בן סירא/בן זאב/ז
אם אתה לא תעשה הרעה לא תאנה אליך רעה
הרחק מרשע וירחק הוא ממך
לא תזרע על תלמי און פן תקצור תבואתה שבעתים
לא תבקש שלטון מלפני יי ויקר וגדֻלה מלפני מלך
אל תהי זך לפני להים וחכם לפני מלך
אל תבקש לשפוט אם אין לאל ידך לעצור בעול פן תשא פני עשיר ושחת צדקתך
אל תאשם נפשך בקהל עם ובהתעשקם לא תתערב
לא תשנה לחטא חטאה כי באחת לא נקית
אל תאמר ברוב עולה ארצנו ועל פשעי ירח מנחה
בצר לא תערוך שועך ובצדקה אל תתמהמה לא תאחר פקודתך
אל תלעג אל מר נפש כי יש מרים ומשפיל
לא תחרוש רעה על אחיך ולא על אוהבך ולא על עמיתך
אל תאות אל כל דבר כזב כי אחריתו לא טוב
אל תרבה שיח בקהל זקנים ולא תכביר מלים בתפִלתך טוב מעט בתם לבב מהפצר שיח בלא דעת
אל תתכוסס בהמון מרעים וזכור כי יי יפקוד על עונך
בעמל יגיעך על תקוץ ניר נירך בעצבון ולא תגעל כי אלהים עשהו
מאד מאד השפל רוחך כי אחרית כל אנוש רמה
לא תחליף אחיך בכסף ורעך בזהב אופיר
אשת חן וטובת לב בל תמיר בפנינים
עבד נאמן לא תלחץ ולא תונה שכיר בעמל נפשו
עבד משכיל אהוב כנשפך ולא תמנענו מצאת לחפשי
אם מקנה לך שמרהו ואם יסכון לך חוס עליו
בנים יש לך יסר אותם והשיא להם נשים בנעֻריהם
בנות יש לך נצור בשרן ולא תיטיב להן פניך
הוצא בת ויצא עׂשק ולאיש ישר תשיאה
אשה אוהבת לך לא תעזוב ואם רעה היא אל תאמין בה
כבד אביך בכל לבך ואם יולדתך לא תֶשֶה
זכור כי בלעדיהם לא היית ובמה תגמול על אשר טפחוך ורבוך
ירא יי בכל לבך וכבד כהניו יקר אל זה בראך ולא תעזוב משרתיו
הודה לו וכבד כהניו והב למו מנתם כאשר צֻויתָ ללחם קרבנך וראשית ידך
ואף לעני תפרוש כפך למען תברך בכל משלח ידך
הפק רצונך לכל חי ואף למתים תעשה חסד
אל תעזוב דמעות אונן וכאין מנחם ועם אבלים תתאבל
לא תכלא רגלך מפקׂד דוֶה על ערשו כי בגלל הדבר הזה תמצא חסד
בכל מעשיך זכור אחריתו ולא תחטא לעולם