ספר היובלים/רובין מנוקד/ג

ספר היובלים • א • ב • ג • ד • ה • ו • ז • ח • ט • י • יא • יב • יג • יד • טו • טז • יז • יח • יט • כ • כא • כב • כג • כד • כה • כו • כז • כח • כט • ל • לא • לב • לג • לד • לה • לו • לז • לח • לט • מ • מא • מב • מג • מד • מה • מו • מז • מח • מט • נ

פרק ג

א

וּבְשֵׁשֶׁת יְמֵי הַשַּׁבָּת הַשֵּׁנִית הֲבִיאוֹנוּ בִּדְבַר ה' אֶל־הָאָדָם אֶת כָּל־חַיַּת הַשָּׂדֶה וְכָל־הַבְּהֵמָה וְאֵת כָּל־עוֹף הַשָּׁמַיִם וְכָל־הָרֶמֶשׂ הָרֹמֵשׂ עַל־הָאָרֶץ וְכָל־הַשֶּׁרֶץ הַשּׁוֹרֵץ בַּמַּיִּם לְמִינֵיהֶם עַל־צִבְאוֹתָם:

ב

אֶת־חַיַּת הָאָרֶץ בַּיּוֹם הָרִאשׁוֹן אֶת־הַבְּהֵמָה בַשֵּׁנִי אֶת־עוֹף הַשָּׁמַיִם בַּשְּׁלִישִׁי, כָּל הָרוֹמֵשׂ עַל־הָאָרֶץ בָּרְבִיעִי כָּל הַשּׁוֹרֵץ בַּמַּיִם בַּיּוֹם הַחֲמִישִׁי:

ג

וַיִּקְרָא לָהֶם הָאָדָם בִּשְׁמוֹתֵיהֶם וְכָל אֲשֶׁר קָרָא־לָהֶם הוּא שְׁמָם:

ד

וּבְכָל־חֲמֵשֶׁת הַיָּמִים הָאֵלֶּה רָאָה הָאָדָם אֶת־כָּל־זֹאת זֵכֶר וּנְקֵבָה בְּכָל־מִין אֲשֶׁר עַל־הָאָרֶץ וְהוּא הָיָה לְבַדּוֹ וְלֹא־יָכוֹל לִמְצֹא כָּמוֹהוּ עֵזֶר כְּנֶגְדּוֹ:

ה

וַיֹּאמֶר ה' אֵלַי לֹא־טוֹב הֱיוֹת הָאָדָם לְבַדּוֹ נַעֲשֶׂה לוֹ עֵזֶר כְּנֶגְדּוֹ:

ו

וַיַּפֵּל ה' אֱלֹהֵינוּ תַּרְדֵמָה עָלָיו וַיִּישַׁן וַיִּקַּח לְאִשָּׁה אַחַת מִצַּלְעוֹתָיו לִהְיוֹת לוֹ לָאִשָּׁה וְיִסְגֹּר בָּשָׂר תַּחְתֶּנָה:

ז

וַיִּבֶן אֶת הָאִשָּׁה וַיָּעַר אֶת־הָאָדָם מִשְּׁנָתוֹ:

ח

וַיִּיקַץ הָאָדָם מִשְּׁנָתוֹ וַיָּקָם בַּיּוֹם הַשִּׁשִּׁי וַיִּקַּח אוֹתָהּ אֵלָיו וַיֵּדַע אוֹתָהּ וַיֹּאמֶר אֵלֶיהָ:

ט

זֹאת הַפַּעַם עֶצֶם מֵעַצְמִי וּבָשָׂר מִבְּשָׂרִי לְזֹאת יִקָּרֵא אִשְׁתִּי כִּי מֵאִישָׁהּ לֻקָחָה:

י

עַל־כֵּן יִהְיוּ אִישׁ וְאִשָּׁה לְאֶחָד, וְעַל־כֵּן יַעֲזֹב אֶת־אָבִיו וְאֶת־אִמּוֹ וְדָבַק בְּאִשְׁתּוֹ וְהָיוּ לְבָשָׂר אֶחָד:

