פתיחת התפריט הראשי
הבהרה:

דף זה הוא במרחב הביאור של ויקיטקסט, ומכיל פרשנות וביאורים של משתמשים בני ימינו, ולא מייצגים בהכרח את הפרשנות המסורתית.

למהדורה המבוארת ללא עימוד

פרשת פקודי

פקודת הקמת המשכןעריכה

וַיְדַבֵּר יְהוָה אֶל מֹשֶׁה לֵּאמֹר:
בְּיוֹם הַחֹדֶשׁ הָרִאשׁוֹן, בְּאֶחָד לַחֹדֶשׁ, תָּקִים אֶת מִשְׁכַּן אֹהֶל מוֹעֵד.

חלקי המשכןעריכה

וְשַׂמְתָּ שָׁם אֵת אֲרוֹן הָעֵדוּת, - וְסַכֹּתָ עַל הָאָרֹן אֶת הַפָּרֹכֶת.
וְהֵבֵאתָ אֶת הַשֻּׁלְחָן וְעָרַכְתָּ אֶת עֶרְכּוֹ,
וְהֵבֵאתָ אֶת הַמְּנֹרָה - וְהַעֲלֵיתָ אֶת נֵרֹתֶיהָ.
וְנָתַתָּה אֶת מִזְבַּח הַזָּהָב לִקְטֹרֶת, - לִפְנֵי אֲרוֹן הָעֵדֻת,
וְשַׂמְתָּ אֶת מָסַךְ הַפֶּתַח לַמִּשְׁכָּן.
וְנָתַתָּה אֵת מִזְבַּח הָעֹלָה - לִפְנֵי פֶּתַח מִשְׁכַּן אֹהֶל מוֹעֵד.
וְנָתַתָּ אֶת הַכִּיֹּר - בֵּין אֹהֶל מוֹעֵד וּבֵין הַמִּזְבֵּחַ, וְנָתַתָּ שָׁם מָיִם.
וְשַׂמְתָּ אֶת הֶחָצֵר סָבִיב, וְנָתַתָּ אֶת מָסַךְ שַׁעַר-הֶחָצֵר.

המשיחהעריכה

וְלָקַחְתָּ אֶת שֶׁמֶן הַמִּשְׁחָה,
וּמָשַׁחְתָּ אֶת הַמִּשְׁכָּן וְאֶת כָּל אֲשֶׁר בּוֹ,
וְקִדַּשְׁתָּ אֹתוֹ וְאֶת כָּל כֵּלָיו - וְהָיָה קֹדֶשׁ.
וּמָשַׁחְתָּ אֶת מִזְבַּח הָעֹלָה וְאֶת כָּל כֵּלָיו, - וְקִדַּשְׁתָּ אֶת הַמִּזְבֵּחַ,
וְהָיָה הַמִּזְבֵּחַ קֹדֶשׁ קָדָשִׁים.
וּמָשַׁחְתָּ אֶת הַכִּיֹּר וְאֶת כַּנּוֹ, - וְקִדַּשְׁתָּ אֹתוֹ.

משיחת הכהניםעריכה

וְהִקְרַבְתָּ אֶת אַהֲרֹן וְאֶת בָּנָיו אֶל פֶּתַח אֹהֶל מוֹעֵד, וְרָחַצְתָּ אֹתָם בַּמָּיִם.
וְהִלְבַּשְׁתָּ אֶת אַהֲרֹן אֵת בִּגְדֵי הַקֹּדֶשׁ, וּמָשַׁחְתָּ אֹתוֹ - וְקִדַּשְׁתָּ אֹתוֹ, וְכִהֵן לִי.
וְאֶת בָּנָיו תַּקְרִיב, וְהִלְבַּשְׁתָּ אֹתָם כֻּתֳּנֹת.
וּמָשַׁחְתָּ אֹתָם כַּאֲשֶׁר מָשַׁחְתָּ אֶת אֲבִיהֶם, וְכִהֲנוּ לִי,
וְהָיְתָה לִהְיֹת לָהֶם מָשְׁחָתָם - לִכְהֻנַּת עוֹלָם, לְדֹרֹתָם.
וַיַּעַשׂ מֹשֶׁה כְּכֹל אֲשֶׁר צִוָּה יְהוָה אֹתוֹ, כֵּן עָשָׂה. {ס}

תאור הקמת המשכןעריכה

וַיְהִי בַּחֹדֶשׁ הָרִאשׁוֹן בַּשָּׁנָה הַשֵּׁנִית, בְּאֶחָד לַחֹדֶשׁ, הוּקַם הַמִּשְׁכָּן.
וַיָּקֶם מֹשֶׁה אֶת הַמִּשְׁכָּן...
וַיִּתֵּן אֶת אֲדָנָיו, וַיָּשֶׂם אֶת קְרָשָׁיו,
וַיִּתֵּן אֶת בְּרִיחָיו, וַיָּקֶם אֶת עַמּוּדָיו.
וַיִּפְרֹשׂ אֶת הָאֹהֶל עַל הַמִּשְׁכָּן, וַיָּשֶׂם אֶת מִכְסֵה הָאֹהֶל עָלָיו מִלְמָעְלָה,
- כַּאֲשֶׁר צִוָּה יְהוָה אֶת מֹשֶׁה. {ס}
וַיִּקַּח וַיִּתֵּן אֶת הָעֵדֻת אֶל הָאָרֹן, וַיָּשֶׂם אֶת הַבַּדִּים עַל הָאָרֹן,
וַיִּתֵּן אֶת הַכַּפֹּרֶת עַל הָאָרֹן מִלְמָעְלָה.
וַיָּבֵא אֶת הָאָרֹן אֶל הַמִּשְׁכָּן,
וַיָּשֶׂם אֵת פָּרֹכֶת הַמָּסָךְ וַיָּסֶךְ עַל אֲרוֹן הָעֵדוּת, - כַּאֲשֶׁר צִוָּה יְהוָה אֶת מֹשֶׁה. {ס}
וַיִּתֵּן אֶת הַשֻּׁלְחָן בְּאֹהֶל מוֹעֵד - עַל יֶרֶךְ הַמִּשְׁכָּן, צָפֹנָה, - מִחוּץ לַפָּרֹכֶת.
וַיַּעֲרֹךְ עָלָיו עֵרֶךְ לֶחֶם לִפְנֵי יְהוָה, - כַּאֲשֶׁר צִוָּה יְהוָה אֶת מֹשֶׁה. {ס}
וַיָּשֶׂם אֶת הַמְּנֹרָה בְּאֹהֶל מוֹעֵד, - נֹכַח הַשֻּׁלְחָן, עַל יֶרֶךְ הַמִּשְׁכָּן, נֶגְבָּה.
וַיַּעַל הַנֵּרֹת לִפְנֵי יְהוָה, כַּאֲשֶׁר צִוָּה יְהוָה אֶת מֹשֶׁה. {ס}
וַיָּשֶׂם אֶת מִזְבַּח הַזָּהָב בְּאֹהֶל מוֹעֵד - לִפְנֵי הַפָּרֹכֶת.
וַיַּקְטֵר עָלָיו קְטֹרֶת סַמִּים, כַּאֲשֶׁר צִוָּה יְהוָה אֶת מֹשֶׁה. {ס}
וַיָּשֶׂם אֶת מָסַךְ הַפֶּתַח לַמִּשְׁכָּן.
וְאֵת מִזְבַּח הָעֹלָה שָׂם פֶּתַח מִשְׁכַּן אֹהֶל מוֹעֵד,
וַיַּעַל עָלָיו אֶת הָעֹלָה וְאֶת הַמִּנְחָה, - כַּאֲשֶׁר צִוָּה יְהוָה אֶת מֹשֶׁה. {ס}
וַיָּשֶׂם אֶת הַכִּיֹּר בֵּין אֹהֶל מוֹעֵד וּבֵין הַמִּזְבֵּחַ, וַיִּתֵּן שָׁמָּה מַיִם לְרָחְצָה.
וְרָחֲצוּ מִמֶּנּוּ מֹשֶׁה וְאַהֲרֹן וּבָנָיו אֶת יְדֵיהֶם וְאֶת רַגְלֵיהֶם.
בְּבֹאָם אֶל אֹהֶל מוֹעֵד וּבְקָרְבָתָם אֶל הַמִּזְבֵּחַ, יִרְחָצוּ, - כַּאֲשֶׁר צִוָּה יְהוָה אֶת מֹשֶׁה. {ס}
וַיָּקֶם אֶת הֶחָצֵר סָבִיב לַמִּשְׁכָּן וְלַמִּזְבֵּחַ,
וַיִּתֵּן אֶת מָסַךְ שַׁעַר הֶחָצֵר,
וַיְכַל מֹשֶׁה אֶת הַמְּלָאכָה. {פ}

כיסוי הענןעריכה

וַיְכַס הֶעָנָן אֶת אֹהֶל מוֹעֵד, וּכְבוֹד יְהוָה מָלֵא אֶת הַמִּשְׁכָּן.
וְלֹא יָכֹל מֹשֶׁה לָבוֹא אֶל אֹהֶל מוֹעֵד, כִּי שָׁכַן עָלָיו הֶעָנָן, וּכְבוֹד יְהוָה מָלֵא אֶת הַמִּשְׁכָּן!
וּבְהֵעָלוֹת הֶעָנָן מֵעַל הַמִּשְׁכָּן - יִסְעוּ בְּנֵי יִשְׂרָאֵל בְּכֹל מַסְעֵיהֶם.
וְאִם לֹא יֵעָלֶה הֶעָנָן, וְלֹא יִסְעוּ - עַד יוֹם הֵעָלֹתוֹ.
כִּי עֲנַן יְהוָה עַל הַמִּשְׁכָּן יוֹמָם, וְאֵשׁ תִּהְיֶה לַיְלָה בּוֹ,
לְעֵינֵי כָל בֵּית יִשְׂרָאֵל בְּכָל מַסְעֵיהֶם! {ש}
חזק חזק חזק ונתחזק - סיום ספר שמות