תרגום אונקלוס (דפוס)/ספר בראשית/ו
(א) וַהֲוָה כַּד שָׁרִיאוּ בְּנֵי אֱנָשָׁא לְמִסְגֵּי עַל אַפֵּי אַרְעָא וּבְנָתָא אִתְיְלִידָא לְהוֹן׃
(ב) וַחֲזוֹ בְּנֵי רַבְרְבַיָּא יַת בְּנָת אֱנָשָׁא אֲרֵי שַׁפִּירָן אִנִּין וּנְסִיבוּ לְהוֹן נְשִׁין מִכֹּל דְּאִתְרְעִיאוּ׃
(ג) וַאֲמַר יְיָ לָא יִתְקַיַּים דָּרָא בִּישָׁא הָדֵין קֳדָמַי לְעָלַם בְּדִיל דְּאִנּוּן בִּסְרָא וְעוֹבָדֵיהוֹן בִּישִׁין [נ"א: בִּישַׁיָּא] אַרְכָּא יָהִיב לְהוֹן מְאָה וְעֶסְרִין שְׁנִין אִם יְתוּבוּן׃
(ד) גִּבָּרַיָּא הֲווֹ בְּאַרְעָא בְּיוֹמַיָּא הָאִנּוּן וְאַף בָּתַר כֵּן דְּעָלִין [נ"א: דִּי יָעֲלוּן] בְּנֵי רַבְרְבַיָּא לְוַת בְּנַת [נ"א: לִבְנָת] אֱנָשָׁא וְיָלְדַן לְהוֹן [נ"א: מִנְּהוֹן] אִנּוּן גִּבָּרַיָּא דְּמֵעָלְמָא אֱנָשִׁין דִּשְׁמָא׃
(ה) וַחֲזָא יְיָ אֲרֵי סַגִיאַת בִּישַׁת אֱנָשָׁא בְּאַרְעָא וְכָל יִצְרָא מַחְשְׁבָת לִבֵּיהּ לְחוֹד בִּישׁ כָּל יוֹמָא׃
(ו) וְתָב יְיָ בְּמֵימְרֵיהּ אֲרֵי עֲבַד יַת אֱנָשָׁא [נ"א: אָדָם] בְּאַרְעָא וַאֲמַר בְּמֵימְרֵיהּ [חסר בנ"א] לְמִתְבַּר תּוּקְפְהוֹן [נ"א: תּוּקְפֵיהוֹן] כִּרְעוּתֵיהּ׃
(ז) וַאֲמַר יְיָ אֶמְחֵי יַת אֱנָשָׁא דִּבְרֵיתִי מֵעַל אַפֵּי אַרְעָא מֵאֱנָשָׁא עַד בְּעִירָא עַד רִחֲשָׁא וְעַד עוֹפָא דִּשְׁמַיָּא אֲרֵי תָּבִית בְּמֵימְרִי אֲרֵי עֲבַדְתִּנּוּן׃
(ח) וְנֹחַ אַשְׁכַּח רַחֲמִין קֳדָם יְיָ׃
(ט) אִלֵּין תּוּלְדַת נֹחַ נֹחַ גְּבַר זַכַּאי שְׁלִים הֲוָה בְּדָרוֹהִי בְּדַחַלְתָּא דַייָ הַלִּיךְ נֹחַ׃
(י) וְאוֹלֵיד נֹחַ תְּלָתָא בְּנִין יַת שֵׁם יַת חָם וְיַת יָפֶת׃
(יא) וְאִתְחַבַּלַת אַרְעָא קֳדָם יְיָ וְאִתְמְלִיאַת אַרְעָא חָטוֹפִין׃
(יב) וַחֲזָא יְיָ יַת אַרְעָא וְהָא אִתְחַבָּלַת אֲרֵי חַבִּילוּ כָּל בִּסְרָא אֲנַשׁ [יַת] אָרְחֵיהּ עַל אַרְעָא׃
(יג) וַאֲמַר יְיָ לְנֹחַ קִצָּא דְּכָל בִּסְרָא עָל לִקְדָמַי אֲרֵי אִתְמְלִיאַת אַרְעָא חָטוֹפִין מִן קֳדָם עוֹבָדֵיהוֹן בִּישַׁיָּא וְהָא אֲנָא מְחַבֵּילְהוֹן עִם אַרְעָא׃
(יד) עִיבֵיד לָךְ תֵּיבוֹתָא דְּאָעִין דְּקַדְרוֹס מְדוֹרִין תַּעֲבֵיד יַת תֵּיבוֹתָא וְתִחְפֵי יָתַהּ מִגָּיו וּמִבָּרָא בְּכוּפְרָא׃
(טו) וְדֵין דְּתַעֲבֵיד יָתָהּ תְּלַת מְאָה אַמִּין אוּרְכָּא דְּתֵיבוֹתָא חַמְשִׁין אַמִּין פּוּתְיָהּ וּתְלָתִין אַמִּין רוּמָהּ׃
(טז) נֵיהוֹר תַּעֲבֵיד לְתֵיבוֹתָא וּלְאַמְּתָא תְּשַׁכְלְלִנָּהּ מִלְּעֵילָא וְתַרְעָא דְּתֵיבוֹתָא בְּסִטְרַהּ תְּשַׁוִּי מְדוֹרִין אַרְעָאִין תִּנְיָנִין וּתְלִיתָאִין תַּעְבְּדִינַּהּ׃
(יז) וַאֲנָא הָא אֲנָא מַיְתִי יַת טוֹפָנָא מַיָּא עַל אַרְעָא לְחַבָּלָא כָּל בִּסְרָא דְּבֵיהּ רוּחָא דְּחַיֵּי מִתְּחוֹת שְׁמַיָּא כֹּל דִּבְאַרְעָא יְמוּת׃
(יח) וְאָקִים יַת קְיָמִי עִמָּךְ וְתֵיעוּל לְתֵיבוֹתָא אַתְּ וּבְנָךְ וְאִתְּתָךְ וּנְשֵׁי בְנָךְ עִמָּךְ׃
(יט) וּמִכָּל דְּחַי מִכָּל בִּסְרָא תְּרֵין מִכֹּלָּא תַּעֵיל לְתֵיבוֹתָא לְקַיָּמָא עִמָּךְ דְּכַר וְנוּקְבָּא יְהוֹן׃
(כ) מֵעוֹפָא לִזְנוֹהִי וּמִן בְּעִירָא לִזְנַהּ [וּ]מִכֹּל רִחֲשָׁא דְּאַרְעָא לִזְנוֹהִי תְּרֵין מִכּוֹלָא יֵיעָלוּן לְוָתָךְ לְקַיָּמָא׃
(כא) וְאַתְּ סַב לָךְ מִכָּל מֵיכַל דְּמִתְאֲכִיל וְתִכְנוֹשׁ לְוָתָךְ וִיהֵי לָךְ וּלְהוֹן לְמֵיכָל׃
(כב) וַעֲבַד נֹחַ כְּכֹל דִּי פַקֵּיד יָתֵיהּ יְיָ כֵּן עֲבָד׃