הסידור השלם (בירנבוים)/אשכנז/עמודים/תפילה לחולה
תְּפִלָּה לְחוֹלֶה
יְיָ אַל בְּאַפְּךָ תוֹכִיחֵֽנִי וְאַל בַּחֲמָתְךָ תְיַסְּרֵֽנִי. חׇנֵּֽנִי, יְיָ, כִּי אֻמְלַל אָֽנִי; רְפָאֵֽנִי, יְיָ, כִּי נִבְהֲלוּ עֲצָמָי. וְנַפְשִׁי נִבְהֲלָה מְאֹד; וְאַתָּה יְיָ, עַד מָתָי. שׁוּבָה, יְיָ, חַלְּצָה נַפְשִׁי; הוֹשִׁיעֵֽנִי לְמַֽעַן חַסְדֶּֽךָ. כִּי אֵין בַּמָּֽוֶת זִכְרֶֽךָ; בִּשְׁאוֹל מִי יֽוֹדֶה לָּךְ. יָגַֽעְתִּי בְאַנְחָתִי, אַשְׂחֶה בְכׇל לַֽיְלָה מִטָּתִי; בְּדִמְעָתִי עַרְשִׂי אַמְסֶה. עָשְׁשָׁה מִכַּֽעַס עֵינִי; עָתְקָה בְּכׇל צוֹרְרָי. סֽוּרוּ מִמֶּֽנִּי, כׇּל פֹּֽעֲלֵי אָֽוֶן, כִּי שָׁמַע יְיָ קוֹל בִּכְיִי. שָׁמַע יְיָ תְּחִנָּתִי; יְיָ תְּפִלָּתִי יִקָּח. יֵבֹֽשׁוּ וְיִבָּהֲלוּ מְאֹד כׇּל אֹיְבָי; יָשֻֽׁבוּ יֵבֹֽשׁוּ רָֽגַע.
מִזְמוֹר לְדָוִד. יְיָ רֹעִי, לֹא אֶחְסָר. בִּנְאוֹת דֶּֽשֶׁא יַרְבִּיצֵֽנִי עַל מֵי מְנֻחוֹת יְנַהֲלֵֽנִי. נַפְשִׁי יְשׁוֹבֵב, יַנְחֵֽנִי בְמַעְגְּלֵי צֶֽדֶק לְמַֽעַן שְׁמוֹ. גַּם כִּי אֵלֵךְ בְּגֵיא צַלְמָֽוֶת לֹא אִירָא רָע, כִּי אַתָּה עִמָּדִי; שִׁבְטְךָ וּמִשְׁעַנְתֶּֽךָ, הֵֽמָּה יְנַחֲמֻֽנִי. תַּעֲרֹךְ לְפָנַי שֻׁלְחָן נֶֽגֶד צֹרְרָי; דִּשַּֽׁנְתָּ בַשֶּֽׁמֶן רֹאשִׁי, כּוֹסִי רְוָיָה. אַךְ טוֹב וָחֶֽסֶד יִרְדְּפֽוּנִי כׇּל יְמֵי חַיָּי; וְשַׁבְתִּי בְּבֵית יְיָ לְאֹֽרֶךְ יָמִים.
רְפָאֵֽנוּ יְיָ וְנֵרָפֵא, הוֹשִׁיעֵֽנוּ וְנִוָּשֵֽׁעָה, כִּי תְהִלָּתֵֽנוּ אָֽתָּה; וְהַעֲלֵה רְפוּאָה שְׁלֵמָה לְכׇל מַכּוֹתֵֽינוּ, כִּי אֵל מֶֽלֶךְ רוֹפֵא נֶאֱמָן וְרַחֲמָן אָֽתָּה. בָּרוּךְ אַתָּה, יְיָ, רוֹפֵא חוֹלֵי עַמּוֹ יִשְׂרָאֵל.