מחבר:דוד פרישמן/תרגום/ספר יורם

ספר יורם
רוּדוֹלְף בּוֹרְכַארְדְט
תרגם דוד פרישמן

הקדמה מאת דוד פרישמן

לפני שנים אחדות פרסם רודולף בורכרדט, סופר שחציו משורר וחציו פילוסוף, את ספרו הקטן "יורם", שהדפיסו בתור כתב-יד רק בשביל מספר קטן של מבינים. הרושם היה חזק. איש מודרני בוחר לו את הצורה העתיקה, סגנון ביבלי והרצאה ביבלית, בורא לו מין איוב קדמוני, ורק שרגשותיו הן רגשות מודרניות דוקא, ואיוב זה מתוכח גם הוא עם אלהיו הזועם ושואל מעמו כי יראה לו את עונו מפורש ("את אצבעך שים על חטאתי"), כדי שידע אם בצדקה באה עליו כל הרעה אשר מצאה אותו. אין הוא שואל כי יעביר מעליו את הרעה, כי ישוב ויחננו, כי ישוב את שבותו ויוסיף את כל אשר היה לו למשנה ויברך את אחריתו מראשיתו ויתן לו ארבעה-עשר אלף צאן וששת אלפים גמלים ואלף צמד בקר ואלף אתונות ושבענה בנים ושלוש בנות וכו'. לא. בשעשועי ילדים כאלה יכול היה רק איזה אלהים קדמוני לכפר פני איזה אדם קדמוני, אחרי שנחם על הרעה, והילד הגדול האיר מיד את פניו וישב ויהי מאושר. לא – בכל אלה לא יושע ליורם זה אף במעט ("אשר אבד הנה אבד ואת האבדה לא תמחה גם כי תשיב לתתה לי שנית. אשר מת הנה מת ואת המות לא תעביר מנגדי גם כי תעורר את המת"). אדרבא. נכון הוא בשס"כ כל גידיו וברמ"ח כל אבריו לקבל בכל רגע באהבה את כל היסורים הרבים, שבאו עליו, ולהצדיקם עליו. ורק את הדבר הקטן הוא שואל מעם האלהים הגדולים והתקיפים: אראה נא ואזכרה נא כי באה עלי כל זאת בצדק וביושר – ואז ירגע בי לבי ואוכל למות במנוחה. הלשון היא לשון אדירה ונאה ועזה. כאבני ברד נופלים הדברים, כסלעי שיש יורדים, והם עצומים וגדולים מכח אנוש. רגע אחד נחשבים אנחנו בעינינו כנתונים בעולם אחר. איזה כח איתנים התפרץ וסוער לעינינו. תשעת הפרקים הקטנים של הספר האמנותי הקטן הזה מכילים אוצר שלם של פרובלימות מודרניות היוצאות ומתפתחות מתוך שרשים קדומים מאד. המוטיבים מוטיבים קדמונים, ורק שמהם מסתעפות שאלות מודרניות רבות: האלהות והאנושות, החטא והעונש, החיים ומניעות פרי הבטן, האהבה ויחס המינים זה לזה, הרוח והטבע – כל אלה מובאים פה בחשבון. הריב הזה עם האלהים מזכיר לנו את האדיר ביותר, ששירת העולמים הטרגית ושירת הגבורים עם שירת האמונה נתנו לנו מאז ועד עתה. ואולם היותר נשגב הוא אותו הקול הנפלא היוצא לנו מתוך ההרצאה – קול שאפשר הוא החקוי היותר טוב לספר הביבליה, שיש לנו עד היום הזה. ומה זה קולה של הביבליה הלא ידענו: מן הצרופים שלו יוצאת לנו הלשון היותר אדירה, שכתבו בה בני האדם עד עתה. את הספר הזה חשבתי לי לחובה לתת בתרגום עברי. אם המחבר, שסוף סוף לא היתה לו האפשרות לכתוב את הביבלית שלו אלא על פי חקויים לשפתו של לוטר, הצליח כל כך בספרו, הרי אי אפשר הוא שהספר בתרגומו העברי, כשהוא כתוב ביבלית ממש, יהיה רשמו קטן מזה.

                                                     ד. פ.
 
                                                                ספר יורם
 
                         
 

קָרוֹב אֱלֹהִים וּלְהֲבִינוֹ רָחוֹק:
אַךְ בִהְיוֹת הַשֹּׁאָה
וְצָמְחָה הַתְּשׁוּעָה עִמָּהּ…
הֶאלְדֶרְליִן

א
א. אֵלֶּה הַדְּבָרִים אֲשֶׁר כָּתַב מָרְדְּכַי בֶּן-גַּבְרִיאֵל הָאֲרַמִּי עַל-סֵפֶר וַיִּקְרָא לוֹ נִפְלְאוֹת תּוֹלְדוֹת אָדָם.
ב. אִישׁ הָיָה בְיִשְׂרָאֵל מִבְּנֵי שֵׁבֶט הַגָּדִי וַיֵּשֶׁב בְּעֵין-פֶּרֶז אֲשֶׁר עִם-הַבְּרֵכוֹת הָאֲחוּזוֹת.
ג. וְשֵׁם הָאִישׁ פִּינְחָס בֶּן-עַמִּינָדָב בֶּן-פְּתוֹר מִבְּנֵי גָד וְשֵׁם אִמּוֹ יָעֵל.
ד. וַיְהִי הָאִישׁ תָּמִים עִם-אֲנָשִׁים טוֹב וְיָשָׁר וְעִם-יִשְׂרָאֵל נֶאֱמָן וַיֵּשֶׁב הָאִישׁ בְּבֵית אֲבוֹתָיו וַיַּעַשׂ מִקְנֶה וְקִנְיָן וַיִּסְחַר עִם-עֲדָרָיו הָלוֹךְ וְשׁוּב מִנֶּגֶב וְעַד-יָם וְסוֹבֵב אֶל-מִזְרָח.
ה. וַיֶּרֶב רְכוּשׁוּ מְאֹד וַיֵּלֶךְ הָלוֹךְ וָרָב וַיֵּצֵא שְׁמוֹ עַד-מִדְיָן אֲשֶׁר עִם-עֲרָב וְעַד-כַּשְׂדִּים.
ו. וַיְהִי לוֹ בֵן וּשְׁמוֹ יוֹרָם אֲשֶׁר יָלְדָה לוֹ אִשְׁתּוֹ וְלֹא הָיָה לוֹ אַחֵר זוּלָתוֹ.
ז. וַיַחְמְדוּ אֶת-הַנַּעַר כָּל-רֹאָיו וַיְהִי לְשִׂמְחָה לְלֵב אָבִיו וְנֶגֶד זְקֵנָיו נֶחָמָה.
ח. כִּי מִשְׁנֵה בְרָכָה בֵרְכוֹ אֱלֹהִים וַיְהִי תָּם וְטוֹב תֹּאַר אַדְמוֹנִי וְצַח וְעִם-הָרָצִים רָץ הָיָה וַיִּתְהַלֵּךְ לִפְנֵי-אֱלֹהִים יָשָׁר מִנְּעֻרָיו.
ט. וַיִּגְדַּל הַנַּעַר וַיְהִי לְאִישׁ וַיִּתֵּן לוֹ פִינְחָס אָבִיו אֶת-הַטַּבַּעַת וְאֶת-שִׂמְלַת הַגְּבָרִים אֲשֶׁר יִלְבַּשׁ וַיְבַקֵּשׁ לוֹ אִשָּׁה לְבַעֲבוּר זַרְעוֹ.
י. וַיִמְצָא לִבְנוֹ אִשָּׁה אֶת-אִיזֶבֶל בַּת-זַכְרִי בֶן-אֱלִיעֶזֶר מִבְּנֵי גָד וַיִּתֵּן אוֹתָהּ לוֹ לְאִשָּׁה.
יא. וַיִּקַּח אוֹתָהּ יוֹרָם לוֹ לְאִשָּׁה כְּחֻקַּת יִשְׂרָאֵל כַּכָּתוּב.
יב. וְהָאִשָּׁה לֹא הָרְתָה לְאִישָׁהּ וְלֹא יָלְדָה לו בֵן אוֹ בַת.
יג. אָז יְדַבֵּר פִּינְחָס עַל-לֵב בְּנוֹ יוֹם יוֹם וַיִתְחַנֵּן לוֹ וְלֹא חָדַל אֲשֶׁר יְגָרֵשׁ אֶת-הָאִשָּׁה כְּחֹק לְיִשְׂרָאֵל וְנָתוֹן לָהּ סֵפֶר כְּרִיתֻת כְּמִשְׁפַּט הָעֲקָרוֹת כַּכָּתוּב בַּתּוֹרָה.
יד. וְלֹא אָבָה יוֹרָם לִשְׁמוֹעַ לוֹ וַיַכְבֵּד אֶת-לִבּוֹ וַיִּחַר לוֹ עַל-אָבִיו עַל-הַדְּבָרִים אֲשֶׁר דִּבֵּר.
יה. כִּי הָיְתָה הָאִשָּׁה בָרָה וְנֶחְמָדָה מְאֹד טוֹבַת תֹּאַר וַעֲנָוָה וְנַפְשָׁה תְּמִימָה כְיַלְדָּה וְיוֹרָם אֲהֵבָהּ.
יו. וַיְצַו אוֹתָהּ יוֹרָם וַתֵּשֶׁב הָאִשָּׁה עִמּוֹ כִלְבָבוֹ.
יז. וַיִּקַּח לוֹ פִילַגְשִׁים עַל-אִשְׁתּוֹ אוּלַי תְּחַיּיֶנָה בוֹ זָרַע.
יח. וּבְהַרְבּוֹתוֹ אֶת-פִּילַגְשָׁיו וְלֹא יָלְדוּ גַם הֵנָּה זוּלָתִי הָאַחַת וַתֵּלֶד לוֹ בֵן.
יט. וְיוֹרָם עֹיֵן אוֹתָה וְאֶת-הַיֶּלֶד אֲשֶׁר יָלְדָה לוֹ.
כ. וְהָאִשָּׁה אִשָּׁה כַשְׂדִית אֲשֶׁר מִמַחֲרַפְתָא אֲשֶׁר בְּאֶרֶץ כַּשְׂדִּים.
כא. וַיְהִי לִתְקוּפַת הַיָמִים וַיִמְצָאוּהָ אוֹתָהּ עִם-מְנַאֲפָהּ וַיּוֹצִיאוּהָ אֶל-מִחוּץ לָעִיר וַיִּסְקְלוּהָ בַאֲבָנִים לְנֹכַח פְּנֵי אֱלֹהִים כִּי זָנְתָה תַחַת אִישָׁהּ.
כב. וְאֶת-הַיֶּלֶד אֲשֶׁר יָלְדָּה הֶעֱבִיר יוֹרָם וְלֹא יָסַף לְדַעְתּוֹ כָל-הַיָּמִים.
 
ב
א. וּפִינְחָס זָקֵן מְאֹד בָּא בַיָּמִים וַיִתְעַצֵּב אֶל-לִבּוֹ עַל-בְּנוֹ כִּי הִכְבִּיד יוֹרָם אֶת-לִבּו.
ב. וַיְהִי כִּי מָרָה רוּחוֹ לוֹ וַיֵּלֶךְ וַיִּשְׁכַּב.
ג. וַיִּישָׁן אֶת-שְׁנָתוֹ וַיַּחֲלוֹם חֲלוֹם.
ד. בַּחֲלוֹמוֹ וְהִנֵּה תְאֵנָה עוֹמֶדֶת בֵּין-הָעֵצִים בְּגַנּוֹ וְהַתְּאֵנָה אֵין-לָהּ עָלִים וְאֵין-לָהּ פְּרִי מַק שָׁרְשָׁה וְכָתוּב עָלֶיהָ עֲקָרָה.
ה. וַיַּחֲלוֹם עוֹד חֲלוֹם שֵׁנִי עַל-הָרִאשׁוֹן וַיַּרְא אֶת-הַתְּאֵנָה וְהִיא עוֹמֶדֶת בְּיוֹם רַעַם וְהַגֶּשֶׁם הוֹלֵךְ וְסֹעֵר וְהִנֵּה נִתְּקוּ כָל-שָׁרָשֶׁיהָ עֲרֻמִּים כֻּלָּם וְלֹא יָכְלָה עוֹד הַתְּאֵנָה לְהִתְחַזֵּק עַל-הַמָּקוֹם אֲשֶׁר הִיא שָׁם.
ו. וּפִינְחָס חֹלֵם בַּשְּׁלִישִׁית וַיַּרְא אֶת-הָעֵץ וֶתִּפּוֹל אֵשׁ עֲקַלָּתוֹן מִן-הַשָּׁמַיִם וַתֹּאכַל אוֹתוֹ כֶּאֱכוֹל הַחַיָּה הַטֹּרֶפֶת אֶת-חַיַּת הַשָּׁלוֹם וְלֹא נוֹתַר מִמֶּנּוּ שְׂרִיד חַיִּים וַיֵּאָכֵל עִם-גִּזְעוֹ.
ז. וַיִּשְׁמַע פִּינְחָס וְהִנֵּה קוֹל קֹרֵא אֵלָיו מִן-הַסְּעָרָה לֵאמֹר: אָנֹכִי הוּא אֱלֹהִים אֲשֶׁר נָתֹן אֶתֵּן וַאֲשֶׁר לָקֹחַ אֶקַּח אָכֵן נִחַמְתִּי כִּי עָשִׂיתִי אֶת-הָאָדָם.
ח. וְהַמַּרְאָה מַרְאָה רִאשׁוֹנָה אֲשֶׁר נִרְאֲתָה לְפִינְחָס כִּי לֹא רָאָה מַרְאָה מֵעוֹדוֹ.
ט. וַיֶּחֱרַד פִּינְחָס חֲרָדָה גְדוֹלָה וַיִּירָא אֶת-אֱלֹהִים וַיְדַבֵּר אֶל-לִבּוֹ לֵאמֹר:
י. הֲלָזֶה זָקַנְתִּי וְשַׂבְתִּי וְאֶת-אֱלֹהִים לֹא יָדַעְתִּי וְאֶת-קוֹלוֹ לֹא שָׁמַעְתִּי בִּלְתִּי הַיּוֹם.
יא. אֲשֶׁר בַּלֵּילוֹת יְחַפְּשֵׂנִי בִּנְדוֹד שְׁנָתִי מֵעֵינַי וְהִבְהִילַנִי בְמַרְאוֹת וּבְחֶזְיוֹנוֹת יְיַסְּרֵנִי.
יב. לְמַעַן הִשָּׁפֵט אִתִּי הָרָעוֹת לְעֻמַּת הַטּוֹבוֹת וְאֶת-עֲדָרַי מוּל זַרְעִי וְשִׁלֵּם לִי כִגְמוּלִי.
יג. וַיְהִי מִמָּחֳרָת בִּהְיוֹת הַבֹּקֶר וַיְצַו פִּינְחָס וַיִּקְרְאוּ לוֹ חֲכָמִים וְיוֹדְעֵי בִינָה לִפְתּוֹר לוֹ אֶת-חֲלוֹמוֹ.
יד. וַיִּרְבּוּ מְאֹד לָבוא וְלֹא מָצָא בָהֶם אִישׁ יוֹדֵעַ חֲלוֹמוֹ לִפְתּוֹר אוֹתוֹ וַיִתְקַצֵּף מְאֹד וַיְגָרְשֵׁם מֵעַל פָּנָיו.
וַיְהִי אַחֲרֵי כֵן וַיְצַו לַעֲשׂוֹת אֶת-קָרְבָּנוֹ לְעֹלָה וְהִגִּישׁוּ קָרְבַּן אָשָׁם וְאֶת-הַחַטָּאת יַעֲשׂוּ בַחֲצֵרוֹ לְכַפֵּר עָלָיו לִפְנֵי אֱלֹהִים.
יו. וְיוֹרָם בָּא מִן-הַדֶּרֶךְ וַיַּרְא אֶת-הַפָּרִים וְאֶת-הַקֳּדָשִׁים אֲשֶׁר בֶּחָצֵר וַיִּתְמַהּ מְאֹד וַיִּגַשׁ אֶל-אָבִיו וַיִּשְׁאַל: מָה אֵלֶּה לְךָ אָבִי?
יז. וּפִינְחָס הָיָה כְנִכְלָם לְעֵינֵי בְנוֹ וַיֵּבוֹשׁ וַיִּתְרַגֵּז וְהוּא חַלָּשׁ וְאֵין אוֹנִים לֹא יְדַבֵּר וְרַק יַפְטִיר בְּשָׂפָה וְיוֹרִיד רִיר כִּי זָקֵן הָאִישׁ מְאֹד.
יח. וְיוֹרָם שָׂם אֶל-לִבּוֹ וַיְדַבֵּר בְּקִרְבּוֹ וַיֹּאמַר: רְאֵה הִנֵּה שָׁב אָבִי וַיְהִי כְּיֶלֶד קָטֹן וְלֹא הִכְלִים אֶת-אָבִיו עוֹד וַיְדַבֵּר אֵלָיו רַכּוֹת כְּדַבֵּר אֶל-הַיֶּלֶד וַיְצַו אֶת-עֲבָדָיו וַיַּעֲבִירוּ אֶת-הַפָּרִים מִן-הֶחָצֵר.
יט. וִימֵי שְׁנֵי חַיֵּי פִינְחָס תִּשְׁעִים שָׁנָה וּשְׁתַּיִם שָׁנִים וַיְהִי שְׂבַע חַיִּים וַיָמָת וַיִּקָּבֵר עִם-אֲבוֹתָיו בְּעֵין-הַפֶּרֶז אֲשֶׁר עִם-הַבְּרֵכוֹת הָאֲחוּזוֹת.
כ. וְאֶת-כָּל רְכוּשׁוֹ הָיָה לִבְנוֹ יְרוּשָׁה עִם-מִסְפַּר כָּל-הָעֲדָרִים וְעִם-מִשְׁקַל כָּל-הַכָּסֶף.
כא. זָהָב וְזָהָב שָׁחוּט וְגַנִּים עִם-כְּרָמִים וְהַשָּׂדוֹת אֲשֶׁר עִם-הַבָּתִּים וּמִחוּץ לַגְּבוּל וְעַל-סְבִיבָיו.
כב. וַיִּסְחַר אֶל-הָאָרֶץ גַּם הוּא כְּכָל-אֲשֶׁר עָשָׂה אָבִיו.
 
ג
א. וַיְהִי בִּהְיוֹת יוֹרָם כְּבֶן-שְׁלשִׁים שָׁנָה וַיָּקָם לִנְסוֹעַ.
ב. וַיִּסַּע יוֹרָם לְמַעַן סַחְרוֹ וַיִדַבֵּר אֶל-אִשְׁתּוֹ וַיֹּאמַר:
ג. רְאִי הִנֵּה אָנֹכִי יוֹצֵא לַדֶּרֶךְ וּבַיוֹם הַשִּׁשִּׁי אָשׁוּב.
ד. וְאַתְּ פֹה שִׂימִי-נָא עֵינֵךְ עַל-כָּל אֲשֶׁר לִי וְלֹא יְבֻלָּע לוֹ וְלֹא יִהְיֶה מַשְׁחִית בִּרְכוּשִׁי.
ה. אַל-תַּאַסְפִי זָר הַבַּיְתָה פֶּן תִהְיֶה בָךְ דִבַּת עָם רָעָה וְאַל-תֹּאמְרִי לְאִישׁ הִנֵּה חַדְרִי.
ו. כִּי-אִם אֶת הָעֲבָדִים צַוִּי וְהֵכִינוּ לְכָל-אִישׁ הַבָּא אֲרֻחָה וְיָשְׁבוּ עִם-הָאֹהָלִים וְהִגִּידוּ לָהֶם כִּי בְשׁוּבִי אֵיטִיב עִמָּם שִׁבְעָתָיִם.
ז. וְאִישׁ כִּי יָסוּר אֵלַיִךְ בִשְׁמִי וְהֵבִיא עִמּוֹ מִכְתָּב אוֹ חוֹתָם וְשָׁאַל מִמֵּךְ לְכָל-מִמְכָּר וְעַל-הַתַּרְבִּית;
ח. וְעָשִׂית לוֹ כְצִדְקָתוֹ אַל תִּגְרְעִי מִמֶּנּוּ מִסַּת שְׂכָרוֹ מְעַט וְאִם הַרְבֵּה כִּי חֹק הוּא לֵאמֹר:
ט. כִּי יַעֲזוֹב אִישׁ בֵּיתוֹ לִהְיוֹת בְּדֶרֶךְ מִשְּׁלשֶׁת יָמִים וָמָעְלָה וְהִפְקִיד הָאִישׁ תַּחְתָּיו אִישׁ אוֹ אִשָּׁה לִהְיוֹת תַּחְתָּיו בְּכָל אֲשֶׁר יִפְנוּ וְלֹא יִהְיֶה שְׁמוֹ לְחַטָּאָה בְקֶרֶב הָאָדָם.
י. וַתַּעַן אִיזֶבֶל וַתֹּאמַר: אֶת-כָּל אֲשֶׁר תְּצַוֵּנִי אֲדוֹנִי אֶעֱשֶׂה.
יא. וְיוֹרָם חִבֵּק לְאִשְׁתּוֹ בְיָדָיו וּבִשְׂפָתָיו כִּי לִבּוֹ עָלֵז בּוֹ וַיִּתְרַפֵּק עָלֶיהָ רֶגַע מְעָט.
יב. וַיָּקָם יוֹרָם אַחֲרֵי כֵן וַיֵּצֵא לְדַרְכּוֹ וַחֲמִשִׁים עֲבָדִים לָקַח עִמּוֹ חֲמֻשִּׁים לְהַסִּיעַ אֶת-הָעֲדָרִים וַיְהִי שָׂמֵחַ וְטוֹב לֵב.
יג. וַיְהִי בַּיוֹם הַשֵּׁנִי בִהְיוֹתוֹ רֹכֵב הוּא וַעֲבָדָיו עַל-שְׂפַת נַחַל פִּשְׁיוֹן וַיָּבֹאוּ עַד-הַמִּדְבָּר.
יד. וְשָׁם לְפָנִים בָּרֵישָׁה עִיר הַגּוֹיִם אֲשֶׁר הִשְׁמִיד אוֹתָהּ אֱלֹהִים מֵעַל פְּנֵי הָאֲדָמָה בְחַטֹּאתֶיהָ.
יה. וַיִפְּלוּ עֲלֵיהֶם הַשּׁוֹדְדִים מִבְּנֵי כַשׁ וַיֶּחְזְקוּ מֵהֶם וַיִּהְיוּ כָל-עֲבָדָיו מַאֲכָל לְפִי חַרְבָּם וַיָּמוּתוּ כֻלָּם בַּחֶרֶב לֹא נִמְלָט מֵהֶם בִּלְתִּי-אִם אֶחָד.
יו. וְיוֹרָם הִתְאַמֵּץ עֲלֵיהֶם וַיִּלָּחֵם בָּם כְּכָל אֲשֶׁר יָכוֹל וַיַּכּוּהוּ וַיִּמְחֲצוּ אֶת-רֹאשׁוֹ וַיְהִי לוֹ פְצָעִים רַבִּים מְאֹד וַיֶּחֲלַשׁ וַיַּאַסְרוּהוּ בִכְבָלִים וַיְנַהֲגוּהוּ אוֹתוֹ וְאֶת-עֲבָדָיו שְׁבִי לִמְכּוֹר אוֹתָם לַעֲבָדִים לָקַחַת כָּפְרָם.
יז. וְיוֹרָם הִתְעַלֵּף וְלֹא יָדַע אֶת-נַפְשׁוֹ וַיְנַהֲגוּהוּ עִמָּם אָסוּר בַּחֲבָלִים.
יח. וַיָּבֹאוּ עַד-מְכָרְיָה הִיא הָעִיר הַגְּדוֹלָה בְכַשְׂדִּים וַיִּמְכְּרוּהוּ לְאִישׁ כַּשְׂדִּי בִשְׁלשֶׁה שְׁקָלִים כֶּסֶף וּשְׁנֵי כְבָשִׂים וַיַּעַזְבוּ אֶת-יוֹרָם בְּיָדוֹ.
יט. וְהָעֶבֶד אֲשֶׁר נִמְלַט מִיַּד הַשּׁוֹדְדִים קָם אַחֲרֵי לֶכֶת הָאֲנָשִׁים כִּי נֶחְבָּא אֶל-מִתַּחַת לְאַבְנֵי הַנָּחַל.
כ. וַיְהִי עִם-לִבּוֹ לָשׁוּב עַד-עֵין הַפֶּרֶז לְסַפֵּר אֶת-כָּל הַמּוֹצְאוֹת אוֹתָם.
כא. וַיָּרָץ הָעֶבֶד הָלוֹךְ וְרוּץ שְׁנֵים עָשָׂר רִיס וְלֹא הוֹסִיף וַיָּרָץ שָׁלשׁ כִּבְרוֹת דֶּרֶךְ וְלֹא הִרְחִיק כִּי פָגַע בּוֹ אֱלֹהִים וַיָּמָת שָׁם בַּמִּדְבָּר.
 
ד
א. וְיוֹרָם הָיָה עֶבֶד בְּאֶרֶץ כַּשְׂדִּים וַיְדַבֵּר בְּאָזְנֵי אֲדוֹנָיו אֲשֶׁר קָנָה אוֹתוֹ וַיֹּאמַר:
ב. בִּי אֲדוֹנִי הִנֵּה אָנֹכִי לְךָ לֹא לְעֵזֶר וְלֹא לְהוֹעִיל לָכֵן לוּ שְׁמַעְתַּנִי וְשָׁלַחְתָּ אֶל-אַרְצִי אֱל-אִשְׁתִּי וְלָקְחָה אִשְׁתִּי מֵרְכוּשִׁי כְּכָל אֲשֶׁר יִיטַב בְּעֵינֶיךָ וְנָתְנָה פִדְיוֹן נַפְשִׁי.
ג. וֵאלֹהִים הִטָּה אֶת-לֶב-הַכַּשְׂדִּי וַיִּיטַב הַדָּבָר בְּעֵינָיו וַיְצַו אֶת-בֶּן-אָחִיו לָצֵאת לַדֶּרֶךְ לְאֶרֶץ יִשְׂרָאֵל לְבַעֲבוּר יִפְדוּ אֶת-יוֹרָם וַיָּשֶׂם הָאִישׁ נְעָלִים בְּרַגְלָיו וְשִׂמְלַת דֶּרֶךְ שָׂם עַל-בְּשָׂרוֹ.
ד. וַיְצַו וַיָּבִיאוּ לוֹ אֶת-מִבְחַר בַּהֲמוֹתָיו וַיֵּשֶׁב עַל-אֲתוֹנוֹ וַיִסַּע יוֹם וָלָיְלָה.
ה. הוּא בַדֶּרֶךְ וַיָּבֹא עַד-הַמָּקוֹם אֲשֶׁר יִקְרְאוּ לוֹ בָא-דָגוֹן אֲשֶׁר עִם-מְסִלַּת הַסּוֹחֲרִים הָעֹלָה מִדְיָנָה וַיָּקֶם עָלָיו אֱלֹהִים רוֹצֵחַ וַיִּפְגַּע בּוֹ אֱלֹהִים בַּמָּקוֹם הַזֶּה וַיַּכֵּהוּ אָרְצָה וְלֹא יָסַף עוֹד לָבוֹא אִם לְפָנִים וְאִם לְאָחוֹר.
ו. וַיְהִי בִּמְלֹאת הַיָּמִים אֲשֶׁר עַל-בֶּן-אֲחִי הַכַּשְׂדִּי לָשׁוּב לִמְכָרְיָה עִם-כֹּפֶר הַפִּדְיוֹן וְלֹא שָׁב;
ז. וַיִּפָּלֵא הַדָּבָר בְּעֵינֵי הַכַּשְׂדִּי וַיְצַו וַיָבִיאוּ אֶת-יוֹרָם לְפָנָיו לְמַעַן חָקְרוֹ וַיְדַבֵּר אֵלָיו קָשׁוֹת כִּי מָלֵא חֵמָה וַיֹּאמֶר אֵלָיו: רַק הֵתַלְתָּ בִּי.
ח. וּפְנֵי יוֹרָם חָוְרוּ מִמָּוֶת וַיִּפּוֹל עַל-פָּנָיו אַרְצָה וַיִּקְרָא: אֲדוֹנִי אֲדוֹנִי.
ט. וְאַחַר כֵּן קָם וַיְצַדֵּק נַפְשׁוֹ בְעֵינֵי אֲדוֹנוֹ וַיֹּאמַר: לֹא כִּי אַרְיֵה טְרָפוֹ אוֹ שׁוֹדֵד שְׁבָהוּ אוֹ מִקְרֶה הוּא לָכֵן הִתְמַהְמֵהַּ.
י. שְׁלַח לְךָ עוֹד אֶחָד אֶל-אַרְצִי אַל תַּקְשֶׁה אֶת-לִבְּךָ לְבַעֲבוּר יְמַלֵּט אֱלֹהִים אֶת-נַפְשְׁךָ מִצָּר וְלֹא תִהְיֶה בְךָ רָעָה.
יא. וְהַכַּשְׂדִּי הִטָּה אֶת-לִבּוֹ וַיֵּאוֹת לוֹ גַם-הַפַּעַם כִּי נָתַן אֱלֹהִים בְּלִבּוֹ גַם אֶת-זֶה וְגַם אֶת-זֶה אִם לַעֲשׂוֹת וְאִם לַחֲדוֹל וַיִּבְחַר לַעֲשׂוֹת וַיְצַו אֶת-אֶחָד מֵעֲבָדָיו לִהְיוֹת נָכוֹן לַדָּרֶךְ.
יב. וְהָעֶבֶד שִׁנֵּס אֶת-מָתְנָיו וַיָּקָם וַיֵּלַךְ.
יג. וַיְהִי כִּרְאוֹת אֱלֹהִים אֶת-עֶבֶד הַכַּשְׂדִּי בַדֶּרֶךְ וַיַּחֲמוֹל עָלָיו וַיָּחָס עַל-הַדָּם הַנִּשְׁפָּךְ וַיְרַחֲמֵהוּ.
יד. וַיְצַו אֱלֹהִים אֶת-אֶחָד מִמַּלְאָכָיו וַיֹּאמֶר אֵלָיו: לֵךְ רֵד מִן-הַשָּׁמַיִם הָרָמִים וְצֵא אֶת-שִׁבְעַת שַׁעֲרֵי הַבַּרְזֶל וַיְצַוֵּהוּ אֶל-הָעֶבֶד לְחַכּוֹת לוֹ בְלֶכְתּוֹ.
יה. וַיְהִי כַּעֲבוֹר הָעֶבֶד בַּדֶּרֶךְ וַיַּרְא וְהִנֵּה מַלְאַךְ אֱלֹהִים עוֹמֵד עַל-אֵם הַדֶּרֶךְ בַמִּדְבָּר.
יו. וְהַמַּלְאָךְ נִצָּב בְּלַהַב אֵשׁ לָבוּשׁ לְבוּשׁ חשֶׁךְ וְלִבְנַת עֵינָיו כְּלִבְנַת כּוֹכְבֵי בֹקֶר.
יז. וַיִּקְרָא הַמַּלְאָךְ מִן-הַלֶּהָבָה אֶל-הָעֶבֶד וַיֹּאמַר: לֵךְ שׁוּב כְּרֶגַע אֶל-הַמָּקוֹם אֲשֶׁר יָצָאתָ.
יח. וְהָעֶבֶד נָפַל עַל-בִּרְכָּיו בַּאֲשֶׁר עָמַד וַיִּפְרוֹשׂ אֶת-כַּפָּיו אֶל-הַמּוֹרָא הַגָּדוֹל וַיַּרְא אֶת-מוֹתוֹ לְנֶגְדּוֹ.
יט. וַיֹּאמַר: הִנֵּה לֹא יְדַעְתִּיךָ אֲדוֹנִי וַאֲנִי פֹּה בַדֶּרֶךְ לָבוֹא כְנַעֲנָה אֶרֶץ הַדָּרוֹם כִּי שָׁלֹחַ שְׁלָחוּנִי לִפְדּוֹת מִשִּׁבְיוֹ אִישׁ יְהוּדִי אֲשֶׁר בְּכַשְׂדִּים.
כ. וּמַלְאַךְ אֱלֹהִים בְּעָמְדוֹ הִגְדִּיל נוֹרְאוֹתָיו כִּי חָרָה לוֹ וַיַּעַט אֶת-הַלֶּהָבָה כִמְעיל לוֹ סָבִיב וְלֹא נוֹתַר מִמֶּנּוּ בִּלְתִּי-אִם שֶׁטֶף הַלַּהַב.
כא. וַיִּקְרָא הַמַּלְאָךְ מִן-הַלַּהַט בְּקוֹל גָּדוֹל שִׁבְעָתַיִם מִבָּרִאשׁוֹנָה וַיִּצְעַק: הֲתֹאמַר בְּלִבְּךָ לַעֲצוֹר אֶת-רֶגֶל אֱלֹהִים עַל-דֶּרֶךְ אֱלֹהִים? שׁוּב אֶל-הַמָּקוֹם אֲשֶׁר מִמֶּנּוּ בָאתָ.
כב. וַיֶּחֱרַד הָעֶבֶד חֲרָדָה גְדוֹלָה וַיָּקָם וַיִּפֶן עַל-עֲקֵבָיו וַיָּשָׁב בַּדֶּרֶךְ אֲשֶׁר בָּא.
כג. וּבְשׁוּבוֹ אַרְצָה כַשְׂדִּים וַיָּבוֹא לִמְכָרְיָה אֶל-בֵּית אֲדוֹנָיו וַיִּתְמְהוּ אֵלָיו כָּל-יוֹדְעָיו מִלְּפָנִים.
כד. נֶאֱלָם פִּיו מִדַּבֵּר וְאָזְנָיו נֶאֶטְמוּ מִשְּׁמוֹעַ אֲשֶׁר לֹא יָבוֹא בוֹ הַדִּבֵּר וְלֹא יֵצֵא מִמֶּנוּ.
כה. וַיְהִי כִּי הֱבִיאוּהוּ לִפְנֵי הַכַּשְׂדִּי לַעֲנוֹת אוֹתוֹ עַל-דְּבַר דַּרְכּוֹ וְעַל-פְּקֻדָּתוֹ אֲשֶׁר הִפְקִיד עָלָיו וַיַּרְא וְהִנֵּה הוּא מְשַׂחֵק כַּאֲשֶׁר יְשַׂחֵק הַמְּשֻׁגָּע וְלֹא יָדַע לְדַבֵּר.
כו. אָז יַכִּיר יוֹרָם יַד מִי הָיְתָה נֶגְדּוֹ וַיְהִי דּוּמָם לְנֹכַח אֱלֹהִים וַיָּחֶל לַעֲבוֹד אֶת-אֲדוֹנָיו אֶת-קוֹנֵהוּ וַיַּעַבְדֵהוּ בַעֲנָוָה וַיְהִי לוֹ לְעֶבֶד נֶאֱמָן.
כז. וַיְשִׂימֵהוּ אֲדוֹנוֹ עַל-הָעֲבָדִים וְעַל-מְשָׁרְתָיו בַּגַּנִים וְגַם אֲשֶׁר בַּכְּרָמִים וּלְפָקִיד לְכָל-אֲנָשָׁיו אֲשֶׁר בְּבָתָּיו.
כח. וְשַׂעֲרַת רֹאשׁ יוֹרָם הִלְבִּינָה בְטֶרֶם יַעַבְרוּ כְמִשְׁלושׁ חֳדָשִׁים.
כט. וּשְׁנֵי יְמֵי עַבְדּוּתוֹ חָמֵשׁ שָׁנִים וּבַשָּׁנָה הַשִּׁשִּׁית וַיָּמָת אֲדוֹנוֹ הַכַּשְׂדִּי וַיַּנְחֵל אֶת-כָּל רְכוּשׁוֹ אַחֲרָיו לִבְנוֹ וְאֶת-כָּל אֲשֶׁר הָיָה לוֹ.
ל. וַיְצַו אוֹתוֹ בְטֶרֶם מוּתוֹ לְשַׁלַּח חָפְשִׁי מִן-הָעֲבָדִים אֶת-הָאֲנָשִׁים אֲשֶׁר עָבְדוּ אוֹתוֹ בֶאֱמוּנָה וַיְהִי גַּם יוֹרָם אֶחָד מֵהֶם.
לא. וַיָּקָם יוֹרָם לָשׁוּב אֶל-אַרְצוֹ.
לב. וַיַּעֲמוֹס יוֹרָם אֶת-כָּל אֲשֶׁר לוֹ עַל-אֲתוֹנוֹ שְׁנֵי סַלִּים מִיְמִינָהּ וּמִשְּׂמֹאלָהּ אֲשֶׁר עִם-יְדוֹת הַכָּר.
לג. וַיָּשֶׂם מִשְּׂמֹאל אֶת-לְבוּשׁ הַכָּבוֹד עִם-חֶרֶב קְטַנָּה וְעִם מִשְׁחַת שֶׁמֶן בַּחֲצִי הַשֶּׁקֶל וּשְׁלשָׁה אֲבַטִּיחִים שָׂם מִיָּמִין וְהֵם נְבוּבִים מְלֵאֵי מַיִם וּמְעַט צֵדָה לַדֶּרֶךְ לָקַח עִמּוֹ וַיֵּצֵא לְדַרְכּוֹ מִקֵּץ שֵׁשׁ שָׁנִים תְּמִימוֹת.
לד. וְהַדֶּרֶךְ דַּרְכּוֹ אֲשֶׁר הָלַךְ בָהּ עִם-חֲמִשִּׁים עֲבָדָיו הַחֲמֻשִּׁים מַסִּיעֵי בַהֲמוֹתָיו וְהֵם הָלְכוּ הָלוֹךְ וְשׁוֹרֵר מֵאַחֲרֵי חֲמֵשֶׁת הָעֲדָרִים.
לה. וֵאלֹהִים הִבִּיט אֵלָיו מִדֵּי לֶכְתּוֹ בְדַרְכּוֹ הָלוֹךְ וְנָסֹעַ יוֹם וְלַיְלָה וַיְהִי אֱלֹהִים מְחַכֶּה לוֹ עִם-הַיָּרֵחַ דּוּמָם וְעִם-הַשָּׁמֶשׁ.
 
ה
א. וַיְהִי כִּי קָרַב יוֹרָם אֶל-אֲחֻזָּתוֹ וְלֹא הָיָה בֵינוֹ וּבֵין-בֵּית אֲבוֹתָיו בִּלְתִּי-אִם כִּמְטַחֲוֵי אֶבֶן וַיִּפּוֹל עָלָיו רוּחוֹ וַיְהִי הָעֶרֶב מִסָּבִיב.
ב. וּבְיוֹרָם לֹא קָם רוּחַ לָבוֹא אֶל-שַׁעַר בֵּיתוֹ פְנִימָה וַיֵּשֶׁב מִחוּץ עַל-אַבְנֵי הַגְּדֶרֶת אֲשֶׁר אֶל-הַבְּרֵכוֹת וַיִּרְעַד מֵרִפְיוֹן יָד.
ג. וְגַם אֲשֶׁר נֵעוֹר רוּחַ הַלַּיְלָה לַעֲלוֹת מִן-הַנְּחָלִים וַיִּרְעַד כָּל-בְּשָׂרוֹ.
ד. וַיְהִי בְּטֶרֶם לַיְלָה וְהַנָּשִׁים יָצְאוּ מִן-הַבָּתִּים אֶל-הַבְּרֵכוֹת לִשְׁאוֹב מַיִם וַיַּכִּירֵן וְאֶת-הַיְלָדִים אֲשֶׁר עִמָּהֶן לֹא הִכִּיר.
ה. וַאֲחָדוֹת מִן-הַנָּשִׁים רָאוּהוּ וַתְּדַבֵּרְנָה אִשָּׁה אֶל-אֲחוֹתָהּ לֵאמֹר: רַק אֵין זֶה כִּי-אִם אִישׁ נָכְרִי הוּא כִּי כָכָה עָנָה בוֹ לְבוּשׁוֹ וַתִּתֵּנָה לוֹ לִשְׁתּוֹת מִדָּלְיָן וַתַּשְׁקֶינָה אֶת-בְּהֶמְתּוֹ.
ו. וַאֲחָדוֹת לֹא נָתְנוּ אֵלָיו לֵב וַאֲחָדוֹת הִרְבּוּ לַהַג וַתַּעֲשֶׂינָה לָהֶן צְחוֹק וְהוֹלֵלוֹת אִשָּׁה עִם-רְעוּתָהּ כַּאֲשֶׁר תַּעֲשֶׂינָה הַנָּשִׁים הַבָּאוֹת אֶל-הַבְּאֵרוֹת וְלֹא הָיְתָה בָהֶן אִשָּׁה אֲשֶׁר הִכִּירָה אוֹתוֹ.
ז. וְיוֹרָם הָיָה נָבוּךְ וַיְדַבֵּר אֲלֵיהֶן כַּשְׂדִּית וַיִּשְׁאַל לְאִשְׁתּוֹ וְהֵן לֹא הֵבִינוּ לוֹ וְלִדְבָרָיו.
ח. וְאִשָּׁה יָצְאָה מֵאַחַד הַבָּתִּים לִשְׁאוֹב מַיִם וַתִּגַשׁ אֶל-יוֹרָם וַתֹּאמֶר אֵלָיו: קוּם הָאִישׁ וּבָאתָ בְּצֵל קוֹרָתִי וְרָחַצְתָּ אֶת רַגְלֶיךָ וְהָיָה לְעֵת בֹּקֶר וְהָיִיתָ נָכוֹן לְדַרְכְּךָ כִּי עָיֵף אָתָּה.
ט. וְיוֹרָם רָאָה בְעֵינָיו אֶת-נַחֲלַת אֲבוֹתָיו וְהִנֵּה זָרִים יִתְּנוּ לוֹ בָהּ מָקוֹם לָלוּן וַיֵּצַר לוֹ וַיּוֹרֶד עֵינָיו אֶל-הַמַּיִם אֲשֶׁר הוּא יוֹשֵׁב עֲלֵיהֶם וַיַּבֵּט בַּמַּיִם אֶת-שִׂמְלָתוֹ וְאֶת-תֹּאַר פָּנָיו.
י. וְאֶת-הָאִשָּׁה אֲשֶׁר קָרְאָה לוֹ לֹא עָנָה דָבָר.
יא. וַתְּדַבֵּרְנָה הַנָּשִׁים אֵלֶיהָ וַתֹּאמַרְנָה: מַה-לָּךְ כִּי תְדַבְּרִי בוֹ הֲטֶרֶם תִּרְאִי אֶת-בְּגָדָיו אֲשֶׁר נָכְרִי הוּא וְאֶת-לְשׁוֹנֵךְ לֹא יִשְׁמַע כִּי אֵינֶנּוּ עִבְרִי וַתֵּלַכְנָה אֶל-בָּתֵּיהֶן אִשָּׁה עִם-דָּלְיָהּ.
יב. וְיוֹרָם עוֹדֶנּוּ מַבִּיט אֶל-בֵּיתוֹ מִנֶּגֶד בְּהָחֵל הָעֲלָטָה מִסָּבִיב וַיֶּחֱרַד כִּי לֹא הִכִּיר אֶת-בֵּיתוֹ מֵאָז.
יג. כִּי גֹרֶן הָיָה תַחַת גַּן הַתְּאֵנָה וְתַחַת הַכֶּרֶם שָׂדֶה לֹא עֻבָּד.
יד. וַיָּקָם וַיִּגַּשׁ אֶל-הַמָּקוֹם וְלֹא מָצָא אֶת-הַשַּׁעַר אֲשֶׁר בָּנָה כִּי כִסּוּ סִבְכֵי חָרוּל אֶת-מְבוֹא הַדֶּרֶךְ וַיַּעַל מִמֶּנּוּ רֵיחַ פְּרָחִים עָז וַיִּמָּלֵא לִבּוֹ פַחַד וְרוּחַ עִוְעִים וַיַּקֵּף אֶת-הַבַּיִת וַיֵּלֶךְ סָבִיב.
יה. וּבְלֶכְתּוֹ וַיְהִי כְּגַנָּב בְּעֵינָיו וַיָּבוֹא אֶל-הֶחָצֵר הַתַּחְתּוֹנָה לְבַקֵּשׁ אֶת-הַדֶּלֶת וְלֹא מָצָא אוֹתָהּ.
יו. וַיִּמְצָא נָתִיב בֵּין-עַנְפֵי הַסֻּכּוֹת וַיֵּלֶךְ לְאוֹר הַיָּרֵחַ וְהוּא לֹא יָדַע אֶת-הַנָּתִיב מֵאָז וַיָּבוֹא שָׁמָּה.
יז. וַיְהִי בְּהִתְהַלְּכוֹ בַחשֶׁךְ וַיִּכָּשֵׁל בַּסְּבָכִים וַיַּרְא אִשָּׁה עִם-אוֹר הַלְּבָנָה וְהִיא נוֹצֶצֶת בִּיקָר אַרְגָּמָן וַאֲבָנֶיהָ וּזְהָבָהּ נוֹתְנִים קוֹל כְּצֶלְצְלִים לְמֵרָחוֹק.
יח. וְהָאִשָּׁה בִרְאוֹתָהּ אוֹתוֹ וְאֶת-לְבוּשׁ הַנָּכְרִי אֲשֶׁר עַל-בְּשָׂרוֹ וְלֹא הִתְחַלְחְלָה מִפָּנָיו כִּי-אִם הָלְכָה בַלָּט לְעֻמַּת בֵּיתָהּ וַתִּקְרוֹץ לוֹ בְעֵינֶיהָ.
יט. וְיוֹרָם הֵבִין כִּי אִשָּׁה זוֹנָה הִיא כִּי הִכִּיר אֶת-רוּחַ נַאֲפוּפֶיהָ בְסַמֵּי מִשְׁחָתָהּ וּבְרֵיחַ שִׂמְלוֹתֶיהָ וַיָּגֶל לִבּוֹ בוֹ בָרֶגַע הַהוּא.
כ. וַיֶּחֱרַץ בְּלִבּוֹ לִשְׁאוֹל אֶת-הַזְּקֵנִים מִמָּחֳרַת הַיּוֹם לְהַגִּיד לוֹ אֶת-מְקוֹם אִשְׁתּוֹ.
כא. כִּי הֵבִין יוֹרָם אֲשֶׁר מָכֹר מָכְרָה אִיזֶבֶל אֶת-נַחֲלָתוֹ וַיְהַלְּלֶנָּה בְלִבּוֹ עַל-זֹאת כִּי יָדַע כִּי יִבָּצֵר מִמֶּנּוּ לָשֶׁבֶת עוֹד בַּמָּקוֹם הַזֶּה בְּבֵית אֲבוֹתָיו אַחֲרֵי כָּל-הַדְּבָרִים אֲשֶׁר הָיוּ.
כב. וְיוֹרָם אָמַר אֶל-לִבּוֹ: אֶעֱשֶׂה-נָא לִי חַג הַפַּעַם וְאֵיטִיב אֶת-לִבִּי אַחֲרֵי הָרָעָה וְאָסּוךְ אֶת-רֹאשִׁי בְשֶׁמֶן וְאֶשְׁכַּב עִם-הָאִשָּׁה הַזֹּאת וַיֵּלֶךְ וַיִּגַּשׁ אֵלֶיהָ.
כג. וְהָאִשָּׁה הִפְנְתָה אֶת-רֹאשָׁהּ אֲחֹרַנִּית אֵלָיו וַתִּרְזוֹם לוֹ בְעֵינֶיהָ וַתְּמוֹלֵל בְּיָדֶיהָ כְּבָרִאשׁוֹנָה וַתִּשְׂחַק בְּקוֹל וְאֶל-הַבַּיִת קָרְאָה אֶל-שִׁפְחוֹתֶיהָ לְהָבִיא אֶת-הַמְּנוֹרוֹת וַתַּעֲמוֹד בְּפֶתַח הַשַּׁעַר בַּחֹשֶׁךְ וַתְּחַכֶּה לוֹ וְלַמְּנוֹרוֹת.
כד. וְיוֹרָם נִגָּשׁ אֵלֶיהָ הַשָּׁעְרָה וַיִּתְרַפֵּק עָלֶיהָ וַיְחַבֵּק אֶת-שׁוֹקֶיהָ וְאֶת-שָׁדֶיהָ וַתִּמְסוֹךְ בְקִרְבּוֹ אֶת-עַגְבַת פִּיהָ כִּנְרָדִים לֹהֲטִים.
כה. אָז תָּבֹאנָה שְׁתַּיִם שְׁפָחוֹת וּמְנוֹרוֹת בְּיָדֵיהֶן לְהָאִיר לָהֶם וַיַּכֵּר יוֹרָם וְהִנֵּה הִיא אִשְּׁתּוֹ אִיזֶבֶל בַּת-זַכְרִי וְהִיא אִשָּׁה זוֹנָה.
כו. וְהוּא בֵּין-זְרוֹעוֹתָיו יְחַבְּקֶנָּה בְּבֵית אֲבוֹתָיו מִקְצֵה הַשָּׁנָה הַשִּׁשִּׁית לְצֵאתוֹ.
 
ו
א. וְהָאִשָּׁה הִכִּירָה אֶת-אִישָׁהּ כִּי יוֹרָם הוּא וַתֵּפֶן מִמֶּנּוּ לְאָחוֹר וַתִּסּוֹב עַד-הַקִּיר.
ב. וְיוֹרָם נָתַן אוֹת לַשְּׁפָחוֹת הַמְבִיאוֹת אֶת-הַמְּנוֹרוֹת לָלֶכֶת מִשָּׁם וְלַעֲזוֹב אוֹתוֹ עִם-אִשְׁתּוֹ לְבַדּוֹ וְהַשְּׁפָחוֹת הִבִּיטוּ אִשָּׁה בִפְנֵי אֲחוֹתָהּ וְאַחַר כֵּן בִּפְנֵי הָאִשָּׁה.
ג. וְגַם בְּיוֹרָם הִבִּיטוּ עַל-דְּבַר אֲשֶׁר הָיָה לָהֶן לִמְצַוֶּה.
ד. וְהָיוּ כְמוֹ עֵגֶל בְּבֹאוֹ עַד-פָּרָשַׁת דְּרָכִים וְהִבִּיט אֶל-הָאִישׁ אֲשֶׁר לַטֶּבַח יוֹבִילֵהוּ וְאֶת-הַדֶּרֶךְ לֹא יֵדַע לִבְחוֹר מִשְּׁתֵּיהֶן וְהָיְתָה הַיִּרְאָה בִשְׁתֵּי עֵינָיו בְּהַבִּיטוֹ.
ה. וְיוֹרָם רָאָה אֶת-יִרְאָתָן וַיִּמְשׁוֹל בְּרוּחוֹ וַיְצַו אוֹתָן שֵׁנִית לָסוּר מִשָּׁם וּלְחַכּוֹת עַד-קָרְאוֹ.
ו. וְהַשְּׁפָחוֹת הֵקַלּוּ בוֹ עֵקֶב אֲשֶׁר דִּבֵּר אֲלֵיהֶן רַכּוֹת וַתִּבְזֶינָה לוֹ וַתִּלְעַגְנָה לֵאמֹר: מִי אַתָּה כִּי תְצַוֵּנוּ עַל-פְּנֵי הָאִשָּׁה רַק אֵין-זֶה כִּי אַתָּה הוּא הַמֶּלֶךְ הַגָּדוֹל אֲשֶׁר עַל-כָּל מַלְכֵי הַצָּפוֹן.
ז. אוֹ פַרְעֹה אַתָּה כִּי כָּכָה תַעֲנֶה בְךָ שִׂמְלָתֶךָ אוֹ אֲדוֹנֵי בָבֶל.
ח. וְיוֹרָם בְּשָׁמְעוֹ כַדְּבָרִים הָאֵלֶּה וַיִּבְעַר בּוֹ אַפּוֹ לְהַשְׁחִית וַיָּרםֶ אֶת-קוֹלוֹ וַיִּצְעָק.
ט. וַיֹּאחַז בַּמְּנוֹרָה אֲשֶׁר בְּיַד הָאַחַת וְהִיא תְלוּיָה בְּטַבְּעוֹתֶיהָ כְמוֹ קָלַע.
י. וַיְרוֹצֵץ יוֹרָם אֶת-גֻלְגָּלְתָּה וְאֶת-מִפְרַקְתָּהּ בַּמְּנוֹרָה עֶשֶׂר פְּעָמִים וַתִּפּוֹל אֲחֹרַנִּית בְּדָמֶיהָ וַתִּשְׁכַּב בְּדָמֶיהָ מְעֻקָּלָה וַתְּהִי מְרֻטָּשָׁה וּמנֻפָּצָה כְּנָחָשׁ רָצוּץ.
יא. וַתְּהִי הַדְּמָמָה סָבִיב וַיְדַבֵּר אֶל-הַשִּׁפְחָה הָאַחֶרֶת וַיֹּאמַר: הִנֵּה אָתוֹן עוֹמֶדֶת בַּחוּץ אֵצֶל הַבְּרֵכוֹת הָאֲחוּזוֹת.
יב. צְאִי וְהֵבֵאתִהָ אֶל-הָאֻרְוָה וּפָקַדְתְּ עַל-אַחַד הַנְּעָרִים וְרָחַץ אוֹתָהּ אַחֲרֵי מוֹסְרוֹתֶיהָ אַחֲרֵי לֶכְתָּהּ בַּדֶּרֶךְ וְנָתַן לָהּ מִסְפּוֹא.
יג. וְהַּשִּׁפְחָה רָאֲתָה כִּי נִמְלְטָה מִמָּוֶת וַתֶּחֱרַד לְנַפְשָׁהּ וַתְּמַהֵר הַחוּצָה כַּאֲשֶׁר אָמָר וְיוֹרָם יָשַׁב עַל-הַמִּפְתָּן בְּסַף בֵּיתוֹ בַחשֶׁךְ לְבִלְתִּי רְאוֹת פְּנֵי אִשְׁתּוֹ וְהוּא עֹבֵר נוֹדֵד בַּמִּדְבָּר אֲשֶׁר בְּנַפְשׁוֹ כִּי לֹא רָאָה בְנַפְשׁוֹ בִלְתִּי-אִם שִׁמֲמוֹת מִדְבָּר.
יד. וְאַחַר הֵחֵל לְדַבֵּר אֶל-אִשְׁתּוֹ וַיֹּאמַר: רְאִי הִנֵּה אָנֹכִי יָצָאתִי לַדֶּרֶךְ נָקִי הָיִיתִי לִפְנֵי אֱלֹהִים וְלֹא עָוֶל בִּי לִפְנֵי אָדָם.
יה. וְאוֹתֵךְ צִוִּיתִי תַחְתַּי בַּבַּיִת הַזֶּה וּבְכָל נַחֲלָתִי כְּחֻקַּת הַהוֹלֵךְ בַּדֶּרֶךְ כִּי הָיִיתִי בַדֶּרֶךְ מִשְּׁלשֶׁת יָמִים וָהָלְאָה.
יו. וְעַתָּה זֶה שַׁבְתִּי וְאָנֹכִי תָמִים עִם-נַפְשִׁי וּלְנֶגֶד אֱלֹהִים אֵין בִּי דֹפִי.
יז. וּמִמֵּךְ לֹא דָרַשְׁתִּי דָבָר בִּלְתִּי-אִם אֶת-עֵדוּת פִּיךְ עֵקֶב אֲשֶׁר הִפְקַדְתִּיךְ תַחְתַּי לְמַעַן תּוּכְלִי לְהִתְיַצֵּב עִמִּי בַמִּשְׁפָּט וּלְמַעַן תִּהְיֶה לָךְ צְדָקָה לְנֹכַח אֱלֹהִים.
יח. וְהָאִשָּׁה צִדְּקָה אֶת-נַפְשָׁהּ וַתֹּאמַר: מִי אָתָּה.
יט. וְיוֹרָם אָמַר בְּלִבּוֹ: רַק אֵין-זֶה כִּי-אִם בִּלַּע הַפַּחַד אֶת-בִּינָתָה וַיַּעַן אוֹתָה וַיֹּאמַר: אָנֹכִי יוֹרָם בֶּן-פִּינְחָס בַּעֲלֵךְ אֲשֶׁר אֵרַשׂ אוֹתֵךְ לוֹ בֶאֱמוּנָה.
כ. וַתּוֹסֶף הָאִשָּׁה וַתַּעַן אוֹתוֹ מִן-הַחֲשֵׁכָה לֵאמֹר: רַק שֶׁקֶר תְּדַבֵּר כִּי לֹא יָדַעְתִּי בַּעַל אֲשֶׁר אֹמַר: הָיִיתִי לוֹ לְאִשָּׁה. אֲבָל אִם כִּדְבָרֶיךָ כֶּן-הוּא כִּי-עַתָּה קְרָא-נָא לְבִנְךָ אוּלַי יָבוֹא הַבַּיְתָה וְעָזַר לְךָ גַּם הוּא אַחֲרֵי דִבְרֵי הָאָלָה וְעָנָה בִי אֶת-כַּחֲשִׁי.
כא. וְיוֹרָם נֶאֱלַם פִּתְאֹם מִדַּבֵּר וַיְהִי לוֹ לַיְלָה בְלִבּוֹ וַיָּקָם וּבְשָׂרוֹ כָבֵד וְהָאִשָּׁה הוֹסִיפָה וַתִּצְעַק: הִנְנִי בְיָדְךָ לַעֲשוֹת בִּי כְּכָל אֲשֶׁר עָשִׂיתָ בְּשִׁפְחָתִי. לֹא בְיַד בַּעֲלִי נִתַּתִּי כִּי-אִם בְּיַד רוֹצֵחַ, לֹא בְיַד אֲדוֹנִי הָסְגַּרְתִּי כִּי-אִם בְּיַד זָר, אֵין לִי בִטְחָה מִלְּפָנֶיךָ בִּלְתִּי-אִם כְּכָל אֲשֶׁר הָיְתָה לְשִׁפְחָתִי.
כב. כִּי הִנֵּה אֵין לִי מִמְּךָ בֵּן.
כג. וַיְהִי כִּשְׁמוֹעַ יוֹרָם אֶת-הַדְּבָרִים הָאֵלֶּה וַתֶּחֱשַׁק נַפְשׁוֹ פִתְאֹם לִרְאוֹת גַּם פָּנֶיהָ בְּדַבְּרָהּ וְנֵר אַיִן וַיִפֶן וַיֵּצֵא.
כד. וַיָּרָץ אַחֲרֵי הַשִּׁפְחָה אֶל-הַסֻּכָּה וַיְצַוֶּנָּה לָשׁוּב לְהָבִיא אֶת-הַמְּנוֹרָה וְהַשִׁפְחָה יָרְאָה וַתֹּאמַר: בִּי אֲדוֹנִי חוּסָה עָלַי רְאֵה הִנֵּה בְהֶמְתְּךָ רְעֵבָה וְגֹעָה עַד לְמֵרָחוֹק.
כה. וְיוֹרָם עָנָה וַיֹּאמַר: תִּרְעַב בְּהֵמָה עַד-מָוֶת וְאַל-תָּמוֹת נַפְשִׁי לְשַׁחַת וַיִּקַּח אֶת-הַמְּנוֹרָה מִיָדָהּ.
כו. וַיָּשָׁב וַיָּבֵא אֶת-הַמְּנוֹרָה עַד-פֵּתַח הַשַּׁעַר וַיָּשֶׂם אוֹתָהּ עַל-וָו וַיַּרְא וְהִנֵּה אִשְׁתּוֹ נִצֶּבֶת אֶל-הַקִּיר וּבוֹכָה אֵינֶנָּה.
כז. כִּי-אִם כְּעֵץ פּוֹרֵחַ הָיְתָה בְקוֹמָתָהּ, בְּנוּיָה כְּמִגְדָּלוֹת, הָדָר מְלֵאָה עִם-מוֹרָא, לְנוֹכָח תַּבִּיט כָּאֳנִיָה בְיוֹם מִלְחָמָה וְשָׁדֶיהָ כְּמִפְרָשִׂים נֶחְמָדִים נְפוֵּחי רוּחַ.
כח. וּבְעָמְדָהּ נִכְחוֹ וַתַּבֵּט בּוֹ לֹא יָדְעָה מָגוֹר וְלֹא הָיוּ תַחֲנוּנִים עִמָּהּ כִּי-אִם קֶצֶף וְהוֹד.
כט. אָז יִפְתַּח יוֹרָם אֶת-פִּיו לֵאמֹר: זַכָּה הָייִת וּטְהוֹרָה לִמְאֹד, צְעִירַת נָשִׁים הָיִית אֲשֶׁר בִּרְחוֹבוֹת יְכַבְּדוּהָ וִירוֹמְמוּהָ בְּקָהָל.
ל. רְמִיָּה לֹא הָיְתָה בְפִיךְ וְלֹא דָבְקָה טֻמְאָה אֶל-נַפְשֵׁךְ, לֹא לְמַעֲנִי עָשִׂית עֵקֶב הֱיוֹתֵךְ עִמִּי כִּי-אִם לְמַעֲנֵךְ, אֶת-שַׂעֲרֵךְ קָלַעַתְּ בַּעֲנָוָה וְלֹא הָיָה הֲדוֹם לָךְ לְמוֹשָׁב אֲשֶׁר לֹא נֶהְפַּךְ בְעֵינַי לְכִסֵּא מְלָכִים.
לא. עָמְדָה הָעֲנָנָה דוּמָם בְּשָׁלְחֵךְ אֶת-יָדֵךְ וְכִי תִשְּׂאִי עֵינַיִךְ לְמֵת וְהֵקִיץ לְחַיִּים. חַי אֲנִי אִם לֹא רִבִּית נִפְלְאוֹתַיִךְ מִנִּפְלְאוֹת נְבִיאֵי אֱלֹהִים.
לב. פָּקַד אֱלֹהִים אוֹתֵךְ לְמוֹפֵת לַהֲפוֹךְ גֵאִים לַעֲנָוִים וְחַלָּשִׁים לַחֲזָקִים לְנַחֵם רְעֵבֵי נֶחָמָה וּלְבַעֲבוּר הֱיוֹת עַל-הָאָרֶץ לֵב נְדִיבוֹת זוּלָתוֹ, נֶפֶשׁ בְּצַלְמוֹ וְדִמְיוֹנוֹ עַל-אֲדָמוֹת, וְאִישׁ לֹא יָהִין לִנְגוֹעַ אֵלָיו.
לג. כִּי-הִנֵּה נְצַרְתִּיךְ עִמִּי כַאֲרוֹן הַבְּרִית הַגְּדוֹלָה מִלִּפְנֵי עֵינֵי אָדָם וּכְקֹדֶשׁ הַקֳּדָשִׁים אֲשֶׁר מִתַּחַת לַכַּפֹּורֶת וַאֲנִי הִנֵּה לֹא קָרַבְתִּי אֵלַיִךְ מֵעוֹדִי לְדַעְתֵּךְ עַד-אִם נָשַׁקְתִּי בָרִאשׁוֹנָה אֶת-רַגְלַיִךְ וְאֶת-בִּרְכַּיִךְ אֶל-פְּנֵי מִטָּתֵנוּ כִּמְלָכוֹת אֶל-פְּנֵי כִסְאָן.
לד. וְכָל-זֹאת עָשִׂיתִי לְמַעַן נַפְשֵׁנוּ אֲשֶׁר לֹא נְטַמֵּא אֶת-נַפְשֵׁנוּ לִפְנֵי אֱלֹהִים וְלִפְנֵי כְבוֹד אֱלֹהִים לִהְיוֹת כִּבְהֵמָה.
לה. רְאִי אִשְׁתִּי הִנֵּה אַתְּ אוֹמֶרֶת אֵלַי: אֵין לִי בֵן מִמֶּךָּ. הֲיֵשׁ אֵפוֹא בֵן לָךְ מִנַּאֲפוּפֵי הַגוֹיִם וּמֵעִגְבֵי שָׂרַיִךְ אֲשֶׁר מָתְנֵיהֶם חֲגוּרִים וּזְקָנָם סוּכָה וְאִם יֵשׁ לָךְ בֵן מִן-הַצָּרַעַת אֲשֶׁר לְרוֹכְבַיִךְ בַסּוּסִים? קוּמִי וַעֲנִי לִי אַל-תִּירָאִי: לָמָּה עָשִׂית זֹאת?
לו. וְהָאִשָּׁה נָשְׂאָה אֶת-עֵינֶיהָ וַתַּבֵּט בּוֹ וַתַּעַן: הִנֵּה מֵרֹאשׁ דִּבַּרְתִּיהָ וְאַף כִּדְבָרֶיךָ כֵּן הוּא: אֵין לִי בֵן מִמֶּךָּ.
לז. וְיוֹרָם עֲזָבָהּ וַיֵּלֶךְ וַיֶאֱסוֹף אֶת-כַּנְפֵי שִׂמְלָתוֹ עַל-פְּנֵי מָתְנָיו וַיַּעַל אֶל-עֲלִיַּת הַקִּיר אֲשֶׁר לְבֵיתוֹ לִשְׁכַּב שָׁם וּלְהִשָּׁפֵט עִם-אֱלֹהִים.
 
ז
א. וַיְּהִי כַּעֲלוֹתוֹ בַּמַּעֲלוֹת וַיַּעֲבוֹר אֶת-הָעֲלִיָּה הָעֶלְיוֹנָה וַיַּחֲטִיאֶנָּה.
ב. וַיַּעַל עוֹד וַיּוֹסֶף לַעֲלוֹת מֵאֲשֶׁר הָיָה עִם-לִבּוֹ וַיָּבֹא הַגָּגָה וְלֹא מָצָא שָׁם מִטָּה כִּי-אִם אֶת-הַמְיַבְּשׁוֹת הָעֲרוּכוֹת שָׁם אֲשֶׁר יוּשַׂם עֲלֵיהֶן עֲנָבִים לְיַבְּשָׁם כְּמִשְׁפָּט.
ג. וַיִּשְׁכַּב עַל-אַחַת הַמְיַבְּשׁוֹת וַתַּעֲלֶינָה הַקּוֹרוֹת בּוֹ וַתַּכְאֵבְנָה לוֹ וַיְהִי כִּדְבַר אֱלֹהִים אֲשֶׁר כָּתוּב:
ד. לֹא יָבֹא יֵין אֲדֹנָי מִן-הַּיֶּקֶב וְלֹא מִקֶּצֶף הָעֲנָבִים הַלַּחִים בַּגִּתּוֹת אֲשֶׁר בְּרַגְלַיִם יִדְרְכוּהוּ נְאוּם אֲדֹנָי.
ה. כִּי-אִם מֵעֲנָבִים יְבֵשִׁים יָזֹק אֶת-יֵינוֹ הַטּוֹב אֲשֶׁר תֹּאַר אֵין לָהֶם וַאֲשֶׁר בּוּז הֵם לַפְּתָאִים נְאוּם אֲדֹנָי.
ו. אֲשֶׁר יֶחְרְבוּ בַשְּׁדֵפָה עַל-אֶשְׁכְּלוֹת הַגֶּפֶן בְּהַאֲרִיךְ הַקַּיִץ וְעַל-הַמְיַבְּשׁוֹת יָנוּחוּ כְמֵתִים וְהָיוּ כְפִגְרֵי חַיִּים, מֵהֶם אָזֹק אֶת-מָתְקִי לְהַשְׁכִּיר נְאוּם אֲדֹנָי אֱלֹהֶיךָ.
ז. וְיוֹרָם שׁוֹכֵב עַל-מִשְׁכָּבוֹ לִדְרוֹשׁ מִשְׁפָּט וַיָּקֶם חַיִץ בֵּינוֹ וּבֵין-אֱלֹהִים לִהְיוֹת מַבְדִיל בֵּינֶיהֶם וַיֹּאמַר:
ח. מֶה-עֲוֹנִי וּבַמָּה חַטָּאתִי כִּי פָקַדְתָּ עָלַי וְהִשְׁמַדְתָּנִי.
ט. וְאִם זַךְ אֲנִי בְעֵינֶיךָ וְאַתָּה כָרַתָּ אֶת-הַבְּרִית עִם-מֹשֶׁה:
י. חַי אֲנִי אִם-תָּנוּס מִפָּנַי וְאִם-כַּנְפֵי שַׁחַר תָּשִׂים לְךָ חַי אֲנִי אִם-תִּטְהָר.
יא. מוֹת הָאֶחָד כְּמוֹת הַשֵּׁנִי, מִשְׁפָּט אֶחָד לָהֶם, וְכָרוֹת הָאֶחָד כִּכְרוֹת הַשֵּׁנִי.
יב. וְאַתָּה אָלִיתָ בְּנַפְשְׁךָ אֶת-אָלוֹת הַבְּרִית אֲשֶׁר לֹא יִכָּרֵת כָּל-בָּשָׂר עוֹד מִמֵּי הַמַּבּוּל וְנִשְׁבַּעְתָּ לְנֹחַ לְבִלְתִּי שַׁחֵת אֶת-אֲשֶׁר עֻשָּׂה.
יג. וְאִם לְנָמֵר הָיִיתָ לְהָקִיא אֶת-בִּלְעֲךָ, הִנְנִי וַעֲשִׂיתִיךָ לְנָמֵר אֲשֶׁר יָשׁוּב לִבְלוֹעַ אֶת-קִיאוֹ.
יד. כִּי בְנַפְשְׁךָ עָרַבְתָּ לִי אֲשֶׁר לֹא תִשָּׁחֵת הָאָרֶץ שֵׁנִית עִם-הַיְּקוּם וְעַד יוֹרָם.
יה. אֲשֶׁר עָרֹב עֲרַבְתַּנִי בִבְרִיתְךָ לְדוֹרוֹת עוֹלָם בְּאוֹת הַקֶּשֶׁת בֶּעָנָן וַאֲשֶׁר הִתְהַלֵּךְ תִתְהַלֵּךְ לְפָנַי בְּקֶרֶב עַמִּי בִצְבָעֶיךָ בֵּין-צִבְאוֹת מַלְאָכֶיךָ וְטָהָרְתָּ.
יו. וְאִם לֹא טָהַרְתָּ וְאֶת-בְּרִיתְךָ הֵפַרְתָּ וְאֶת-שְׁבוּעָתְךָ נִשְׁבַּעְתָּ לַשָּׁוְא:
יז. הִנְנִי וְאֶשְׁבּוֹר בְּמוֹ עֵינַי אֶת-קַשְׁתְּךָ בְּתוֹךְ הֶעָנָן וְאֶמְחֶנָּה מִקֶּרֶב לִבִּי וּבְצִבְאוֹת מַלְאָכֶיךָ אַשֵּׁב בְּרוּחַ פִּי וְהִתְעוֹפְפוּ כְצֶמֶר נוֹצָה רַכָּה וְכָלִיתָ וְנִשְׁמַדְתָּ גַּם אַתָּה כְעֶצֶב רֵיק תַּחַת אֲשֶׁר נִשְׁבַּעְתָּ לַשָּׁוְא וְהֵבֵאתִי עָלֶיךָ מַבּוּל מְעַט גַּם אֲנִי וְנִמְחֵיתָ מֵעַל פְּנֵי הָאֲדָמָה.
יח. וַיְהִי כְּדַבֵּר יוֹרָם וַיִּהְיוּ דְבָרָיו נוֹרָאִים עַד לִמְאֹד וַיִּשְׁמַע אוֹתָם אֱלֹהִים וַיֵצֶר-לוֹ עַל-הַדְּבָרִים הַמָּרִים וַיְצַו לְמַלְאָךְ לֵאמֹר: לֵךְ רֵד אֶל-הָאִישׁ הַכֹּאֵב וְנִחַמְתּוֹ וַיֵּרֶד הַמַּלְאָךְ.
יט. וַיִּתְיַצֵּב הַמַּלְאָךְ בְּפֶתַח הַגָּג לְבוּשׁ כְּנָפַיִם וַתְּהִי עַל-שְׂפָתָיו חֶמְלָה וַיַּבֵּט בּעֵינַיִם קָמוֹת וַתִּהְיֶינָה כְצַלְמֵי עֵינַיִם.
כ. וַיְבָרֶךְ אֶת-יוֹרָם בְּעֵינָיו וַיֹּאמַר: אַל-תִּבְכֶּה בְּרוּךְ אֱלֹהִים וְאַחַר כֵּן פָּנָה וַיֵּלֶךְ כַּאֲשֶׁר בָּא.
כא. וַיּוֹסֶף יוֹרָם לָרִיב אֶל-אֱלֹהִים וַיֶּחֱזַק בִּדְבָרָיו מִבָּרִאשׁוֹנָה וַיְדַבֵּר אֶל-אֱלֹהִים שֵׁנִית וַיֹּאמַר: לֹא כִּי הַרְאֵה הַרְאֵנִי אֶת-עֲוֹנִי עָרֹם וְאֶת-אֶצְבָּעֲךָ שִׂים עַל-חַטָּאתִי וְאֶרְאֶה גַם אָנִי.
כב. אֲשֶׁר אָבַד אָבַד, וְגַם בַּהֲשִׁיבְךָ אֶת-שְׁבוּתִי – אֶת-דְּבַר הָאֲבֵדָה לֹא תִמְחֶה עוֹד; וַאֲשֶׁר מֵת מֵת, וְגַם בְּעוֹרֶרְךָ אֶת-מֵתַי לְחַיִּים – אֶת הַמָּוֶת לֹא תַעֲבִיר עוֹד מִנֶּגְדִּי וְגַם בָּכֹה לֹא אֶבְכֶּה;
כג. כַּאֲשֶׁר בָּכִיתִי בַשִּׁבְיָה לְכָל אֲשֶׁר אָבַד מִמֶּנִּי וְלֹא אֶזְעַק כְּכָל אֲשֶׁר זָעַקְתִּי עַל-יַד הַבְּרֵכוֹת וְכַאֲשֶׁר זָעַקְתִּי בְּפֶתַח שַׁעַר בֵּיתִי כִּי-עַתָּה אֶשְׁכַּב עַל-אַחַת הַמְיַבְּשׁוֹת וְלֹא אוֹסִיף לִבְכּוֹת.
כד. וְלֹא אֶשְׁאַל מְעִמְּךָ דָּבָר בִּלְתִּי רַק כִּי תַרְאֵנִי כִּי בִצְדָקָה וּבְישֶׁר בָּאָה לִי כָל-זֹאת אֲשֶׁר אָבֹד יֹאבַד לִי רְכוּשִׁי וְאִשְׁתִּי וַעֲבָדַי עִם-כָּל מוֹלַדְתִּי וַאֲשֶׁר הָיִיתִי לְאֻמְלָל.
כה. וַאֲשֶׁר בִּצְדָקָה וּבְיֹשֶׁר מֵתוּ הָאֲנָשִׁים אֲשֶׁר רָצַחְתָּ עַל-כָּל דֶּרֶךְ מִדַּרְכֵּי חַיַּי לְמַעַן תָּמוּת בְּנֶחָמָה נַפְשׁי.
כו. וְיוֹרָם נָשָׂא אֶת-עֵינָיו אֶל-פֶּתַח הַגָּג לִרְאוֹת אִם יִתְיַצֵּב הַמַּלְאָךְ לִהְיוֹת לְמֵלִיץ עַל-הָאֱלֹהִים לִפְדּוֹת אוֹתוֹ מִיַּד יוֹרָם וְלֹא יָרַד הַמַּלְאָךְ לְהִתְיַצֵּב שָׁם.
כז. וַיִּשְׂמַח יוֹרָם בְּלִבּוֹ עַל-הַדָּבָר הַזֶּה.
 
ח
א. וַיְדַבֵּר יוֹרָם בַּשְּׁלִישִׁית וַיֹּאמַר: לָמָּה עֲשִׂיתַנִי פֶרֶד מִנְּעוּרַי אֲשֶׁר זַרְעִי לֹא יְעַבֵּר וְלֹא אֵאָחֵז בָּאָרֶץ עִם-אֲבוֹתַי אֲשֶׁר לְפָנַי וְלֹא יִהְיֶה לִי קִים עִם-אִשְׁתִּי אַחֲרַי כִּי צָדְקוּ דְבָרֶיהָ וּבִצְדָקָה עָשְׂתָה כִּי-אַתָּה נָתַתָּ לָהּ צְדָקָה.
ב. וְאָנֹכִי אֵין מוֹעִיל בִּי אֲשֶׁר כִּתְאֵנָה יְבֵשָׁה הָיִיתִי הַמְחַכָּה לִסְעָרָה.
ג. וּמַטָּרָה לַבָּרָק וְאוֹת לַמָּוֶת וְאֵין-אוֹנִים בַּצָרָה אֵיד וְקִיא צֹאָה עַל-פְּנֵי הָאֲדָמָה אֲשֶׁר יְצַרְתָּהּ מִתֹּהוּ וּמִבֹּהוּ בְרָאתָהּ וּמִקִיא צֹּאָה הֲזֶה צַלְמְךָ אֲשֶׁר בּוֹ בְרָאתָנוּ?
ד. כִּי בְצִדְקָם מֵתוּ אֲבוֹתַי וּבְתָם לֵבָב שְׂבֵעֵי חַיִּים וּמְלֵאֵי יָמִים וּמְלֵאֵי בְרָכָה.
ה. אֲשֶׁר לֹא עֲוֹנָם פָּקַדְתָּ עָלַי לְבַקֵּשׁ אֶת-חַטָּאתָם מִמֶּנִּי וְלָכֵן עֲנֵנִי הַפַּעַם וְאֶת-עֵדוּתְךָ הוֹעִידֵנִי.
ו. כִּי אֵין בְּמַלְאָכֶיךָ גַּם אֶחָד אֲשֶׁר יִגְבַּר עַד לִסְגּוֹר אֶת-פִּי וַאֲשֶׁר יַעֲמִיס עַל-נַפְשׁוֹ אֶת-עֲוֹנְךָ נֶגְדִּי זוּלָתִי אַתָּה לְבַדְּךָ כִּי תָבוֹא וְתִגָּלֶה אֵלַי בְּטֶרֶם אָמוּת.
ז. וַיּוֹסֶף יוֹרָם וַיַּבֵּט אֶל-פֶּתַח הַגָּג לִרְאוֹת אִם הָיְתָה מַרְאָה.
ח. וַיַּרְא מַרְאָה וַיַּחְשְׁבֶנָּה לֵאלֹהִים וְהוּא בֹכֶה מִתּוֹךְ נֹגַהּ אֵשׁ גָּדוֹל וְלֹא רָאָה אֶת-הַמַּרְאָה בִלְתִּי-אִם כְּנִיד עַפְעָף מְעַט וַתֻּכֶּינָה עֵינָיו בְּסַנְוֵרִים וְלֹא הוֹסִיף עוֹד לִרְאוֹת.
ט. וְאֶת-הָעוֹמֵד בַּפֶּתַח לֹא הִכִּיר וְלֹא יָדַע מִי-זֶה יָצָא לִקְרָאתוֹ לַעֲנוֹת אוֹתוֹ דְבָרִים.
י. וְלֹא רָאָה כִּי אִשְׁתּוֹ הִיא כִּי בָאָה לְחַפְּשׂוֹ וְהִיא נֹשֵׂאת בְּיָדָהּ שְׁנֵי מַרְבַדִּים וְנֵר וַתִּגַּשׁ אֵלָיו וַתַּשְׁכִּיבֵהּוּ עַל-הַמַּרְבַדִּים וַתִּשְׁכַּב עִמּוֹ גַם הִיא וְלֹא דִבְּרָה דָבָר וַיַּכֵּר מִן-הַחֲשֵׁכָה כִּי רָעֲדוּ פָנֶיהָ.
יא. וְהַמִּטָּה אֵין עַמּוּדִים לָהּ וְאֵין מוֹטוֹת לְבַעֲבוּר הַחֲזֵק אֶת-הָאֲפִּרְיוֹן מִמַּעַל וַיִּשְׁלַח אֱלֹהִים אַרְבָּעָה מַלְאָכִים וַיֵּרְדוּ מִשַּׁעֲרֵי הַבַּרְזֶל מִן-הַשָּׁמָיִם.
יב. וַיַּעַמְדוּ כָל-הַלַּיְלָה עַל-אַרְבַּע פִּנּוֹת הַמִּטָּה בָרוּחַ לְבוּשֵׁי כְנָפַיִם וְרַגְלֵיהֶם סְגוּרוֹת וְהֵמָּה מַבִּיטִים לְנִכְחָם וְעֵינֵיהֶם עֵינַיִם אֲשֶׁר לֹא תָמוֹתְנָה.
יג. וַיִּפְרְשׂוּ סֻכַּת רוּחַ עַל פְּנֵי הַמִּטָּה כְשִׂמְלַת אֶרֶג אֲשֶׁר לֹא יִגַּע בָּהּ אִישׁ וַיַּטּוּהָ עַל-פְּנֵי שְׁנֵיהֶם לָסֹךְ עַל-יוֹרָם וְעַל-אִשְׁתּוֹ בַלַּיְלָה הַהוּא בְּשָׁכְבָם יַחְדָּו לֵב אֶל-לֵב.
יד. וְהֵמָּה מַשְׂבִּיעִים אִישׁ אֶת-אָחִיו בִּדְמָעוֹת.
 