יא

וּבַשָּׁבוּעַ הָרִאשׁוֹן נִבְרָא הָאָדָם וְאִשְׁתּוֹ וּבַשָּׁבוּעַ הַשֵּׁנִי הֵבִיא אוֹתָהּ אֵלָיו:

יב

לָכֵן צֻוְּתָה כִּי תִּטְמָא שִׁבְעַת יָמִים לְבֵן וּשְׁבֻעַיִם לְבַת:

יג

וַיְּהִי מִקֵּץ אַרְבָּעִים יוֹם לָשֶׁבֶת הָאָדָם בָּאֶרֶץ אֲשֶׁר נִבְרָא שָׁם וַנָּבִיא אוֹתוֹ אֶל־גַּן־הָעֵדֶן:

יָד

עַל־כֵּן חָרוּת עַל לֻחוֹת הַשָּׁמַיִם, זֹאת תּוֹרַת הַיּוֹלֶדֶת:

טו

כִּי תַזְרִיעַ וְיָלְדָה זָכָר וְטָמְאָה שִׁבְעַת יָמִים כְּפִי הַשָּׁבוּעַ הָרִאשׁוֹן:

טז

וּשְׁלֹשִׁים יוֹם וּשְׁלֹשֶׁת יָמִים תֵּשֵׁב בִּדְמֵי טָהֳרָה וּבְכָל־קֹדֶשׁ לֹא־תִגַּע וְאֶל־הַמִּקְדָּשׁ לֹא תָּבֹא עַד מְלֹאת הַיָּמִים הָאֵלֶּה הַיּוֹלֶדֶת זָכָר:

יז

וְאִם נְקֵבָה תֵלֵד וְטָמְאָה שְׁבֻעַיִם כְּפִי שְׁנֵי־הַשְּׁבוּעַיִם הָרִאשׁוֹנִים:

יח

וְשִׁשִּׁים יוֹם וְשֵׁשֶׁת יָמִים תֵּשֵׁב עַל דְּמֵי טָהֳרָה וְהָיוּ לָהּ בְּכֻלָּם שְׁמוֹנִים יוֹם:

יט

וַיְּהִי כַּאֲשֶׁר מָלְאָה הָאִשָּׁה שְׁמוֹנִים יוֹם וַנָּבִיא אוֹתָהּ אֶל גַּן־הָעֵדֶן כִּי קָדוֹשׁ הוּא מִכָּל־הָאָרֶץ וְכָל־עֵץ הַנָּטוּעַ בּוֹ קָדוֹשׁ הוּא:

כ

לָכֵן מִשְׁפַּט הַיָּמִים הָאֵלֶּה לַיּוֹלֶדֶת בֶּן אוֹ בַת לְבַל־תִּגַּע בְּכָל־קֹדֶשׁ וְאֶל־הַמִּקְדָּשׁ לֹא־תָּבֹא עַד מְלֹאת לָהּ הַיָּמִים הָאֵלֶּה לַבֵּן אוֹ לַבַּת:

כא

זֹאת הַתּוֹרָה וְהָעֵדוּת הַכְּתוּבָה לִבְנֵי יִשְׂרָאֵל לִשְׁמֹר אוֹתָהּ לְעוֹלָם:

כב

וּבְרֵאשִׁית הַיּוֹבֵל הָרִאשׁוֹן הָיוּ הָאָדָם וְאִשְׁתּוֹ שֶׁבַע שָׁנִים בְּגַן־עֵדֶן, לְעָבְדָהּ וּלְשָׁמְרָהּ:

כג

וַנִּתֵּן־לוֹ עֲבוֹדָה לִשְׁעוֹת בָּהּ וַנְּלַמְּדֵהוּ לַעֲבֹד בְּכָל־נִגְּלָה לְעֵיִן־רֹאִי, וַיַּעֲבֹד:

כד

וְהוּא הָיָה עָרוּם וְלֹא־הִתְבּוֹנֵן לְהִתְבּוֹשֵׁשׁ:

כה

וַיִּשְׁמֹּר אֶת־הַגַּן מִפְּנֵי עוֹף־הַשָּׁמַיִם וְחַיַּת־הָאָרֶץ וְהַבְּהֵמָה, וְיֶאֱסֹף אֶת־פְּרִי הַגַּן וַיֹּאכַל וְהַנּוֹתָר שָׁמַר־לוֹ וּלְאִשְׁתּוֹ וְהָיָה לְפִקָּדוֹן:

כו

וַיְּהִי מִקֵּץ שֶׁבַע שָׁנִים לְשִׁבְתּוֹ שָׁם שֶׁבַע שָׁנִים בְּמִסְפָּר בַּחֹדֶשׁ הַשֵּׁנִי בְּשִׁבְעָה־עָשָׂר בּוֹ, וַיָּבֹא הַנָּחָשׁ וְיִקְרַב אֶל־הָאִשָּׁה:

כז

וַיֹּאמֶר הַנָּחָשׁ אֶל־הָאִשָּׁה הַאַף מִכָּל פְּרִי־הָעֵצִים אֲשֶׁר בַּגַּן, אָמַר אֱלֹהִים לֹא תֹאכְלוּ מִמֶּנּוּ:

כח

וַתֹּאמֶר אֵלָיו מִכָּל פְּרִי־הָעֵצִים אֲשֶׁר בַּגַּן אָמַר אֱלֹהִים כִּי נֹאכַל מִמֶּנּוּ:

כט

וּמִפְּרִי הָעֵץ אֲשֶׁר בְּתוֹךְ הַגָּן אָמַר אֱלֹהִים אֵלֵינוּ לְבַל־נֹאכַל מִמֶּנּוּ וּלְבַל־נִגַּע בּוֹ פֶּן־נָמוּת:

ל

וַיֹּאמֶר הַנָּחָשׁ אֶל־הָאִשָּׁה, לֹא־מוֹת תְּמוּתוּן:

לֹא

כִּי יוֹדֵעַ אֱלֹהִים כִּי בַּיּוֹם אֲכָלְכֶם מִמֶּנּוּ וְנִפְקְחוּ עֵינֵיכֶם, וִהְיִיתֶם כֵּאלֹהִים יֹדְעֵי טוֹב וָרָע:

לב

וַתֵּרֶא הָאִשָּׁה אֶת־הָעֵץ כִּי נֶחְמָד הוּא וְתַאֲוָה לָעֵינַיִם וְכִי פִּרְיוֹ טוֹב לְמַאֲכָל וַתִּקַּח מִפִּרְיוֹ וַתֹּאכַל:

לג

וַתְּכַס בָּרִאשׁוֹנָה אֶת־עֶרְוָתָהּ בְּעֲלֵי תְּאֵנָה וַתִּתֵּן מִמֶּנּוּ לָאָדָם וַיֹּאכַל:

לד

וַתִּפָּקַחְנָה עֵינָיו וַיֵּדַע כִּי עָרוּם הָיָה וַיִּקַּח עֲלֵי תְּאֵנָה וַיִּתְפֹּר אוֹתָם וַיַּעַשׂ־לוֹ חֲגוֹרָה וַיְּכַס אֶת־עֶרְוָתוֹ:

לה

וַיְּקַלֵּל ה' אֶת־הַנַּחַשׁ, וְעֶבְרָתוּ עָלָיו שָׁמַר לָנֶצַח:

לו

וְגַם עַל־הָאִשָּׁה קָצַף עַל־אֲשֶׁר שָׁמְעָה בְּקוֹל הַנָּחָשׁ וַתֹּאכַל:

לז

וַיֹּאמֶר לָהּ הַרְבֵּה אַרְבֶּה עִצְּבוֹנֵךְ וִיגוֹנֵךְ בְּעֶצֶב תֵּלְדִי בָנִים, וְאֶל־אִישֵׁךְ תְּשׁוּקָתֵךְ וְהוּא יִמְשָׁל־בָךְ:

