לְכָל־קִרְבָּם וְכָל־אִישׁ יִצְדַק בְּמוֹלַדְתּוֹ לָעַד:

יז

וְעוֹנֶשׁ כֻּלָּהַם נֶחְרָץ וְחָרוּת עַל־לֻחוֹת הַשָּׁמַיִם בְּלִי עַוְלָתָה:

יח

וְכָל־הַסָּרִים מִן־הַדֶּרֶךְ אֲשֶׁר נוֹעַד לָהֶם לָלֶכֶת בָּהּ אִם־לֹא יֵלְכוּ בָּהּ, הָעוֹנֶשׁ כָּתוּב לְכָל־קֶרֶב וּלְכָל־דּוֹר:

יט

וְלֹא יִנָּצֵל כָּל אֲשֶׁר בַּשָּׁמַיִם וְעַל־הָאָרֶץ, בָּאוֹר וּבַחֹשֶׁךְ בְּגֵיא צַלְמָוֶת וּבִתְּהוֹם רַבָּה וּבִמְקוֹם הָאֹפֶל:

כ

כָּל־עָנְשָׁם כָּלָה וְנֶחְרָץ וְכָתוּב וְחָרוּת לְכֻלָּם:

כא

אֵת הַגָּדוֹל יִשְׁפֹּט כְּגָדְלוֹ וְאֵת הַצָּעִיר כִּצְעִירָתוֹ, וְאֵת כָּל־אִישׁ וְאִישׁ יִשְׁפֹּט עַל־פִּי דַּרְכּוֹ:

כב

וְלֹא יִקַּח שֹּׁחַד, בְּאָמְרוֹ כִּי יֵשֵׁב לִשְׁפֹּט אֵת כָּל־בָּשָׂר:

כג

וְכִי יִתֵּן לוֹ אִישׁ אֶת־כֹּל אֲשֶׁר עַל־הָאָרֶץ, לֹא יִשָּׂא פָּנָיו וְלֹא יִקַּח דָּבָר מִיָּדוֹ כִּי הוּא הַשּׁוֹפֵט:

כד

וְעַל־בְּנֵי יִשְׂרָאֵל כָּתוּב וְחָרוּץ לֵאמֹר, אִם יִפְנוּ אֵלָיו בִּצְדָקָה יִסְלַח לְכָל־אֲשָׁמָם וְיִשָּׂא לְכָל־עֲוֹנָם:

כה

כָּתוּב וְחָרוּץ, כִּי כָּל־מוֹדֶה וְעוֹזֵב פְּשָׁעָיו יְרֻחָם פַּעַם אֶחַת בְּשָׁנָה:

כו

אֲבָל לֹא רֻחָמוּ כָּל־אֲשֶׁר הִשְׁחִיתוּ אֶת־דַּרְכָּם וְאֶת־יִצְרָם לִפְנֵי הַמַּבּוּל אַךְ נֹחַ לְבַדּוֹ, כִּי פָּנָיו נִשְּׂאוּ בִּגְלַל הַבָּנִים אֲשֶׁר הִצִיל לְמַעֲנֵהוּ מִמֵּי־הַמַּבּוּל:

כז

כִּי לִבּוֹ הָיָה צַדִּיק בְּכָל־דְּרָכָיו כַּאֲשֶׁר צֻוָּה, וְלֹא עָבַר עַל־כֹּל אֲשֶּׁר נִפְקַד עָלָיו:

כח

וַיֹּאמֶר ה' יִמַּח כָּל אֲשֶׁר בֶּחָרָבָה, מִכָּל־הַבְּהֵמָה עַד־חַיַּת הַשָּׂדֶה וְעוֹף־הַשָּׁמַיִם וְעַד הָרֶמֶשׂ הָרֹמֵשׂ עַל־הָאָרֶץ:

כט

וַיְּצַו אֶת־נֹחַ לַעֲשׂוֹת לוֹ תֵּבָה לְהִנָּצֵל מִמֵּי הַמַּבּוּל:

ל

וַיַּעַשׂ נֹחַ תֵּבָה לְכָל אֲשֶׁר צִוָּהוּ, בְּיוֹבֵל הַשִּׁבְעָה וְעֶשְׂרִים בַּשָּׁבֻעַ הַחֲמִישִׁי בַּשָּׁנָה הַחֲמִישִׁית:

לא

וַיָּבוֹא אֵלֶיהָ בַּשָּׁנָה הַשִּׁשִּׁית בּוֹ בַּחֹדֶשׁ הַשֵּׁנִי בְּרֹאשׁ הַחֹדֶשׁ הַשֵּׁנִי:

לב

עַד יוֹם שִׁשָּׁה עָשָׂר בּוֹ בָּא הוּא וְכָל־אֲשֶׁר הֵבֵאנוּ לוֹ אֶל־הַתֵּבָה, וַיִּסְגֹּר ה' בַּעֲדוֹ מִחוּץ בַּיּוֹם שִׁבְעָה עָשָׂר בָּעֶרֶב:

לג

וַה' פָּתַח שֶׁבַע אֲרֻבּוֹת שָׁמָיִם, לְהַמְטִיר מַיִם מִן־הַשָּׁמַיִם עַל־הָאָרֶץ אַרְבָּעִים יוֹם וְאַרְבָּעִים לָיְלָה:

לד

וְגַם מַעְיְנוֹת הַתְּהוֹם הֶעֱלוּ מַיִם, עַד כִּי מָלֵא כָּל־הָעוֹלָם מָיִם:

לָה

וַיִּגְבְּרוּ הַמַּיִם עַל־הָאָרֶץ, חֲמֵשׁ עֶשְׂרֵה אַמָּה מִלְמַעְלָה גָּבְרוּ הַמַּיִם עַל כָּל־הֶהָרִים הַגְּבֹהִים:

לוֹ

וַתָּרָם הַתֵּבָה מֵעַל־הָאָרֶץ, וְתֵלֵךְ עַל־פְּנֵי הַמָּיִם:

לז

וַיִּהְיוּ הַמַּיִם עַל־פְּנֵי הָאָרֶץ חֲמִשָׁה חֳדָשִׁים, חֲמִשִׁים וּמְאַת יוֹם:

לח

וַתֵּלֵךְ וַתָּנַח עַל־רֹאשׁ הַלּוּבָר, אַחַר הָרֵי אֲרָרָט:

לט

וּבֵחֹדֶשׁ הָרְבִיעִי נִסְכְּרוּ מַעְיְנוֹת תְּהוֹם רַבָּה, וַאֲרֻבֹּת הַשָּׁמַיִם נִכְלָאוּ:

מ

וּבְרֹאשׁ הַחֹדֶשׁ הַשְּׁבִיעִי נִבְקְעוּ כָּל־מַעְיְנוֹת תְּהוֹמוֹת הָאָרֶץ, וְזֶרֶם הַמַּיִם הֵחֵל לָרֶדֶת אֶל־תַּחְתִּית הַתְּהוֹם:

מא

וּבְרֹאשׁ הַחֹדֶשׁ הָעֲשִׂירִי נִרְאוּ רָאשֵׁי הֶהָרִים:

מב

וּבְרֹאשׁ הַחֹדֶשׁ הָרִאשׁוֹן נִרְאֲתָה הָאֲדָמָה וַיָּשֻׁבוּ הַמַּיִם מֵעַל הָאָרֶץ הָלוֹךְ וָשׁוֹב, בַּשָּׁבוּעַ הַחֲמִישִׁי בַּשָּׁנָה הַשְּׁבִיעִית בּוֹ:

מג

וּבַשִּׁבְעָה־עָשָׂר יוֹם לַחֹדֶשׁ הַשֵּׁנִי יָבְשָׁה הָאָרֶץ:

מד

וּבְשִּׁבְעָה וְעֶשְׂרִים יוֹם בּוֹ הֵסִיר אֶת־מִכְסֵה הַתֵּבָה, וַיְּשַׁלַּח מִתּוֹכָהּ אֵת חַיַּת־הָאָרֶץ וְעוֹף־הַשָּׁמַיִם וְהָרָמֶשׂ: