אלוף בצלות ואלוף שום

אַלּוּף בַּצְלוּת וְאַלּוּף שׁוּם

בְּדִיחָה עֲמָמִית בַּחֲרוּזִים

מאת חיים נחמן ביאליק

א

בֶּן אַחַד הַמְּלָכִים יָצָא בָאָרֶץ לְשׁוּטוֹ, / לְמַעַן אֱסֹף חָכְמָה וָדַעַת וּלְשִׂימָן אֶל־יַלְקוּטוֹ, / כְּדָת לְכָל־בְּנֵי־הַמְּלָכִים, / הַשְּׁלֵמִים וְהַטּוֹבִים וְהַמְבֹרָכִים, / וַיַּעֲבֹר בֶּן־הַמֶּלֶךְ בְּכָל־חֲמֵשׁ הַיַּבַּשׁוֹת, / וַיָּתָר אֶת־הָאֲרָצוֹת הַיְשָׁנוֹת וְהַחֲדָשׁוֹת, / וַיִּקְרַע אֶת־כָּל־שִׁבְעַת הַיַּמִּים, / וַיִּצְלַח אֶת־כָּל־הַנְּהָרוֹת וְאֵת כָּל־הָאֲגַמִּים, / וְגַם אֶל־הָאִיִּים הָרְחוֹקִים הִגִּיעַ, / וְעַד מֵעֵבֶר לְהָרֵי הַחֹשֶׁךְ הִבְקִיעַ, / וַיִּדְרֹךְ בִּנְעָלָיו צִיּוֹת וְאֶרֶץ תַּלְאוּבוֹת, / וַיֶּאֱסֹף חָכְמָה וָדַעַת כֶּאֱסֹף בֵּיצִים עֲזוּבוֹת, / לֹא הִנִּיחַ קְטַנָּה וּגְדוֹלָה אֲשֶׁר לֹא־אָסָף, / וַיֶּחְכַּם וַיִּשְׂכַּל מֵהֵימָן וּמֵאָסָף, / וּמִדֵּי צֵאתוֹ וּמִדֵּי בֹאוֹ, / דִּבֵּר בְּחָכְמָה עַל־עוֹלָם וּמְלֹאוֹ, / וַיְהִי חָכָם בַּיּוֹם וְחָכָם בַּלָּיְלָה, / יָדַע מַה־לְּמַטָּה וּמַה לְּמָעְלָה, / מַה לְּפָנִים וּמַה לְּאָחוֹר, / וּלְהַבְדִּיל בֵּין־הַלָּבָן וּבֵין הַשָּׁחֹר, / בֵּין חֲמוֹר בֶּן־אֲתוֹנוֹת וּבֵין חֲמַר־מְרָת, / וּבֵין יֵינוֹת קַפְרִיסִין וּבֵין מֵימֵי פְרָת, / – סוֹף דָּבָר, בָּחוּר בֶּן־חַיִל וּבֶן פֹּרָת!

ב

וַיְהִי בִמְלֹאת שִׁבְעָה שָׁבוּעוֹת לְצֵאתוֹ, / וַיִּמָּלֵךְ עָלָיו לִבּוֹ לָשׁוּב אֶל־בֵּיתוֹ, / כִּי כְבָר מִלֵּא בְחָכְמָה כְּרֵסוֹ, / מַשָּׂא כָבֵד מִשֵּׂאתוֹ, / וְכָל־הָאַמְתָּחוֹת וְכָל־הַצִּקְלוֹנוֹת / מָלְאוּ מִשֶּׁבַע הַחָכְמוֹת וּמִשִּׁבְעִים הַלְּשׁוֹנוֹת, / וַיְצַו בֶּן־הַמֶּלֶךְ לָצֹר כֵּלָיו, / וְהִנֵּה־זֶה בָא הַמַּגִּיד וַיֹּאמֶר אֵלָיו:

"אֲדוֹנִי בֶן־הַמֶּלֶךְ הַנֶּחְמָד וְהַנָּעִים! / שָׁמַעְתִּי כִּי־יֵשׁ בָּעוֹלָם אִי־פְלָאִים, / לֹא־שְׁזָפַתּוּ עֵין בֶּן־מֶלֶךְ מֵעוֹדוֹ, / וָאֹמַר: אֶגְלֶה אֹזֶן רוֹמְמוּת כְּבוֹדוֹ, / אוּלַי יְהִי עִם־לְבַב הֲדַר־תִּפְאַרְתּוֹ, / וְסַרְתָּ אֶל־הָאִי וַחֲקַרְתּוֹ. / הֵן אִי־פְלָאִים הָאִי וְאִישׁ לֹא־חֲקָרוֹ, / וְלֹא דָרְכָה רֶגֶל בֶּן־מֶלֶךְ עֲפָרוֹ, / וּמִי יוֹדֵעַ אֶת־הֶחָתוּם עוֹד בְּאוֹצָרוֹ, / אוּלַי יְהִי אֱלֹהִים עִמְּךָ, / לְהַשְׂגִּיא פָעָלְךָ וּלְהַגְדִּיל שִׁמְךָ, / וּמָצָאתָ שָׁם אֶת־הַיֵּמִים אוֹ אֶת־הָאֹחִים."

וַיֹּאמֶר בֶּן־הַמֶּלֶךְ: דְּבָרֶיךָ טוֹבִים וּנְכֹחִים!

בּוֹ בַיּוֹם וּבַשָּׁעָה הַהִיא / שָׂכַר לוֹ בֶּן־הַמֶּלֶךְ אֳנִי / וַיֵּרֶד הוּא וְכָל־הַכְּבֻדָּה עִמּוֹ אֶל־הָאִי.

ג

וַיְהִי בַעֲלוֹת בֶּן־הַמֶּלֶךְ אֶל־הַיַּבָּשָׁה, / וַיִּשְׁתּוֹמֵם כִּי לֹא־מָצָא כָל־חֲדָשָׁה, / זוּלָתִי כִּי־נִפְלִים מְעַט אַנְשֵׁי־הָאִי בְמִינָם: / יְמִינָם שְׂמֹאלָם וּשְׂמֹאלָם יְמִינָם, / וּתְמוֹלָם מָחֳרָתָם וּמָחֳרָתָם תְמוֹלָם, / וְלֵילָם יוֹמָם וְיוֹמָם לֵילָם, / מְרֻבָּעָם עָגֹל וּמְרֻבָּע עִגּוּלָם, / וְהָפוּךְ נִצָּב בְּבֵיתָם הַסֻּלָּם, / וְעֵץ יַעֲרָם גָּדֵל מִנּוֹפוֹ, / וּתְחִלַּת מִנְיָנָם מִסּוֹפוֹ. / וַיִּזְעַף בֶּן־הַמֶּלֶךְ וַיָּנַּע בִּכְתֵפוֹ, / וַיֹּאמֶר: עַל־מֶה חָרַדְתִּי אֵפוֹא, / וָאָנִיעַ עַצְמוֹתַי עַד הֲלֹם? – / אַךְ־שִׁקֶּר־לִי הָאִישׁ וַיַּחֲלֹם חֲלוֹם!

עוֹדֶנּוּ זֹעֵף וּפַרְתְּמִים גְּדוֹלִים וְרַבִּים / חָרְדוּ לִקְרָאתוֹ בְּכִרְכָּרוֹת וּבְצַבִּים, / בְּסוּסִים, בִּפְרָדִים וּבְשֶׁנְהַבִּים, / וּמַקְהֲלוֹת נוֹגְנִים עִם־שָׁרִים / רוֹכְבִים לִפְנֵיהֶם עַל־שִׁבְעִים עֲיָרִים, / וּכְלֵי־זֶמֶר בִּימִינָם וּבִשְׂמֹאלָם / מַרְעִימִים נוֹרָאוֹת בְּקוֹלָם, / מִסּוֹף הָעוֹלָם וְעָד־סוֹף הָעוֹלָם, / וְהַשּׁוֹטְרִים בּוֹקְעִים בָּעָם וְקוֹרְאִים: שִׂימוּ רָוַח! – / עַם יוֹדְעֵי תְרוּעָה מִזֶּה וּמִזֶּה וְהֵם בַּתָּוֶךְ; / וַיּוֹלִיכוּ אֶת־בֶּן־הַמֶּלֶךְ הָאַרְמוֹנָה אֶל־הַזָּבַח, / אֲשֶׁר הֵכִין מֶלֶךְ הָאִי לָאוֹרֵחַ הַבָּא, / סְעֻדָּה גְדוֹלָה וְרַבָּה, / אֶחָד מִשִּׁשִּׁים בָּעוֹלָם הַבָּא.

הוּא בָא הָאַרְמוֹנָה וּמֶלֶךְ הָאִי הוֹפִיעַ, / וַיְמַלֵּא אֶת־יַד־הָאוֹרֵחַ בַּגָּבִיעַ; / וַיְהִי אַךְ־טָעַם מִדַּם־הָעֵנָב / וַתִּיפָּקַחְנָה עֵינָיו, / וַיַּרְא אֶת־שֻׁלְחַן הַמֶּלֶךְ וְאֶת־הַסְּעֻדָּה, / אֶת־כָּל־הַתְּכוּנָה הָרַבָּה וְאֶת כָּל־הַכְּבֻדָּה: / בָּשָׂר וְדָגִים וְכָל־מַטְעַמִּים, / דְּגֵי נְהָרוֹת וּדְגַת יַמִּים, / צֶאֱצָאֵי קִישׁוֹן וּפִישׁוֹן וְאוֹקְיָנוֹס: / פַּלְמוּדָה וָעֳפִיאָן וְאוֹקָנוֹס, / שְׁפַרְנוּן וּקְבַרְנוּן וּצְלֹפַח, – / אֹרֶךְ כָּל־דָּג אַמָּתַיִם וָטֹפַח, / וְעֵין־הָרֹטֶב כְּעֵין־הַפִּטְדָה וְהַנֹּפֶךְ; / וּבְשַׂר־תַּאֲוָה, בְּשָׂרִים מִבְּשָׂרִים שׁוֹנִים: / שַׂלְוִים וְיוֹנִים וּפַסְיוֹנִים, / נָא וּצְלִי־אֵשׁ וּמְבֻשָּׁל בַּחֲלֵב צִפֳּרִים, / וְעֵגֶל־רְעִי וּמְרִיא וְאַלְיַת כָּרִים. / אֵין שֻׁלְחַן הַמֶּלֶךְ חָסֵר מְאוּמָה, / גַּם־קֻרְקְבָן שֶׁל־צְפִיר דָּנִיֵּאל וּלְשׁוֹן פָּרָה אֲדֻמָּה, / מִלְּבַד לֶחֶם חֲמֻדּוֹת, עוּגוֹת וּרְקִיקִים, / מִקְלְעוֹת חַלּוֹת בְּכַרְכֹּם וּבְצִמּוּקִים, / צַפִּיחִיּוֹת בִּדְבַשׁ וְאֶסְפּוֹגִים מְתוּקִים, / וּמִלְּבַד צְבִי וְאַיָּל וְיַחְמוּר וְדִישׁוֹן, / וְיֵינוֹת עַתִּיקִים מִימוֹת אָדָם הָרִאשׁוֹן, / מִיִּקְבּוֹ שֶׁל־לוֹט וּמִגִּתּוֹ שֶׁל־נֹחַ – / וַיֵּשְׁבוּ לֶאֱכֹל וְלִשְׁתּוֹת וְלִשׂמֹחַ.

ד

וַיְהִי אַחֲרֵי אָכְלָם וְאַחֲרֵי שָׁתֹה, / וּמֶלֶךְ הָאִי וְכָל־עֲדָתוֹ / יוֹשְׁבִים אֶת־אוֹרְחָם הַנַּעֲלֶה בִּמְסִבָּם, / מִתְעַטְּשִׁים מֵרֵיחַ קְטֹרֶת וּמְטִיבִים לִבָּם, / וְעֵינֵי כֻלָּם חֶצְיָן עֲצוּמוֹת / מִנְּעִימוֹת שֹׂבַע וּמִשֹּׂבַע נְעִימוֹת, / וַיִּתְעַטֵּשׁ הַמֶּלֶךְ וַיִּשְׁאַל אֶת־אוֹרְחוֹ כַּנִּמּוֹס:

– הַגִּידָה־לִּי, אוֹרְחִי וּבֶן אָחִי! / הֵן חָכָם אַתָּה מֵאֵיתָן הָאֶזְרָחִי / וְחִכְּךָ יִטְעַם כָּל־טָעַם, – / הֶעָרְבָה לְךָ אֲרוּחָתִי הָפָּעַם?

וַיְזוֹרֵר בֶּן־הַמֶּלֶךְ גַּם הוּא וַיַּעַן / בְּמֶתֶק שְׂפָתַיִם וּבְעַנְוַת נֹעַם:

– אֲדוֹנִי, אָבִי וּמַלְכִּי! / מִי־אָנֹכִי הַדַּל כִּי־ / תָשִׂים בִּמְשִׁיבֵי טַעַם חֶלְקִי. / חֵי־נַפְשִׁי אִם־יָדַעְתִּי בְּכָל־מְדִינָה וָפֶלֶךְ / מַטְעַמִּים כְּמַטְעַמֵּי אֲדוֹנִי הַמֶּלֶךְ. / כֻּלָּם מַמְתַּקִּים וּמַעֲדַנִּים כֻּלָּם, / אֵין־בָּם כָּל־סֶלֶף; אֶפֶס... וְאוּלָם...

גִּמְגֵּם בֶּן־הַמֶּלֶךְ וַיְהִי כַחֲמוֹר הָעוֹלֶה בְסֻלָּם. / אֵין זֹאת כִּי־אִם־יָרֵא אוֹ בוֹש. / וְהַמֶּלֶךְ חִכָּה לְסוֹף פָּסוּק עַד־בּוֹש, / וַיַּרְא כִּי־אֵין סוֹף – וַיָּנֶד רֹאשׁ, / וַיֹּאמֶר בִּמְרִירוּת. וּפָנָיו לַעֲנָה וָרֹאשׁ:

– וְאוּלָם? וְאוּלָם?

וּבֶן־הַמֶּלֶךְ הִתְגַּבֵּר / וַיְכַל לְדַבֵּר:

– וְאוּלָם בְּאָכְלִי אֶת־הַצָּלִי, / רֶגַע אֶחָד נִדְמָה־לִי, / כְּאִלּוּ הוּא חָסֵר תֶּבֶל מִן־הַתְּבָלִים, / וָאֶשְׁאַל אֶת־טַבָּחִי וַיֹּאמֶר: בְּצָ... בְּצָ... בְּצָלִים!

וְלֹא הֵבִינוּ הַמֶּלֶךְ וּפַרְתְּמָיו מַה־שֵּׂחוֹ, / כִּי לֹא־גִדַּל הָאִי אֶת־הַבָּצָל וְלֹא־הִצְמִיחוֹ, / וְאִישׁ מֵהֶם לֹא־יָדַע מַה־מַּרְאֵהוּ וּמַה־טַּעְמוֹ וְרֵיחוֹ, / וַיֹּאמְרוּ אַךְ הִתְעַטֵּשׁ בֶּן־הַמֶּלֶךְ – וַיִּתְעַטְּשׁוּ גַם־הֵמָּה / עֲטִישָׁה שֶׁיֶּשׁ־בָּהּ מִן־הֵא־הַשְּׁאֵלָה וְהֵא־הַתֵּמַהּ:

– הַבְּצָ... הַבְּצָ... הַבְּצָלִים?!

וְלֹא יָדַע בֶּן־הַמֶּלֶךְ מָה הַפְּלִיאָה וְהַתְּמִיהָה, / וַיִּתְעַטֵּשׁ בְּדָגֵשׁ חָזָק וּבְהֵא הַיְדִיעָה, / פַּעַם וּשְׁתַּיִם וּשְׁלִישִׁיָּה:

– הַבְּצָ... הַבְּצָ... הַבְּצָלִים!!!

וַיִּתְמְהוּ הַפַּרְתְּמִים אִישׁ אֶל־רֵעֵהוּ, / וְהַמֶּלֶךְ שָׁב וַיִּשְׁאָלֵהוּ:

– הֲזוֹרַרְתָּ אִם־דִּבַּרְתָּ? / וּמָה הַבְּצָלִים הָאֵלֶּה אֲשֶׁר אָמָרְתָּ?

אַךְ הָגָה אֶת־הַשֵּׁם בְּאוֹתִיּוֹתָיו – וְחָטְמוֹ נַעֲוָה, / וְכָל־חָטְמֵי הַפַּרְתְּמִים הִתְאַוּוּ תַּאֲוָה, / וַיִּתְעַטְּשׁוּ וַיְזוֹרְרוּ שָׁלֹש רְגָלִים, / מֵרֵיחַ הַקְּטֹרֶת וְהַבְּשָׂמִים וּמֵהַ־

בְּצָ... בְּצָ... בְּצָלִים!!!

וַיְזוֹרֵר בֶּן־הַמֶּלֶךְ גַם־הוּא וַיֹּאמֶר:

– יִשְׂגֶּה מַלְכִּי כְּאֶרֶז וְיִפְרַח כְּתֹמֶר! / הֲלֹא אַתָּה קֻפַּת הַמַּדָּע וְאֹסֶם הַבִּינָה, / וְאֵיךְ לֹא־תֵדַע אֶת־הַבָּצָל יֶרֶק הַגִּנָה, / וְהוּא פְרִי מִפְּרִי הָאֲדָמָה, / יֵדָעֵהוּ כָּל־עֶבֶד וְכָל־אָמָה, / פְּרִי עַז וּמַר וְאַכְזָרִי, מִבְּנֵי חָרִיף לְמִשְׁפַּחַת מְרָרִי, / עוֹדֶנּוּ בְאִבּוֹ יִלְבַּשׁ מִכְנְסָיִם, / עוֹמֵד עַל־רֹאשׁוֹ וְרַגְלָיו לַשָּׁמָיִם, / כְּמִתְהַדֵּר: „רְאוּ, כַּמָּה גְדוֹלִים מעֲשָׂי / וְכַמָּה יְרֻקִּים מִכְנָסָי!” / וּבְגָמְלוֹ יֵצֵא בְּתַכְרִיךְ זְהָבוֹ, / וְהַנָּחָשׁ מְקַנֵּן בִּלְבָבוֹ, וּבְשָׂרוֹ פְּצָלוֹת פְּצָלוֹת לְבָנוֹת / כְּמַעֲשֵׂי הַכֻּתֳּנוֹת בְּתוֹךְ הַכֻּתֳּנוֹת, / מֵהֶן לְבָנוֹת כֻּלָּן וּמֵהֶן לְבָנוֹת וּתְכֵלֶת, / וְטַעְמוֹ כְּטַעַם הַחֶלְבְּנָה וְהַשְּׁחֵלֶת, / כָּל־אוֹכְלוֹ חַי יִצְעַק: הוֹשַׁעְנָא! / מַר־לִי מַר, הִרְוַנִי לַעֲנָה! – / וְהַמַּפְשִׁיטוֹ וְהַמְפַלְחוֹ דָמֹעַ תִּדְמַע עֵינוֹ; / עַל־כֵּן לֹא־יֹאכְלוּהוּ הַשּׁוֹעִים בְּעֵינוֹ, / כִּי־מַאֲכַל דִּמְעָה לְאֶבְיוֹנֵיהֶם יִתְּנוּהוּ, / הֵם בְּפִתָּם עַל־מְרוֹרָיו יֹאכְלוּהוּ. / וַאֲשֶׁר יֹאכְלֶנּוּ חַי לְתֵאָבוֹן וּלְכֹסֶף, / יֹאכַל מִמֶּנּוּ כְּזַיִת וְאַל יוֹסֶף, / פֶּן־יַעֲמֹד טַעְמוֹ בְּפִיו וְרֵיחוֹ לֹא־יֵאָסֶף. / וְאוּלָם חֵי־מַלְכִּי אִם־יֵש כַּבָּצָל בְּכָל־הַיָּרָק / נוֹתֵן טַעַם לְשֶׁבַח בַּמָּרָק, / וְכִי יֻתַּן מִמֶּנּוּ בִּצְלִי אֵשׁ – / וְעָרַב הַצָּלִי עַל־אַחַת שֵׁשׁ; / כִּי כֵן מִשְׁפַּט הַפְּרִי הַזֶּה וְכֵן דָּתוֹ: / מַר הוּא בְּחַיָּיו וּמָתוֹק בְּמִיתָתוֹ. / וְעַתָּה אִם־טוֹבָה אַרְצִי בְעֵינֶיךָ לִטְעֹם מִפִּרְיָהּ, / יְצַו אֲדוֹנִי הַמֶּלֶךְ וְעָשָׂה טַבָּחִי אֶת־הַבִּרְיָה, / צְלִי־קְדֵרָה וּצְלִי־אֵשׁ וְגֶחָלִים, / מְתֻבָּל וּמְפֻלְפָּל וּבָצֹל מְבֻצָּל בִּבְצָלִים, / וּבָרִיתָ אִתִּי לֶחֶם הַלַּיְלָה, / אַתָּה וְכָל־שָׂרֵי הַמַּעֲלָה; / כִּי בְהִצְטַיְּדִי לַדֶּרֶךְ צִוִּיתִי עַל הַפְּרִי הַזֶּה לְקַחְתּוֹ, / וְהָיָה עִם־טַבָּחִי וְעָשָׂהוּ לִמְלַאכְתּוֹ, / וְגַם הִנֵּה הוּא בְּאַמְתַּחְתּוֹ. / אַל־נָא יָשִׁיב אֵפוֹא הַמֶּלֶךְ אֶת־פָּנָי, / וְטָעַמְתָּ הָעֶרֶב הַזֶּה מְעַט מֵעֲדָנָי, / וְהָיָה אִם־תִּכְשַׁר בָּרוּתִי לְפָנֶיךָ – וְהִכְשַׁרְתָּ, / וְאִם־תִּנְעַר מִמֶּנָּה כַּפֶּיךָ – וְנָעָרְתָּ.

וַיֹּאמֵר הַמֶּלֶךְ: כֵּן תַּעֲשֶׂה כַּאֲשֶׁר דִּיבַּרְתָּ.

ה

וַיְהִי בָעֶרֶב בִּשְׁקֹט הֲמוֹן קִרְיָה, / וְהַמֶּלֶךְ וּפַרְתְּמָיו יָשְׁבוּ לֶאֱכֹל אֶת־הַבִּרְיָה, / אֲשֶׁר הֵכִין לִכְבוֹדָם בֶּן־הַמֶּלֶךְ הָאוֹרֵחַ: / גְּדִי מְקֻלָּס וּטְלֵה־חָלָב וְעֹפֶר רַךְ וָמֵחַ, / כֻּלָּם צָלִי מְבֻצָּל וּמְבֻשָּׂם מַעֲשֵׂה רוֹקֵחַ, / מִתְבּוֹסְסִים בְּשֻׁמַּן זָהָב רוֹתֵחַ, / וּפֵרוּרֵי בָצָל דַּקִּים שְׂקוּפִים אֲטוּמִים, / צְרוּבֵי אֵשׁ וַאֲדַמְדַּמִּים־חוּמִים, / זְרוּעִים עַל־הַצָּלִי כְּגַרְגְּרֵי אַלְגֻמִּים / וּמְרַמְּזִים לְיֵצֶר הָאֲכִילָה בְּאֶלֶף עֵינֵי עֲרוּמִים / וְתוֹבְעִים בְּלִי לָשׁוֹן וּדְבַר שְׂפָתַיִם / אֶת־הַחֵךְ וְאֶת־בֵּית־הַבְּלִיעָה וְאֶת־הַשִּׁנַּיִם / וְאֶת־הַקֵּבָה וְאֶת־הַלְּחָיָיִם. / וְכַדֵּי יַיִן וּמִזְרְקֵי עֲסִיסִים / מִגַּפְנֵי אַסְפַּמְיָה וְאַשְׁכְּלוֹת אִיטַלְיָה וְקַפְרִיסִין / עוֹמְדִים עַל־פְּנֵי־הַשֻּׁלְחָן בַּתָּוֶךְ / כְּכֹהֲנִים עַל־דּוּכָנָם בְּבִרְכַּת הַזָּבַח / וּמְשַׂקְּרִים לַבֶּטֶן: בֹּאִי וַאֲרַיָּוֶךְ!

וַיִשְׂאוּ הַקְּרוּאִים אֶת־עֵינֵיהֶם / וַיִּרְאוּ אֶת־הַמּוּשָׂם לִפְנֵיהֶם, / וַיָּבֹא בְּאַפָּם רֵיחַ צְלִי־הַנִּיחוֹחַ, / וַיֹּאחֲזֵם הַבֻּלְמוּס וַיֵּלְכוּ שְׁבִי בְּלִי־כֹחַ, / וְלֹא־מָצְאָה עוֹד בִּטְנָם מָנוֹחַ, / וַיָּעִיטוּ אֶל־הַמַּטְעַמִּים כְּעַיִט אֶל־הַפְּגָרִים / וַיִּקְרָעוּם וַיְשַׁסְּעוּם לַעֲשָׂרָה גְזָרִים, / נַקֵּר בַּמַּזְלֵג וְעָבֹר וָשׁוֹב בֵּין־הַבְּתָרִים, / גָּזֹר עַל־יָמִין וְאָכֹל עַל־שְׂמֹאל, / אֵין־אֹמֶר וְאֵין־דְּבָרִים זוּלָתִי קוֹל: / קוֹל לֶסֶת לוֹעֶסֶת וְקוֹל שֵׁן גּוֹרָסֶת, / קוֹל כּוֹס וְצִנְצֶנֶת נוֹצֶצֶת וּמְכַסְכָּסֶת, / קוֹל מַזְלֵג מְנַקֵּר וְשַׂכִּין קוֹרָצֶת / וְקוֹל שָׂפָה מוֹצֶצֶת וּמִתְמַצְמָצֶת; / כִּי אַכֵן בָּאוּ הַמַּטְעַמִּים כַּשֶּׁמֶן בְּעַצְמוֹתָם / וַיֹּאמְרוּ: לֹא־נָשׁוּב עַל־כַּלּוֹתָם! / וְהַפִּיקוֹת אֲשֶׁר בְּגַרְגְּרוֹתָם – / רָצוֹא וָשׁוֹב, עָלֹה וָרֶדֶת / כִּמְרוּצַת הָעַכְבָּרִים אֲשֶׁר בַּמַּלְכֹּדֶת. / וְלֹא־חָשְׂכוּ נַפְשָׁם מְעָמָל וִיגִיעָה, / וַיַּעֲבִידוּ בְּפֶרֶךְ אֶת־בֵּית־הַבְּלִיעָה, / עַד־אֲשֶׁר־זָרְחוּ פְּנִינֵי זֵעָה עַל־הַקָּרַחַת, / וַיֵּאָנְחוּ מִשֶּׁפַע תַּעֲנוּג וָנַחַת, / וַיִּהיו פֶה אֶחָד וְשָׂפָה אַחַת, / לֵאמֹר: כַּפְתּוֹר וַפֶרַח, כַּפְתּוֹר וַפָרַח! / לֹא־בָא כַבֹּשֶׂם הַזֶּה מִימֵי תָרַח!

וַיַּרְא בֶּן־הַמֶּלֶךְ כִּי־עָרְבָה הַבִּרְיָה, / וַיִּלְבַּשׁ עֹז וּגְבוּרָה כַּשִּׁרְיָה, / וַיְעַר אֶל־פִּיו מִן־הָאָדֹם הָאָדֹם הָאִיטַלְקִי, / וַיִּקְרָא: כּוֹס־יְשׁוּעוֹת לְחַיֵּי אֲדוֹנִי וּמַלְכִּי! / הִנֵּה כִבְּדַנִי הַמֶּלֶךְ נֶגְדָּה־נָּא לְכָל־עָמּוֹ / וַיִּטְעַם מִפְּרִי אַרְצִי וְגַם רָצָה אֶת־טַעְמוֹ, / וְעַתָּה אוּלַי יִתְאַו הַמֶּלֶךְ גַּם לִרְאוֹתוֹ, / בָּצָל חַי וְתָמִים בְּמַלְבּוּשָׁיו כִּהְיוֹתוֹ, / יֵצֵא מִפִּיו דָּבָר וְצִוִּיתִי כְרֶגַע לְהָבִיא / מִן־הָאַמְתַּחַת אֲשֶר בִּמְזָוִי / מְלֹא הַטֶּנֶא מִפְּרִי־זְהָבִי; / כִּי חֵי־נַפְשְׁךָ, מַלְכִּי אָבִי! / אִם־לֹא כְטוּב טַעְמוֹ בַצָּלִי כֵּן נָאוֶה מַרְאֵהוּ, / וְאַתָּה אַךְ־תָּעִיף עֵינֶיךָ בּוֹ – וְתַחְמְדֵהוּ, / וְאִם לִבְּךָ טוֹב אֵלַי וַהֲרֵחוֹתוֹ מִנְחָה / מִיַּד־עַבְדְּךָ וּבִנְךָ, / מִנְחַת זִכָּרוֹן מִזִּמְרַת אַרְצִי וְטוּבָהּ, / וְהָיָה לְךָ לְמַאֲכָל וְזַרְעוֹ לִתְנוּבָה.

וַיֹּאמֶר הַמֶּלֶךְ: יוּבָא.

ו

אָז יְדַלֵּג הָעֶבֶד כְּעֹפֶר הָאַיָּלִים / לְהָבִיא בִדְבַר בֶּן־הַמֶּלֶךְ מִן־הַבְּצָלִים, / וַיָּרֶם מִן־הַצֵּידָה אֲשֶׁר בַּמְּזָוֶה / כָּל־בָּחוּר בַּבְּצָלִים וְכָל־נֶחְמָד וְנָאוֶה, / וַיִּתְּנֵם אֶל־טֶנֶא זָהָב וַיָּבֵא, / וַיִּשְׁטָחֵם עַל־הַמַּרְבַד שָׁטֹחַ / לְרַגְלֵי הַמֶּלֶךְ שַׁי רֵיחַ נִיחוֹחַ.

וְהַמֶּלֶךְ וּפַרְתְּמָיו רָאוּ אֶת־הַבְּצָלִים בִּמְעִילֵי זְהָבָם, / וַיִּשְׁתּוֹמְמוּ עַל־הַמַּרְאֶה וַיָּפָג לְבָבָם, / וַיָּרִימוּ אִישׁ בָּצָל וַיִּתְבּוֹנָנוּ, / וַיֹּאמְרוּ אִישׁ אֶל־אָחִיו: מָן הוּא? / כִּי מֵעוֹלָם לֹא־רָאוּ פְרִי־הָדָר כָּמֹהוּ / וְלֹא־יָדְעוּ מַה־הוּא, / וַיָּנִיעוּ רֹאשׁ וַיִּשְׁרְקוּ וַיִּתְמָהוּ.

וְשָׁם בְּתוֹךְ הַפַּרְתְּמִים יָשִׁישׁ אֶחָד הָיָה, / יָשִׁישׁ מֻמְחֶה וְחַכִּים וּבָקִי בְהַטָּיָה, / בִּטְנוֹ אוֹצָר בָּלוּם וּגְרוֹנוֹ קֶבֶר, / וַיִּקַּח בָּצָל וַיַּהַפְכֵהוּ מֵעֵבֶר אֶל־עֵבֶר, / וַיְמַשְּׁשֵהוּ וַיְמַעֲכֵהוּ כֹּה וָכֹה בְּכַפּוֹ, / וַיְרִיחֵהוּ אַחַת וּשְׁתַּיִם בְּאַפּוֹ, / אַחַת בִּנְחִירוֹ הַיְמָנִית וְאַחַת בִּנְחִירוֹ הַשְׂמָאלִית, / וַיִּבְחָנֵהוּ בְּחִינָה דַקָּה כִּבְחֹן אֶתְרוֹג אוֹ מַרְגָּלִית, / וַיְנַסֵּהוּ נִסָּיוֹן כָּפוּל וּמְשֻׁלָּשׁ, / בִּשְׁנֵי זוּגוֹת מִשְׁקָפַיִם וּבִשְׁפוֹפֶרֶת וּבְאֶגְרוֹף מְפֻלָּשׁ, / וַיְפַצְּלֵהוּ פְּצָלוֹת פְּצָלוֹת, / וַיַּפְשִׁיטֵהוּ אֶת־כָּל־הַשְּׂמָלוֹת, / וְאַחַר לְקָקוֹ בִּקְצֵה־הַלָּשׁוֹן וַיֹּאמֶר בִּזְהִירוּת: / אָכֵן יֶשׁ־בּוֹ מִן־הַמְּרִירוּת שֶׁבַּחֲרִיפוּת וּמִן־הַחֲרִיפוּת שֶׁבַּמְּרִירוּת, / וּמִן־הָרֹךְ שֶׁבַּקְּשִׁי ומִן־הַקְּשִׁי שֶׁבָּרֹךְ, / וּמִן־הַתּוֹךְ שֶׁבַּקְּלִיפָּה וּמִן־הַקְּלִיפָּה שֶׁבַּתּוֹך, / וּמִזְגּוֹ לֹא־קַר וְלֹא־חַם וְלֹא־יָבֵשׁ וְלֹא־לַח, / וְעֵינוֹ אֵינֶנָּה כְּעֵין הַבְּדֹלַח, / וְרֵיחוֹ אֵינֶנוּ כְּרֵיחַ הֵקִּנָּמוֹן, / וְטַעְמוֹ לֹא כְטַעַם הַכַּמּוֹן, / וְיָצָא מִכְּלָל־צְנוֹן וְלֹא־בָא עַד־הָחֲזֶרֶת, / וְלֹא־נִמְצָא זִכְרוֹ בְּפִיטוּם הַקְּטֹרֶת, / וּלְפִי הַשְׁעָרָתִי, הַשְׁעָרַת מֻמְחֶה, / אֵין כָּמֹהוּ סְגֻלָּה יָפָה לְאִצְטוּמְכָא.

וַיֹּאמֶר בֶּן־הַמֶּלֶךְ אֶל־הַמֻּמְחֶה: / יְבָרֶכְךָ אֱלֹהִים בְּשָׁכְבְּךָ וּבְקוּמְךָ! / עַתָּה יָדַעְתִּי כִּי אֵין־כָּמוֹךָ חַכִּים / חוֹקֵר לְכָל־תַּכְלִית וּמֵבִין בְּעִנְיָנִים דַּקִּים, / רְאֵה, כָּל־דְּבָרֵיךָ נְכוֹחִים וּבְרוּרִים / וּמִשְׁפָּטְךָ עַל־הַבְּצָלִים מִשְׁפַּט הָאוּרִים. / כִּמְעַט עֵינְךָ רָאָתַם / וַתָּבֹא עַד־חֵקֶר תְכוּנָתָם, / וַתַּעֲמֹד בִּשְׁתֵי רַגְלַיִם עַל־סוֹדָם, / כִּי לְךָ עֵין לֹא אָדָם, / וּבָרוּךְ שֶׁחָלַק מְחָכְמָתוֹ לְבָשָׂר וָדָם!

ז

וּמֶלֶךְ הָאִי, יְּבָרֵךְ אֱלֹהִים פֹּעַל יָדָיו, / קִבֵּל אֶת־הַמִּנְחָה וַיְצַו עָלֶיהָ אֶת־עֲבָדָיו / לְשִׂימָהּ לְמִשְׁמֶרֶת בְּמִבְחַר הָאֲסָמִים / עִם־צְרוֹרוֹת הַמּוֹר וְרָאשֵׁי הַבְּשָׂמִים. / וּמִמָּחֳרַת הַיּוֹם קָרָא לְשִׁבְעִים חֲכָמָיו הַמְחֻכָּמִים, / וַיֹּאמֶר: אַתֶּם רְאִיתֶם אֱת־הַגְּמוּלָה, / אֲשֶׁר גָּמַל בֶּן־הַמֶּלֶךְ אֶת־אַרְצֵנוּ וּגְבוּלָהּ, / בְּהוֹסִיפוֹ פְרִי עַל־פִּרְיָהּ וּבְהַרְבּוֹתוֹ יְבוּלָהּ, / וְעַתָּה, דְּעוּ וּרְאוּ מַה־יֵּעָשֶׂה לוֹ יְקָר וּגְדֻלָּה, / וְשָׁמְעוּ הָאִיִּים וְיָדְעָה הָאָרֶץ כֻּלָּהּ, / כִּי אֵין־כְּמַלְכְּכֶם נֶאֱמָן לְשָׁלֵּם שְׂכַר פְּעֻלָּה.

וּזְקַן־הַחֲכָמִים, יוֹעֵץ פֶּלֶא כַּאֲחִיתֹפֶל, / מֹחוֹ יוֹרֶה כַחֵץ וְשִׂכְלוֹ בָרָק בְּמוֹ־אֹפֶל, / אֲשֶׁר לוֹ הַבֶּטֶן הַמְלֵאָה וְלוֹ הַקָּרַחַת, / מִהַר וַיַּנַּח אֶצְבַּע עַל־הַפַּדַּחַת, / וּכְהִתְבּוֹנְנוֹ כְמוֹ־רֶגַע וַיִּקְרָא פִתְאֹם בְּשִׂמְחָה:

"יְגַדֶּלְךָ אֱלֹהִים, אֲדוֹנִי הַמֶּלֶךְ, וִירוֹמִמְךָ! / אָנֹכִי טֶרֶם יָגַעְתִּי – וּרְאֵה זֶה מָצָאתִי, / אֵין־זֹאת כִּי אִם־הוֹפִיעַ אֱלֹהִים עַל־עֲצָתִי. / הִנֵּה הוֹאֵל הוֹאִיל בֶּן־הַמֶּלֶךְ הַצָּעִיר, נֵרוֹ יִזְרַח וְיָאִיר / כַּשֶּׁמֶשׁ בְּיוֹם בָּהִיר, / וַיַּגֵּשׁ מִתְּנוּבַת אַרְצוֹ וּמִפְּרִי־גַנּוֹ / פְּרִי הָדָר וְחָדָשׁ מְלֹא־טַנְאוֹ / מִנְחָה לַאדוֹנִי הַמֶּלֶךְ וּמַתָּת – / וּמְנַעְנוּהוּ מִכָּבוֹד וְלֹא־תֵחָשֶׁב־לָנוּ לְחַטָּאת? / כִּי־יָעַצְתִּי: יִשּׁקֶל־נָא לְבֶן־הַמֶּלֶךְ עַל־פִּי־פָּעֳלוֹ / אֲדַרְכְּמוֹנֵי זָהָב מְלֹא־הַטֶּנֶא כְּמִכְסַת פִּרְיוֹ וּמִשְׁקָלוֹ, / וְנָקַל זֹאת בְּעֵינַי – וְנָתַתָּ בְיָדוֹ אִגָּרֶת, / כִּי מְעַתָּה יִקָּרֵא לוֹ שֵׁם־כָּבוֹד וְתִפְאָרֶת, / לֵאמֹר: 'הוֹד רוֹמְמוּתוֹ הָאַלּוּף בַּצְלוּת!' / וְהָיְתָה לוֹ בְּאַרְצוֹ לְעֵדָה וּלְהִתְנַצְּלוּת, / כִּי לֹא־שוֹטֵט לָרִיק וְלֹא־אָכַל לֶחֶם עַצְלוּת; / וּלְךָ תִּהְיֶה צְדָקָה, כִּי לֹא־שִׁלַּחְתָּ אוֹרַחֲךָ רֵיקָם, / אֶת־מְכַבְּדֶיךָ תְּכַבֵּד וְתָשִׁיב שִׁבְעָתַיִם אֶל־חֵיקָם. / זֹאת עֲצָתִי – וְאֱלֹהִים יְצַוֶּה־לְךָ שְׁלוֹמוֹ, / כִּי חָכָם אֲדוֹנִי הַמֶּלֶךְ כִּשְׁלֹמֹה, / וְאָנֹכִי מָה? הֲלֹא רַק פַּרְעֹש בֶּן־יוֹמוֹ, / מְלַחֵךְ עֲפַר נַעֲלֵי מַלְכִּי וְכַרְעֵי הֲדוֹמוֹ, / בָּרוּךְ וּמְבֹרָךְ שֵׁם כְּבוֹד הַמֶּלֶךְ מִמְּקוֹמוֹ."

וַתִּיטַב בְּעֵינֵי הַמֶּלֶךְ הָעֵצָה, / וַיַּעֲשֶׂנָּה בְּלֵב שָׁלֵם וּבְנֶפֶשׁ חֲפֵצָה, / וַיִּתֵּן לְבֶן־הַמֶּלֶךְ אֶת־הַזָּהָב וְאֶת־הָאִגָּרֶת, / וְכָבוֹד גָּדוֹל עָשָׂה לוֹ וְתִפְאָרֶת, / וַיְשַׁלְּחֵהוּ עַד־הַגְּבוּל בְּתֻפִּים וּבִמְחוֹלוֹת, – / וְכָל־הָעָם רוֹאִים אֶת הַקּוֹלוֹת!

ח

וַיְהִי מִקֵּץ כַּךְ וְכַךְ יָמִים וְשָׁעוֹת וּרְגָעִים וְדַקִּים / (כִּי כֵן יִמְנוּ אֶת־עִתּוֹת בְּנֵי־הַמְּלָכִים הָעֲנֻגִּים וְהָרַכִּים / בְּצֵאתָם לְמַסְעֵיהֶם בַּמֶּרְחַקִּים) / וּבְכֵן וַיְהִי מִקֵּץ כַּךְ וְכַךְ עִתִּים לְצֵאתוֹ, / וּבֶן־הַמֶּלֶךְ שָׁב בִּתְרוּעָה לְבֵיתוֹ, / וְהוּא עָמוּס בְּחָכְמָה וּבִתְבוּנָה וּבְכָל־מַסָּה / כְּדֵי־עֶשְׂרִים צִמְדֵי בָקָר לְמַשָּׂא, / וַיַּעַשׂ מִשְׁתֶּה וַיִּקְרָא לִבְנֵי־הַמְּלָכִים מִשּׁכֵנָיו, / וּבְשִׁבְתָּם עַל־גְּבִיעִים מְלֵאִים דַּם־עֵנָב, / סִפֵּר לָהֶם אֶת־כַּל־הַיְקָר אֲשֶׁר רָאוּ עֵינָיו / בְּאִיֵּי הַיָּם וּבְכָל־אַרְצוֹת מַסָּעָיו, / וְאֶת־כָּל־פָּרָשַׁת קוֹרוֹתָיו וּפְגָעָיו, / וְאֶת־כָּל־הַבְּאֵרוֹת אֲשֶׁר מֵהֶן שָׁאַב / מְלֹא דְלָיָיו חָכְמָה, אֲחוֹתוֹ אֲשֶׁר אָהַב, / וְאַחֲרוֹן אַחֲרוֹן – דְּבַר הַבְּצָלִים וְהַזָּהָב.

וּלְמַעַן דַּעַת כָּל־הָאוֹרְחִים הַנֶּחְמָדִים, / כִּי לֹא־מִלֵּא בֶן־הַמֶּלֶךְ פִּיו קָדִים, / וַיְצַו לְהָבִיא אֶת־שַׂק־הָאֲדַרְכְּמוֹנִים אֶל־הָאוּלָם, וַיִּשְׁטָחֵם עַל־הַשּׁלְחָן לְעֵינֵי הַקְּרוּאִים כֻּלָּם / וַיְמַשּׁשׁוּם הַקְּרוּאִים וַיַּאֲזִינוּ לְצִלְצוּלָם, / אַחֲרֵי־כֵן קָרְאוּ וַיִשְׁנוּ אֶת־כְּתָב־הָעֵדוּת, / (וְאִם מֵרֹב סְבֹא, לְשׁוֹנָם הִתְנַהֲלָה קְצָת בִּכְבֵדוּת) / וַיִּרְאוּ כִּי אַכֵן עָשָׂה בֶן־הַמֶּלֶךְ גְדוֹלוֹת, / וַיָּרִיעוּ לְעֻמָּתוֹ בְּקוֹלֵי־קוֹלוֹת: / "יְחִי אַלּוּף בַּצְלוּת, כָּבוֹד וְהוֹד לוֹ! / הַלְלוּהוּ בִגְבוּרוֹתָיו, הַלְלוּהוּ כְּרֹב גָּדְלוֹ!"

וְשָׁם בְּתוֹךְ הַקְּרוּאִים בְּמִשְׁתֵּה הַיַּיִן / בֶּן אַחַד הַמְּלָכִים כָּמֹהוּ כְאַיִן, / כִּמְעַט לֹא־יֵרָאֶה לְעַיִן, / לֹא תֹאַר לוֹ וְלֹא הָדָר, אַבְרֵךְ דַּל וְצָנוּם / אֲבָל לִבּוֹ עֵר וְשִׂכְלוֹ לֹא־יָנוּם, / וּכְשָׁמְעוֹ דְּבַר־הַבְּצָלִים לֹא־מָצָא עוֹד מָנוֹחַ, / כִּי־נִתְקְעוּ הַדְּבָרִים בְּלִבּוֹ כְּמַסְמֵר בַּמֹּחַ, / וּכְכֹל אֲשֶׂר־הָגָה בָם כֵּן הִתְאוֹשֵׁשׁ וַיֹּאמֶר: / הִנֵּה הֵבִיא זֶה בִבְצָלָיו זָהָב כַּחֹמֶר, / וְלָמָּה לֹא־אֶעֱשֶׂה גַּם־אֲנִי כָּמֹהוּ? / הָבָה אֲנַסֶּה דָבָר – אוּלַי אוּכַל עֲשׂהוּ!

וַיַּעַשׂ בַּסֵּתֶר וַיִּשְׁלַח מַלְאָכִים חֶרֶשׁ, לַחְקֹר בְּאִי־הַפְּלָאִים כָּל־דָּבָר עַד־שֹׁרֶשׁ. / וּמִקֵּץ יָמִים רַבִּים אַחֲרֵי הִתְמַהְמְהָם, / שָׁבוּ הַמַּלְאָכִים אֶל־אַרְצָם וְאֶל־עַמָּם, / וּבְפִיהֵם לְבֶן־הַמֶּלֶךְ בְּשֹרַת נִחוּמִים / לֵאמֹר: "בָּאנוּ אֶל־הָאִי – וְהִנֵּה אֵין־בּוֹ שוּמִים!"

וַיִּשְׁמַע בֶּן־הַמֶּלֶךְ וְלֹא הִגִּיד לְאָבִיו וּלְאִמוֹ / וַיֵּצֵא אֶל־הָאִי וּמְתֶי־סוֹדוֹ עִמּוֹ.

ט

וַיְהִי, וַיְהִי, וַיְהִי / כְּבוֹא בֶן־הַמֶּלֶךְ אֶל־הָאִי –

פֹּה יִקְרָא הַקּוֹרֵא אֶת הַכָּתוּב בְּבֶן־הַמֶּלֶךְ הַרִאשׁוֹן, / וְהַמְחַבֵּר, יִצְּרֵהוּ אֵל כְּאִישׁוֹן, / וְיֵט אֵלָיו שָׁלוֹם כִּנְהַר פִּישׁוֹן, / יֵלֶךְ־לוֹ לְפִי־שָׁעָה לִישֹׁן, / כִּי מַה־יִּתְרוֹן בְּמִשְׁנֵה דְבָרִים וּבְכֵפֶל לָשׁוֹן? / סוֹף דָּבָר, גַּם לְבֶן־מֶלֶךְ זֶה, יַאֲרִיךְ אֱלֹהִים שָׁנָיו, / נַעֲשָׂה כַכָּבוֹד אֲשֶׁר־נַעֲשָׂה לְשֶׁלְּפָנָיו, / וַיְקַבְּלוּ אַנְשֵׁי־הָאִי בִּתְרוּעָה גְדוֹלָה אֶת־פָּנָיו, / וּמִשְׁתֶּה עָרְכוּ לוֹ בְּאַרְמוֹן הַמֶּלֶךְ הַנֶּהְדָּר, / הַכֹּל כַּאֲשֶׁר לַכֹּל, דָּבָר לֹא־נֶעְדָּר.

וַיְהִי אַחֲרֵי אָכֹל וְאַחֲרֵי שָׁתֹה, / וּמֶלֶךְ הָאִי וְאוֹרְחוֹ וְכָל־עֲדָתוֹ / יוֹשְׁבִים יַחַד שֶׁבֶת נַחַת בִּמְסִבָּם, / מְשִׂיחִים נְעִימוֹת וּמְטִיבֵים לִבָּם / כְּמִשְׁפַּט הַמְּלָכִים אַחֲרֵי־הַסְּעֻדָּה וּכְדַרְכָּם: / גּוֹמְעִים תְּמַד צוֹנֵן עַל־צַפִּיחִיּוֹת בְּכַרְכֹּם, / מְפַצְּחִים בָּטְנִים וְלוֹעֲסִים גְּרוֹגָרוֹת וְצִימּוּקִים, / וְעוֹד כָּאֵלֶּה זְנֵי מֶרְקָחִים וְתַפְנוּקִים, / וּבְפִיהֶם תְּקוּעִים קְנֵי־מִקְטָרוֹת אֲרֻכִּים, / וַעֲתַר עֲנַן־הַקְּטֹרֶת עוֹלֶה וּמְתַמֵּר, / מִסְתַּלְסֵל בְּהָדָר לְקוֹל מְנַגֵּן וּמְזַמֵּר – / וַיִּשְׁאַל הַמֶּלֶךְ אֶת־אוֹרְחוֹ בְּחֵן וּבִידִידֹת:

"הֶעָרְבוּ לְךָ מַטְעַמֵּי הַמֶּלֶךְ, בֶּן־חֲמֻדוֹת?"

ויַּעַן בֶּן־הַמֶּלֶךְ בְּהִשְׁתַּחֲוָיוֹת וּבְקִדּוֹת:

"יָרוּם כְּבוֹד־הַמֶּלֶךְ עַד־שָׁמַיִם לָרוּם! / כְּלוּם חָסֵר שֻלְחַן הַמֶּלֶךְ מְאוּם? / כֻּלוֹ נָעִים וְעָרֵב אֵין בּוֹ פְּחֶתֶת וָמוּם, / וְאוּלָם לְפִי עֲנִיּוּת דַּעְתִּי הֻמְ... הֻמְ..."

"מָה אָמַרְתָּ?" – שָׁאַל הַמֶּלֶךְ וַיְהִי כְמֵקִיץ פִּתְאֹם מִנּוּם.

וַיַּעַן בֶּן־הַמֶּלֶךְ, וּפָנָיו הִשְׁתַּנּוּ כִּכְרוּם:

"אֲנִי? – לֹא־אָמַרְתִּי כְלוּם! / וְכִי מִי־אֲנִי כִּי־אֲדַבֵּר וְאֶנְאַם נְאֻם? / לֹא־אָמַרְתִּי כִּי־אִם לוּ־הוֹאִיל הַטַּבָּח שׂוּם / בְּתוֹךְ הַצָּלִי הַנִּפְלָא מְעַט שׁוּם, / כִּי עַתָּה נָדַף רֵיחוֹ מְלֹא כָל־הַיְּקוּם..."

וַיִּתְמַהּ הַמֶּלֶךְ: "אֵיךְ אָמַרְתָּ? שׁוּם?"

וְגַם הַשּׂרִים שָׁמְעוּ וְלֹא הֵבִינוּ מְאוּם, / כִּי מְעוֹלָם לֹא־רָאוּ שׁוּמִים וְלֹא יָדְעוּ טַעְמָם, / לֹא שֵׁם לַשּׁוּם וְלֹא זֵכֶר לוֹ בְּאַרְצָם וּבְעַמָּם. / וַיַּרְא בֶּן־הַמֶּלֶךְ, כִּי לַשּׁוְא יַשְׁחִית דְּבָרָיו / בְּאָזְנֵי הַמֶּלֶךְ וּבְאָזְנֵי שָׂרָיו, / וַיָּרֶץ אֶת־עֲבָדָיו אֶל־הַמְּזָוֶה, / וַיָּבִיאוּ מְלֹא־תַרְמִיל מִן־הַבֹּשֶׂם הַנָּאוֶה, / רָאשֵׁי שׁוּמִים נָאִים וּמֻבְחָרִים, / וַיִּשְׁפְּכוּם כְּרִי אֶחָד לִפְנֵי הַמֶּלֶךְ וְהַשּׂרִים.

וְהַמְסֻבִּים מְמַשּׁשִׁים אֶת־הַשּׁוּם וּמִשְׁתָּאִים, / וְקוֹרְאִים: "פִּלְאֵי־פְלָאִים פִּלְאֵי־פְלָאִים! / רְאוּ שׁוֹקוֹ, רְאוּ בִטְנוֹ, רְאוּ זְקָנוֹ וּשְׂפָמוֹ! / בָּרוּךְ שְׁכָּכָה־לּוֹ בְעוֹלָמוֹ!"

וְהַמֶּלֶךְ נָתַן עֵינוֹ בִּגְדָל הַחַרְטֻמִּים, הוּא חֲכַם הָרָזִים וַעֲרוּם־הָעֲרוּמִים, / אֲשֶׁר לוֹ הַחֹטֶם הַמְיֻבָּל, הַמַּצְמִיחַ גַּרְגְּרִים אֲדֻמִּים, / וְכָל־מִשְׁפְּטֵי־פִיו כְּמִשְׁפַּט הָאוּרִים וְהַתֻּמִּים. / וַיָּרֶם הָאַשּׁף תְרוּמָה מִכְּרִי הַשּׁוּמִים, / קֶלַח נָאֶה וּמְשֻׁבָּח מְלֵא זָקָן וָכֶרֶס, / וַיַּנִּיחֵהוּ עַל־פִּסַּת יָדוֹ כְּהַשְׁכֵּב תִּינוֹק בָּעֶרֶשׂ, / וַיִּבְדֹּק אֶת־הַקֶּלַח בָּדֹק וְשָׁנֹה, / מַשְׁמֵשׁ בְּרֹאשׁוֹ וּפַשְׁפֵּשׁ בִּזְקָנוֹ, / וּבָחֹן שִׁבְעָתַיִם יְרֵכוֹ, בִּטְנוֹ וְקָנוֹ; / וַתִּמְעַט בְּעֵינָיו כָּל־הַבְּחִינָה אֲשֶׁר בְּחָנוֹ, / וַיְפָרְדֶנּוּ גַּם־פָּרֵד לִפְרֻדוֹתָיו, / וּבְקַחְתּוֹ צֵלָע אַחַת מִצַּלְעוֹתָיו, / וַיִּקְרַע מְעָלֶיהָ בְּצִפֹּרֶן אֲגֻדָּלוֹ אֶת־גִּלְדָּהּ, / וַיַּפְשִׁיטֶנָּה עֲרֻמָּה כְּיוֹם הִוָּלְדָהּ, / מַחְשׂף הַלָּבָן וְעָרוֹת בְּשָׂרָהּ, / וַתִּגָּל הַצֵּלָע בְּכָל־זָהֳרָהּ, / יְחִידָה, תַּמָּה, נְקִיָּה וּבָרָה, / וְעֵינָהּ כְּעֵין הַפְּנִינָה הַיְקָרָה, / אוֹ כַשֵׁן הַתְּמִימָה בְּשִׂפְתֵי הָעֵז וְהַפָּרָה; / וַיְהִי אַךְ־עָלָה רֵיחַ נִיחוֹחָהּ בְּאַף הָאַשּׁף, / וַיְבַהֵל זֶה לִנְחִירָיו שַׁחַק טַבַּק וַיִּשְׁאָף, / מָנָה יָפָה, מָנָה אַחַת אַפָּיִם, / מִזֶּה וּמִזֶּה, מְלֹא שְׁתֵּי־הַנְּחִירָיִם, / וַיִּתְעַטֵשׁ וַתָּאֹרְנָה עֵינָיו וַיֹּאמֶר לֵאמֹר:

"הַנּוֹתֵן תְּשׁוּעָה לַמְּלָכִים הוּא יִשְׁמֹר / אֶת־אֲדוֹנִי וּמַלְכִּי וִינַשּׂאֵהוּ כְּהַר־הַמּוֹר, / וְהָיָה רֵיחוֹ כַלְּבָנוֹן וּכְמָר־דְרוֹר, / וּמִי אֲנִי, חֲמוֹר בֶּן־חֲמוֹר, / רֻם זֻלּוּת וְשַׁבְּלוּל תֶּמֶס יֵלֶךְ, / כִּי־אָבֹא לָדוּן לִפְנֵי הַמֶּלֶךְ? / וְאוּלָם אַחֲרֵי דַקּוּת הָעִיוּן וְהַבְּחִינָה, / רְאֵה זֶה הֶעֱלֵיתִי בִּמְצוּדַת הַבִּינָה, / כִּי הַפְּרִי הַמְיֻחָשׂ הַזֶּה, עַל־פִּי סִמָּנִים לָרֹב, / אָח קָטֹן הוּא לַבָּצָל אוֹ שְׁאֵרוֹ הַקָּרוֹב, כִּי כֵן יִלְבַּשׁ גַּם־הַפְּרִי הַזֶּה מְעִילִים, / כְּמִשְׁפַּט הַבָּצָל, בֶּן־הַמְּלָכִים וְהָאֲצִילִים: / וְאִם הִמְעִיט־לוֹ אֱלֹהִים מֵאָחִיו הַבְּכוֹר בְּגָדִים וּגְלָדִים, / הֶעְדִּיפוֹ עָלָיו בְּיֶתֶר הַסְּגֻלּוֹת וְהַחֲסָדִים; / כִּי תַחַת הַקְּלִפּוֹת הִרְבָּה לוֹ "תּוֹךְ" / וַיִּתֵּן לִלְבָבוֹ צַחְצָחוּת וָזֹךְ, / וְהוֹד וְהָדָר שִׁוָּה עָלָיו, / בְּתִתּוֹ לוֹ בָּשָׂר צַח כְּחָלָב, / וַיַּעַטְרֵהוּ לְתִפְאֶרֶת בְּלֹרִית וּזְקַנְקַן; / וְאִם לֹא הָדוּר הוּא בִלְבוּשָׁיו – אַל־תִּסְתַּכֵּל בַּקַּנְקַן; / הָאָדָם יִרְאֶה לָעֵינַיִם – לֹא כֵן אֱלֹהִים: / יֵשׁ מְלֻכְלָךְ מִבְּחוּץ וְנָאֶה מִבִּפְנִים; / גַּם־אֲנִי חָטְמִי יַגֶּד־לִי, וְהוּא מְנֻסֶּה וּבָקִי, / כִּי חָרִיף זֶה הַקָּטֹן מֵאָחִיו הַגֵּא וְהַנָּקִי. / סוֹף דָּבָר, שְׁנֵי אַחִים הֵם גַּם בִּפְרִידָתָם, / וְאִם לֹא רְאִי זֶה כִּרְאִי זֶה – אַחַת דָּתָם, / הַצַּד הַשּׁוֶה בִּשְנֵיהֶם – צַחֲנָתָם, / אֶת אֲשֶׁר־בָּחַנְתִּי וְחָקַרְתִּי וְלָמַדְתִּי, / אוֹתָהּ מְאֲדוֹנִי הַמֶּלֶךְ לֹא־כִחַדְתִּי, / וַאֲנִי כַּאֲשֶׁר עָבַדְתִּי אֶת־מַלְכִּי בֶאֱמוּנָה עָבָדְתִּי."

י

וּדְבַר־הַמֶּלֶךְ נַעֲשָׂה מְהֵרָה, / וַיָּכִינוּ לְמָחָר אֶת־הַכֵּרָה, / וַיְנַסּוּ אֶת־הַשּׁוּם בִּצְלִי־הַקְּדֵרָה, / וְהִנֵּה אֱמֶת נָכוֹן דְּבַר בֶּן־הַמֶּלֶךְ הָאוֹרֵחַ: / לֹא־בָא כַבֹּשֶׂם הַזֶּה לְטַעַם וּלְרֵיחַ, / וּבֶאֱכֹל הַמֶּלֶךְ מִן־הַצָּלִי הַמְתֻבָּל בְּשׁוּמִים, / וַתִּפְרַחְנָה עַצְמוֹתָיו, וַיְהִי כְאִילוּ מָלְאוּ עֲלוּמִים, / וְגַם גַּרְגְּרֵי־הַשנִי בְּאַף גְּדָל־הַחַרְטֻמִּים, / צָהֲלוּ מִדֶּשֶׁן וַיִּהְיוּ אֲדֻמִּים אֲדֻמִּים / וְעֵינָם כְּעֵין־אֶשְׁכֹּל הָאַלְגֻּמִּים / (וּכְבָר בְּדִבְרֵי חַכְמֵי קְדוּמִים / בִּכְתָב־אֱמֶת מְפֹרָשׁ רָשׁוּם: / עֲשָׂרָה דְבָרִים נֶאֶמְרוּ בַשּׁוּם: מַצְהִיל הַפָּנִים וּמֵאִיר הָעֵינָיִם / וְהוֹרֵג אֶת־הַכִּינִּים בִּבְנֵי־מֵעָיִם, / וְגוֹמֵר וְגוֹמֵר וְגוֹמֵר אַחַת לְאַחַת, / עַיֵּן בְּדִבְרֵיהֶם וְתִמְצָא נָחַת).