לח

וַיֹּאמֶר גַּם אֶל־הָאָדָם יַעַן אֲשֶׁר שָׁמַעְתָּ לְקוֹל אִשְׁתְּךָ וַתֹּאכַל מִן־הָעֵץ אֲשֶׁר צִוִּיתִיךָ לְבִלְתִּי אֲכוֹל מִמֶּנּוּ אֲרוּרָה הָאֲדָמָה בַּעֲבוּרֶךָ:

לט

קוֹץ וְדַרְדַּר יִצְמְחוּ לָךְ וְלַּחְמְךָ תֹּאכַל בְּזֵעַת אַפֶּךָ עַד־שׁוּבְךָ אֶל־הָאֲדָמָה אֲשֶׁר לֻקַּחְתָּ מִמֶּנָּה כִּי עַל־הָעָפָר אַתָּה וְאֶל־עָפָר תָּשׁוּב

מ

וַיַּעַשׂ לָהֶם בִּגְדֵי־עוֹר וַיַּלְבִּישֵׁם בָּהֶם וַיִּשְׁלָחֵם מִגַּן־עֵדֶן:

מא

וּבַיּוֹם הַהוּא בְּצֵאת הָאָדָם מִגַּן־עֵדֶן הִקְרִיב לְרֵיחַ נִיחוֹחַ קְטֹרֶת לְבוֹנָה וְחֶלְבְּנָה נָטָּף וּשְׁחֵלֶת בַּבֹּקֶר כְּצֵאת הַשֶּׁמֶשׁ בַּיּוֹם אֲשֶׁר כִּסָּה אֶת־עֶרְוָתוֹ:

מב

וּבַיּוֹם הַהוּא נִסְכַּר פִּי כָּל חַיַּת־הָאָרֶץ וּפִי הַבְּהֵמָה וְעוֹף הַשָּׁמַיִם וּפִי כָּל־הוֹלֵךְ עַל אַרְבַּע וְכָל הָרֶמֶשׁ לְבַל יוּכְלוּן לְדַבֵּר עוֹד כִּי כֻּלָּם דִּבְּרוּ יַחְדָיו שָׂפָה אַחַת וְלָשׁוֹן אֶחָת:

מג

וַיְּגָרֶשׁ מִגַּן־עֵדֶן כָּל־הַבָּשָׂר אֲשֶׁר הָיָה בְּגַן־הָעֵדֶן וַיִּפָּרֵד כָּל־בָּשָׂר לְמִשְׁפְּחוֹתָיו וּלְמִינָיו אֶל־הַמְּקוֹמוֹת אֲשֶׁר נוֹעֲדוּ לָהֶם:

מַד

אַךְ בְּלֵב הָאָדָם נָתַן לְכַסּוֹת בְּשַׂר עֶרְוָתוֹ לוֹ לְבַדּוֹ בְּכָל־חַיָּה וּבְהֵמָה:

מה

עַל־כֵּן צִוָּה עַל־הַלֻּחוֹת אֶת כָּל־יוֹדְעֵי מִשְׁפַּט הַתּוֹרָה לְכַסּוֹת אֶת בְּשַׂר־עֶרְוָתָם וּלְבִלְתִּי הִתְגַּלּוֹת כַּאֲשֶׁר יִתְגַּלּוּ הַגּוֹיִם:

מו

וּבְרֹאשׁ הַחֹדֶשׁ הָרְבִיעִי יָצְאוּ הָאָדָם וְאִשְׁתּוֹ מִגַּן־עֵדֶן וַיֵּשְׁבוּ בְּאֶרֶץ אֶלְּדָד, בָּאָרֶץ אֲשֶׁר נִבְרְאוּ שָׁם:

מז

וַיִּקְרָא הָאָדָם שֵׁם אִשְׁתּוֹ חַוָּה, וְלֹא הָיָה לָהֶם בֶּן עַד־שְׁנַת הַיּוֹבֵל הָרִאשׁוֹן:

מח

וְאַחֲרֵי־כֵן יָדַע אוֹתָהּ, וְהוּא עָבַד אֶת־אַדְמָתוֹ כַּאֲשֶׁר הָרְאָה בְּגַן־הָעֵדֶן: