מָחִֽיתִי כָעָב פְּשָׁעֶֽיךָ, וְכֶעָנָן חַטֹּאותֶֽיךָ, שׁוּבָה אֵלַי, כִּי גְאַלְתִּֽיךָ. רָנּוּ שָׁמַֽיִם, כִּי עָשָׂה יְיָ; הָרִֽיעוּ תַּחְתִּיּוֹת אָֽרֶץ, פִּצְחוּ הָרִים רִנָּה, יַֽעַר וְכׇל־עֵץ בּוֹ, כִּי גָאַל יְיָ יַעֲקֹב, וּבְיִשְׂרָאֵל יִתְפָּאָר. גֹּאֲלֵֽנוּ יְיָ צְבָאוֹת שְׁמוֹ, קְדוֹשׁ יִשְׂרָאֵל.
יִשְׂרָאֵל נוֹשַׁע בַּייָ תְּשׁוּעַת עוֹלָמִים; לֹא תֵבֹֽשׁוּ וְלֹא תִכָּלְמוּ עַד־עֽוֹלְמֵי עַד. אֲכַלְתֶּם אָכוֹל וְשָׂבֽוֹעַ, וְהִלַּלְתֶּם אֶת שֵׁם יְיָ אֱלֹהֵיכֶם אֲשֶׁר עָשָׂה עִמָּכֶם לְהַפְלִיא, וְלֹא יֵבֹֽשׁוּ עַמִּי לְעוֹלָם. וִידַעְתֶּם כִּי בְקֶֽרֶב יִשְׂרָאֵל אָֽנִי, וַאֲנִי יְיָ אֱלֹהֵיכֶם, וְאֵין עוֹד; וְלֹא יֵבֹֽשׁוּ עַמִּי לְעוֹלָם. כִּי בְשִׂמְחָה תֵצֵֽאוּ, וּבְשָׁלוֹם תּוּבָלוּן; הֶהָרִים וְהַגְּבָעוֹת יִפְצְחוּ לִפְנֵיכֶם רִנָּה, וְכׇל עֲצֵי הַשָּׂדֶה יִמְחֲאוּ־כָף. הִנֵּה אֵל יְשׁוּעָתִי, אֶבְטַח וְלֹא אֶפְחָד; כִּי עׇזִּי וְזִמְרָת יָהּ יְיָ, וַיְהִי־לִי לִישׁוּעָה. וּשְׁאַבְתֶּם־מַֽיִם בְּשָׂשׂוֹן, מִמַּעַיְנֵי הַיְשׁוּעָה. וַאֲמַרְתֶּם בַּיּוֹם הַהוּא: הוֹדוּ לַייָ, קִרְאוּ בִשְׁמוֹ, הוֹדִֽיעוּ בָעַמִּים עֲלִילֹתָיו; הַזְכִּֽירוּ כִּי נִשְׂגָּב שְׁמוֹ. זַמְּרוּ יְיָ, כִּי גֵאוּת עָשָׂה; מוּדַֽעַת זֹאת בְּכׇל הָאָֽרֶץ. צַהֲלִי וָרֹֽנִּי, יוֹשֶֽׁבֶת צִיּוֹן, כִּי גָדוֹל בְּקִרְבֵּךְ קְדוֹשׁ יִשְׂרָאֵל. וְאָמַר בַּיּוֹם הַהוּא, הִנֵּה אֱלֹהֵֽינוּ זֶה קִוִּֽינוּ לוֹ וְיוֹשִׁיעֵֽנוּ; זֶה יְיָ קִוִּֽינוּ לוֹ, נָגִֽילָה וְנִשְׂמְחָה בִּישׁוּעָתוֹ.
בֵּית יַעֲקֹב, לְכוּ וְנֵלְכָה בְּאוֹר יְיָ. וְהָיָה אֱמוּנַת עִתֶּֽיךָ חֹֽסֶן יְשׁוּעֹת, חׇכְמַת וָדָֽעַת, יִרְאַת יְיָ הִיא אוֹצָרוֹ. וַיְהִי דָוִד לְכׇל דְּרָכָו מַשְׂכִּיל, וַייָ עִמּוֹ. פָּדָה בְשָׁלוֹם נַפְשִׁי מִקְּרׇב־לִי, כִּי בְרַבִּים הָיוּ עִמָּדִי. וַיֹּֽאמֶר הָעָם אֶל שָׁאוּל: הֲיוֹנָתָן יָמוּת, אֲשֶׁר