וְלֹא אֵחַר הַמֶּלֶךְ מַעֲשֵׂהוּ גַּם־הַפָּעַם, / וְכָל־שָׂרָיו וְיוֹעֲצָיו שִׁבְעִים זְקֵנִים מְשִׁיבֵי טַעַם / נִכְנְסוּ בִדְבַר־מֶלֶךְ בּוֹ בַלַּיְלָה / לִישִׁיבָה גְדוֹלָה, לִישִׁיבָה שֶל־מַעְלָה, / לְהִוָּעֵץ מַה־יְּקָר וּגְדֻלָּה וְשִׁילּוּמִים / יִנָּתְנוּ לְבֶן־הַמֶּלֶךְ אִישׁ־הַשּׁוּמִים, / חֵלֶף הַפְּרִי הַנִּפְלָא אֲשֶׁר הֵבִיא בִגְבוּלָם, / לְבָרֵךְ־בּוֹ אַדְמָתָם וּלְהַעֲשִׁיר יְבוּלָם, / וְיָדְעוּ הָעַמִּים וְהַלְּשׁוֹנוֹת כֻּלָּם, / כִּי פֹעַל אָדָם – יְשֻׁלָּם.

וַיֵּשְׁבוּ הַזְּקֵנִים שֶׁבֶת דּוֹגֶרֶת עַל־בֵּיצָה, / וַיַּעֲמִיקוּ חֵקֶר וַיְבַקְשׁוּ עֵצָה, / וַיַּחֲלִיקוּ זָקָן מְהֻדָּר וּמְגֻדָּל, / וַיִּקְמְטוּ מֵצַח וַיַּחְתְּרוּ בָאֲגֻדָּל, / לָדַעַת מַה־דְּבַר־הַסְּגֻלָּה מִכָּל־סְגֻלָּה, / הָרָאוּי לְבֶן־הַמֶּלֶךְ לִהְיוֹת לוֹ גְמוּלָה, / וַאֲשֶׁר בְּלִי־צֵל־סָפֵק וּסְפֶק־סָפֵק / חֵפֶץ לִבּוֹ יַשְׁלִים וּרְצוֹנוֹ יָפֵק, / וַאֲשֶׁר יָאְדִּיר גַּם־כְּבוֹד־הַמֶּלֶךְ וְהָעָם / מִנָּהָר וְעַד־נָהָר וּמִיָּם וְעַד־יָם.

עוֹד הַזְּקֵנִים אוֹבְדֵי עֵצוֹת וְעֶשְׁתּוֹנוֹת, / וּזְקַן הַחַרְטֻמִּים הִתְעוֹרֵר כְּמֵקִיץ מִשְּׁנוֹת, / וַיֹּאמֵר: רַבּוֹתַי, מָה הַהִתְעַשּׁתוּת וּמָה הַשְּׁטוּת? / וּמָה הָעֶשְׁתּוֹנוֹת וּמָה הָעַשְׁתּוּת? / הַדָּבָר פָּשׁוּט בְּתַכְלִית הַפַּשְׁטוּת! / הִנֵה אִתָּנוּ פֹּה בָאִי דְּבַר־סְגֻלָּה, / אֵין־כָּמֹהוּ לִיקָר בְּתֵבֵל כֻּלָּה, – / הָבָה, נְשִׁיבֶנוּ מִנְחָה חֵלֶף הַשּׁוּם וְנִנָּצֵל! / הֲטֶרֶם תֵּדְעוּ מַה־הוּא? –

הֲלֹא הוּא הַבָּצָל!

הַדָּבָר יָצָא מִפִּי הַחַרְטֹם – וְהַזְּקֵנִים כַּף מוֹחֲאִים: / שְׂפָתַיִם יִשַּׁק מֵשִׁיב דְּבָרִים נְכֹחִים!

יא

וַיְהִי בַיּוֹם הַשּׁלִישִׁי וַיֶּהֶמוּ הַפַּעֲמוֹנִים, / וְכָל־אַנְשֵׁי־הָאִי הֲמוֹנִים הֲמוֹנִים, / מִתּוֹמֵךְ הַמַּטְאֲטֵא וְעַד־תּוֹמֵךְ הַפֶּלֶךְ, / נִדְחֲפוּ הַחוּצָה בִּדְבַר שַׂר חֲצִי־הַפֶּלֶךְ, / לַעֲשׂוֹת כָּבוֹד וִיקָר לְבֶן־הַמֶּלֶךְ / וּלְשַׁלְּחוֹ מִן־הָאִי, עֵקֶב כָּל־הַגְּדוֹלוֹת, / בְּרַעַם תֻּפִּים וּבְסַעֲרַת מְחוֹלוֹת. / וַתַּעֲבֹר הָעֲבָרָה, וְכָל־הַקִּרְיָה הוֹמָה: / הָעָם מִזֶּה וּמִזֶּה נֶעֱרַם כְּחוֹמָה, / וּבֶן־הַמֶּלֶךְ – לְפָנָיו תִּשְׁתַּחֲוֶה כָל־קוֹמָה – / רוֹכֵב בַּתָּוֶךְ עַל־אֲתוֹנוֹ הַצְּחוֹרָה רוֹמָה, / וּמִסָּבִיב לוֹ שִׁבְעִים פַּחוֹת וּסְגָנִים / רוֹכְבִים עַל־שִׁבְעִים רְכָשִׁים וַאֲחַשְׁתְּרָנִים, / וּבְרֹאשׁ הַתַּהֲלוּכָה בִכְרָה נָאוָה וְקַלָּה / צוֹעֶדֶת מַעֲדַנּוֹת מְקֻשּׁטֶת כְּכַלָּה, / מוּבֶלֶת לְאִטָּהּ, נְהוּגָה בְאַפְסָר / בְּיַד־אֲחַשְׁדַּרְפָּן אוֹ בְיַד־טַפְסָר, / נוֹשֵׂאת בְּהָדָר מַשְׂאַת הַסְּגֻלָּה, מִנְחַת הַמֶּלֶךְ לַחֲתַן־הַכָּבוֹד וְהַגְּדֻלָּה: / אַמְתַּחַת מֶשִׁי יְקָרָה בַּהֲדָרָהּ כְּלוּלָה, / רְקוּמָה זָהָב וּמְלֵאָה בְצָלִים כֻּלָּהּ, / מִדָּה כְּנֶגֶד מִדָּה, אֵיפָה שְׁלֵמָה וּשְׁקוּלָה; / וּמְגִלַּת־קְלָף, הִיא אִגֶּרֶת הַתְּעוּדָה, / חֲתוּמָה בְּטַבַּעַת הַמֶּלֶךְ וּבְאוֹתִיּוֹת זָהָב רְפוּדָה, / אֶל־הַאַמְתַּחַת בִּפְתִיל תְּכֵלֶת צְמוּדָה, / וְעָלֶיהָ בִּכְתָב אָמָּן מְזֻיָּן וּמְתֻיָּג רָשׁוּם: / אוֹת־כָּבוֹד וִיקָר לְאַלּוּף שׁוּם! – / וְהַכָּרוֹזִים עוֹבְרִים בָּעָם עָבֹר וְקָרוֹא: / כָּכָה יֵעָשֶׂה לָאִיש אֲשֶׁר הַמֶּלֶךְ חָפֵץ בִּיקָרוֹ! / וְכָל־הָעָם מִקְּטַנָּם וְעַד־גְּדוֹלָם / מְרִיעִים לְעֻמַּת בֶּן־הַמֶּלֶךְ בְּקוֹלָם: / "יְחִי בֶן־הַמֶּלֶךְ אַלּוּף־שׁוּם לְעוֹלָם! / צֵאתְךָ לְחַיִּים טוֹבִים וּלְשָׁלוֹם!" – / וְהַפַּעֲמוֹנִים עוֹדָם הוֹמִים הָמֹה וְהָלֹם, / וּמֵרָאשֵׁי הַמִּגְדָּלִים מְנַפְנְפִים הַדְּגָלִים, / וּגְבִירוֹת מֵרָאשֵׁי טִירוֹת מַמְטִירוֹת בְּצָלִים, / וּבְרֹאשָׁן כְּלִילֵי־פְאֵר: מִקְלְעוֹת בְּצַלְצַלִים, – / וְהַתֻּפִּים מַרְעִימִים וְהַצֶּלְצְלִים מְצַלְצְלִים.

יב

וּבֶן־הַמֶּלֶךְ שָׁב אֶל־בֵּיתוֹ – וּבְיָדוֹ טוּבוֹ, / וְלֹא־יָדַע אִישׁ בְּצֵאתוֹ וּבְשׁוּבוֹ, / כִּי מֵאָז שָׁב מִדַּרְכּוֹ שַׂךְ בַּעֲדוֹ, / וַיִּלְבַּשׁ דְּמָמָה וָעֹצֶב כְּמַדּוֹ, / וְלֹא־גִלָּה לְאִישׁ בָּעוֹלָם סוֹדוֹ, / זוּלָתִי לְכוֹתֵב הַדְּבָרִים הָאֵלֶּה לְבַדּוֹ.

(1928)