ט
א. וַיְהִי מִמָּחֳרָת בִּהְיוֹת הַבֹּקֶר וַיִּמְכּוֹר יוֹרָם אֶת-כָּל אֲשֶׁר לוֹ וְאֶת-חֶלְקַת שָׂדֵהוּ וְאֶת-הַבָּתִּים וַיִּמְכְּרֵם לְיוֹאֵל בֶּן-אַמְנוֹן חוֹתֵן אָבִיו בְּעֵין הַפָּרֶז.
ב. וַיִּסַּע הוּא וְאִשְׁתּוֹ עִם-עֲדָרָיו צָפוֹנָה לָשׁוּב אַרְצָה כַשְׂדִּים לָגוּר שָׁם כִּי אוֹתָהּ יָדַע.
ג. וְאִיזֶבֶל הָרְתָה לְאִישָׁהּ וַיִּסְעוּ בַמִּדְבָּר שְׁמוֹנָה חֳדָשִׁים.
ד. וּבִמְלֹאת הַיָּמִים וַתֵּלֶד בֵּן וַתֵּינֶק אוֹתוֹ וְהַיֶּלֶד שֵׂעָר לָבָן לוֹ לְמִיּוֹם הוּלֶדֶת אוֹתוֹ וְהָיָה לְאוֹת לַלַּיְלָה אֲשֶׁר הֹרָה בוֹ.
ה. וְהָאִשָּׁה אִשָּׁה רַכָּה וּמְפֻנָּקָה מְאֹד עָנֹג בְּשָׂרָהּ עָלֶיהָ וְלֹא הָיָה לָהּ דֵּי חָלָב בְּשָׁדֶיהָ לְהֵינִיק אֶת-הַיָּלֶד.
ו. וַיְהִי בְּבֹאָם לִמְכָרְיָה עַד-בֵּית הַכַּשְׂדִּי אֲשֶׁר נִמְכַּר יוֹרָם לְעֶבֶד לוֹ וַיִּשְׁאֲלוּ אֶת-פִּי בֶּן הַכַּשְׂדִּי לְאִשָּׁה מֵינֶקֶת אִם-יֵשׁ אִשָּׁה מֵינֶקֶת בְּאֶחָד מִבָּתָּיו.
ז. וַיִּמְצְאוּ שָׁם אִשָּׁה עִבְרִיָּה אֲשֶׁר יָלְדָה גַם הִיא וַיִּתְּנוּ לָהּ אֶת-הַיֶּלֶד לְהֵינִיקוֹ וַיָּשׁוּבוּ אֶל-אָהֳלֵיהֶם.
ח. וַיְהִי בְּהָנִיק הַמֵּינֶקֶת אֶת-הַיֶּלֶד בְּבֵית הַכַּשְׂדִּי וְאֵשׁ אֱלֹהִים יָצְאָה וַתִּפּוֹל מִן-הַשָּׁמַיִם עַל-אֹהֶל יוֹרָם עַל-יְתֵדוֹתָיו וַתֹּאחַז בְּאַרְבַּע פִּנּוֹת הָאֹהֶל וַיַּעַל יוֹרָם בָּאֵשׁ הַהִיא אֶל-אֱלֹהִים וַיָּמָת הוּא וְאִשְׁתּוֹ בָאֵשׁ וְהָעֲבָדִים נִמְלְטוּ וְלֹא מֵתוּ.
ט. וַיְגַדְּלוּ אֶת-הַיֶּלֶד בְּאֶרֶץ כַּשְׂדִּים וַיַּאַמְנוּהוּ וַיִּירְאוּ אֶת-אֱלֹהִים.
י. וַיִגְדַּל הַיֶּלֶד וַיְהִי לְנָבִיא אֲשֶׁר לֹא יָדַע אִישׁ אֶת-שְׁמוֹ וַיִּקְרְאוּ לוֹ מָשִׁיחַ.
יא. וְרַבִּים יָדְעוּ כִּי פָנִים אֶל-פָּנִים רָאָה אֱלֹהִים אוֹתוֹ וַיְדַבֵּר אֵלָיו כַּאֲשֶׁר יְדַבֵּר אִישׁ לְאָחִיו.
יב. וְכִי בָא אֱלֹהִים אֵלָיו כִּי כָלְתָה נַפְשׁוֹ אֵלָיו לְמַעַן הֱיוֹתוֹ קָרוֹב לוֹ כַּכָּתוּב בַּסְּפָרִים.
יג. וְיֵשׁ-אֲשֶׁר בִּסְעָרָה בָּא אֵלָיו לְסָעֵר אֶת-לִבּוֹ וְיֵשׁ-אֲשֶׁר בָּא בְקוֹל דְּמָמָה לִהְיוֹת דּוּמָם כָּמֹהוּ.
יד. וּבְקוֹל תְּהוֹמוֹת בָּא לְבַעֲבוּר הוֹרוֹתוֹ וּלְבַעֲבוּר לַמְּדוֹ וּבְקוֹל הֲמוֹת לֵיְלוֹת בַּחֲלִילִים וּבְכִנּוֹרוֹת לְזַמֵּר לְפָנָיו.
יה. אוֹ בַקוֹל אֲשֶׁר לִקְשִׁי רוּחַ בַּעֲלוֹת הַיָּגוֹן בֵּין-הָעַרְבָּיִם.
יו. לִבְכּוֹת עִמּו יַחְדָּו לְתֵבֵל וּלְכָל אֲשֶׁר בָּהּ.